Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 1 2018

1 Pasidingkon Ulaon na Parohon Masalah

1 Pasidingkon Ulaon na Parohon Masalah

Bibel marisi poda sian Debata na ”hasea mamodai, maminsang, pauliulihon, manogunogu di bagasan hatigoran”. (2 Timoteus 3:16) Tutu do i? Parrohahon ma songon dia Bibel mangurupi godang halak pasidingkon masalah, asa unang parohon jea.

PAGODANGHU MANGINUM ALKOHOL

Taingot ma muse si Sophia na dipaboa di halaman onom. Sai diinum do alkohol ala pamarsakhu ibana. Tutu, ndang diorai Bibel hita manginum alkohol. Alai didok di Bibel, ”Unang ma pardongan parminum anggur dohot na hisap tu jagal.” (Poda 23:20, Bibel siganup ari) Molo pagodanghu manginum alkohol, boi parohon sahit, manegai paralealeon, jala godang na mate ganup taon. Alai boi do on ndang masa molo diihuthon poda ni Bibel.

I ma na diulahon si Sophia. Didok ibana, ”Huboto ma ndang boi alkohol pamagohon arsak ni rohangku. Huulahon ma na didok Pilippi 4:6, 7, ’Unang holsohon agia aha. Alai, pabotohon ma tu Debata pangidoanmu.’ Ganup borngin do marsak rohangku. Martangiang ma ahu tu Jahowa. Hupaboa ma sude na di rohangku jala ndang huboto be aha sibahenonku. Hupangido ma asa unang asingasing pingkiranku. Disi dungo, marsitutu ma ahu manjaga pingkiranku tongtong denggan. Ndang pamarsakhu be ahu mamingkiri sitaononku. Ndang huinum be alkohol. Huhilala ma dame ni roha, jala ndang olo ahu mago i sian diringku.”

 MANGULAHON SEKS NA SO PATUT

Parohon jea dohot hasusaan do mangulahon seks na so patut. Alai, diurupi Bibel do hita asa unang taulahon i. Dipaboa do aha na boi mambahen hita mangulahon seks na so patut, umpamana manggoda dohot manonton film porno. Si Samuel mandok, ”Mura do manggoda borua. Sipata, ndang na lomo rohangku tu borua i. Alai, ala huboto lomo rohana tu ahu, hugoda ma ibana.” Gabe didok angka halak ma si Samuel panggoda, hape ndang songon i ibana. Ujungna, tutu ma ibana gabe panggoda. Maralo do on tu rohana. Didok ibana, ”Ndang denggan manggoda, alana boi mambahen holan dirinta na taharingkothon.”

Dijaha si Samuel ma sijahaon tu angka na poso di situs web jw.org. Dirimangi ma Poda 20:11, na mandok, ”Nang dakdanak [baoa] tartanda do marhite sian angka parulaonna, manang na toman, manang na tigor ulaonna.” Songon dia ayat on mangurupi ibana? Diboto si Samuel ma sala do manggoda. Didok ibana, ”Molo lomo roha ni sasahalak manggoda, ndang boi ibana gabe dongan saripe na denggan. Hurimangi ma, boha ma annon pangkilalaan ni tungganeborungku molo sai hugoda borua na asing. Huboto ma, nang pe mura manggoda, alai sala do i.” Marhamubaon ma si Samuel. Ndang manggoda be ibana, jala boi ma dipasiding seks na so patut.

Ala lomo roha ni si Antonio manonton film porno, molo ndang manat, boi do gabe diulahon seks na so patut. Nang pe nunga marhasohotan, tongtong do ibana manonton film porno. Alai dirimangi si Antonio ma 1 Petrus 5:8. Didok disi, ”Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna.” Didok si Antonio, ”Manang didia pe, adong do gambar porno jala boi leleng longkot di pingkiran. Film porno i sian Sibolis. Jadi sian ayat on, huboto ma film porno i boi mangelaela ahu mangulahon seks na so patut. Saonari huboto ma boi do Jahowa mangurupi ahu ’marpingkiran na ias jala dungo’. Boi ma hubolongkon pingkiran dohot roha na rorang, asa tongtong denggan parsaripeonku.” Boi do si Antonio mambolongkon hasomalan na rorang. Ujungna, ndang parohon jea be parniulaonna.

Sian on taboto, diurupi Bibel do hita mambolongkon hasomalan na rorang na parohon jea dohot hasusaan. Alai, songon dia do bahenonta molo hasomalan na so denggan i maol tabolongkon? Taulas ma songon dia Bibel mangurupi hita.

Diurupi Bibel do hita mambolongkon hasomalan na parohon jea