Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Songon dia Hamu Boi Mandapot Ngolu na Dumenggan?

Songon dia Hamu Boi Mandapot Ngolu na Dumenggan?

NDANG songon saonari on hian hangoluan ni jolma na dihalomohon Debata. Ingkon diingani halak na mangoloi Debata do tano on. Jala ingkon mangihuthon tudu-tuduna, maniru holongna dohot angka parangena na asing. Lomo roha ni Debata asa sude jolma marlas ni roha, markeluarga, mamparsiajari angka na baru jala mambahen sude tano on gabe paradeiso.

MARJANJI DO DEBATA LAHO PAUBAONNA TANO ON SONGON NA DIHALOMOHON ROHANA

  • “Ibana do pasohothon hamusuon ro di ujung ni tano on.”​Psalmen 46:10.

  • “Dapot ma tingki naung ditontuhon . . . ripashononmu ma halak na manegai tano on.”​Pangungkapon 11:18.

  • “Na so tupa be dohonon ni pangisina: Na gale do ahu.”​Jesaya 33:24.

  • “Jadijadian ni tangannasida ingkon halak na hupillit marsaulihonsa.”​Jesaya 65:22.

Songon dia do angka surirang i laho saut? Dilantik Debata ma Anakna, i ma Jesus gabe Raja laho mamarenta tano on sian surgo. Di Bibel, didok do pamarentaon i, Harajaon ni Debata. (Daniel 2:44) Taringot Jesus, Bibel mandok, “Lehonon ni Debata Jahowa ma tu ibana habangsa. . . . Mamarenta ma ibana gabe Raja.”​—Lukas 1:32, 33.

Tingki di tano on, godang do dibahen Jesus mukjizat. On patuduhon laho bahenonna do lam denggan ngolu ni jolma dung gabe Raja ibana.

DIPATUDU JESUS DO AHA NA LAHO BAHENONNA TU HALAK NA MANGOLOI DEBATA

  • Dipamalum ibana do sude sahit, na patuduhon laho salpuhononna sude hagaleon ni jolma.​Mateus 9:35.

  • Dipaso ibana do haba-haba di laut, na patuduhon laho jagaonna do angka jolma sian bencana alam.​Markus 4:36-39.

  • Dilehon ibana do mangan marribu halak, na patuduhon lehononna do angka na dihaporluhon jolma asa boi tongtong mangolu.​Markus 6:41-44.

  • Dibahen ibana do aek gabe anggur di pesta perkawinan, na patuduhon bahenonna do angka jolma asa boi marlas ni roha.​Johannes 2:7-11.

Songon dia do hamu boi mandapot hangoluan na dihalomohon Debata tu angka halak na mangkaholongi Ibana? Adong do na ingkon diulahon hamu. Bibel mandok ingkon dilului hamu do “dalan tu hangoluan, jala otik do halak na jumpangan i”.​—Mateus 7:14.

MANDAPOT DALAN TU NGOLU NA DUMENGGAN

Aha do dalan hangoluan i? Didok Debata, “Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu.”  (Jesaya 48:17) Molo diihuthon hamu poda on, dapotmuna ma ngolu na dumenggan.

Didok Jesus, “Ahu do dalan dohot hasintongan dohot hangoluan.” (Johannes 14:6) Molo taulahon aha na diajarhon Jesus jala tatiru ibana, boi ma lam solhot hita tu Debata jala lam denggan ma ngolunta.

Songon dia asa boi dapotmuna dalan tu hangoluan i? Saonari, godang do agama. Alai didok Jesus, “Ndang sude halak na mandok tu ahu, ‘Tuan, Tuan,’ masuk tu Harajaon banua ginjang i. Alai holan na mangulahon lomo ni roha ni Damang na di banua ginjang i do.” (Mateus 7:21) Didok Jesus muse, “Sian parbuena ma tandaonmuna nasida.” (Mateus 7:16) Bibel boi mangurupi hamu mamboto na dia do agama na sintong.​—Johannes 17:17.

Songon dia asa boi hamu mardalan di dalan hangoluan i? Ingkon taboto do ise Silehon ngolu tu sude jolma. Ingkon taboto do muse: Ise Ibana? Ise goarna? Songon dia parangena? Aha naung diulahon Ibana? Jala aha na dihalomohon rohana sian hita? *

Lomo do roha ni Debata asa sude jolma ndang holan karejo, mangan, marsonang-sonang, dohot markeluarga. Boi do taboto ise na Manompa hita jala marale-ale tu Ibana. Boi do tapatudu holong tu Ibana molo taulahon aha na diparentahon Ibana. Jesus mandok, “On do hangoluan na saleleng ni lelengna, ingkon tandaon ni nasida do Ho Debata na Sasada i.”​—Johannes 17:3.

MARHITE BIBEL, DIAJARI DEBATA DO HAMU “BAHEN HATUAONMU”.—JESAYA 48:17

IHUTHON MA DALAN HANGOLUAN I

Dung taboto aha na dihalomohon Debata asa taulahon, ra ingkon tabahen do hamubaon. Sipata, maol do i taulahon. Alai sasintongna, boi do lam denggan ngolunta tingki taihuthon dalan hangoluan i. Laho mangurupi hamu mamboto alus ni sungkun-sungkun taringot Debata, las do roha ni Sitindangi Ni Jahowa mangurupi hamu marsiajar Bibel gratis di tingki dohot inganan na pas di hamu. Boi do muse diida hamu situs webnami di www.jw.org/bbc.