Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 1 2018

Bibel dohot na Tinuju ni Ngolumuna

Bibel dohot na Tinuju ni Ngolumuna

RIMANGI MA mardalan hamu bornginborngin jala golap situtu. Alai, nang pe songon i ndang mabiar hamu lilu, ala diboan hamu do senter. Molo disenter hamu tu toru, gabe tiur ma dalan i. Molo disenter hamu tu jolo, boi ma idaonmu dao tu jolo.

Tarsongon senter i ma Bibel. Songon naung taulas di halaman ualu sahat tu sampulu tolu, boi do Bibel mangurupi hita mangadopi angka masalah di portibi on. Alai, ndang holan i laba ni Bibel. Molo taparsiajari Bibel, taboto ma taringot ari na naeng ro jala diurupi ma hita mangkilala las ni roha dohot hadameon. (Psalmen 119:105) Tutu do i?

Molo tajaha Bibel, taboto ma: 1 aha na tinuju ni ngolu on, jala 2 songon dia asa boi maraleale tu Debata.

1 NA TINUJU NI NGOLU ON

Godang do laba ni poda ni Bibel laho mangurupi hita mangadopi masalah. Alai Bibel i ndang holan marisi tudutudu sambing. Dijujui Bibel do hita mamingkirhon angka na rumingkot, ndang holan taringot dirinta sandiri. Molo taulahon songon i, denggan ma ngolunta jala taboto ma na tinuju ni ngolu on.

Umpamana, didok di Bibel, ”Martuaan do na mangalehon sian na manjalo!” (Ulaon ni Apostel 20:35) Hea do ra diurupi hamu sasahalak na mangkaporluhon pangurupion. Manang, rade hamu manangihon donganmu paboahon arsak ni rohana. Tontu, las do rohamuna boi mangurupi angka halak sisongon i.

 Molo talehon silehonlehon jala ndang tahirim balosna, tadapot ma las ni roha. Sahalak baoa mandok, ”Molo rade mangurupi, dapotta ma godang pasupasu, alai unang ma pola tahirim adong balosna.” Molo taurupi halak, tarlumobi tu na so boi mangalehon balosna, jaloonta do balosna sian Debata. Alana didok di Bibel, songon na pasali Debata do hita molo tapatudu burju dohot asi ni roha. (Poda 19:17) Las do roha ni Debata molo taurupi dongan na susa, jala marjanji do Ibana mangalehon pasupasu, i ma hangoluan na salelengna di paradeiso. On ma pangkirimon na mansai arga di hita!​—Psalmen 37:29; Lukas 14:12-14. *

Na rumingkot, dipaboa do di Bibel, boi do martujuan ngolunta molo tasomba Debata na sintong, i ma Jahowa. Dijujui Bibel do asa tapuji, tapasangap, jala taoloi Debata, ala tama do bahenonta songon i tu Ibana. (Parjamita 12:13; Pangungkapon 4:11) Molo taulahon i, las ma roha ni Debata. Didok do tu hita, ”Marbisuk ma ho . . . jala sai palas ma rohangku.” (Poda 27:11) Molo taulahon poda ni Debata na disurat di Bibel, las ma rohaNa mangida hita. Holong do rohaNa tu hita jala lomo rohaNa asa taoloi Ibana. Alana, godang do laba ni i tu hita. (Jesaya 48:17, 18) Na dumenggan di ngolunta, i ma molo talehon dirinta manomba Debata, Sitompa saluhut jala mangolu hombar tu lomo ni rohaNa.

2 MARALEALE TU DEBATA

Marhite Bibel, diurupi do hita asa maraleale tu Debata. Bibel mandok, ”Pajonok hamu ma tu Debata, dung i pajonohonna ma tu hamu!” (Jakobus 4:8) Sipata, olo do didok rohanta ndang boi hita maraleale tu Debata. Alai Bibel paposhon rohanta, molo ’talului Debata’, boi ma ’jumpangta’ Ibana, ala ’ndang na dao Ibana sian hita’. (Ulaon ni Apostel 17:27) Molo maraleale tu Debata, denggan ma ngolunta saonari dohot di ari na naeng ro. Tutu do i?

Rimangi ma: Manang aha pe na tabahen, ndang boi hita malua sian hamatean. (1 Korint 15:26) Alai molo Debata, tongtong do mangolu salelengna. Boi do bahenonNa hita malua sian hamatean jala mangolu salelengna. Didok Debata do tu angka alealeNa, ”Anggiat ma martua [hamu] ro di salelenglelengna.”​—Psalmen 22:27.

Songon dia do carana asa boi maraleale tu Debata? Tongtong ma parsiajari Bibel. (Johannes 17:3; 2 Timoteus 3:16) Pangido ma bisuk asa boi diantusi hamu isi ni Bibel. Didok di Bibel, molo ’tapangido’ bisuk sian Debata, lehononNa do i tu hita. * (Jakobus 1:5) Dung i, marsitutu ma mangulahon na pinarsiajaranmu. Bahen ma Bibel i gabe ”sulusulu” jala ”hatiuron” di dalanmuna, saonari ro di saleleng ni lelengna.​—Psalmen 119:105.

^ par. 8 Laho mamboto gumodang hatorangan taringot hangoluan na salelengna di Paradeiso, ida ma pasal 3 di buku Aha do na Diajarhon Bibel tu Hita? na dipabinsar Sitindangi Ni Jahowa.

^ par. 13 Las do roha ni Sitindangi Ni Jahowa mangurupi hamu mangantusi isi ni Bibel. Laho mamboto taringot on, ida ma video Songon dia do Parsiajaran Bibel na Diulahon Hami? di jw.org/bbc.

Tongtong do Debata mangolu salelengna, jala boi do bahenonNa hita mangolu salelengna