Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Rap marbarita dohot si Tabitha, tungganeborungku

 BIBEL MAMBAHEN DENGGAN NGOLUNGKU

Ndang Porsea Ahu Adong Debata

Ndang Porsea Ahu Adong Debata
  • TUBU TAON: 1974

  • NEGARA ASAL: REPUBLIK DEMOKRATIK JERMAN

  • RIWAYAT HIDUP: NDANG PORSEA ADONG DEBATA (ATEISME)

NGOLUNGKU DI UJU I

Ahu tubu di huta Saxony, di Republik Demokratik Jerman (RDJ). Togu do holong di keluarganami jala tongtong do diajarhon natuatuangku angka na denggan taringot tu moral. Negara komunis do RDJ on, alani i godang do halak di Saxony na so mangkaringkothon agama. Jala ndang porsea ahu adong Debata. Ateis dohot komunis do ahu sahat tu na marumur 18 taon.

Boasa lomo rohangku tu komunisme? Ala lomo do rohangku tu hata na mandok dos do sude halak. Jala porsea do ahu, molo dos do dibahen tu ganup halak, ndang adong be na gabe pamorahu manang papogoshu. Jadi, huihuthon ma organisasi pemuda Komunis. Tingki marumur 14 taon, dohot ma ahu karejo di proyek lingkungan laho mandaur ulang angka harotas. Diargai pamarenta dohot angka halak di Aue do sude ulaonku, jala dapothu do silehonlehon sian nasida. Nang pe poso dope ahu, nunga hutanda pigapiga parpolitik di RDJ. Huhilala, sintong do na hupillit on, jala denggan ma annon parngoluonku di ari na naeng ro.

Alai, muba ma sude. Taon 1989, dirumpakhon ma Tembok Berlin jala ndang adong be kelompok Komunis di Eropa Timur. Gabe mangkorhon do i tu na asing. Huparrohahon, ndang denggan be uhum di RDJ. Umpamana, dipatujolohon do angka na mangihuthon Komunisme sian na so mangihuthon. Boasa boi songon i, hape saleleng on angka halak Komunis porsea na dos do sude halak? Holan hata do Komunisme i? Gabe holsoan ma ahu.

Gabe mangkaringkothon musik dohot melukis ma ahu. Di akademi musik ma ahu singkola jala naeng kuliah muse, asa boi gabe musisi manang seniman. Gabe mago do sude angka poda na denggan na nilehon ni natuatuangku najolo. Marsonangsonang jala marhalleti ma ahu. Nang pe songon i, tongtong do mabiar ahu, jala tarida do i sian gombar na hulukis. Aha ma na laho masa di ari na naeng ro? Aha do na tinuju ni ngolu on?

Tingki huboto alus ni sungkunsungkun i, songgot do rohangku. Tingki botari di singkola, hundul ma ahu rap dohot kelompok parsiajar na mangulas taringot tu ari na naeng ro.  Si Diana *, na dohot di kelompok i sahalak Sitindangi Ni Jahowa. Dipaboa ibana ma tu ahu tudutudu na denggan. Didok ibana ma, ”Andreas, molo olo ho mandapot alus ni sungkunsungkun taringot tu hangoluan dohot ari na naeng ro, lului ma alusna di Bibel.”

Sasintongna, songon na so satolop do ahu tu na nidokna i, alai hulului ma alusna sian Bibel. Dijujui si Diana ma asa hujaha buku Daniel bindu 2. Songgot do rohangku dung hujaha i. Surirang on manggombarhon angka parhuaso di portibi on, dohot angka pamarentaon na marhuaso di tingkinta saonari. Dipatudu si Diana ma muse angka surirang na asing di Bibel taringot tu ari na naeng ro. Ujungna gabe huboto ma alus ni sungkunsungkun i! Alai ise ma na manurat surirang i, jala ise do na boi tangkas mamboto taringot tu ari na naeng ro? Tutu do adong Debata?

SONGON DIA BIBEL PAUBAHON NGOLUNGKU

Dipatandahon si Diana ma ahu tu Sitindangi Ni Jahowa naung marhasohotan, i ma si Horst dohot si Angelika. Diurupi nasida ma ahu lam mangantusi Hata ni Debata. Huboto ma, holan Sitindangi Ni Jahowa do organisasi agama na tongtong mamangke jala patandahon goar ni Debata, i ma Jahowa. (Psalmen 83:19; Mateus 6:9) Huparsiajari ma, dilehon Jahowa do pangkirimon tu sude jolma asa boi mangolu salelenglelengna di paradeiso di tano on. Psalmen 37:9 mandok, ”Sai na teanon ni angka na mangkaposi Jahowa do tano i sogot.” Huantusi ma, pangkirimon on dilehon tu sude halak na olo pahombarhon ngoluna tu prinsip ni Bibel.

Alai, ingkon marsitutu do ahu laho pahombarhon ngolungku tu prinsip ni Bibel. Najolo ginjang do rohangku ala sukses di bagian musik dohot seniman, jadi porlu do ahu marsiajar asa marserep ni roha. Ndang mura laho manadingkon angka ulaon na rorang. Alai, mandok mauliate do ahu tu Jahowa ala sabar do Ibana, parasi roha, jala diantusi do pangkilalaan ni angka halak na marsitutu mangulahon naung diparsiajari sian Bibel!

Huparsiajari do taringot tu komunisme dohot ateisme sahat tu na marumur 18 taon, alai dung marsiajar Bibel muba ma sude ngolungku. Ndang holsoan be ahu taringot tu ari na naeng ro, jala adong ma na tinuju ni ngolungku. Di taon 1993, tardidi ma ahu gabe Sitindangi Ni Jahowa, jala taon 2000 marhasohotan ma ahu tu si Tabitha, sahalak Sitindangi Ni Jahowa na burju jala ringgas. Dipangke hami ma gumodang tingki laho mangurupi na asing asa mamparsiajari Bibel. Godang do na dijumpangi hami na sarupa songon ahu najolo, mangihuthon komunisme dohot ateisme. Las situtu do rohangku ala boi huurupi angka halak asa boi mananda Jahowa.

LABA NA HUDAPOT

Tingki mulai marsaor ahu dohot Sitindangi Ni Jahowa, sogo situtu do roha ni natuatuangku. Alai, dung diparrohahon nasida lam denggan do parangengku ala jotjot marsaor tu Sitindangi Ni Jahowa, gabe olo ma nasida manjaha Bibel jala dohot tu parpunguan ni Sitindangi Ni Jahowa. Mansai las situtu do rohangku alani i.

Denggan do parsaripeonku dohot si Tabitha, ala tongtong do diihuthon hami poda sian Bibel taringot tu naung marhasohotan. Ala diulahon hami do na nidok ni Bibel asa marsihohot tu dongan saripe, gabe togu ma parsaripeonnami.​—Heber 13:4.

Ndang mabiar be ahu di parngoluon on jala ndang holsoan be taringot tu ari na naeng ro. Gabe songon keluargangku do sude Sitindangi di liat portibi on, na mangkilala hadameon dohot holong. Ndang hea hami paimbarimbarhon ganup halak di keluarga on. On do na hinirim ni rohangku sian najolo jala ulahononku ma i saleleng ngolungku.

^ par. 12 Pigapiga goar nunga diganti.