Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 5 2016

Rura Parhariaraan

Si Daud Mangalo si Goliat—Tutu do i Masa?

Si Daud Mangalo si Goliat—Tutu do i Masa?

Adong do halak na so porsea taringot na masa tu si Daud dohot si Goliat. Porsea do hamu taringot na masa na dipaboa di artikel na parjolo? Molo ndang porsea hamu, pingkirhon ma tolu sungkunsungkun on.

1 | Tutu do adong baoa na timbona hirahira 2,9 m?

Bibel mandok, timbo ni si Goliat hirahira ”onom asta santopap [sanjongkal]”. (1 Samuel 17:4) Saasta dos ma i dohot 44,5 cm; jala santopap dos ma i dohot 22,2 cm. Molo ditotal, hirahira 2,9 m ma sude. Adong do na mandok, ndang tutu nasa i timbo ni si Goliat. Alai, rimangi ma on. Sejarah mandok, di zaman modern on adong do baoa na timbona hirahira 2,7 m. Alani i, porsea do hita molo si Goliat 15 cm umtimbo sian baoa i? Si Goliat halak Repaim. Somalna, balga jala timbo do halak Repaim. Sejarah ni Mesir di abad 13 SM mandok, molo halak Kanaan pe timbona hirahira 2,4 m. Alani i, boi ma taboto tutu do si Goliat timbona hirahira 2,9 m.

2 | Tutu do adong si Daud?

Sahalak sarjana mandok, ndang tutu adong si Daud. Alai hea do dapot ni arkeologi hata na mandok, ”jabu ni si Daud”. Jala hea do didok Jesus molo si Daud tutu adong. (Mateus 12:3; 22:43-45) Adong do dua hatorangan na paboahon Jesus, i ma Messias na ro sian pinompar ni si Daud. (Mateus 1:6-16; Lukas 3:23-31) Alani i, tutu do adong si Daud.

3 | Tutu do parporangan i masa di sada inganan?

Bibel mandok, parporangan i masa di Rura Parhariaraan. Markemah ma halak Palistim di sada inganan di holangholang ni Soko dohot Azeka. Halak Israel maringanan di rura parhariaraan mandompakhon inganan ni halak Palistim. Tutu do inganan on adong?

Parrohahon ma, sahalak baoa na ro tu inganan i mandok, ”Pemandu wisatanami, na so pola mangkaringkothon partondion, mamboan hami tu Rura Parhariaraan. Ditogihon ma hami tu dolok. Ditatap hami ma rura i sian dolok, jala disuru do hami manjaha 1 Samuel 17:1-3. Ditudu ibana ma rura i jala didok, ’Di sabola hambirang an, disi hinan ma Soko.’ Dung i, didok ibana muse, ’Di sabola siamun an, disi hinan ma Azeka. Di holangholang ni huta i ma halak Palistim markemah, jonok ni dolok na di jolomuna i. Ra, di ingananta jongjong on ma halak Israel markemah.’ Hubayangkon ma si Saul dohot si Daud jongjong dison. Dung mardalan hami muse, diida hami ma di rura i adong sunge na otik nama aekna, jala batu do sude disi. Hubayangkon ma muse, dison ma ra si Daud mambuat lima batu na landit, na dipangke laho mamunu si Goliat.” Songon baoa i, godang do halak na longang ala mamboto taringot hatorangan na tangkas na dipaboa di Bibel.

Ndang adong na boi mansoadahon hasintongan taringot sejarah on. Alana, tutu do adong halakna dohot ingananna. Na rumingkot, sinihathon ni Debata do Bibel, Debata ”na so margabus”.Titus 1:2; 2 Timoteus 3:16.