Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 SIULASON NI MAJALAH ON | NA NIDOK NI BIBEL TARINGOT TU SURUSURUAN

Songon dia Surusuruan Mangurupi Hamu?

Songon dia Surusuruan Mangurupi Hamu?

Marsitutu do angka surusuruan na marsihohot mamparrohahon aha na masa tu angka jolma, jala ringgas do nasida mangulahon sangkap ni Debata. Tingki ditompa Debata tano on, ”rap marende do angka bintang jala angka anak ni Debata marsuraksurak marlas ni roha”. (Job 38:4, 7, Bibel siganup ari) Sian najolo, las do roha ni angka surusuruan mamparrohahon angka surirang na laho masa tu tano on di ari na naeng ro.​—1 Petrus 1:11, 12.

Bibel mandok, diurupi angka surusuruan do naposo ni Debata laho mangulahon sangkapNa. (Psalmen 34:8) Umpamana:

  • Tingki laho diripashon Jahowa huta Sodom dohot Gomorra, diurupi angka surusuruan do si Lot dohot keluargana asa laho sian huta i.​—1 Musa 19:1, 15-26.

  • Di tingki harajaon ni Babel najolo, adong tolu halak Israel na poso dipamasuk tu parapian, alai disuru Debata ma surusuruan ”asa paluahon naposona”.​—Daniel 3:19-28.

  • Dung saborngin dipamasuk tu hurungan ni singa, dipaboa si Daniel, tongtong do ibana mangolu ala disuru Debata do ”surusuruanna na mangkuntam baba ni singa i”.​—Daniel 6:17, 23.

Sian najolo sai diurupi surusuruan do angka halak na marsihohot

DIURUPI ANGKA SURUSURUAN DO HURIA KRISTEN NA PARJOLO

Di pigapiga situasi, parsidohot do surusuruan ni Debata tu ulaon ni huria Kristen na parjolo laho manggohi sangkap ni Jahowa. Umpamana:

  • Dibungka surusuruan do pintu ni penjara jala ditogihon ma angka apostel na dipenjarahon i, asa marbarita muse nasida di bagas joro.​—Ulaon ni Apostel 5:17-21.

  • Ditogutogu surusuruan do si Pilippus asa marbarita tu sahalak Etiopia, na naeng mulak dung sidung martangiang di Jerusalem.​—Ulaon ni Apostel 8:26-33.

  • Ala lomo roha ni Debata asa na so halak Jahudi boi gabe halak Kristen, ro do surusuruan manjumpangi halak na marpangkat sian Rom na margoar si Kornelius. Dijujui surusuruan i ma si Kornelius asa manogihon si Petrus ro tu jabuna.​—Ulaon ni Apostel 10:3-5.

  • Tingki dipenjarahon apostel Petrus, ro do sada surusuruan paluahon ibana.​—Ulaon ni Apostel 12:1-11.

 BOI DO SURUSURUAN MANGURUPI HAMU

Ndang adong bukti na patuduhon dipangke Debata do saonari surusuruan asa mangurupi jolma marhite tanda halongangan, songon na masa di tingki ni Bibel. Alai taringot tu tingkinta saonari, didok Jesus do, ”Laos baritahononhon do barita na uli on na taringot tu Harajaon i di liat portibi on, laho mangkatindangkonsa tu saluhutna bangso; dung pe i, asa ro ujungna.” (Mateus 24:14) Diboto hamu do na diurupi angka surusuruan halak Kristen mangulahon ulaonnasida i?

Dohot do surusuruan mangurupi ulaon marbarita na uli di liat portibi on

Buku Pangungkapon patorangkon, marsitutu do surusuruan mangurupi angka na olo mananda Jahowa dohot sangkapNa. Apostel Johannes manurat, ”Huida ma surusuruan na asing habang martongatonga langit, na umpeop barita na uli sisalelenglelengna, sibaritahononna tu angka pangisi ni tano i, tu saluhut bangso dohot marga dohot hata dohot houm. Gogo ma soarana mandok: Habiari hamu ma Debata jala pasangap Ibana, ai nunga dapot tingki ni panguhumonna! Somba hamu ma Ibana, Sitompa langit dohot tano dohot laut ro di angka mual aek!” (Pangungkapon 14:6, 7) Godang do pengalaman saonari on patuduhon, diurupi surusuruan do ulaon marbarita di liat portibi on. Tingki sahalak pardosa marhamubaon jala mulak tu Jahowa, marlas ni roha do ”angka surusuruan ni Debata”.​—Lukas 15:10.

Aha do na masa molo dung sae ulaon marbarita on? Parsidohot ma ”angka parangan na di banua ginjang” i laho mangurupi Jesus, i ma Raja ni angka raja, na marporang ”di ari na bolon i, ari ni Debata, Sigomgom saluhutna” di Armagedon. (Pangungkapon 16:14-16; 19:14-16) Gabe panguhum ma angka surusuruan na mansai gogo i di ari panguhuman ni Debata, tingki Jesus ”mandabu uhum tu . . . angka na so mangoloi barita na uli”.​—2 Tessalonik 1:7, 8

Alani i, pos ma rohamuna, diparrohahon surusuruan do hamu. Diparrohahon nasida do manang ise na giot rohana laho manomba Debata, jala jotjot do Jahowa mamangke nasida laho patoguhon jala mangalinggomi angka naposoNa na marsihohot.​—Heber 1:14.

Sude do hita ingkon mambahen sada haputusan na ringkot. Olo do hita manangihon jala mangoloi barita na uli na disarhon di liat portibi on? Las do roha ni Sitindangi Ni Jahowa mangurupi hamu asa mandapot laba sian pangurupion ni surusuruan ni Debata.