Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 1 2018

Poda ni Bibel Tongtong Marlangku

Poda ni Bibel Tongtong Marlangku

RIMANGI MA ON: Laho hamu mardalani tu sada museum jala godang barang na bersejarah disi. Adong naung sega jala lapuhon. Alai adong sada barang na denggan dope, jala bagak idaon. Disungkun hamu ma tu sasahalak na mandongani hamu tusi, ”Barang na baru do on?” Dialusi ibana ma, ”Ndang. Aslina dope on, jala ndang hea dope diganti.” Disungkun hamu muse, ”Hea do on dibahen tu sada inganan asa unang sega?” Didok ibana ma, ”Ndang hea. Sai dison do on. Jala godang do halak naeng manegai barang on.” Gabe sungkunsungkun do ra rohamu, ’Sian aha do on dibahen?’

Tarsongon barang na bersejarah i ma Bibel. Alana, Bibel ma buku na umtua sian sude buku. Tutu, godang do buku naung leleng. Alai, angka buku i sarupa songon barang na bersejarah naung sega nangkin. Nang pe adong hatorangan taringot sains di buku sisongon i, alai maralo do hatorangan i tu parbinotoan di tingkinta saonari. Adong do muse hatorangan taringot parubatan di buku sisongon i. Alai, parubatan i ndang cocok be saonari. Asing ni i, godang do angka buku na bersejarah naung sega jala mago pigapiga isina.

Imbar do Bibel sian buku na asing. Bibel disurat lobi sian 3.500 taon naung salpu jala ndang hea diuba isina. Nang pe godang na marsitutu laho manutung sude Bibel, mangorai halak manjaha Bibel, alai tongtong do Bibel martahan sahat tu saonari. Asing ni i, adong do hatorangan di Bibel na pas sahat tu tingkinta saonari.​—Ida kotak ”Pas do Hatorangan ni Bibel”.

 MARISI PODA NA TAHAPORLUHON

Sungkunsungkun do ra rohamu, ’Porlu dope tajaha poda ni Bibel?’ Laho mandapot alusna, rimangi ma: ’Angka sitaonon na songon dia do na jotjot masa saonari? Na dia do na mambahen hamu marsak?’ Ra, marsak do hamu ala adong porang, polusi, hajahaton, manang korupsi. Alai, rimangi ma pigapiga poda na disurat di Bibel. Dung i, sungkun ma dirimu, ’Molo godang na mangihuthon poda on, songon dia do situasi di portibi on?’

MARDAME

”Martua ma sibahen dame, ai goaron do nasida anak ni Debata!” (Mateus 5:9) ”Molo tarbahen, intap na tarpatupa hamu, tiop hamu ma dame maradophon halak saluhutna!”​—Rom 12:18.

RADE MANALPUHON HASALAAN

”Martua ma na asi roha, ai siasian do nasida!” (Mateus 5:7) ”Masipauneunean jala masisesaan dosa ma hamu, jumpa marpangkurangi na sada dompak donganna; songon panesa ni [Jahowa] * di hamu, songon i ma nang hamu!”​—Kolosse 3:13.

MARSADA NI ROHA

”Sian sada jolma do dipatupa Ibana saluhut bangso ni manisia, asa diingani liat sisik ni tano on, dibuhul hian do tingki ni angka bangso i ro di parbalohan ni siinganannasida.” (Ulaon ni Apostel 17:26) ”Dung i mangkuling ma si Petrus, ninna ma: Nunga tangkas dapot rohangku, na so siida bohi Debata! Sian ganup bangso do tahe jangkononna angka na mangkabiari Ibana jala mangulahon hatigoran.”​—Ulaon ni Apostel 10:34, 35.

MANGURUS TANO ON

”Dung i ditogihon Debata Jahowa ma jolma i paojakkon ibana tu porlak Eden i, asa dipaulaula jala diramoti.” (1 Musa 2:15) Jahowa ”mangago angka na mangago tano i”.​—Pangungkapon 11:18.

