Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

“Ummarga do hamu.”​—MATEUS 10:31

Diparrohahon Debata do Ahu?

Diparrohahon Debata do Ahu?

HOLONG NI SAHALAK INA TU POSO-POSONA

Disi tubu sahalak poso-poso, ringkot do dipeakkon ibana tu andora ni omakna. Boasa? Alana on boi mambahen asa unang tangis-tangis jala asa tenang dihilala poso-posona i. * Jala boi do dihilala poso-posona i, holong do roha ni omakna tu ibana.

Boasa mansai holong roha ni sahalak ina tu poso-posona? Di majalah The Journal of Perinatal Education, didok sahalak Profesor na margoar si Jeannette Crenshaw ma, adong hormon oksitoksin “na mambahen sahalak ina gabe denggan tingki mangabing, mandideng, dohot manusui poso-posona”. Adong muse hormon na asing “na mambahen sahalak ina gabe mamboto sude na porlu di poso-posona”. On ma na mambahen gabe lam solhot ina dohot poso-posona i. Aha do na boi taparsiajari sian on?

Debata Jahowa * do na mambahen tubu holong ni sahalak ina tu poso-posona. Mandok mauliate do Raja Daud tu Debata ala boi ibana denggan tubu sian “bortian”, jala boi dihilala ibana holong ni omakna tingki mangabing ibana. Didok ibana ma tu Debata, “Sian mulai tubu ahu, tu Ho do hupasahat ngolungku, jala sian bortian dope, Ho hian do Debatangku.”​—Psalmen 22:9, 10, Bibel siganup ari.

RIMANGI MA: Nunga taboto, dibahen Jahowa do sahalak ina asa boi denggan mangkaholongi poso-posona. Jala tangkas do diboto ina i angka na porlu di poso-posona. Didok di Bibel, “Anak ni Debata do hita.” Alani i, dos songon cara ni sahalak ina mangkaholongi poso-posona, pos ma rohanta holong do roha ni Debata tu hita ganup marsada-sada!​—Ulaon ni Apostel 17:29.

NA DIDOK BIBEL TARINGOT HOLONG NI DEBATA

Jesus Kristus ma naung leleng mananda Debata Sitompa hita. Didok ibana, “Nda salimper do digadis dua amporik? Alai, ndang adong nanggo sada pe sian i na madabu tu tano na so pamotoan ni Amamuna. Gari obuk na di ulumuna pe nunga dibilangi sude. Alani i unang ma mabiar, ummarga do hamu sian godang amporik.”​—Mateus 10:29-31.

Boha do molo hita? Sai taparrohahon do angka pidong? Ra ndang pola sai taparrohahon i. Alai diparrohahon Debata do ganup angka pidong i! Di adopan ni Debata, ummarga do jolma sian angka pidong. Jadi parsiajaran aha do na tadapot sian on? “Unang ma mabiar.” Pos ma rohamuna, sai diparrohahon Debata do hamu!

Holong do roha ni Debata tu hita jala diboto Ibana do sude na masa tu hita

 Angka Ayat na paposhon rohanta

  • “Manatap manonggor do mata ni Jahowa tu liat portibi on, marnida halak na jahat dohot na denggan marroha.”​—PODA 15:3.

  • “Sai manatap do mata ni Jahowa tu angka partigor, jala pinggolna tu angguknasida.”​—PSALMEN 34:16.

  • ‘Sai marolopolop jala marlas ni roha ma ahu alani asi ni roham, na tinatapmu dangolhon, na marbinoto i Ho di angka hasusaanki.’​—PSALMEN 31:8.

“NDANG HOLONG ROHA NI JAHOWA TU AHU”

Molo taboto holong do roha ni Debata tu hita, adong do laba ni i tu hita? Adong. Taparrohahon ma na didok si Hannah, * sian Inggris:

“Jotjot do lungun rohangku. Alana huhilala, ndang holong roha ni Jahowa tu ahu jala ndang dialusi Ibana tangiangku. Ra ala hurang do haporseaonku umbahen gabe songon i huhilala. Ndang ringkot ahu di Ibana. Diuhum do ahu jala ndang diparrohahon Ibana ahu.”

Alai, gabe muba do pangkilalaan ni si Hannah. Didok ibana, pos do rohana tu holong ni Jahowa. Boasa boi songon i? Dipatorang ibana, “Huingot ma sada jamita taringot tobusan ni Jesus, na marlaba jala ringkot di ahu. Jahowa do na paradehon i. Gabe pos ma rohangku tu holong ni Jahowa. Sampe tangis do ahu ala dialusi Jahowa tangiangku. Gabe huboto ma, holong situtu do roha ni Debata tu ahu. Asing ni i, lam tangkas do hutanda Jahowa ala marsiajar Bibel jala ro tu parpunguan ni Sitindangi Ni Jahowa. Olo do Ibana mangurupi jala mamparrohahon hita ganup marsada-sada.”

Tutu do na didok si Hannah i. Alai boha do carana asa pos rohamu na diboto Jahowa pangkilalaanmuna? Tadapot ma alusna di halaman na mangihut.

^ par. 3 Adong do piga-piga ina na gabe marsak manang songon na stres dung manubuhon anakna. Alai ndang boi tasalahon omakna i. Lembaga Kesehatan Mental Nasional AS paboahon, na mambahen sahalak ina gabe marsak manang stres dung manubuhon, i ma “ala loja jala hansitan . . . jadi ndang boi tasalahon sahalak ina i”. Laho mamboto gumodang hatorangan taringot on, ida ma majalah Sedarlah! 8 Juni 2003 di halaman 21 na marjudul “Memahami Depresi Pascapersalinan”.

^ par. 5 Jahowa, i ma goar ni Debata na disurat di Bibel.​—Psalmen 83:19.

^ par. 15 Piga-piga goar di majalah on nunga diganti.