Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 1 2017

 TIRU MA HAPORSEAON NI NASIDA | SI HENOK

Halomoan ni Debata do Ibana

Halomoan ni Debata do Ibana

MAOL do ra tarimangi hangoluan ni si Henok, ala ibana mangolu marribu taon naung salpu. Hirahira 365 taon ma umur ni si Henok—opat hali lompit martimbangkon umur ni halak saonari. Alai di tingki i, ndang matua dope umur nasa i. Hirahira 5.000 taon naung salpu, ganjang do umur ni angka jolma. Umpamana, lobi sian 600 taon ma umur ni si Adam tingki tubu si Henok, jala mangolu dope ibana hirahira 300 taon nai! Pigapiga pinompar ni si Adam, umganjang do umurna sian i. Alani i, poso dope si Henok nang pe marumur 365 taon, dos songon na poso na godang dope sangkap ni rohana. Hape ndang boi be si Henok songon i.

Songon na jonok nama si Henok tu hamatean. Marlojong ma ibana huhut marningot bohi ni angka halak na muruk ala mambege barita na sian Debata na pinasahatna. Tarrimas situtu jala sogo roha ni nasida mangida ibana. Ndang olo nasida manangihon jala sogo do roha ni nasida tu Debata. Ndang taralo nasida Debata ni si Henok, i ma Jahowa. Alai taralo nasida do si Henok. Olo do ra sungkunsungkun si Henok di bagasan rohana, boi do ibana pajumpang muse dohot ripena, boruna, anakna si Metusalah manang si Lamek pahompuna? (1 Musa 5:21, 23, 25) Boha do ujungna?

Ndang godang hatorangan dipaboa Bibel taringot si Henok. Holan tolu do buku di Bibel na paboahon hatorangan na jempek taringot ibana. (1 Musa 5:21-24; Heber 11:5; Judas 14, 15) Alai boi do angka ayat i mangurupi hita mananda baoa na togu haporseaonna i. Hamu do na manarihon keluargamuna? Hea do maol dihilala hamu mangulahon na sintong? Molo songon i, godang ma na boi diparsiajari hamu sian haporseaon ni si Henok.

”SAI MARPARANGE, MARDONGANHON DEBATA MA SI HENOK”

Jahat do parange ni angka jolma di masa ni si Henok. I ma papitusunduthon sian si Adam. Alani i, ndang apala dao dope nasida sian hangoluan na tipak na hea dihilala si Adam dohot si Hawa. I do alana boasa boi ganjang umurnasida. Alai sega situtu do pangalaho dohot partondion ni nasida. Nunga rarat be hajahaton. On marmula di sundut paduahon tingki dipamate si Kain anggina, i ma si Abel. Olo do ra adong pinompar ni si Kain na marginjang ni roha jala umjahat sian si Kain. Di sundut na patoluhon, lam rarat ma hajahaton. Mulai ma dipangke angka halak goar ni Jahowa tingki i, alai ndang na laho manomba Ibana. Ndang dipasangap nasida goar ni Debata, alai dipangke tu na so suman.1 Musa 4:8, 23-26.

Godangan halak di tingki ni si Henok mangihuthon agama na so sintong. Dung magodang si Henok, ingkon pillitonna do na dumenggan di ibana. Ihuthononna do angka na jahat di tingki i? Manang Debata Jahowa do pillitonna? Tontu, godang do sitiruon na denggan na diingot ibana sian si Abel, na mate ala mangulahon lomo ni roha ni Debata. Dipillit si Henok do manomba Debata.  1 Musa 5:22 paboahon, ”Sai marparange, mardonganhon Debata ma si Henok.” Hata on patuduhon holan si Henok ma jolma na manomba Debata di tingki i. Ibana ma jolma na parjolo na didok Bibel mardonganhon Debata.

Didok ayat i do muse si Henok tongtong mardonganhon Debata dung tubu anakna si Metusalah. Hirahira marumur 65 taon ma ibana tingki marianakhon. Ndang dipaboa Bibel goar ni ripena jala ndang dipaboa Bibel sadia godang ”anak dohot boru” ni si Henok. Sahalak ama na manomba Debata huhut manarihon keluargana, ingkon marsitutu mangihuthon lomo ni roha ni Debata. Tontu diantusi si Henok do patik ni Jahowa asa marsihohot tu dongan saripe. (1 Musa 2:24) Jala marsitutu do ibana mangajarhon taringot Jahowa tu ianakhonna. Aha do hasilna?