NDANG MANGAHUT JALA DENGGAN MARPARANGE

”Pasiding hamu ma nasa haholiton! Ai nang pe marlobilobi halak, ndada sian artana i ngoluna.” (Lukas 12:15) ”Alai parmainanon dohot ragam ni harorangon ro di pangahution, unang ma targoar di hamu; ai songon i do tama di angka na badia.”​—Epesus 5:3.

JUJUR JALA RINGGAS KAREJO

”Huringkoti hami marparange na denggan di na saluhut.” (Heber 13:18) ”Naung manangko i, unang be manangko; mulaulaon ma ibana.”​—Epesus 4:28.

MANGURUPI NA SUSA

”Apuli hamu ma angka siotik roha, anju hamu ma angka na gale, lambas ma rohamuna dompak saluhutna!” (1 Tessalonik 5:14) ”Mandulo angka na so marama, so marina dohot angka na mabalu di haporsuhonnasida.”​—Jakobus 1:27.

Ringkot do taulahon angka poda on di ngolunta ganup ari. Diurupi do hita mamboto songon dia cara mangulahon i. Molo godang na mangulahon angka poda naung dipaboa nangkin, tontu  mangkorhon na denggan do on tu sude jolma. Sian on taboto, marlangku do poda ni Bibel sahat tu saonari! Antong, aha do laba ni poda ni Bibel tu hamu?

LABA NI PODA NI BIBEL

Jesus mandok, ”Gabe pintor do Hapistaran [manang, bisuk] i dipintori angka pambahenanna i.” (Mateus 11:19) Sasahalak boi didok marbisuk molo nunga diulahon na pinarsiajaranna. Olo do ra sungkunsungkun rohamu, ’Molo hujaha Bibel, aha do huroha labana di ahu? Boi do i mangurupi ahu mangadopi sitaonon?’ Parrohahon ma pengalaman on.

Tabo do ngolu ni si Sophia * jala godang do ulaonna. Alai tompu ma susa ngoluna. Mate ma boruna jala sursar parsaripeonna. Didok ibana, ”Marsak situtu do ahu ala mate borungku, ditadingkon tungganedolingku ahu, jala ndang adong be jabungku. Hansit do huhilala, ndang margogo, jala ndang marpangkirimon.”

Baru pe diboto si Sophia na sintong do hata ni Bibel na mandok, ”Ariari ni taonnami, intap pitupulu taon do i, jala molo marhagogoon situtu dieak do ualupulu taon, jala hinadenggan nasida do hangaluton dohot halojaon, ai hatop situtu  do laho salpu, jala habang do hami.”​—Psalmen 90:10.

Dilului si Sophia do poda sian Bibel asa boi adopanna sitaononna. Marlaba situtu do i di ibana. Songon na laho taulas di halaman ualu sahat tu sampulu tolu, godang do na mangihuthon poda ni Bibel jala mandapot laba sian i. Diboto nasida do molo Bibel i sarupa songon barang na bersejarah na dipaboa di mula ni majalah on. Antong, boasa imbar Bibel i tu buku na asing? Alana Bibel i marisi Hata ni Debata, ndang hata ni jolma.​—1 Tessalonik 2:13.

Saonari, godang do hasusaan dohot sitaonon. Tingki masa sisongon i, tudia do hamu mangalului pangurupion asa dame pangkilalaanmu?

Saonari, taulas ma laba ni poda ni Bibel. Dapotmuna ma hatorangan boha asa boi

  1. pasidingkon ulaon na parohon masalah.

  2. mandapot pangurupion laho mangadopi masalah.

  3. marhasil mangadopi masalah.

Diulas ma taringot on di halaman na mangihut.

^ par. 10 Jahowa, i ma goar ni Debata na disurat di Bibel.​—Psalmen 83:19.

^ par. 24 Di halaman onom sahat tu sampulu tolu, pigapiga goar nunga diganti.