Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 3 2017

Las do rohangku marsaor dohot angka dongan na poso di huria

 BIBEL MAMBAHEN DENGGAN NGOLUNGKU

Najolo Holan Bisbol do di Rohangku!

Najolo Holan Bisbol do di Rohangku!
  • TUBU TAON: 1928

  • NEGARA ASAL: KOSTA RIKA

  • RIWAYAT HIDUP: GABE ATLET DOHOT PARJUJI

NGOLUNGKU DI UJU I

Magodang di Puerto Limón do ahu, kota pelabuhan di pesisir timur Kosta Rika. Ualu ma hami ianakhon ni natuatuanami jala ahu ma na papituhon. Marumur ualu taon ma ahu tingki marujung ngolu bapa. Alani i, sahalak ni omak do na pagodanggodangkon hami.

Lomo hian do rohangku marbisbol sian dakdanak. Tingki remaja, dohot ma ahu tu tim bisbol. Tingki marumur 20-an, adong ma sahalak agen na manogihon ahu asa dohot tu sada tim na jago di Nikaragua. Alai, ala marsahitsahit omakku jala ahu do na manjaga, ndang olo ahu. Ndang sadia leleng, adong ma muse agen na manogihon ahu asa masuk tu tim bisbol nasional Kosta Rika. Olo ma ahu. Masuk ma ahu tu tim nasional sian taon 1949 sahat tu 1952, jala dohot do ahu martanding di Kuba, Meksiko, dohot Nikaragua. Gabe baseman (pemain bisbol) na jago do ahu. Di bagasan 17 hali pertandingan, ndang hea hubahen hasalaan. Mansai las do rohangku molo joujou halak di goarhu tingki martanding!

Nang pe songon i, mansai rorang do pangalahongku. Nang pe nunga adong hallethu, alai sai marhalletti dope ahu dohot borua na asing. Parmabuk do ahu. Hea do alani mabukna, ndang huingot songon dia parmulakku tu jabu! Asing ni i, parjuji jala partogel do ahu.

Di tingki i, gabe Sitindangi Ni Jahowa ma omakku. Marsitutu do ibana manjujui ahu asa dohot, alai ndang marhasil ibana ala holan tu bisbol do rohangku. Tingki marlatik, ndang huhilala na male nang pe nunga tingkina mangan! Sai holan na tu pertandingan do pingkiranku. Umlomo do rohangku marbisbol sian manang aha pe!

Alai tingki marumur 29 taon, madabu ma ahu tingki manangkup bola jala gabe marsahit alani i. Dung malum, ndang dohot be ahu tu tim bisbol na jago. Alai gabe pelatih tim bisbol di jonok ni jabungku ma ahu.

 SONGON DIA BIBEL PAUBAHON NGOLUNGKU

Taon 1957, dohot ma ahu tu kebaktian ni Sitindangi Ni Jahowa di stadion ingananku marbisbol najolo. Disi, huida ma imbar ni pangalaho ni angka Sitindangi sian halak na manonton bisbol. Pantun do nasida, ndang songon panonton bisbol na gaor. Alani i, gabe taronjar ma rohangku laho marsiajar Bibel dohot Sitindangi jala ro ma ahu tu parpunguan ni nasida.

Las do rohangku mamboto ajaran ni Bibel. Umpamana, didok Jesus do molo di tingki parpudi, laho ma angka siseanna mamaritahon Harajaon ni Debata di liat portibi on. (Mateus 24:14) Huboto ma muse, halak Kristen na sintong ndang digaji tingki marbarita na uli. Didok Jesus do, ”Sibasabasa do i tu hamu; antong, basabasahon hamu ma i!”Mateus 10:8.

Tingki marsiajar Bibel, huparrohahon do na niajarhon ni Sitindangi Ni Jahowa dohot na diulahon nasida. Hupuji do nasida ala ringgas jala ndang marnaloja mamaritahon Harajaon ni Debata di liat portibi on. Diulahon nasida do parenta ni Jesus asa burju tu sude halak. Pintor lomo do rohangku gabe Sitindangi Ni Jahowa tingki hujaha hata ni Jesus di Markus 10:21, na mandok, ”Ro ma ho, ihuthon Ahu!”

Alai ndang mura laho marhamubaon. Umpamana, saleleng martaontaon ganup minggu do ahu manuhor togel. Alai huparsiajari ma sian Bibel, dihagigihon Debata do angka halak na mardebatahon ”debata nasib”, suang songon i nang pangahut. (Jesaya 65:11, Bibel siganup ari; Kolosse 3:5) Alani i, ndang marjuji be ahu. Hape saminggu dungkon ndang martogel be ahu, kaluar ma nomor na jotjot hutuhor! Didok halak ma ahu na oto, ala ndang hutuhor togel di tingki i. Dijujui nasida ma ahu asa dohot muse, alai ndang olo ahu. Mulai sian i, ndang hea be ahu marjuji.

Adong do muse na manguji parangengku ”na imbaru” dung tardidi ahu di kebaktian ni Sitindangi Ni Jahowa. (Epesus 4:24) Dung sidung kebaktian i, mulak ma ahu tu hotel. Disi, jumpang ma ahu dohot hallethu hian jala jongjong ma ibana di pintu ni kamarhu. Didok ibana ma, ”Beta Sammy, marsonangsonang ma hita!” Alai ndang olo ahu, jala hudok ma tu ibana na mangulahon poda ni Bibel do ahu saonari. (1 Korint 6:18) Songgot do rohana umbege i. Diparoaroa ma poda ni Bibel taringot tu ulaon parmainanon jala dijugulhon do mangelaela ahu asa marhallet muse hami. Alai pintor masuk ma ahu tu kamar jala hukunsi ma pintu. Saonari, las do rohangku mandok tongtong do ahu marsihohot sian taon 1958.

LABA NA HUDAPOT

Mansai godang do laba na hudapot ala mangihuthon panogunoguon sian Bibel! Alani godangna, ra boi disurat di sada buku. Pigapiga laba na hudapot, i ma gabe godang alealengku, ngolu na martujuan, dohot las ni roha na sasintongna.

Tong dope marbisbol ahu, alai boi do huorom diringku. Najolo tingki marbisbol, dapothu do hasangapon dohot hamoraon, alai holan parsatongkinan do i. Alai manongtong do paralealeonku tu Debata dohot tu angka dongan. Bibel mandok, ”Na laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata.” (1 Johannes 2:17) Saonari, Jahowa dohot angka naposoNa do na rumingkot di ahu!