Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Marlas ni Roha di Tingkinta Saonari

Marlas ni Roha di Tingkinta Saonari

DI SADA tingki, ndang adong be jolma na marsahit, matua, jala mate. Boi do dapotmuna hangoluan sisongon i! Alai, godang do parsoalan dohot hasusaan na diadopi angka jolma saonari. Adong do na boi mangurupi hamu? Bibel boi do mangurupi hamu asa marlas ni roha di tingkinta saonari. Taulas ma angka hasusaan na diadopi jolma jala songon dia Bibel boi mangurupi.

MARLAS NI ROHA DI ANGKA NA ADONG DI HAMU

Poda sian Bibel: “Unang ma holongan di hepeng hamu, alai las ma rohamuna di angka na adong di hamu.”​Heber 13:5.

Saonari, godang do angka barang na baru jala didok halak ingkon adong do i di hita. Alai Bibel mandok, boi do hita tongtong marlas ni roha “di angka na adong” di hita. Songon dia carana?

Pasiding ma “holong ni roha tu hepeng”. Ala “holong ni roha tu hepeng”, godang jolma saonari ndang manarihon dirina, keluargana dohot angka donganna. Adong muse na gabe roa pangalahona. Na asing, gabe ndang arga be dirina. (1 Timoteus 6:10) Sasintongna, ndang marbisuk nasida disi! Alana, molo halak na holongan di hepeng ndang boi sonang ngoluna.​—Parjamita 5:9.

Ummarga do jolma sian angka barang. Tutu, boi do marguna angka barang. Alai ndang boi angka barang i mangkaholongi manang mangargai hita. Holan jolma do na boi mangulahon i. Molo adong “aleale”, boi do i mangurupi hita asa marlas ni roha.​—Poda 17:17.

PODA SIAN BIBEL BOI MANGURUPI HITA ASA MARLAS NI ROHA DI TINGKINTA SAONARI

MARTAHAN NANG PE MARSAHIT

Poda sian Bibel: “Las ni roha, i do ubat na dumenggan.”​Poda 17:22, Bibel siganup ari.

Songon “ubat na dumenggan”, las ni roha boi mangurupi hita martahan tingki marsahit. Alai songon dia hita boi marlas ni roha tingki marsahit?

Tongtong ma mandok mauliate. Molo sai hasusaanta sandiri do na tapingkiri, gabe lam susa do tahilala ganup ari. (Poda 15:15) Alai didok Bibel, “tongtong ma hamu mandok mauliate”. (Kolosse 3:15) Mandok mauliate ma hita tu angka na denggan na adong di ngolunta, songon pemandangan na bagak, lambok ni alogo, dohot burju ni roha sian halak na tahaholongi. On boi mambahen hita marlas ni roha.

Mangurupi halak na asing. Nang pe marsahit, boi do taurupi na asing. Alana, “umlas do roha ni halak na mangalehon sian na manjalo”. (Ulaon ni Apostel 20:35) Tingki didok halak mauliate tu hita ala nunga taurupi, gabe las do rohanta jala ndang sai tapingkirhon be hasusaanta sandiri. Boi do tabahen lam denggan ngolunta tingki taurupi halak asa mandapot hangoluan na dumenggan.

 PATOGUHON PARSARIPEON

Poda sian Bibel: “Asa diboto hamu dia na rumingkot.”​Pilippi 1:10.

Molo suami dohot istri ndang jotjot rap, boi do i manegai parsaripeon ni nasida. Ingkon diharingkothon suami dohot istri do parsaripeon ni nasida jala ingkon i do sada na rumingkot di ngolu ni nasida.

Rap mangulahon angka ulaon. Bahen ma rencana asa boi hamu rap di sada ulaon. Bibel mandok, “Dumenggan do dua halak sian apala holan sahalak.” (Parjamita 4:9, Bibel siganup ari) Alani i, boi do hamu rap mangalompa, rap mangan, manang rap mangulahon angka ulaon na asing.

Patudu ma holong tu dongan saripemuna. Didok Bibel, ingkon dipatudu suami dohot istri do holong jala ingkon diargai do dongan saripena. (Epesus 5:28, 33) Burju jala lambok ma hamu tu dongan saripemuna. Manang, boi do dilehon hamu hadiah tu ibana. Tontu, holan tu dongan saripena do suami dohot istri boi mangulahon hubungan seks.​—Heber 13:4.