Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 4 2017

 SIULASON NI MAJALAH ON | AHA DO NA MASA TU HALAK NAUNG MATE?

Na Nidok ni Bibel taringot tu Halak Naung Mate

Na Nidok ni Bibel taringot tu Halak Naung Mate

Molo tajaha di buku 1 Musa taringot tu panompaon, didok Debata do tu si Adam, i ma jolma na parjolo, ”Jadi do panganonmu sian nasa hau di bagasan porlak on. Alai anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho.” (1 Musa 2:16, 17) Tangkas do on patuduhon molo dioloi si Adam do parenta ni Debata, ndang mate ibana alai tongtong mangolu di porlak Eden.

Alai, ndang dioloi si Adam parenta ni Debata jala dipangan do parbue ni hau i, na dilehon si Hawa tu ibana. (1 Musa 3:1-6) Gabe mangkorhon do na diulahon nasida i tu hita saonari. Apostel Paulus mandok, ”Bongot dosa i tu portibi on marhite sian sada halak jala marhitehite dosa i ro hamatean, songon i sahat hamatean i tu saluhut jolma, ala sude nasida mardosa.” (Rom 5:12) ”Sada halak”, i ma si Adam. Alai, aha do dosa i jala songon dia i gabe parohon hamatean?

Dosa do na diulahon si Adam tingki dialo ibana uhum ni Debata. (1 Johannes 3:4) Alani dosa i, hamatean do upana, dos songon naung didok Debata. Aut dioloi si Adam dohot pinomparna parenta ni Debata, ndang mardosa jala mate nasida. Ditompa Debata pe jolma asa mangolu salelenglelengna do, ndang na asa mate.

Satolop do hita sude molo hamatean i nunga sahat tu ”saluhut jolma”, songon na nidok ni Bibel. Alai, tutu do adong sian dirinta on na tongtong  mangolu nang pe mate dagingta? Godang na mandok, tutu do i. Adong do bagian sian dirinta on na so boi mate, i ma tondinta. Molo songon i do, hira na margabus ma Debata tu si Adam. Boasa songon i? Alana, molo tutu do boi pinda tondinta tu inganan na asing dung mate hita, on patuduhon ndang na tutu hamatean i upa ni dosa, songon na didok Debata. Bibel mandok, ”Na so tarbahen Debata margabus.” (Heber 6:18) Sasintongna, Sibolis do na margabus tingki didok tu si Hawa, ”Ndang na tutu hamu mate.”​—1 Musa 3:4.

Gabe tubu ma sungkunsungkun, molo ndang tutu ajaran taringot tu tondi na so boi mate, antong aha do na masa tu halak naung mate?

BIBEL PABOAHON ANGKA NA SINTONG

Taringot tu panompaon, di buku 1 Musa didok, ”Dung i dibuat Debata Jahowa ma orbuk ni tano i jala digana ma jolma sian i; diombushon ma hosa hangoluan tu ruang ni igungna, gabe mangolu ma jolma i.” Hata ”mangolu ma jolma i” dibuat sian hata Heber, i ma ne’phesh, * lapatanna ”tompaan na marhosa”.​—1 Musa 2:7, Bibel siganup ari.

Tangkas do dipaboa di Bibel, ditompa jolma ndang martondi na so boi mate. Alai, didok holan ”mangolu ma jolma i”. I do alana, molo talului pe di Bibel, ndang adong disurat taringot tu ”tondi na so boi mate”.

Molo ndang adong disurat di Bibel taringot tu tondi na so boi mate, boasa godang agama saonari na mangajarhon i? Alusna boi taboto sian na masa di Misir najolo.

 AJARAN NA TARSAR SIAN ANGKA PARBEGU

Sahalak sejarawan Junani di abad palimahon SM mandok, bangso Misir ma ”na parjolo sahali na mangkaporseai ajaran taringot tu tondi na so boi mate”. Bangso na asing songon Babel najolo, dohot do mamangke ajaran tondi na so boi mate. Dung si Aleksander Agung na mangarajai Asia Kecil taon 332 SM, gabe mura ma angka guru sian Junani mansarhon ajaran ni nasida, jala hatop do i tarsar tu saluhut imperium Junani.

Molo talului pe di Bibel, ndang adong disurat taringot tu ”tondi na so boi mate”

Di abad na parjolo M, adong dua sekte Jahudi na balga, i ma Eseni dohot Parise na mangajarhon tongtong do mangolu tondi nang pe mate daging. The Jewish Encyclopedia mandok, ”Ajaran taringot tu tondi na so boi mate boi sahat tu halak Jahudi marhite ajaran Junani tarlumobi ajaran ni si Plato.” Alani i, sejarawan Jahudi di abad na parjolo na margoar si Josephus mandok, ajaran i ndang sian Bibel, alai sian ”haporseaon ni halak Junani”, didok ibana holan bagian sian turiturian sambing do i.

Ala lam balga pangkorhon ni ajaran Junani on, gabe dohot ma angka na mangangku Kristen mamangke ajaran ni angka parbegu i. Sejarawan na margoar si Jona Lendering mandok, ”Didok si Plato, dumenggan do inganan ni tondinta andorang so tubu tu tano on. Gabe mura do ajaran i dipadomu tu ajaran gareja.” Alani i, masuk ma ajaran taringot tu tondi na so boi mate tu gareja jala gabe ajaran na ringkot do i di nasida.

 ”PALUAON NI NA SINTONG I MA HAMU”

Di abad na parjolo, dilehon apostel Paulus do sipasingot, ”Tangkas do didok Tondi i: Adong ma di angka ari sogot deba na marbalik sian haporseaon i; oloan ni i ma angka tondi sipaotooto dohot podapoda ni angka sibolis.” (1 Timoteus 4:1) Tutu do na nidokna i! Sada sian ”podapoda ni angka sibolis” do ajaran taringot tu tondi na so boi mate. Ndang sian Bibel i, alai sian ajaran ni bangso parbegu do i najolo.

Las do rohanta ala didok Jesus, ”Tandaonmuna ma na sintong i, jala paluaon ni na sintong i ma hamu.” (Johannes 8:32) Molo taboto parbinotoan na sintong sian Bibel, gabe malua ma hita sian ajaran na so pasangaphon Debata, na ro sian godang agama di liat portibi on. Jala hasintongan sian Hata ni Debata, paluahon hita sian jorat ni angka ajaran na so sintong taringot tu hamatean.​—Ida ma kotak ” Aha do na Masa tu Halak Naung Mate?

Ditompa Debata jolma ndang na asa mangolu di tano on holan 70 manang 80 taon, jala dung mate gabe pinda tu inganan na asing. Sasintongna sangkapNa, i ma asa mangolu salelenglelengna di tano on do jala mangoloi Ibana. Sangkap ni Debata on patuduhon holongNa tu jolma, jala ingkon saut do i. (Maleaki 3:6) Dame ma rohanta ala didok panurat buku psalmen do, ”Teanon ni angka partigor i do sogot tano i, jala tongtong do nasida maringanan disi.”​—Psalmen 37:29.

 

^ par. 9 Di pigapiga terjemahan Bibel na asing, songon King James Version dohot Catholic Douay Version, hata ne’phesh diterjemahon gabe ”tondi na mangolu”, jala godang terjemahan modern songon The New English Bible mambahen gabe ”tompaan na mangolu”, New International Version dohot The Jerusalem Bible mambahen gabe ”na mangolu”, manang Today’s English Version mambahen gabe ”mulai mangolu”.