Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 5 2017

 TIRU MA HAPORSEAON NI NASIDA | SI SARAH

Ina ni Angka Raja

Ina ni Angka Raja

DIPASO si Sarah ma satongkin ulaonna jala diida ma dompak langit. Dung dilehon ibana tudutudu, rap karejo ma sude hatobanna di bagasan las ni roha. Ringgas do si Sarah mangulahon ulaonna. Rimangi ma, didampol dagingna ala nunga loja ibana padengganhon tenda na maribak naung dipangke nasida. Tenda na dibahen sian kulit ni hambing i, nunga lam tipis ala jotjot hona mata ni ari dohot udan. Gabe taringot ma si Sarah, nunga godang luat na diingani nasida saleleng on. Dungkon botari, holom ma langit. Tarpaima do ibana diharoro ni si Abraham * naung borhat tingki manogot. Dung tarida tungganedolina i ro sian dolok, mengkel suping ma ibana, gabe lam tamba ma uli ni rupana.

Nunga salpu sampulu taon dung ditaripari si Abraham dohot keluargana Sunge Euprat jala borhat tu Kanaan. Rade do si Sarah mangihuthon tungganedolina borhat tu luat na so diboto dope. Diboto si Sarah, marhite si Abraham do Jahowa laho pasauthon sangkapNa, i ma asa sian ibana ro pinompar na dihalomohon Debata jala gabe sada bangso. Aha ma na boi diulahon si Sarah? Ndang boi marianakhon jala nunga marumur 75 taon ibana tingki i. Ra, sungkunsungkun do rohana, ’Songon dia ma Jahowa boi manggohi janjiNa, hape ahu do tungganeboru ni si Abraham?’ Boi do dapot rohanta boasa holsoan ibana jala ndang sabar taringot tu sangkap ni Debata i.

Sipata, boi do gabe sungkunsungkun rohanta taringot tu janji ni Debata. Boi do hita gabe ndang sabar, tarlumobi tingki paimahon asa digohi pangkirimon na tahalomohon. Aha do na taparsiajari sian haporseaon ni borua na burju on?

”DISUNDATI JAHOWA DO AHU”

Nunga mulak keluarga i sian Misir. (1 Musa 13:1-4) Dipajongjong nasida ma tenda di luat na timbo dompak timur ni Betel, jala digoari halak Kanaan ma i Lus. Sian i, boi ma diida si Sarah bolak ni tano na dijanjihon i. Disi ma tano Kanaan dohot angka dalan tu pigapiga luat na dao. Sian sude na niidana, ndang adong na dos songon huta hatubuanna. Magodang di Ur do ibana, i ma sada kota di Mesopotamia, na daona 1.900 kilometer sian inganan i. Disi do tading angka keluargana, artana, dohot jabu naung denggan dipajongjong jala nunga adong saluran aek! Alai nang pe songon i, ndang sai tu hutana i laho rohana jala naeng mulak tusi.

Taingot ma na disurat apostel Paulus hirahira 2.000 taon naung salpu, na manaringoti haporseaon ni si Sarah dohot si Abraham, ”Aut diingot rohanasida tano naung tinadingkonnasida i, sanga do nasida mulak tusi.” (Heber 11:8, 11, 15) Ndang sai dipaingotingot si Sarah dohot si Abraham sude naung tinadingkon ni nasida. Molo holan i do na sai dipingkiri nasida, ra gabe dipillit do mulak tu Ur. Molo mulak nasida tusi, ndang dapotnasida be hak na sumurung naung pinarade  ni Jahowa. Jala, ndang adong na mananda nasida gabe sitiruon taringot tu haporseaon.

Sai tongtong do ibana manatap tu ari na naeng ro. Diurupi ibana do tungganedolina nang pe ingkon marpindapinda, mambongkar tenda, mamboan angka pahanpahanan, jala pajongjongkon tenda muse. Togu do ibana nang pe mangadopi godang parungkilon dohot angka na muba. Dipaboa Jahowa ma muse janjiNa tu si Abraham, alai ndang adong dipaboa taringot tu si Sarah!​—1 Musa 13:14-17; 15:5-7.

