Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Angka Surirang Naung Saut

Angka Surirang Naung Saut

Di halaman tolu dipaboa do taringot si Kroesus na ditaluhon raja sian Persia ala porsea tu hata ni datu sian Delfi. Alai di Bibel, disurat do surirang taringot raja Persia i jala saut do sude naung disurirangkon i.

Hira-hira 200 taon andorang so tubu raja Persia, nunga disurat panurirang Jesaya goar ni raja i, i ma si Sirus jala dipaboa do songon dia ibana manaluhon kota Babel.

Jesaya 44:24, 27, 28: “Songon on do hata ni Jahowa, . . . Ahu do na mandok tu pusat samudora: Marsik ma ho jala angka sungemi arsihanku ma. Na mandok tu si Sirus ibana parmahanku, jala ibana pasauthon nasa lomo ni rohangku; jala dohononna ma tu Jerusalem: Ingkon paulion ma ho! Jala tu bagas joro ingkon ojak ho bahenon!”

Si Herodotus, sejarawan sian Junani mandok, dipamarsik tentara ni si Sirus ma sunge Euprat na mangkaliangi kota Babel. Boi ma nasida masuk tu kota i. Dung ditaluhon si Sirus kota Babel, dipalua ma halak Jahudi na tartaban jala dipaloas mulak laho padengganhon Jerusalem, naung sega di taon 607 SM.

Jesaya 45:1: “Songon on do hata ni Jahowa tu na miniahanna tu si Sirus, na hutiop di tanganna siamun papatuhon angka bangso parbegu di jolona, jala mangkarhari sinjata sian gonting ni angka raja, mangungkap di jolona angka pintu dohot bahal, unang hinsu di dapot.”

Ala timbo tembok ni kota Babel jala dihaliangi sunge, pos do roha ni halak Babel ndang boi masuk musu tusi. Jadi ndang ditutup harbangan ni kota i. Hape, masuk ma tentara ni si Sirus. Autsugari diboto halak Babel na laho ro tentara ni si Sirus, tontu ditutup do sude harbangan ni kota i.

Ndang holan surirang on naung digohi, alai godang dope surirang na disurat di Bibel naung digohi. * Somalna ramalan na dibahen jolma, didok do ro sian angka debata gana-ganaan ni nasida. Alai surirang na disurat di Bibel, ro sian Debata Jahowa. Didok di Bibel, “Ahu palumbahon hian sian mulamula ujungna sogot, ahu marboaboa sian na robi na so masa dope.”​—Jesaya 46:10.

Holan surirang ni Jahowa do na sintong jala tutu masa. Alana lapatan ni goarNa, i ma “Ibana  Mambahen Ibana Pasauthon”. On patuduhon, holan Jahowa do na mamboto jala mambahen angka na laho masa di ari na naeng ro, hombar tu sangkapNa. Alani i pos ma rohanta, saut do sude janjiNa.

ANGKA SURIRANG NAUNG MASA

Taida ma taringot surirang na disurat di Bibel na masa di tingkinta saonari. Hira-hira 2.000 taon naung salpu, Bibel paboahon masa ma “angka ari hasusaan, di angka tingki parpudi”. Boasa didok angka ari hasusaan? Alana saonari, lam godang do masa hajahaton dohot sitaonon na manusai sude jolma. Taida ma aha do surirang ni Bibel “di angka tingki parpudi” on.

2 Timoteus 3:1-5: “Di ari parpudi . . .  mangkaholongi dirina sandiri ma jolma, holongan di hepeng, marhata manggang, patimbohon diri, mangaleai, ndang mangoloi natorasna, ndang diboto mandok mauliate, ndang marsihohot, ndang marroha holong, ndang olo mardos ni roha, paroa-roahon donganna, ndang diboto mangorom diri, parmuruk-muruk, mangkasogohon na denggan, mangulahon na jahat tu donganna, sijogal rungkung, siginjang roha, holongan tu giot-giot ni rohana sian tu Debata, paragama do nasida idaon alai ndang dihangoluhon.”

Tontu satolop do hamu songon i ma pangalaho ni godangan halak saonari on. Godang do saonari diida hamu angka siginjang roha, mangkaringkothon diri sandiri dohot hepeng, lomo-lomona tu donganna, jala ndang olo mardame? Asing ni i, godang do dakdanak na so mangoloi natua-tuana. Torop halak mangkaringkothon lomo ni rohana sandiri, ndang olo palashon roha ni Debata. Jala lam jorbut do sude na masa saonari on.

Mateus 24:6, 7: “Begeonmuna ma soara ni na marporang dohot barita taringot tu angka parporangan. . . . Marporang ma bangso tu bangso jala harajaon tu harajaon.”

Sian taon 1914, lobi sian 100 juta halak na mate alani porang. Sarupa do godang ni halak na mate on tu godang ni penduduk di piga-piga negara. Boi ma dapot rohanta mansai godang do na marhabot ni roha jala susa alani i! Sahat tu saonari, godang dope masa porang.

Mateus 24:7: “Masa ma haraparon.”

Program Pangan Dunia mandok, “Sasintongna, cukup do sipanganon tu sude halak di liat portibi on. Alai, adong 815 juta halak jotjot hurang mangan. Jala godang halak na hurang gizi.” Ganup taon, hira-hira tolu juta ma dakdanak mate alani haraparon.

Lukas 21:11: “Masa ma gempa na mansai gogo.”

Ganup taon, hira-hira 50.000 hali ma masa gempa na gogo. Gempa on godang manegai bangunan. Jala masa do gempa na mansai gogo hira-hira sahali sataon. Jadi sian taon 1975 sahat tu taon 2000, adong 471.000 halak na mate alani gempa.

Mateus 24:14: “Baritahononhon ma barita na uli taringot tu Harajaon i di liat portibi on, asa saluhut bangso mambege barita i, dung pe i asa ro ujungna.”

Saonari, lobi sian ualu juta Sitindangi Ni Jahowa di liat portibi on mamaritahon Harajaon ni Debata di 240 negeri. Marbarita do nasida tu sude halak. Molo nunga didok Debata ndang diulahon be ulaon marbarita, surirang i mandok, “dung pe i, asa ro ujungna”. Lapatanna marujung ma pamarentaon ni jolma. Holan Harajaon ni Debata nama na mamarenta. Janji na dia do na laho dipasaut marhite Harajaon ni Debata? Jaha ma di halaman na mangihut.