Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 SIULASON NI MAJALAH ON | OPAT HODA—NA MANGKORHON TU HAMU

Angka Ise do Na Mangkunduli Hoda I?

Angka Ise do Na Mangkunduli Hoda I?

Songon sada hahomion jala pabiarbiarhon do na mangkunduli hoda i. Alai sasintongna, ndang songon i. Boasa? Alana, Bibel dohot angka na masa saonari mangurupi hita asa mamboto lapatan ni gombaran i. Nang pe i patuduhon angka mara na laho masa di tano on, alai boi do i gabe barita na uli di hita. Boasa? Saonari taparrohahon ma angka ise do na mangkunduli hoda i.

NA MANGKUNDULI HODA NA BONTAR

Songon on ma mula ni parnidaan i, ”Dung i hubereng, jadi adong ma hoda sihapaspili [manang, ”bontar”]; na marsior do na mangkunduli hoda i, dilehon do tu ibana tumpal, laos borhat do ibana marhamonangan, asa monang.”Pangungkapon 6:2.

Ise do na mangkunduli hoda na bontar i? Buku Pangungkapon paboahon molo na mangkunduli i didok ”Hata ni Debata”. (Pangungkapon 19:11-13) Jesus do na didok gabe Hata, ala ibana do na pasahathon Hata ni Debata. (Johannes 1:1, 14) Didok do muse ibana ”Raja ni angka raja jala Tuan ni angka tuan” jala ”Nasatia jala Nasintong”. (Pangungkapon 19: 11, 16, Bibel siganup ari) Tangkas ma, marhuaso do Jesus laho marporang jala ndang pangkeonna huasona i laho mangulahon na sala manang na jahat. Alai, gabe tubu do sungkunsungkun na asing.

Ise do na mangalehon huaso i tu Jesus? (Pangungkapon 6:2) Di bagasan sada parnidaan, diida si Daniel do Messias dipatudos songon ”anak ni jolma”. Jala dilehon Debata Jahowa * ”na so suda arina” i do tu ibana ”pamarentaon dohot hamuliaon dohot harajaon”. (Daniel 7:13, 14) Tangkas ma, Debata do na mangalehon huaso i tu Jesus laho mamarenta jala manguhum. Tama do hoda na bontar na dihunduli Anak ni Debata dipangke laho manggombarhon porang na tigor, ala jotjot do dipangke di Bibel warna na bontar laho manggombarhon hatigoran.Pangungkapon 3:4; 7:9, 13, 14.

Andigan do i masa? Parrohahon ma na mangkunduli hoda na parjolo, i ma Jesus. Dung dapotan tumpal do ibana asa mangkunduli hoda i. (Pangungkapon 6:2) Andigan do Jesus gabe Raja di surgo? Didok di Bibel, ndang pintor gabe raja Jesus dung dipahehe. (Heber 10:12, 13) Dipaboa Jesus do tu angka siseanna angka tanda asa diboto nasida andigan do ibana mulai mamarenta di surgo. Jesus mandok, susa do parngoluon di portibi on di mula ni pamarentaonna i. Masa ma porang, haraparon, dohot angka sahit. (Mateus 24:3, 7; Lukas 21:10, 11) Masa ma i sude ndang leleng dung Porang Dunia na parjolo taon 1914, i ma ari hasusaan na nidok ni Bibel ”tingki parpudi”.2 Timoteus 3:1-5.

Alai boasa ndang lam tu dengganna portibi on, hape nunga gabe raja Jesus di taon 1914? Alana, tingki i di surgo do Jesus mamarenta ndang di tano on dope. Masa ma porang di surgo. Jesus ma na gabe Mikhael na mandabuhon Sibolis dohot angka surusuruanna tu tano on. (Pangungkapon 12:7-9, 12) Alani i, tarrimas situtu do Sibolis ala nunga lam otik tingkina. Tutu, satongkin nai, saut ma lomo ni roha ni Debata laho mangaripashon Sibolis sian tano on. (Mateus 6:10) Taida ma songon dia na mangkunduli hoda na tolu nai mangurupi hita mamboto na mangolu di ”tingki parpudi” do hita saonari. Tangkas do dipaboa ise na mangkunduli hoda na parjolo, alai na mangkunduli  hoda na tolu nai holan gombaran do i taringot tu na laho masa na mangkorhon tu jolma.

NA MANGKUNDULI HODA NA RARA

”Dung i ruar ma hoda na asing, na rara songon api; dilehon ma tu na mangkunduli hoda i huaso mambuat dame sian tano on, asa masiseatan, laos dilehon ma podang na balga tu ibana.”Pangungkapon 6:4.

Na mangkunduli hoda on, manggombarhon porang. Didok, buatonna ma hadameon sian saluhut tano on. Di taon 1914, masa ma porang dunia na parjolo na mansai balga. Dungkon i, masa ma muse porang dunia na paduahon na umbalga sian i. Pigapiga halak mandok, lobi sian 100 juta halak ma na mate alani porang i! Jala, mansai godang do halak na gabe lungka alani i.

