Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 5 2016

 TIRU MA HAPORSEAON NI NASIDA | SI DAUD

”Jahowa do na Marporang”

”Jahowa do na Marporang”

BARANI do si Daud mangalaosi angka tentara i. Longang jala mabiar do nasida. Aha do na mambahen nasida mabiar? Marulakulak do si Daud mambege hata na pabiarbiarhon. I ma taringot sahalak baoa na mangasangi sian bariba ni dolok. Ra, ibana ma jolma na umtimbo na hea diida si Daud.

I ma si Goliat! Diboto si Daud ma boasa mabiar angka tentara i, alana mansai timbo do si Goliat i. Ra, boratna sarupa tu borat ni dua halak baoa nang pe so mamangke alat marporang. Ibana tentara na mansai timbo jala balga, gogo jala marpengalaman. Gogo ma soarana mangasangi halak Israel. Pingkirhon ma songon dia gogo ni soarana di dolok pailahon tentara ni halak Israel dohot si Saul. Didok ma asa sada sian tentara ni Israel mangalo ibana!1 Samuel 17:4-10.

Mabiar ma bangso Israel dohot Raja Saul. Diboto si Daud ma, nunga adong sabulan nasida songon i! Tingki direhei si Goliat halak Israel ganup ari, sip do tentara ni halak Palistim dohot Israel. Lungun do roha ni si Daud mambege i. Maila do ibana mangida si Saul, tentara ni Israel dohot tolu hahana ala mabiar nasida. Di roha ni si Daud, ndang holan halak Israel na dileai si Goliat, alai dohot do Jahowa na dileai. Alai, nang pe poso dope si Daud, aha do na diulahon ibana? Jala aha do parsiajaran na boi tatiru sian haporseaon ni si Daud?1 Samuel 17:11-14.

”MIAHI MA IBANA, AI I MA IBANA!”

Taida ma na masa pigapiga bulan andorang so ro halak Palistim. Tingki botari, marmahan birubiru ni bapakna do si Daud di jonok ni Betlehem. Ganteng jala malo do si Daud, godang do na marlomo ni roha mangida ibana. Tingki marmahan, marhasapi do ibana. Tompaan ni Debata do na patoguhon rohana. Jala, ala jotjot marlatik lam malo ma ibana marmusik. Alai di botari i, disuru bapakna ma si Daud asa mulak.1 Samuel 16:12.

Diida ibana ma bapakna, si Isai, mangkatai tu sahalak baoa naung matua, i ma panurirang Samuel. Disuru Jahowa ma si Samuel mamillit sada sian anak ni si Isai asa gabe raja ni Israel! Nunga diida si Samuel nian pitu haha ni si Daud, alai dipaboa Jahowa tu si Samuel, ndang adong na dipillit Ibana sian na pitu i. Dung ro si Daud, didok Jahowa ma tu si Samuel, ”Miahi ma ibana, ai i ma ibana!” Di jolo ni sude haha ni si Daud, dibungka si Samuel ma tanduk na marisi miak na hushus jala diusehon ma i tu simanjujung ni si Daud. Dung dimiahi si Daud, muba ma na masa di parngoluonna. Didok di Bibel, ”Dung i songgop ma Tondi ni Jahowa tu si Daud olat ni na sadari i dohot tu jolo on.”1 Samuel 16:1, 5-11, 13.

Ala serep roha ni si Daud, diurupi Jahowa do ibana manaluhon singa

Na mansai lomo do roha ni si Daud gabe raja? Ndang, dipaima ibana do tudutudu marhite tondi parbadia asa diboto andigan tingki na pas manjalo tanggung jawab na balga. Alani i,  tongtong do ibana marmahan birubiru. Ingkon barani jala rade do mangulahon ulaon on. Sada tingki, diroro singa dohot gompul ma birubiru ni bapakna. Ndang sian na dao si Daud mangusir angka binatang i. Alai, pintor didapothon jala dibunu ibana do binatang i, asa boi malua birubiru ni bapakna!1 Samuel 17:34-36; Jesaya 31:4.

Dung i, dijou ma muse si Daud. Nunga dibege Raja Saul taringot habaranion ni si Daud. Nang pe tentara na gogo si Saul, ndang lomo be roha ni Jahowa mangida ibana ala mangalo tu Jahowa. Ala sai patuduhon parange na roa si Saul, umpamana mura muruk, curiga, jala jahat, ndang dilehon Jahowa be tondiNa tu ibana. Tingki ro tondi na jahat tu si Saul, holan musik do na boi mambahen ibana marlas ni roha. Pigapiga tentara ni si Saul nunga mambege taringot si Daud na malo marmusik dohot marporang. Alani i, dijou ma si Daud asa gabe parmusik dohot siboan sinjata ni si Saul.1 Samuel 15:26-29; 16:14-23.