Dihilala si Sarah, on ma tingkina laho paboahon tu si Abraham taringot tu sangkap ni rohana. Tarimangi ma songon dia pangkilalaan ni si Sarah tingki didok, ”Nunga disundati Jahowa ahu mangintubu.” Dung i, dipangido ma tu tungganedolina asa dibuat si Hagar gabe tungganeboruna, asa adong ianakhonnasida. Boi do dirimangi hamu songon dia pangkilalaan ni si Sarah tingki dipangido i tu tungganedolina? Hira na so masuk di angkal do pangidoanna i molo di tingkinta saonari. Alai, somal do di tingki i sahalak baoa naung marhasohotan mambuat borua na asing muse gabe tungganeboruna, asa adong ianakhonna. * Na dirimpu si Sarah do marhite cara on ma Debata manggohi sangkapNa asa parohon sada bangso na dipasupasu marhite si Abraham? Manang aha pe na ro tu roha ni si Sarah, rade do ibana nang pe ingkon marungkil di joloan ni ari. Songon dia pandapot ni si Abraham? Didok di Bibel, dioloi si Abraham ma na nidok ni si Sarah.​—1 Musa 16:1-3.

Debata do na mangonjar roha ni si Sarah asa mamillit songon i? Ndang. Sian pangidoanna i tarida ma, pamingkirion ni jolma do i. Dirimpu si Sarah, naung ditontuhon Debata do i asa masa tu ibana, jala didok rohana ndang adong be cara na asing na dumenggan sian i. Hape, na binahenna i gabe parohon parungkilon dohot hansit ni roha. Nang pe songon i, pangidoanna i patuduhon ndang mangkaringkothon dirina sandiri ibana. Saonari on, godang do halak na holan mangkaringkothon dirina sandiri, alani i denggan situtu do sitiruon na binahen ni si Sarah. Molo tapatujolohon do sangkap ni Debata sian na ringkot di hita, na maniru haporseaon ni si Sarah do hita disi.

”TUTU DO NIAN, MENGKEL DO HO”

Ndang sadia leleng dungkon i, gabegabean ma si Hagar. Ra, didok rohana, rumingkotan ma ibana sian si Sarah. Gabe ndang diparsangapi ibana be si Sarah. Hansit situtu do roha ni si Sarah! Dipaloas si Abraham dohot Debata do si Sarah  mambahen na hansit tu si Hagar. Tubu ma ianakhon ni si Hagar, i ma si Ismael, jala lam magodang ma ibana. (1 Musa 16:4-9, 16) Dung marumur 89 taon si Sarah jala si Abraham marumur 99 taon, adong ma muse barita sian Jahowa. Songgot do roha ni nasida mambege barita i!

Marjanji do muse Jahowa tu si Abraham, asa marganda pinomparna. Diganti Debata do goarna. Tingki i, ditanda do ibana margoar si Abram. Alai, dibahen Jahowa ma gabe Abraham, lapatanna ”ompu ni torop angka bangso”. Jala, on ma parjolo sahali dipaboa Jahowa sangkapNa taringot tu si Sarah. Diganti Debata ma goar ni si Sarai, ra lapatanna ”Parbada”, gabe si Sarah, songon naung jotjot tabege. Aha do lapatan ni goarna i? ”Boru ni raja”! Dipatorang Jahowa ma boasa goar i na dipillit, ”Pasupasuonku do ibana jala lehononku di ho sada anak tinubuhonna. Pasupasuonku do ibana, jala gabe ina ni angka bangso ibana, jala adong do gabe angka raja sian pinomparna i.”​—1 Musa 17:5, 15, 16, Bibel siganup ari.

Marjanji do Jahowa asa sian anak ni si Sarah ro pinompar na parohon pasupasu tu sude bangso! Didok Debata ma asa dibahen goarna, si Isak, lapatanna ”Siparengkelon”. Dung diboto si Abraham sangkap ni Jahowa, i ma laho mamasumasu si Sarah asa marianakhon, ”manungkap ma si Abraham jala mengkel”. (1 Musa 17:17) Las situtu ma rohana alani i. (Rom 4:19, 20) Songon dia si Sarah?