Holan angka na ringkot do na dipaboa Bibel taringot si Henok. Ndang disurat di Bibel hatorangan taringot haporseaon ni anakna, i ma si Metusalah sahat tu na ro Aek na sumar. Ibana do jolma na umganjang umurna na disurat di Bibel. Si Metusalah ma bapak ni si Lamek. Jala sanga do rap mangolu si Lamek dohot ompungna si Henok lobi sian saratus taon. Dung magodang si Lamek, marhaporseaon na togu do ibana. Marhite ibana do disurirangkon Jahowa taringot si Noak anakna dohot taringot haroro ni Aek na sumar. Marhaporseaon na togu do si Noak songon si Henok. Ndang hea si Noak pajumpang dohot si Henok. Alai ditadingkon si Henok do sitiruon na denggan. Tontu sitiruon on do na diingot si Noak na dibege ibana sian bapakna si Lamek, manang sian ompungna si Metusalah, manang olo do ra sian si Jared bapak ni si Henok na mate tingki si Noak marumur 366 taon.1 Musa 5:25-29; 6:9; 9:1.

Pingkirhon ma imbar ni si Henok tu si Adam. Nang pe tipak, dialo si Adam do Jahowa. Ditadingkon ibana do sitiruon na so denggan tu pinomparna na parohon hasusaan. Nang pe ndang tipak, sitiruon na denggan do na ditadingkon si Henok tu pinomparna. Si Adam mate tingki si Henok marumur 308 taon. Ndang taboto lungun do rohanasida manang na ndang tingki mate ompuna si Adam. Alai ”sai marparange, mardonganhon Debata ma si Henok”.1 Musa 5:24.

Molo hamu do na manarihon haporluan ni keluargamuna, tiru ma haporseaon ni si Henok. Nang pe ringkot manarihon haporluan di pardagingon, alai rumingkot do manarihon haporluan di partondion. (1 Timoteus 5:8) Marhite pangkataion dohot di parniulaon. Molo ditiru hamu si Henok, mangoloi Debata di saluhut parngoluonmuna, gabe sitiruon na denggan ma on di keluargamuna. I ma arta na umarga.

SI HENOK ”MANURIRANGI TARINGOT TU NASIDA”

Lungun do roha ni si Henok ala holan ibana do na marhaporseaon di tingki i. Nang pe songon i, disarihon Debata do ibana. Dapot ma tingkina, mangkatai ma Jahowa tu ibana. Dipaboa Debata ma tu si Henok barita na laho dipasahat tu angka halak di tingki i. Dibahen Debata ma si Henok gabe panurirang. Ibana ma panurirang na  parjolo na disurat di Bibel. Sian dia taboto? Dipaboa si Judas anggi ni Jesus do taringot barita ni si Henok, na disurat marratus taon dungkon i. *

Aha do na disurirangkon si Henok? Didok ibana, ”Nunga ro Tuhan i mardongan angka na badiana, na marloksaloksa, manguhumi saluhutna dohot maminsang saluhut parjahat, ala ni nasa ulaonnasida na jahat na binahennasida dohot ala ni saluhut hatanasida na tois, na hinatahon ni angka parjahat dompak Ibana.” (Judas 14, 15) Molo taparrohahon ayat on, hira naung masa ma na dipaboa ni si Henok i. Songon i ma cara ni angka panurirang di ari na mangihut paboahon baritanasida. Ala pos situtu do rohanasida na laho masa surirang i, hira naung masa ma baritanasida i!Jesaya 46:10.

Barani do si Henok paboahon barita panguhuman tu angka parjahat

Songon dia do pangkilalaan ni si Henok pasahathon barita i tu angka halak na olo manangihon? Parrohahon ma posi ni barita ni si Henok, opat hali ma ibana mamangke hata na patuduhon jahat ni parniulaon dohot pangalaho ni angka halak di tingki i. Dipasingot ibana do sude halak taringot naung sega jala lam tu segana do portibi di tingki i. Jala dipaboa ibana do tu angka halak taringot panguhuman na laho ulahonon ni Debata rap dohot angka surusuruan na marloksaloksa. Barani do si Henok paboahon barita i jala sahalakna do paboahon barita i. Tingki poso si Lamek, olo do ra diida ibana habaranion ni ompungna i. I do na mambahen si Lamek marhaporseaon.

Sitiruon do haporseaon ni si Henok tu hita. Songon dia do pangkilalaanta mangida portibi on? Dos do songon pangkilalaan ni Debata? Barita panguhuman na dipasahat si Henok dos do songon barita panguhuman na tapaboa saonari. Masa ma aek na sumar di tingki ni si Noak songon naung dipaboa si Henok. Jala na laho masa do muse panguhuman na umbalga di ari na naeng ro. (Mateus 24:38, 39; 2 Petrus 2:4-6) Saonari, nunga rade be Debata dohot angka surusuruanNa laho mangaripashon angka parjahat. Sai taingot ma barita ni si Henok jala tapaboa ma tu na asing. Olo do ra ndang sahaporseaon hita dohot keluarga manang alealenta jala olo do ra lungun rohanta alani i. Ndang hea Jahowa manadingkon si Henok. Suang songon i ma saonari, ndang tadingkononNa halak na marsihohot tu Ibana!

