Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Mangolu Salelengna di Tano On

Mangolu Salelengna di Tano On

PANGKIRIMON NA PALASHON ROHA! Marjanji do Debata mangalehon ngolu na salelengna tu hita di tano on. Alai godang do na so porsea tu janji i. Didok nasida, ‘Na ingkon mate do sude jolma. Jala i do na masa.’ Na asing mandok, boi do hita mangolu salelengna, alai ndang di tano on. Didok nasida, ingkon jolo mate do hita baru pe boi mangolu salelengna di surgo. Tutu do i?

Parjolo, taida ma songon dia do alus ni Bibel tu tolu sungkun-sungkun on: Aha do na patuduhon jolma i ditompa asa mangolu salelengna? Aha do sangkap ni Debata tu tano on dohot tu jolma? Boasa ma mate jolma?

SUMURUNG DO JOLMA DITOMPA

Sumurung do jolma ditompa sian sude tompaan na adong di tano on. Sian dia taboto? Didok di Bibel, jolma i ditompa ‘tumiru rupa’ ni Debata jala ‘tudos tu pangalahoNa’. (1 Musa 1:26, 27) Aha do lapatanna? Tingki manompa jolma, dilehon Debata do tu jolma angka parange na adong di diriNa, songon holong dohot hatigoran.

Asing ni i, ditompa do jolma i boi marpingkir, mambahen haputusan, mangantusi na denggan dohot na roa, jala marale-ale tu Debata. Angka parange i ma na mambahen las rohanta mangida uli ni tompaan na asing, mangida seni, mambege musik, dohot puisi. Alai na rumingkot, ditompa do hita asa boi marale-ale tu Debata. I do na mambahen sumurung jolma sian angka tompaan di tano on.

Rimangi ma: Molo holan laho satongkin do ngolu ni jolma jala ingkon mate, boasa ma sumurung jolma i ditompa? Dilehon Debata pe angka parange i tu hita, asa boi do hita marlas ni roha mangolu salelengna di tano on.

BOASA DITOMPA DEBATA TANO ON DOHOT JOLMA

Adong na mandok, ditompa Debata pe jolma, ndang na laho mangolu salelengna di tano on. Didok nasida, inganan parsatongkinan do tano on, laho mamillit angka jolma na tama tu surgo asa mangolu salelengna. Molo tutu do songon i, tontu Debata do na mambahen angka hajahaton dohot hasusaan di tano on. Hape maralo do pandapot sisongon i tu na didok di Bibel. Bibel mandok, “Tau partanobatoan do Ibana, na so hasurahan di  pambahenanna, ai na tigor do luhut dalanna, sihaposan do Debata, ndang adong hageduhonna, na tigor jala na bonar do Ibana.”​—5 Musa 32:4.

Dipaboa do di Bibel boasa ditompa Debata tano on. Didok, “Jahowa do nampuna angka langit ni langitan, alai anggo tano on nunga dilehon tu jolma manisia.” (Psalmen 115:16) Jadi ditompa Debata pe tano on, asa boi do jolma maringanan disi salelengna. Jala diparade do sude angka na ringkot di hita asa marlas ni roha mangolu salelengna.​—1 Musa 2:8, 9.

“Jahowa do nampuna angka langit ni langitan, alai anggo tano on nunga dilehon tu jolma manisia.”—Psalmen 115:16

Asing ni i, dipaboa do di Bibel boasa ditompa Debata jolma. Didok Ibana tu si Adam dohot si Hawa, “Gohi hamu sandok tano on, jala patunduk hamu . . . sude binatang, angka na manjirir di atas tano on.” (1 Musa 1:28) Tontu las do roha ni nasida ala disuru mambahen tano on gabe Paradeiso! Jadi, tingki ditompa Debata si Adam dohot si Hawa, lomo do rohaNa asa mangolu salelengna nasida dohot pinomparna di tano on, ndang di surgo.

BOASA MA MATE JOLMA?

Antong, boasa ma mate jolma? Didok di Bibel, adong sada suru-suruan na mangalo tu Debata. Gabe digoari ma ibana Sibolis jala lomo rohana ndang saut sangkap ni Debata. Aha do na diulahon ibana?

Dioto-otoi Sibolis ma si Adam dohot si Hawa. Didok, adong na ditabunihon Debata sian nasida, i ma parbinotoan laho manontuhon na denggan dohot na roa. Porsea do nasida tu hata ni Sibolis, gabe dohot ma nasida mangalo tu Debata. Ujungna mardosa ma nasida, matua jala mate songon naung didok Debata. Ndang boi be nasida mangolu salelengna di tano on.​—1 Musa 2:17; 3:1-6; 5:5.

Adong do pangkorhon ni dosa ni si Adam dohot si Hawa tu hita saonari? Didok di Bibel, “Masuk do dosa i tu portibi on marhite sada jolma [si Adam]. Jala dosa i parohon hamatean. Ujungna rarat ma hamatean i tu sude jolma.” (Rom 5:12) Jadi ala mardosa do si Adam dohot si Hawa, gabe dohot ma angka pinomparna mate. Ndang ala naung ditontuhon manang direncanahon Debata.

MANGOLU SALELENGNA DI TANO ON

Nang pe si Adam dohot si Hawa mangalo tu Debata, alai na ingkon saut do sangkapNa tu tano on dohot tu jolma. Ala Debata parholong do Jahowa jala na tigor, pintor diparade Ibana do cara asa boi jolma malua sian dosa dohot hamatean. Didok apostel Paulus, “Upa tinuhor ni dosa do hamatean. Alai silehon-lehon ni Debata do hangoluan na saleleng ni lelengna marhite Kristus Jesus Tuanta.” (Rom 6:23) Alani holong ni rohaNa, “Pola do Anakna na sasada i [Jesus Kristus] dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.” (Johannes 3:16) Ala rade do Jesus mangalehon dirina gabe tobusan, boi ma tadapot muse hangoluan naung dipamago si Adam. *

Satongkin nai, saut ma janji ni Debata taringot tu Paradeiso di tano on. Boi ma dapotmu pasu-pasu di Paradeiso molo diulahon hamu hata ni Jesus na mandok, “Masuk ma hamu sian harbangan na sompit, ai bidang jala lambas do dalan tu hamagoan jala godang do halak na masuk sian i. Alai sompit do harbangan jala sosak do dalan tu hangoluan, jala otik do halak na jumpangan i.” (Mateus 7:13, 14) Jadi hamu do na ingkon mamillit, laho mangolu salelengna do manang na ndang.

^ par. 17 Laho mamboto gumodang hatorangan taringot laba ni tobusan tu hita, ida ma pasal 5 sian buku Aha do na Diajarhon Bibel tu Hita? na dipabinsar Sitindangi Ni Jahowa jala adong do buku on di www.jw.org/bbc.