Ndang sadia leleng, adong ma tolu halak baoa na so ditanda ro tu tenda ni si Abraham. Nang pe las ari tingki i, pintor dijangkon nasida do baoa na tolu i. Didok si Abraham ma tu si Sarah, ”Hatop, buat ma tolu solup itak na dumenggan, baen ma i gabe roti.” Godang do na diparade nasida ala lomo do rohanasida manamue. Ndang holan tungganeboruna na disuru laho paradehon i sude; alai pintor laho do si Abraham mambuat lombu asa seatonna, jala paradeonna do muse godang sipanganon dohot siinumon. (1 Musa 18:1-8, Bibel siganup ari) Surusuruan ni Jahowa do hape angka baoa i! Ra, cerita on do na diingot si Paulus tingki manurat ayat na mandok, ”Unang halanggushon hamu partamueon; ai marhite sian i hea do ditamuei halak angka surusuruan, so pamotoanna.” (Heber 13:2) Boi do ditiru hamu burju ni roha ni si Abraham dohot si Sarah?

Lomo do roha ni si Sarah manamue

Tingki sada sian surusuruan i manaringoti janji ni Debata tu si Abraham na laho marianakhon ma si Sarah, ditangihon si Sarah do i sian bagas tenda. Songgot do rohana mambege na boi do ibana marianakhon, alani i mengkel ma ibana di bagasan rohana huhut didok, ”Nunga tung matua ahu saonari, boi dope hape ahu maranakhon?” Dipasingot surusuruan i ma si Sarah marhite sungkunsungkun, ”Ai adong na so tarpatupa Jahowa?” Gabe mabiar ma si Sarah jala didok, ”Ndang na mengkel ahu.” Didok surusuruan i ma, ”Tutu do nian, mengkel do ho.”​—1 Musa 18:9-15, Bibel siganup ari.

Na gale do haporseaon ni si Sarah umbahen na mengkel ibana? Ndang songon i. Bibel mandok, ”Laos hinorhon ni haporseaon do dijangkon si Sara gogo manubuhon pomparan maralohon timbo ni umurna, ala haposan di rohana na marbagabagahonsa.” (Heber 11:11) Tangkas do ditanda si Sarah songon dia Jahowa; pos do rohana na laho saut do sude janjiNa. Sude do hita mangkaporluhon haporseaon na togu songon si Sarah. Denggan do molo tatanda Debata na disurat di Bibel. Molo taulahon i, taboto ma sintong do haporseaon na pinatudu ni si Sarah. Tongtong do Jahowa marsihohot tu sude janjiNa. Sipata, dipangke Ibana do cara na palongang roha, mambahen songgot roha manang mambahen hita gabe mengkel!

’TANGIHON MA SUDE NA NIDOKNA’

Dipasupasu Jahowa do si Sarah alani haporseaonna

Tingki marumur 90 taon, digohi ma na pinaimaima ni si Sarah! Ditubuhon ma sada anak di si Abraham, na di tingki i marumur 100 taon. Songon naung dipaboa Debata, digoari si Abraham ma anakna i si Isak manang ”Siparengkelon”. Boi ma tarimangi songon dia si Sarah naung gale alai mengkel suping huhut didok, ”Siparengkelon do dibahen Debata tu ahu; nasa na umbegesa parengkelanna do ahu.” (1 Musa 21:6) On ma silehonlehon ni Jahowa na umbalga di ngoluna. Alai, ingkon rade do ibana mangulahon tanggung jawab na balga.

 Tingki marumur lima taon si Isak, dibahen ma pesta sirang susu. Alai masa ma na so denggan. Diida si Sarah ma si Ismael na marumur 19 taon, jotjot mangarehei si Isak. Ra, ndang holan na diparengkelengkeli si Isak. Hea do didok apostel Paulus taringot tu parange ni si Ismael, i ma si penganiaya. Dihilala si Sarah, sada parsoalan na serius do on. Diboto si Sarah, ringkot do si Isak, ala marhite ibana do digohi sangkap ni Debata. Jadi, barani ma ibana paboahon i sude tu si Abraham. Dipangido ma asa dipalao si Hagar dohot si Ismael.​—1 Musa 21:8-10; Galatia 4:22, 23, 29.

