Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 5 2017

 SIULASON NI MAJALAH ON | NA NIDOK NI BIBEL TARINGOT TU SURUSURUAN

Hasintongan Taringot tu Surusuruan

Hasintongan Taringot tu Surusuruan

Olo do hamu mamboto taringot tu surusuruan, ise do nasida, sian dia do mula ni nasida, jala aha do ulaon ni nasida? Alus na sintong taringot i adong di bagasan Hata ni Debata, i ma Bibel. (2 Timoteus 3:16) Aha do na dipaboa Bibel taringot tu nasida?

  • Songon Debata, mardaging tondi do surusuruan jala ndang boi idaon, ala nasida ”ndang marsibuk manang marholiholi”. Surusuruan na marsihohot tading di surgo raphon Debata.​—Lukas 24:39; Mateus 18:10; Johannes 4:24.

  • Sipata, manuman songon jolma do angka surusuruan tingki dilehon Debata sada ulaon tu nasida di tano on. Alai dung sidung ulaon i, mulak ma muse nasida gabe tondi.​—Panguhum 6:11-23; 13:15-20.

  • Nang pe di Bibel jotjot do angka surusuruan digombarhon songon baoa jala manuman gabe baoa, alai sasintongna ndang baoa manang borua nasida songon jolma. Nasida ndang marhasohotan jala ndang marianakhon. Asing ni i, angka surusuruan ndang songon jolma, na ingkon tubu jala magodang. Ditompa Debata do angka surusuruan; i do umbahen didok di Bibel ”angka anak ni Debata” do nasida.​—Job 1:6; Psalmen 148:2, 5.

  • Bibel paboahon taringot tu ”parhataan ni jolma nang surusuruan”, on patuduhon adong do bahasa na dipangke surusuruan. Nang pe dipangke Debata surusuruan laho mangkatai tu angka jolma, alai ndang lomo roha ni Debata molo tasomba manang martangiang hita tu nasida.​—1 Korint 13:1; Pangungkapon 22:8, 9.

  • Marloksaloksa do angka surusuruan, lapatanna marmiliar do nasida. *Daniel 7:10; Pangungkapon 5:11.

  • Surusuruan ma ”ulubalang na gogo”. Dao do umgogo jala umpistar nasida sian angka jolma. Boi do nasida hatop marpindapinda, ndang adong manang aha pe di portibi on na boi mangambati pardalanan ni nasida.​—Psalmen 103:20; Daniel 9:20-23.

  • Nang pe malo jala mansai gogo, adong do na so boi diulahon jala na so diboto surusuruan.​—Mateus 24:36; 1 Petrus 1:12.

  • Songon jolma, marparange do angka surusuruan. Boi do nasida maniru parange ni Debata jala dilehon do tu nasida hak laho mamillit. Alani i, boi do nasida mamillit na sintong manang na sala. Alai pigapiga sian nasida, dipillit do mangalo tu Debata.​—Judas 6.

^ par. 8 Saloksa, i ma 10.000. Saloksa hali saloksa, i ma 100 juta. Didok di buku Pangungkapon, ”marloksaloksa” do angka surusuruan. Lapatanna, adong marratus juta manang marmiliar angka surusuruan!