Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 2 2017

 SIULASON NI MAJALAH ON | OLO DO HAMU MANJALO SILEHONLEHON NI DEBATA?

Boasa Mansai Arga Silehonlehon i?

Boasa Mansai Arga Silehonlehon i?

Boasa sada silehonlehon mansai arga di hita? Alani na opat on: (1) ise na mangalehon i, (2) boasa i dilehon, (3) aha do na diulahon laho mangalehon i, jala (4) mansai dihaporluhon do i? Molo taboto alus ni opat sungkunsungkun on, boi ma i mangurupi hita lam mangargai silehonlehon ni Debata, i ma tobusan.

ISE NA MANGALEHON?

Silehonlehon boi gabe mararga ala dilehon sahalak parhuaso manang halak na taparsangapi. Adong do muse silehonlehon na mura, alai arga di hita ala na mangalehon i keluarganta manang alealenta. Songon i ma silehonlehon ni si Russell tu si Jordan, na dipaboa di mula ni majalah on. Songon dia do i dipatudos tu tobusan?

Na parjolo, didok Bibel, ”Naung sinuruna [Debata] i Anakna na sasada i tu portibi on, asa mangolu hita marhitehite Ibana.” (1 Johannes 4:9) Ala Debata Natumimbul do na mangalehon i, gabe arga ma i di hita. Taringot Debata Natumimbul, panurat psalmen mandok, ”Asa ditanda nasida sasada Ho do na margoar Jahowa, Natumimbul gumomgom liat portibi on.” (Psalmen 83:19) Ndang adong na tumimbul sian Ibana na mangalehon silehonlehon tu hita.

Na paduahon, didok do Debata i ’Ama’ di hita. (Jesaya 63:16) Boasa? Ibana do silehon hangoluan di hita. Asing ni i, disarihon do hita songon ama na manarihon ianakhonna. Taringot naposoNa najolo, si Epraim, didok Debata do, ”Nda anak hasian si Epraim di ahu? Nda anak hasoloan? . . . Ala ni malala do ateatengku taringot tu ibana, ingkon marpangulahi rohangku mida ibana.” (Jeremia 31:20) Songon i ma pangkilalaan ni Debata tu naposoNa saonari. Ndang holan Sipanompa Ibana di hita alai gabe Ama jala Aleale. Alani i, mansai arga do silehonlehon na sian Ibana!

 BOASA I DILEHON?

Boi do silehonlehon gabe mararga molo dilehon sian ias ni roha, ndang alani terpaksa. Jala ndang marpambuat holong ni halak na mangalehon sian ias ni roha.

Debata mangalehon anakNa ala ni holongNa tu hita. Bibel mandok, ”Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on.” Boasa dilehon i? ”Asa mangolu hita marhitehite Ibana.” (1 Johannes 4:9) Ingkon ulahonon ni Debata do i? Sasintongna ndang! Tobusan ni Jesus patuduhon ’asi ni roha’ ni Debata.Rom 3:24.

Boasa didok silehonlehon ni Debata i patuduhon ”asi ni rohana”? Bibel patorangkon, ”Dipapatar do holong ni rohana i di hita, uju pardosa dope hita, ai disi do mate Kristus humongkop hita.” (Rom 5:8) Holong do na mangonjar roha ni Debata mangurupi jolma na gale, so marpangkirimon jala mardosa. Sasintongna, ndang tama hita manjalo holongNa i jala ndang tarbalosta i. On ma holong na umbalga na dipatuduhon Debata.

AHA DO NA DIULAHON LAHO MANGALEHON I?

Sada silehonlehon boi gabe mararga, ala godang na diulahon laho paradehon sileholehon i. Tingki sasahalak rade mangalehon na mansai arga di ibana tu hita, taargai situtu do silehonlehon i, ala ndang mura mangulahon i.

Dilehon Debata do ”Anakna na sasada i”. (Johannes 3:16) Dohot do Jesus mangurupi tingki ditompa Debata saluhut na di hasiangan on. Jesus do ”haholongan ni rohana” jala ibana do ”suman ni Debata na so tarida i”. (Kolosse 1:13-15) Ndang adong tompaan na umsolhot tu Jahowa asing ni Jesus.

”Ndang diolani Ibana Anakna sandiri.” (Rom 8:32) Dilehon Jahowa do na dumenggan tu hita sude. Ndang adong silehonlehon na ummarga sian i.

MANSAI DIHAPORLUHON DO I

Silehonlehon boi gabe mararga molo mansai dihaporluhon. Umpamana, boha do pangkilalaanmu molo adong sasahalak na rade manggarar biaya rumah sakit na so tolap gararonmu? Tontu arga do silehonlehon i di hamu!

”Songon na di bagasan Adam saluhut mate, songon i di bagasan Kristus sude dipangolu.” (1 Korint 15:22) Ala hita pinompar ni si Adam, ingkon ”mate” do hita. Ndang boi hita malua sian sahit dohot hamatean manang mardame tu Debata jala ndang boi hita manobus dosanta sandiri. Ala mardosa, ndang boi tapalua dirinta manang halak sian dosa. Didok Bibel do, ”So manang tartobus manang ise donganna manang tarlehonsa partobusna tu Debata. Maargahu do partobus ni tondina i.” (Psalmen 49:8, 9) Tahaporluhon situtu do pangurupion! Sasintongna, ndang marpangkirimon be hita.

Alani holongNa, rade do Jahowa manggarar tobusan na tahaporluhon asa boi ”sude dipangolu”. Boasa boi didok songon i? ”Dipaias mudar ni Jesus, Anakna i, do hita sian nasa dosa.” Molo tahaporseai i, boi ma disesa dosanta jala mandapot hangoluan salelenglelengna. (1 Johannes 1:7; 5:13)  Songon dia do tobusan on marlaba tu halak naung mate? ”Songon marhite sian sada jolma songgop hamatean, songon i do marhite sian sada Jolma [Jesus] haheheon ni angka naung mate.”1 Korint 15:21. *

Ndang adong na tumimbul sian Debata na boi mangalehon tobusan i. Ndang adong silehonlehon na umbalga sian tobusan. Ndang adong na boi mangalehon umgodang sian na dilehon Jahowa tu hita. Jala ndang adong silehonlehon na rumingkot sian tobusan na paluahon hita sian dosa dohot hamatean. Holan tobusan do silehonlehon na mansai arga.

 

^ par. 19 Laho mandapot gumodang hatorangan taringot tu sangkap ni Debata pahehehon halak naung mate, ida ma pasal 7 buku Aha do na Diajarhon Bibel tu Hita? na dibahen Sitindangi Ni Jahowa jala rade do di www.jw.org/bbc.