Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 4 2016

 SIULASON NI MAJALAH ON | BIBEL—DILINGGOMI ASA TONGTONG ADONG

Bibel Dilinggomi asa Unang Sega

Bibel Dilinggomi asa Unang Sega

MASALAH: Papirus dohot perkamen do na somal dipangke panurat dohot panalin laho manurat isi ni Bibel. * (2 Timoteus 4:13) Alani i, songon dia do on boi mambahen Bibel adong sahat tu saonari?

Papirus on boi maribak, luntur jala hatop busuk. Panulingkit sian Mesir na margoar si Richard Parkinson dohot si Stephen Quirke mandok, ”Papirus on lam leleng lam mura busuk jala gabe orbuk. Molo leleng disimpan gulungan on, gabe lapuhon jala molo disimpan di toru ni tano, gabe diharat ngitngit manang semut putih.” Nasida mandok, hatop do sega papirus molo palelenghu hona las ni ari jala hatop busuk molo disimpan di inganan na marombun.

Umtahan do perkamen sian papirus, alai boi do sega molo disimpan di inganan na pamohophu, na marombun, manang didadang mata ni ari. * Asing ni i, perkamen jotjot diharat ngitngit. Buku Everyday Writing in the Graeco-Roman East mandok, ”Jarang do tadapot angka perkamen najolo.” Alani i, molo sega do Bibel na parjolo, tontu sude isina pe mago do.

SONGON DIA BIBEL DILINGGOMI: Di buku na palimahon sian Bibel, ganup raja diparentahon asa ”uhalonna [salinonna] di ibana hata ni patikon tu sada buku”. (5 Musa 17:18) Godang do panalin manurathon angka manuskrip manang salinan ni Bibel di abad na parjolo. Alani i, adong ma gulungan di sinagoga ni halak Israel jala sahat tu Makedonia! (Lukas 4:16, 17; Ulaon ni Apostel 17:11) Songon dia do manuskrip naung leleng on boi dilinggomi sahat tu saonari?

Gulungan Laut Mati na disimpan saleleng marratus taon di bagasan gunsi di gua na mahiang

Si Philip W. Comfort, sahalak sarjana na manulingkiti Perjanjian Baru mandok, ”Halak Jahudi somalna mambahen angka gulungan on di bagasan ni gunsi manang kendi.” Jala, tongtong do on diihuthon halak Kristen di abad na parjolo. Alani i ma adong pigapiga manuskrip ni Bibel na dapot di bagasan gunsi sian gua di gurun.

HASILNA: Marribu sian manuskrip ni Bibel on lelengna 2.000 taon jala boi martahan sahat tu saonari. Ndang adong manuskrip na asing songon godang ni manuskrip ni Bibel jala boi martahan sahat tu saonari.

^ par. 3 Papirus, i ma suansuanan na tubu di aek jala disi ma disurathon angka surat najolo. Perkamen dibahen sian kulit ni binatang.

^ par. 5 Umpamana, Deklarasi Kemerdekaan ni Amerika Serikat disurat di perkamen. Saonari, hirahira 250 taon dungkon i, ndang tarjaha be deklarasi i.