Angka na poso pe boi do maniru parange ni si Daud. Parrohahon ma, dilehon ibana do godang tingkina asa lam jonok tu Jahowa. Asing ni i, jotjot do ibana marlatik asa boi gabe haposan. Jala na rumingkot, diihuthon ibana do tudutudu marhite tondi parbadia. Parsiajaran na mansai denggan do on di hita!Parjamita 12:1.

UNANG POLA MABIAR ALANI HALAK PALISTIM ON

Saleleng karejo tu si Saul, jotjot do si Daud mulak tu jabuna laho marmahan birubiru, alai sipata ndang pintor mulak ibana tu si Saul. Tingki mulak, disuru si Isai ma ibana manjumpangi tolu hahana, na gabe tentara ni si Saul. Laho ma si Daud mamboan sipanganon ni hahana tu Rura Parhariaraan. Dung sahat, marsak ma ibana mangida tentara ni Israel dohot Palistim songon na dipatorang di mula ni parsiajaran on. Masidompahan do nasida di rura i.1 Samuel 17:1-3, 15-19.

Didok roha ni si Daud, ndang boi dipasombu situasi on. Boasa ma pola mabiar tentara ni Jahowa alani sahalak baoa na manomba ganaganaan? Diida si Daud do tingki si Goliat mangaleai Jahowa. Alani i, pintor didok ibana do tu tentara i asa ditaluhon nasida si Goliat. Ala dibege si Eliab hata ni si Daud, dimuruki hahana i ma ibana jala didok asa unang dohot si Daud tu parporangan i. Alai, didok si Daud ma tu ibana, ”Ai apala aha do na hubahen? Nda hata sangkababa sambing do i?” Dung i, didok si Daud muse taringot cara manaluhon si Goliat, jala adong do na paboahon hata ni si Daud tu si Saul. Disuru raja Saul do asa ro si Daud manjumpangi ibana.1 Samuel 17:23-31.

Didok si Daud ma tu si Saul taringot si Goliat, ”Unang pola godoron roha ni manang ise ala bayo an!” Mabiar do si Saul dohot tentarana alani si Goliat. Ra, mabiar pe nasida ala mangida balga dohot timbo ni si Goliat do. Ninna roha ni nasida, mura do si Goliat manaluhon nasida. Alai, ndang songon i di pingkiran ni si Daud. Songon na laho taulas, marimbar do pamingkirion  ni si Daud taringot i. Alani i, ibana sandiri do na maju mangadopi si Goliat.1 Samuel 17:32.

Didok si Saul ma, ”Ndang tarbahen ho laho mandopang halak Palistim on laho mangalo ibana, ai bajar dope ho, alai anggo ibana baoa na somal marmusu sian sieteketehonna.” Tutu do dakdanak dope si Daud? Ndang. Alai, ndang boi dope ibana gabe tentara ala paposohu dope. Nang pe songon i, di tingki i nunga ditanda be si Daud sahalak na barani.1 Samuel 16:18; 17:33.

Dipapos si Daud do roha ni si Saul jala dipaboa songon dia ibana pamatehon singa dohot gompul. Na marginjang ni roha do si Daud? Ndang. Diboto si Daud do ise na mambahen ibana monang. Didok ibana, ”Jahowa na paluahon ahu sian sisilon ni singa dohot sian sisilon ni gompul, paluaonna do ahu sian tangan ni halak Palistim.” Didok si Saul ma, ”Antong laho ma ho, sai didongani Jahowa ma ho!”1 Samuel 17:37.

Lomo do rohamu marhaporseaon songon si Daud? Molo taparrohahon, marhaporseaon na togu do si Daud alani parbinotoanna dohot pengalamanna. Diboto ibana, tongtong do Jahowa manggohi janjiNa jala mangalinggomi ibana. Asa boi songon i haporseaonta, ingkon tongtong do hita marsiajar taringot Debata marhite Bibel. Molo taulahon na taparsiajari, lam togu ma haporseaonta.Heber 11:1.

”PASAHATON NI JAHOWA HO TU BAGASAN TANGANKU”

Mulana, dilehon si Saul do baju tentara tu si Daud, songon na dipangke si Goliat. Baju tentara i dibahen sian tombaga jala borat. Dung dipangke si Daud baju i, ndang boi ibana mardalan. Ala ndang hea ibana dilatik gabe tentara, ndang somal ibana mamangke baju tentara, tarlumobi baju tentara na dipangke si Saul, baoa na umtimbo di Israel! (1 Samuel 9:2) Alani i, ndang baju tentara i na dipangke, alai baju na somal dipangke tingki marmahan do na dipangke si Daud.1 Samuel 17:38-40.

