Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 2 2017

 SIULASON NI MAJALAH ON | OLO DO HAMU MANJALO SILEHONLEHON NI DEBATA?

Songon dia Hita Patuduhon Pangargaion tu Silehonlehon i?

Songon dia Hita Patuduhon Pangargaion tu Silehonlehon i?

”Ditiop holong ni roha ni Kristus do hami . . . Humongkop saluhut do Ibana mate, asa unang be mangolu di dirina angka na mangolu i, asa mangolu nasida di Ibana.”2 Korint 5:14, 15.

SILEHONLEHON na mararga mangonjar rohanta patuduhon hamauliateon. Diajarhon Jesus do on tingki dipamalum ibana sampulu baoa na marsahit kusta. ”Mulak do sahalak sian nasida, dung diida, naung gabe malum ibana; dipagogo ma soarana mamuji Debata.” Didok Jesus ma, ”Nda sampulu nasida naung gabe ias? Didia do na sia nari?” (Lukas 17:12-17) Aha ma parsiajaranna? Mura do hita lupa di haburjuon ni sasahalak!

Imbar do tobusan sian silehonlehon na asing. Ummarga do i sian manang aha. Boha do pangkilalaanta tu na diulahon Debata di ngolunta?

  • Ingkon tatanda do Silehon tobusan i. Ndang pintor mangolu salelengna jolma dibahen tobusan i. Alani i didok Jesus do di tangiangna, ”Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna.” (Johannes 17:3) Molo adong na paboahon tu hamu taringot sasahalak na hea mangurupi hamu malua sian parmaraan tingki dakdanak, olo do hamu mananda halak i jala mamboto boasa olo ibana paluahon hamu? Dihalomohon Jahowa Silehon tobusan i do asa tatanda jala maraleale hita tu Ibana. Didok  do di Bibel, ”Pajonok hamu ma tu Debata, dung i pajonohonna ma tu hamu!”Jakobus 4:8.

  • Patudu ma na porsea hamu tu tobusan i. ”Dapotan hangoluan na salelenglelengna do na mangkaporseai Anak i.” (Johannes 3:36) Aha do lapatan ni mangkaporseai anak i? Haporseaonta ingkon tarida sian parniulaon. (Jakobus 2:17) Sada silehonlehon boi tadapot molo marsitutu hita mambuat jala manjalo i. Suang songon i tu tobusan. Aha na ingkon taulahon? Parsiajari ma aha na dipangido Debata jala ulahon ma. * Martangiang ma tu Debata mangido asa disesa dosanta jala asa ias panggora ni rohanta. Patudu ma haporseaon tu Debata na mangalehon tobusan na boi parohon hadameon, hahipason dohot hasonangan tu halak na porsea!Heber 11:1.

  • Ro tu Parningotan hamamate ni Jesus. Jesus paboahon tu hita asa marningot tobusan marhite sada ulaon. Didok ibana, ”Ula hamu ma i, bahen parningotan di Ahu!” (Lukas 22:19) Sitindangi Ni Jahowa mambahen parningotan ari hamamate ni Jesus di ari Selasa, 11 April 2017 dung bot mata ni ari. Di ulaon on adong jamita na patorangkon boasa ingkon mate Jesus jala aha do labana tu hita saonari nang tu ari na naeng ro. Hirahira sajom do ulaon on. Taon na salpu, hirahira 20 juta na ro tu parningotan i di liat portibi on. Las rohanami manggokkon hamu patuduhon pangargaion tu silehonlehon na arga sian Debata.

^ par. 7 Cara na dumenggan asa mananda jala jonok tu Debata i ma marhite marsiajar sian HataNa, Bibel. Pangido ma pangurupion sian Sitindangi Ni Jahowa manang ida ma situsnami di www.jw.org/bbc.