”TARHINSAT SI HENOK, GABE NDANG DIIDA HAMATEAN”

Songon dia do ujung ni parngoluon ni si Henok? Otik do hatorangan na dipaboa Bibel taringot hangoluan dohot hamatean ni si Henok. Buku 1 Musa mandok, ”Jala sai marparange, mardonganhon Debata ma si Henok, dung i ndang disi be ibana, ai dialap Debata do ibana.” (1 Musa 5:24) Songon dia do dibahen Debata mangalap ibana? Apostel Paulus paboahon, ”Hinorhon ni haporseaon i do tarhinsat si Henok, gabe ndang diida hamatean, jadi ndang jumpang be ibana, ala naung dihinsat Debata; ai andorang so tarhinsat, dihatindangkon do ibana, halomoan ni Debata.” (Heber 11:5) Aha do lapatan ni hata na mandok ”tarhinsat si Henok, gabe ndang diida hamatean”? Pigapiga terjemahan Bibel mandok si Henok diboan tu surgo. Alai ndang tutu i. Bibel paboahon, Jesus Kristus do na parjolo dipahehe tu surgo.Johannes 3:13.

Aha do lapatan ni hata na mandok si Henok ”tarhinsat” gabe ”ndang diida hamatean”? Olo do  ra dibahen Debata asa ndang dihilala si Henok tingki mate ibana. Alai ”andorang so tarhinsat, dihatindangkon do ibana, halomoan ni Debata.” Songon dia carana? Andorang so mate ibana olo do ra si Henok mandapot parnidaan sian Debata, hira na diida ibana ma paradeiso di tano on. Huhut diida parnidaan i, tarpodom ma si Henok laos mate. Taringot si Henok dohot angka baoa nang borua na marsihohot, didok apostel Paulus, ”Di bagasan haporseaon do mate nasida sude.” (Heber 11:13) Dung i, dilului angka musuna ma bangkena alai ”ndang jumpang be”, olo do ra ala nunga dipamago Jahowa asa unang dipangke tu panombaon na so sintong. *

Huhut taingot ayat i, tarimangi ma ujung ni hangoluan ni si Henok. On ma hirahira na masa: nunga loja be si Henok marlojong. Nunga jonok be angka musuna na tarrimas alani barita na dipasahat ibana. Martabuni ma si Henok di sada inganan. Diboto ibana do ndang boi salelengna ibana martabuni. Nunga lam jonok be angka musuna na laho pamatehon ibana. Huhut martabuni, martangiang ma ibana tu Debata. Dung i, dame situtu ma pangkilalaanna. Diida ibana ma parnidaan jala dihilala ibana hira na dohot ma ibana disi.

Tingki dilele parjahat do ra si Henok dialap Debata

Pingkirhon ma parnidaan na diida ni si Henok imbar situtu tu na diida ibana saleleng on. Diida ibana ma sada inganan na uli dos songon porlak Eden. Alai ndang adong kerubim na manjaga inganan i. Sude halak na tading disi baoa nang borua, ndang adong be na marsahit jala hisar dagingna. Dihilala nasida ma hadameon, ndang adong be hajahaton dohot agama na so sintong na diida si Henok saleleng on. Gabe pos ma roha ni si Henok na dihaholongi Debata do ibana. Jala pos do rohana, na laho sipardohot do ibana di inganan i. Huhut mangkilala hadameon alani parnidaan i, tarpodom ma ibana laos mate.

Disi dope ibana sahat tu saonari, tarpodom di hamatean, alai diingot Jahowa do ibana! Songon janji ni Jesus, na laho ro ma tingkina, begeon ni saluhut halak naung mate na adong di bagasan parningotan ni Debata ma soara ni Jesus jala hehe. Idaon ni nasida ma tano na imbaru na uli jala gok hadameon.Johannes 5:28, 29.

Olo do hamu sipardohot disi? Pingkirhon ma las ni rohanta tingki pajumpang dohot si Henok. Boi ma hita mangkatai tu ibana. Paboaonna ma tu hita taringot na tutu do na tapingkirhon saleleng on taringot ujung ni ngoluna. Alai ringkot do saonari taulahon parsiajaran na boi tadapot sian ibana. Dung paboahon taringot si Henok, didok si Paulus ma, ”Alai ia so adong haporseaon ni sada halak, ndang boi lomo ni roha ni Debata di halak i.” (Heber 11:6, Bibel siganup ari) On ma boasa porlu tatiru habaranion ni si Henok!

^ par. 14 Pigapiga sarjana Bibel mandok, si Judas mangenet sian surat Apokrifa na digoari Buku ni si Henok na marisi hatorangan na so sintong taringot si Henok. Tutu do adong surirang ni si Henok di buku i. Alai, olo do ra hatorangan i dibuat sian buku najolo na marisi turiturian. Ndang sian surat Apokrifa haroro ni hatorangan na disurat si Judas. Olo do ra si Judas mangenet hatorangan sian halak najolo manang sian Jesus. Alana diida Jesus do hangoluan ni si Henok sian surgo.

^ par. 20 Dos ma i songon na dibahen Debata tu bangke ni si Musa dohot Jesus asa unang dipangke tu ulaon na sala.5 Musa 34:5, 6; Lukas 24:3-6; Judas 9.