Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Boi do angka na dibahen angka ilmuwan mambahen lam ganjang umur ni jolma?

Na Dibahen Jolma Laho Paganjangkon Umur

Na Dibahen Jolma Laho Paganjangkon Umur

“Alai anggo Ibana denggan do saluhutna i dibahen di tingki halehetanna; ditompahon do huhut roha hangoluan salelenglelengna tu bagasan rohanasida.”​Parjamita 3:11.

HATA ni Raja Salomo on paboahon, songon dia pangkilalaan ni angka halak taringot hangoluan. Jempek do umur ni jolma jala ujungna mate. Alani i, saleleng marribu taon, marsitutu do angka halak mangalului cara songon dia asa boi ganjang umur ni jolma.

Umpamana, cerita taringot si Gilgames, raja ni Sumeria. Godang cerita na paboahon taringot ibana. Sada ceritana, i ma Epik Gilgames na paboahon na laho ibana tu inganan na dao jala berbahaya laho mangalului cara songon dia asa unang mate. Alai ndang marhasil ibana.

Sahalak ilmuwan najolo di laboratoriumna

Di abad na paopathon SM, angka ilmuwan di Cina mambahen ramuan na dihaporseai nasida boi mambahen ganjang umur ni jolma. Dibahen nasida do ramuan i sian merkuri dohot sian garam arsenik. Alai mate do piga-piga kaisar Cina alani i. Di Eropa, saleleng taon 500 sahat tu 1.500 M, dibahen angka ilmuwan do cara songon dia manguba mas asa boi diallang jolma. Porsea do nasida, molo mas i boi mambahen lam ganjang umur ni jolma.

Saonari, dilului angka ilmuwan do aha na mambahen jolma gabe matua. Dos songon “ramuan hangoluan”, angka cara na dibahen angka ilmuwan i patuduhon, lomo do roha ni jolma mangalului songon dia carana asa unang matua jala mate. Alai aha do hasilna?

“DITOMPAHON [DEBATA] DO HUHUT ROHA HANGOLUAN SALELENGLELENGNA TU BAGASAN ROHANASIDA.”​—PARJAMITA 3:11

DILULUI DO AHA NA MAMBAHEN JOLMA GABE MATUA

Adong lobi sian 300 pandapot ni angka ilmuwan taringot boasa matua hita jala mate. Di taon na parpudi on, marhasil do angka ilmuwan mambahen lam ganjang umur ni sel ni jolma dohot sel ni binatang. Alani i, dilehon angka halak na mora ma hepeng tu angka ilmuwan i laho mangalului alus taringot boasa mate hita. Aha do hasil na dapot ni nasida?

Mambahen lam ganjang umur ni jolma. Piga-piga ilmuwan porsea, ala adong do na masa tu telomer umbahen gabe matua hita. Telomer, i ma bagian ujung na adong di DNA. Telomer on ma na manjaga tingki tarbagi sel na adong di DNA. Alai dung martamba umur ni jolma, lam jempek ma telomer i. Ujungna, gabe ndang boi be sel i tarbagi. On ma na mambahen hita gabe matua.

Taon 2009, adong sahalak borua na margoar si Elizabeth Blackburn. Hea do ibana manjalo penghargaan Nobel. Ibana dohot angka  donganna, manulingkiti sada zat na boi mambahen telomer asa unang hatop jempek. Alai didok nasida, ndang telomer i na mambahen ganjang umur ni jolma.

Cara na asing na hea dicoba jolma asa unang gabe matua, i ma memprogram ulang sel. Ndang boi be tarbagi sel na adong di pamatang ni halak naung matua. I do na mambahen gabe luka, hansitan dagingna, jala gabe marsahit. Na parpudi on, dicoba angka ilmuwan di Prancis do laho memprogram ulang sel ni halak naung matua. Adong do piga-piga naung marumur 100 taon lobi. Ketua na manguluhon penelitian i, i ma Professor Jean-Marc Lemaître. Didok ibana, naeng dibahen nasida do songon dia asa sel i boi gabe “mulak muse songon sel ni halak na poso”.

BOI DO ILMU PENGETAHUAN MAMBAHEN LAM GANJANG UMURTA?

Nang pe marsitutu angka jolma mambahen asa unang gabe matua, godang do ilmuwan mandok ndang boi jolma tongtong poso. Memang, sian abad 19, hira na lam ganjang do umur ni jolma. Alai boi pe lam ganjang, ala nunga diboto angka jolma do taringot kebersihan jala nunga godang didapot angka ubat dohot vaksin. Porsea do piga-piga ilmuwan molo umur ni jolma nunga ditontuhon batasna.

Hira-hira 3.500 taon naung salpu, disurat si Musa do di Bibel, “Pitupulu taon do ngolunami, ualupulu taon ma molo margogo hami. Alai gok arsak dohot hasusaan do i, alai hatop do i salpu, dung i laos salpu ma dohot hami.” (Psalmen 90:10, Bibel siganup ari) Nang pe marsitutu angka jolma mambahen asa lam ganjang umur, alai tutu do masa na didok si Musa on.

Hape, molo taparrohahon angka tompaan songon bulu babi manang sada jenis korang, boi do umurna lobi sian 200 taon. Jala pohon sequoia raksasa umurna boi sampe marribu taon. Molo tabandingkon umur ni jolma tu umur ni angka tompaan on, gabe sungkun-sungkun do rohanta, ‘Memang holan sahat tu 70 manang 80 taon do umur ni jolma?’