Hatop do parlojong ni nasida jala songon soara ni ronggur begeon! Mansai tangkas do digombarhon taringot tu opat hoda dohot na mangkunduli i di Bibel! Na parjolo, i ma hoda na bontar, na dihunduli sahalak raja na mandapot tumpal. Di pudina, ro ma sada hoda na rara songon api jala buaton ni na mangkunduli i ma hadameon sian tano on. Dung i, ro ma muse hoda na patoluhon, na birong situtu, ditiop na mangkunduli i ma sada timbangan jala paboaonna ma na laho masa haraparon. Hoda na paopathon, i ma hoda na pucat, patuduhon na laho masa ma sahit manang na asing na boi parohon hamatean, jala na mangkunduli i margoar Hamatean. Mangihut do tu ibana Banua Toru na laho mambuat hangoluan ni godang jolma!Pangungkapon 6:1-8.

”Mabiar do ahu tingki parjolo sahali hujaha taringot tu na mangkunduli hoda i. Huhilala nunga jonok be Ari Panguhuman i, hape ndang rade dope ahu. Ra, ndang boi ahu malua.”Si Crystal.

”Najolo, sungkunsungkun do rohangku taringot tu opat hoda dohot na mangkunduli i. Alai dung huboto lapatan ni parnidaan i, gabe tangkas ma sude.”Si Ed.

Hea do dihilala hamu songon na nidok ni si Crystal manang si Ed? On ma sada gombaran na diboto godangan halak sian buku Pangungkapon, i ma buku na parpudi di Bibel. Dapotmuna do labana molo diantusi hamu parnidaan on. Boasa? Alana, didok Debata dapotan las ni roha do halak na manjaha, mamparsiajari, jala mangulahon na tarsurat di buku panurirang.Pangungkapon 1:1-3.

Godang do halak na mabiar alani parnidaan taringot tu na mangkunduli hoda on. Alai sasintongna, parnidaan on disurat ndang na laho pabiarbiarhon hita. Gariada, dipatogu jala gabe marpangkirimon do marjuta halak alani i. Hamu pe boi do songon i! Jaha ma buku on.