Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Pas do Hatorangan ni Bibel

Pas do Hatorangan ni Bibel

SAINS

BIBEL NDANG BUKU SAINS, ALAI ISINA HOMBAR TU SAINS. ON MA PIGAPIGA CONTOHNA.

Songon dia do mula ni langit dohot tano on?

Godang ilmuwan na mandok, langit dohot tano on ndang ditompa. Alai saonari, didok nasida do molo langit dohot tano on ditompa. Hape, Bibel nunga mandok songon i sian najolo.​—1 Musa 1:1.

Songon dia do bentuk ni tano on?

Najolo, godang do na porsea molo tano on dosdos. Alai di abad na palimahon SM, angka ilmuwan sian Junani mandok tingko do tano on. Leleng andorang so adong hatorangan i, di abad na paualuhon SM, si Jesaya manurat taringot ”liat portibi on”. (Jesaya 40:22) Di terjemahan ni Bibel na asing, hata on diterjemahon gabe ”portibi na tingko”.

Lam tu segana do langit sian taon tu taon?

Di abad paopathon SM, sahalak ilmuwan sian Junani na margoar si Aristoteles mangajarhon, ndang na laho sega langit i, holan tano on do na sega. Godang do na porsea tu hatorangan on saleleng marratus taon. Alai di abad 19 M, didapot angka ilmuwan ma sada hatorangan na paboahon, boi do sega langit dohot tano on. Sahalak ilmuwan na digoari Lord Kelvin satolop tu hatorangan on. Didok ibana, Bibel pe paboahon, ”Laho buruk do ianggo nasida sude songon ulos.” (Psalmen 102:26, 27) Alai porsea do si Kelvin, songon na dipaboa di Bibel, linggoman ni Debata do tompaanNa asa unang sega.​—Parjamita 1:4.

Adong do na manungkol tano on?

Didok si Aristoteles, di luar ni tano on adong godang lapisan jala songon i torus marlapislapis. Bagian sian tano on do angka lapisan i, jala tano on adong di bagasan angka lapisan i. Alai di abad 18 M, diangkui angka ilmuwan ma molo angka bintang dohot planet targantung di na soada. Hape di buku Job, na disurat di abad 15 SM, nunga didok hian Debata ”manggantungkon tano on tu atas ni na soada”.​—Job 26:7.

PARUBATAN

BIBEL NDANG BUKU KESEHATAN, ALAI NUNGA DIPABOA HIAN HATORANGAN TARINGOT KESEHATAN DISI.

 Papulikkon na marsahit.

Di Patik ni si Musa, adong do parenta na mandok asa dipapulik sude halak na hona kusta. Alai, hirahira 700 taon naung salpu ma angka ilmuwan mamboto taringot i, jala marlaba do i sahat tu saonari.​—3 Musa, bindu 13 dohot 14.

Manunsi tangan dungkon maniop bangke ni jolma.

Sahat tu abad 19 M, jotjot do angka dokter maniop bangke ni jolma, alai ndang disunsi tangan ni nasida andorang so mangubati pasien na asing. Gabe godang do na mate alani i. Hape nunga dipaboa hian di Patik ni si Musa, molo adong na maniop bangke ni na mate, ingkon dipaias do dirina. Jala ingkon songon i do torus diulahon, alana mangkorhon na denggan do i tu kesehatan.​—4 Musa 19:11, 19.

WC.

Ganup taon, adong satonga juta dakdanak mate alani diare. Boasa? Ala ndang diparade inganan laho mambolongkon kotoranna jala gabe marserak. Hape, nunga dipaboa hian di Patik ni si Musa asa ditanom sasahalak kotoranna jala dao dibahen sian inganan ni nasida tading.​—5 Musa 23:14.

Tingki na pas laho disunat.

Di Patik ni si Musa, didok do asa disunat angka dakdanak baoa tingki marumur ualu ari. (3 Musa 12:3) Alana tingki baru tubu posoposo, di umur ualu ari i ma mudarna boi denggan membeku. Hape andorang so adong dope perawatan kesehatan, nunga diihuthon halak Israel be cara sisongon on.

Dame ni roha parohon hahipason.

Angka dokter dohot ilmuwan mandok, mangkorhon na denggan do tu kesehatan molo las roha, dame pangkilalaan, marpangkirimon, jala rade manalpuhon hasalaan. Jala didok do di Bibel, ”Roha na hilas manumpak hahisaron, alai anggo tondi na gondok pamalas holiholi.”​—Poda 17:22.