Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Halak Masoret na manat manalin Bibel

 SIULASON NI MAJALAH ON | BIBEL​—DILINGGOMI ASA TONGTONG ADONG

Bibel Dilinggomi sian Halak na Marsangkap Manguba Isina

Bibel Dilinggomi sian Halak na Marsangkap Manguba Isina

MASALAH: Nang pe disurat di bahan na mura sega jala mangadopi paraloan, ndang gabe mago Bibel i. Alai, panalin dohot penerjemah marsangkap manguba isi ni Bibel. Ndang dipahombar nasida pangantusionna tu isi ni Bibel. Taparrohahon ma pigapiga na masa:

  • Inganan panombaon: Hirahira abad na paopathon sahat tu abad na paduahon SM, panalin buku Pentateukh Samaria manambai hata dungkon 2 Musa 20:17 ”di Aargaareezem. Jala pajongjongonmu disan sada langgatan”. Hirim roha ni panalin i ayat on patoguhon ayat na mandok porlu pajongjongon langgatan di ”Aargaareezem”, manang Dolok Gerizim.

  • Ajaran Debata sitolu sada: Lobi sian 300 taon dung sae Bibel disurat, sahalak na porsea tu Debata sitolu sada manambai hata di 1 Johannes 5:7 gabe ”di surgo, adong Debata Ama, Hata dohot Tondi Parbadia: sada do nasida na tolu”. Hata on ndang adong di Bibel na parjolo. Pakar Alkitab na margoar si Bruce Metzger manurat, ”Dung abad na paonomhon pe asa lam godang hata on tarida di manuskrip Latin Kuno dohot Latin Vulgata.”

  • Goar ni Debata: Ala haporseaon ni Jahudi na sala, godang do penerjemah ni Bibel manesa goar ni Debata sian Surat na Badia. Diganti nasida ma gabe panjouon songon ”Debata” manang ”Tuhan”. Sasintongna, goar panjouon on ndang holan panjouon tu Panompa, alai boi do tu jolma, ganaganaan dohot tu Sibolis.​—Johannes 10:34, 35; 1 Korint 8:5, 6; 2 Korint 4:4. *

SONGON DIA BIBEL DILINGGOMI: Na parjolo, nang pe pigapiga panalin ndang manat,  alai adong do na asing na malo jala manat manalin Bibel. Hirahira di abad na paonomhon sahat tu abad na pasampuluhon Masehi, disalin jala dicetak halak Masoret ma Angka Buku Heber, didok ma on Surat Masoret. Dietong nasida do godang ni hata dohot huruf laho mamastihon ndang adong na sala. Tingki dihilala nasida adong na sala, boi do dapotnasida i di bagian margin. Ndang olo halak Masoret manguba isi ni Bibel. Profesor Moshe Goshen-Gottstein mandok, ”Di halak Masoret, dosa na balga do molo manguba isi ni Bibel.”

Na paduahon, angka manuskrip na didapot saonari mangurupi angka pakar Alkitab laho padengganhon na sala. Umpamana, angka pemimpin ni agama mandok, Bibel hata Latin nunga sintong. Alai, dipamasuk nasida do hata na sala di 1 Johannes 5:7. Hata na sala i pe dipamasuk tu Bibel bahasa Inggris King James Version! Alai dung dapot manuskrip na asing, dapot ni nasida ma hatorangan na ringkot. Bruce Metzger mandok, ”Asing ni di manuskrip Latin, hata na ditambai di [1 Johannes 5:7] ndang adong di manuskrip najolo songon di manuskrip Siria, Koptik, Armenia, Etiopia, Arab, dohot Slavia.” Ujungna, ndang dipamasuk be hata i tu Bibel King James Version naung direvisi.

Manuskrip Bibel na dibahen sian papirus hirahira taon 200 M, dibuat sian perpustakaan Chester Beatty P46

Manuskrip najolo patoguhon hasintongan na adong di Bibel. Di taon 1947, didapot ma Gulungan Laut Mati. On mangurupi angka pakar Alkitab paimbarhon surat Heber na dibahen halak Masoret tu gulungan Bibel na disurat marribu taon naung salpu. Sahalak sian pakar i mandok, ”Sada gulungan sian Gulungan Laut Mati i patuduhon Bibel i disalin saleleng marribu taon. Na manalin i halak Jahudi na manat jala marsihohot.”

Perpustakaan Chester Beatty di Dublin, Irlandia, papunguhon gulungan papirus na hombar tu Angka Buku Junani Kristen dohot manuskrip sian abad na paduahon Masehi, hirahira 100 taon dung sae Bibel disurat. The Anchor Bible Dictionary mandok, ”Godang do hatorangan na boi didapot sian gulungan papirus. Salinanna pe hombar sian mulana sahat tu ujungna.”

”Ndang adong buku najolo na disalin dos tu aslina”

HASILNA: Nang pe naung leleng jala godang na manalin Bibel, ndang na gabe sega Bibel i, alai laho patoguhonsa do. Sir Frederic Kenyon mandok taringot Angka Buku Junani Kristen, ”Ndang adong buku najolo na songon i. Alani i, tutu do Bibel na adong di hita saonari dos do tu aslina, jala angka pakar na so mamihak pe ndang boi mansoadahon i.” Asing ni Angka Buku Heber, sarjana William Henry Green mandok, ”Ndang adong buku najolo na disalin dos tu aslina.”

^ par. 6 Ida ma buku Tudutudu Laho Mangantusi Hata ni Debata, rade do muse di www.jw.org/bbc.