Songon dia do pangkorhon ni porang di tingkinta saonari? Di tingkinta saonari ma taboto, na boi do jolma mangaripashon saluhut jolma. Nang pe didok organisasi PBB manang na asing parohon hadameon, alai ndang boi nasida pasohon na mangkunduli hoda na rara i.

NA MANGKUNDULI HODA NA BIRONG

”Jadi huida, adong ma hoda sada na birong; ditiop na mangkunduli hoda i do sada dasing [manang, ”timbangan”] di tanganna. Jadi hubege do songon soara di tongatonga ni na opat parngolu i mandok: Sasolup eme sahupang, jala tolu solup eme na rara sahupang; ia miak dohot anggur, unang hahua!”Pangungkapon 6:5, 6.

Na mangkunduli hoda on manggombarhon haraparon. Sian ayat i, taboto ma mansai arga do sipanganon. Sasolup (0,7 kilogram) eme argana sahupang, i ma gaji ni parkarejo sadari di abad na parjolo! (Mateus 20:2) Jala sahupang i, boi do tong manuhor tolu solup (2,1 kilogram) eme na rara, i ma sipanganon na ummura sian eme. Alani i, maol do mangalehon mangan molo godang ianakhon. Di tingki i, dipasingot do angka halak asa diantan manganhon sipanganon siganup ari, songon miak dohot anggur.

Naung marlojong do na mangkunduli hoda na birong i mulai sian taon 1914? Nunga! Hirahira 70 juta halak ma na mate alani haraparon saleleng taon 1900-an. Sahalak pejabat mandok, ”Saleleng taon 2012 sahat tu 2014, hirahira 805 juta halak, manang sada sian sia halak di portibi on hurangan gizi.” Na asing muse mandok, ”Gumodang do halak na mate alani haraparon sian alani sahit AIDS, malaria dohot tuberkulosis (TBC).” Nang pe godang na diulahon asa boi mangan angka jolma, alai tong do hoda na birong i marlojong.

NA MANGKUNDULI HODA NA PUCAT

”Jadi hubereng, gabe adong ma hoda sada silansat [manang, ”pucat”]; ia goar ni na mangkunduli hoda i, hamatean do, jala mangihut do tu ibana banua toru; jadi dilehon do di nasida huaso tu saparopat ni pangisi ni tano on, mamusa nasida marhitehite podang dohot haleon dohot hamatean hian nang marhitehite binatang angka na di tano on.”Pangungkapon 6:8.

Hoda na paopathon manggombarhon hamatean alani sahit manang na asing. Ndang sadia leleng dung taon 1914, masa ma sahit flu spanyol na pamatehon marpulu juta halak. Ra, hirahira 500 juta halak ma na hona, sapartolu sian penduduk ni portibi on di tingki i!

Alai mulana dope i. Angka ahli paboahon, marratus juta halak mate alani sahit cacar saleleng taon 1900-an. Saonari, gabe jempek do umur ni jolma binahen ni sahit AIDS, tuberkulosis (TBC), dohot malaria nang pe angka dokter marsitutu mangalului ubatna.

Porang, haraparon, manang sahit, parohon hamatean. Jala ndang marnasae Banua Toru papunguhon angka bangke ni na mate.

 NUNGA JONOK ARI NA DUMENGGAN!

Salpu nama sude hasusaan. Ingot ma, di taon 1914 do Jesus ’borhat marhamonangan’ mandabuhon Sibolis tu tano on, alai ndang sae dope parporanganna i. (Pangungkapon 6:2; 12:9, 12) Di Armagedon, salpuhonon ni Jesus ma sude na binahen ni Sibolis jala ripashononna ma angka na mangihuthon ibana. (Pangungkapon 20:1-3) Dipaso Jesus ma na mangkunduli hoda i jala padengganonna ma sude na sega na binahen ni nasida. Songon dia carana? Rimangi ma janji na disurat di Bibel.

Ndang adong be porang. Jahowa ”pasohothon hamusuon ro di ujung ni tano on; Ibana do umponggolhon sior jala ditallihi hujur”. (Psalmen 46:10) Hilalaon ni na lambok roha ma godang hadameon di tano on.Psalmen 37:11.

Ndang adong be haraparon. ”Jadi gabe situtu ma eme di tano on ro di punsu ni angka dolok, humaras [manang, ”godang”] ma parbuena.”Psalmen 72:16.

Salpuhonon ni Jesus ma sude pambahenan ni na mangkunduli hoda na tolu i

Ndang adong be sahit dohot hamatean. Mangolu salelengna ma ganup halak. ”Apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be.”Pangungkapon 21:4.

Tingki di tano on, dipatudu Jesus do aha na laho masa molo dung mamarenta ibana. Dipatudu do roha dame, dilehon do mangan marribu halak, dipamalum na marsahit, jala dipahehe do halak naung mate.Mateus 12:15; 14:19-21; 26:52; Johannes 11:43, 44.

Las do roha ni Sitindangi Ni Jahowa patuduhon sian Bibelmuna songon dia asa rade hamu tingki Jesus pasohon angka na mangkunduli hoda i. Lomo do rohamu mandapot gumodang hatorangan?

^ par. 7 Jahowa, i ma goar ni Debata na disurat di Bibel.