Songon dia do pangkilalaan ni si Abraham? Didok di Bibel, ”Sogo situtu do roha ni si Abraham di hata i, ala ni anakna i.” Mansai holong do rohana tu si Ismael, ala ibana do anakna na parjolo. Alai, Jahowa do na tangkas mamboto sasude, alani i diurupi Jahowa ma nasida pasaehon parsoalan i. Didok di Bibel, ”Alai ninna Debata ma tu si Abraham: Unang sogo roham taringot tu dakdanak i dohot taringot tu hatobanmu; tangihon ma sude na nidok ni soara ni si Sarah tu ho, ai marhitehite si Isak do targoar di ho pinompar.” Dipapos Jahowa ma roha ni si Abraham, tongtong do sarihononNa si Hagar dohot si Ismael. Porsea jala dioloi si Abraham do i.​—1 Musa 21:11-14.

Si Sarah do tungganeboru na denggan di si Abraham. Ndang holan angka na denggan na dipaboa tu tungganedolina. Tingki diida adong parsoalan na laho masa tu keluargana jala mangkorhon di ari na naeng ro, tangkas do i dipaboa tu tungganedolina. Ndang sala na diulahonna i, jala ndang na patuduhon na so diparsangapi tungganedolina. Apostel Petrus, naung marhasohotan mandok, si Sarah ma na gabe sitiruon tu angka tungganeboru asa unduk maradophon tungganedolina. (1 Korint 9:5; 1 Petrus 3:5, 6) Sasintongna, molo ndang dipaboa si Sarah parsoalan on, patuduhon na so unduk do ibana tu tungganedolina, jala balga do pangkorhon ni i tu si Abraham dohot tu saluhut keluargana. Lambok do si Sarah mangkatai tingki paboahon parsoalan i tu si Abraham.

Godang do angka tungganeboru na mambahen si Sarah gabe sitiruon di nasida. Sian si Sarah do nasida marsiajar songon dia asa unduk jala patuduhon sangap tu tungganedoli ni nasida. Adong do pigapiga na mangkirim asa nasida diurupi Jahowa, songon na binahenNa tu si Sarah. Diparsiajari nasida do songon dia si Sarah boi patuduhon haporseaon, holong, dohot hasabaron.

 

Nang pe digoari Jahowa ibana ”Boru ni raja”, alai ndang na gabe ginjang rohana manang dipangido asa dibahen tu ibana songon keluarga ni raja. I do alana, tingki marujung ngolu ibana dung marumur 127 taon, ’mangandungi ma si Abraham jala ditatangisi’ si Sarah. * (1 Musa 23:1, 2) Mansai lungun do rohana ala ndang adong be ”Boru ni raja” na hinaholonganna i. Tontu sihol do roha ni Debata Jahowa laho pahehehon si Sarah di paradeiso di tano on. Denggan ma parngoluon na laho lehononNa tu si Sarah dohot tu sude halak na maniru haporseaonna di ari na naeng ro.​—Johannes 5:28, 29.

^ par. 3 Sasintongna, najolo si Abram dohot si Sarai do goar ni nasida. Alai, asa mura taboto, tapangke ma goar na ditanda gumodang halak.

^ par. 10 Tingki i, diloas Jahowa dope angka baoa marhasohotan tu lobi sian sada borua, alai di pudian ni ari dipatangkas Jesus ma muse, asa mangihuthon uhum na parjolo sahali dibahen tingki di porlak Eden, i ma marhasohotan tu sada baoa manang tu sada borua.​—1 Musa 2:24; Mateus 19:3-9.

^ par. 25 Di Bibel, holan si Sarah do borua na dipaboa sadia umurna tingki marujung ngolu.