Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Janji na Laho Dipasaut

Janji na Laho Dipasaut

Songon naung disurirangkon Jesus, saonari barita na uli taringot Harajaon ni Debata disarhon di liat portibi on. (Mateus 24:14) Buku Daniel paboahon, Debata do na marhuaso di Harajaon i. Jala dipaboa do di Daniel bindu 2, surirang taringot pamarentaon ni jolma na mangarajai portibi on mulai sian Babel sahat tu saonari on. Daniel 2 ayat 44 mandok:

“Padirion ni Debata, na di surgo i, sada harajaon na so tarpapatu ro di salelenglelengna, gomgomanna pe ndang pasahatonna tu bangso na asing; ropuhanna do tahe sogot saluhut angka harajaon i, jala pansingkononna, alai hot do anggo na sasada i ro di saleleng ni lelengna.”

Asing ni surirang on, adong dope piga-piga surirang na paboahon, holan Harajaon ni Debata ma na mamarenta di tano on. Songon dia do situasi ni ngolunta dung mamarenta Harajaon ni Debata? On ma piga-piga janji ni Debata na laho saut satongkin nai.

  • NDANG ADONG BE PORANG

    Psalmen 46:10: “[Debata] do pasohothon hamusuon ro di ujung ni tano on; Ibana do umponggolhon sior jala ditallihi hujur, dipuruni do angka hureta di bagasan api.”

    Saonari, jotjot do hepeng dohot hapistaran ni jolma dipangke laho mambahen sinjata na parohon jea. Alai di Harajaon ni Debata, sudena i dipangke tu ulaon na denggan! Saut nama satongkin nai janji on.

  • NDANG ADONG BE NA MARSAHIT

    Jesaya 33:24: “Na so tupa be dohonon ni pangisina: Na gale do ahu.”

    Ndang adong be na marsahit jantung, kanker, malaria manang sahit na asing. Ndang porlu be rumah sakit dohot angka ubat. Di ari na naeng ro, sehat do sude jolma.

  • GOK SIPANGANON

    Psalmen 72:16: “Jadi gabe situtu ma eme di tano on ro di punsu ni angka dolok, humaras ma parbuena.”

    Di liat portibi on, subur ma sude tano jala denggan tubu suan-suanan. Ndang adong be na hurangan gizi dohot hurangan sipanganon.

  • NDANG ADONG BE ARSAK NI ROHA, ILU-ILU, DOHOT HAMATEAN

    Pangungkapon 21:4: “Apusan ni Debata ma nasa ilu-ilu sian mata ni nasida. Ndang adong be hamatean nang arsak ni roha, nang angguk-angguk, nang na hansit, ndang disi be. Ai nunga salpu na parjolo i.”

     Mangolu ma hita saleleng-lelengna di tano on jala sonang. On ma janji sian Debata parholong, Debata Jahowa.

INGKON SAUT DO SUDE JANJI NI JAHOWA

Porsea do hamu tu sude janji ni Debata? Hirim do roha ni godangan halak asa boi mangolu salelengna. Alai maol do dapot roha ni nasida taringot hangoluan salelengna, ala ndang adong dope jolma na hea mangolu salelengna.

Sahat tu saonari, mardosa dope jolma jala ingkon mate. Ala godang sahit, sitaonon, dohot hasusaan, godang jolma mandok, i do sangkap ni Debata tu jolma. Alai ndang songon i sangkap ni Debata.

Asa pos rohanta tu angka janjiNa, didok Debata do, “Ndang mulak boti tu ahu, ingkon bahenonna do lomo ni rohangku, jala manjadi tu na hutongos.”​—Jesaya 55:11.

Didok di Bibel, Jahowa i ma Debata “na so margabus”. (Titus 1:2) Ala mansai denggan sude janji ni Debata, pingkirhon hamu ma: Tutu do boi hita mangolu salelengna di tano on? Aha do na ingkon taulahon asa tadapot janji i? Dialusi ma on di halaman na mangihut.