Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 1 2017

 SIULASON NI MAJALAH ON | ASA TADAPOT LABA SIAN MANJAHA BIBEL

Songon dia do Carana?

Songon dia do Carana?

Aha do na boi mangurupi hita asa tahalomohon manjaha Bibel? Parrohahon ma lima cara naung diulahon godangan halak.

Parade ma inganan na denggan. Lului ma inganan na buni jala pasiding ma na boi manggugai hita. Denggan do molo torang jala lambok alogo tingki hita manjaha.

Parade ma pingkiran. Molo taingot Bibel i sian Debata, gabe rade ma pingkiranta laho manjaha, dos songon dakdanak na rade manangihon poda ni natuatuana. Olo do ra sala pandapotta taringot tu Bibel saleleng on. Ingkon tapasiding ma i asa rade pingkiranta manjalo pangajarion na sian Debata.Psalmen 25:4.

Martangiang. Bibel marisi pingkiran ni Debata. Alani i, tahaporluhon do pangurupionNa laho mangantusi i. Marjanji do Ibana mangalehon ”Tondi Parbadia tu angka na mangido I sian Ibana.” (Lukas 11:13) Tondi parbadia boi mangurupi hita mangantusi lomo ni roha ni Debata. Jala boi do i mangurupi hita asa mangantusi ”nang angka na buni di bagasan diri ni Debata”.1 Korint 2:10, Bibel siganup ari.

Antusi ma lapatanna. Unang ma holan na manjaha sambing, alai huhut ma tarimangi. Lului ma alus ni sungkunsungkun songon, ’Parange aha do na boi hutiru sian halak na didok di ayat on? Songon dia do ahu mangulahon i di parngoluonku?’

Tontuhon ma tujuanna. Asa tadapot laba tingki manjaha Bibel, tontuhon ma na laho taparsiajari, na marlaba tu parngoluonta. Umpamana, asa lam mananda Debata, asa lam denggan parangenta jala asa gabe tungganeboru manang tungganedoli na burju. Dung i, tapillit ma ayat ni Bibel na boi mangurupi hita mangulahon i. *

On ma lima cara na boi mangurupi hita. Alai, songon dia do asa tahalomohon manjaha Bibel? Artikel na mangihut mangulas carana.

^ par. 8 Molo ndang diboto hamu ayat ni Bibel na hombar tusi, las roha ni Sitindangi Ni Jahowa mangurupi hamu.