Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 1 2018

2 Pangurupion Laho Mangadopi Masalah

2 Pangurupion Laho Mangadopi Masalah

Adong do masalah na maol taadopi jala nunga masa saleleng martaontaon. Jala olo do ra nunga jolo balga masalah i, baru pe taboto na ingkon tapasae masalah i. Boi do Bibel mangurupi hita mangadopi masalah sisongon i? Parrohahon ma pigapiga contoh.

JOTJOT MARSAK

Didok si Rosie, ”Jotjot do ahu marsak ala sai hupingkiri angka na ngeri. Hape so masa dope i.” Alai adong do ayat na mangurupi ibana, i ma Mateus 6:34, ”Antong, unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari.” Hata na dipaboa Jesus i mangurupi si Rosie asa unang pamarsakhu mamingkiri ari marsogot. Didok ibana, ”Sai adong do masalah. Alai ndang pola pamarsakhu be ahu mamingkiri angka na so masa dope.”

Si Yasmine na jotjot marsak mandok, ”Jotjot do ahu tumatangis di bagasan saminggu. Sipata ndang boi ahu modom. Ala asingasing na hupingkiri, gabe busisaon ma ahu.” Alai adong do ayat na mangurupi ibana, i ma 1 Petrus 5:7, ”Tinggangkon hamu ma nasa na hinolsohon ni rohamuna tu Ibana, ai disarihon do hamu!” Didok si Yasmine, ”Sai martangiang do ahu tu Jahowa, jala dialusi do tangiangku. Lumbang ma pangkilalaanku. Nang pe sipata marsak ahu, alai nunga huantusi cara mangadopi i.”

 NDANG PINTOR DIULAHON ULAONNA

Si Isabella mandok, ”Ala bapakku pe jotjot ndang pintor mangulahon ulaonna, ahu pe gabe songon i. Jotjot do ndang pintor huulahon ulaon na ringkot ala manonton TV manang na asing. Ndang adong laba ni parange sisongon i. Alana gabe stres do hita jala ndang denggan mangulahon ulaonta.” Alai adong do ayat na mangurupi ibana, i ma 2 Timoteus 2:15, ”Haringgashon patuduhon haburjuonmi di Debata, songon pangula na so tarila, na padalanhon hata hasintongan i tigortigor.” Didok si Isabella, ”Ndang olo ahu gabe maila Jahowa ala ndang pintor huulahon ulaonku.” Saonari, ndang songon i be ibana.

Si Kelsey mandok, ”Jotjot do ndang pintor huulahon ulaonku. Dung naeng dapot pe tingkina baru huulahon. Tangis ma ahu, ndang boi modom, jala marsak huhilala.” Alai adong ayat na mangurupi ibana, i ma Poda 13:16, ”Luhut na niula ni halak na bisuk maraturan do, alai anggo na bodo pararat habodoonna do.” Dung dirimangi ayat i, didok ibana, ”Ingkon tapingkiri hian do na laho taulahon. Saonari di mejangku, hubahen do jadwal asa boi huulahon ulaonku pas di tingkina.”

LUNGUNLUNGUNAN

Didok si Kirsten, ”Ditadingkon tungganedolingku ma ahu dohot opat ianakhonnami.” Nang pe songon i, adong do ayat na mangurupi ibana, i ma Poda 17:17, ”Manang ise na tongtong marholong ni roha, i ma aleale, alai tartulluk di hagogotan pe ianggo dongan situtu.” Dung i dipangido si Kirsten do pangurupion sian angka dongan na manomba Jahowa. Songon dia do pangkilalaanna? Didok ibana, ”Godang do cara ni nasida laho mangurupi ahu! Ditaruhon do sipanganon dohot bunga tu jabungku. Tolu hali ma diurupi nasida hami pinda jabu. Diurupi do ahu mangalului karejo. Sai rade do nasida mangurupi ahu.”

Taingot ma si Sophia na dipaboa di halaman ualu. Lungun do rohana tingki mangida sasahalak marlas ni roha dohot keluargana, hape ibana holan sahalakna. Alai adong ayat na mangurupi ibana, i ma Psalmen 68:7, Bibel siganup ari, ”Ibana do mangalehon parmianan [manang, jabu] di halak na so adong sisolhotna.” Didok ibana, ”Lapatan ni ayat on ndang holan taringot jabu na taingani. Alai taringot pangkilalaanta na dame tingki rap dohot dongan sahaporseaon. Las do roha ala boi rap dohot angka halak na mangkaholongi Jahowa. Alai huboto, ingkon jolo solhot do paralealeonku tu Jahowa asa boi jonok tu nasida. Las rohangku manjaha Psalmen 37:4, ’Halomohon Jahowa, jadi lehononna ma tu ho pinangido ni roham.’”

Didok si Sophia muse, ”Huboto ma, ringkot do tongtong patoguhon paralealeon tu Jahowa. Alana, Ibana do Aleale na dumenggan sian saluhut. Hubahen ma daftar na laho ulahononku raphon angka dongan na mangkaholongi Jahowa, asa boi ahu maraleale dohot nasida. Angka na denggan do na huida sian nasida.”

Tutu, angka na manomba Jahowa pe angka halak na so sempurna do. Godang do masalah na diadopi Sitindangi Ni Jahowa. Alai ala marsiajar Bibel, marsitutu do nasida mangurupi na asing. Nasida ma na porlu tadongani. Alai molo adong masalahta na so marnasae dope, umpamana taringot kesehatan manang tingki marhabot ni roha, adong do poda ni Bibel na boi mangurupi hita?

Molo diulahon hamu poda ni Bibel, dapotmu ma aleale na sai rade mangurupi