Diboan si Daud do tungkot, hadanghadangan dohot ambalang. Saonari, ndang hea be taida ambalang, alai boi do i dipangke gabe sinjata. Adong do kantong na metmet di ujung ni tali ni ambalang i, denggan do sinjata on dipangke parmahan. Dipamasuk ibana ma batu tu kantong i, diputarputar ma di ginjang ni simanjujungna, dung i dipalua ma batu i jala dipatongon ma tu musuna. Mansai denggan do sinjata on, alana di tingki i adong do tentara na dilatik mamangke ambalang.

Dung diparade si Daud sudena i, laho ma ibana mandapothon musuna. Pingkirhon hamu ma songon dia si Daud paposhon rohana tu Jahowa tingki martangiang, huhut papunguhon lima batu na landit sian sunge. Dung i, marlojong ma ibana tu parporangan i!

Aha do na dipingkirhon si Goliat tingki ro musuna? ”Lea rohana mida ibana [si Daud], ai na bajar dope jala tarrara bohina jala uli rupana.” Didok si Goliat ma, ”Hira biang do ahu di roham umbahen na ro ho mamboan tungkot manjumpangkon ahu?” Holan tungkot ni si Daud do na diida si Goliat, ndang diparrohahon ibana ambalang na ditiop si Daud. Diburai ma si Daud marhite debata ni halak Palistim, diasangi jala didok ma lehononna daging ni si Daud allangon ni pidong dohot binatang.1 Samuel 17:41-44.

Di tingki i, tongtong do marsihohot si Daud. Pingkirhon ma sahalak baoa na poso mandok tu si Goliat, ”Ia ho da ro tu ahu mangasahon podang dohot hujur dohot lombulombu; alai anggo ahu ro tu ho mangasahon goar ni Jahowa Zebaot, Debata ni parangan ni Israel, angka na niasapanmi.” Ndang mabiar si Daud mangida si Goliat dohot sinjatana. Songon na nidok ni si Daud, Jahowa do na marporang di parporangan i. Alani i, uhumon ni Jahowa do si Goliat ala dileai goarNa.1 Samuel 17:45-47.

Ndang gabe mabiar si Daud alani balga ni si Goliat dohot jago ni sinjatana. Jala ndang dipaloas si Daud hasalaan ni si Saul dohot tentarana mambahen hurang pos ni rohana. Ndang  dipatudos ibana dirina tu si Goliat. Diboto si Daud do, nang pe timbo ni si Goliat hirahira 2,9 m, alai pos do roha ni si Daud umbalga do Jahowa sian si Goliat. Sasintongna, ndang maol di Jahowa laho mangaripashon si Goliat, alana di adopan ni Jahowa songon porngis do ibana!

Marlojong ma si Daud mandapothon si Goliat. Dibuat ma batu sian hadanghadanganna, dungi diputarputar ma ambalangna di ginjang ni simanjujungna asa boi denggan danggurhononna. Masidompakdompahan do si Daud dohot si Goliat. Jala jongjong ma si Goliat di pudi ni siboan sinjatana. Ndang mabiar si Goliat mangida si Daud, ala didok rohana, boi do ondingan ni siboan sinjatana i simanjujungna molo didanggur si Daud.1 Samuel 17:41.

Pos do roha ni si Daud, ndang adong na umbalga sian Jahowa

Dipalua si Daud ma batu i sian ambalangna. Dung i, tompu ma hohom angka tentara na mangida i. Diurupi Jahowa do si Daud, asa boi pas batu i hona tu pardompahan ni si Goliat. Dung i, tungkap ma si Goliat tu tano! Marsurak ma si Daud, dibuat ma podang ni si Goliat i, disintak sian sarungna, dung i diponggol ma ulu si Goliat.1 Samuel 17:48-51.

Ujungna, ndang mabiar be si Saul dohot angka tentarana. Marsurak ma halak Israel laho mangalo halak Palistim. Monang ma nasida di parporangan i, songon na nidok ni si Daud tu si Goliat, ”Pasahatonna do hamu tu bagasan tangannami.”1 Samuel 17:47, 52, 53.

Saonari, ndang be marporang naposo ni Jahowa. (Mateus 26:52) Alai, tongtong ma tatiru haporseaon ni si Daud. Songon si Daud, ingkon patar do Jahowa di hita, ala holan Ibana do na tama tasomba jala na ingkon tajumolohon di ngolunta. Tingki adong parungkilonta, on boi mambahen hita marmetmet ni roha. Alai, pos ma rohanta, umbalga do Jahowa sian parungkilonta. Molo tongtong tasomba Jahowa, jala marhaporseaon na togu songon si Daud, ndang adong manang aha pe na boi mambahen hita gale. Ndang adong na umgogo sian Jahowa!