PRINSIP NI BIBEL: ”Unang holsohon hamu hosamuna.”​—Mateus 6:25.

Aha do lapatanna? Ayat on didok Jesus tingki marjamita ibana di Dolok. Hombar tu sada kamus ni Bibel, hata ”holsoan” jotjot didok tu ”halak na pogos, rapar jala na susa di parngoluon”. Holso ni roha pe, boi do lapatanna mabiar tu ari na naeng ro. Tontu, ingkon tasarihon do aha na porlu di hita dohot halak na tahaholongi. (Pilippi 2:20) Alai, tingki didok Jesus, ”Unang ma holsoan,” ibana mandok tu siseanna asa unang mangkolsohon angka na so ringkot—alana, molo maholsohu hita tu ari sogot gabe moru ma las ni rohanta.​—Mateus 6:31, 34.

Marlaba dope i saonari? Marbisuk do hita molo taihuthon na nidok ni Jesus. Boasa? Pigapiga buku referensi patorangkon molo maholsohu sasahalak, gabe torus ma karejo sistem saraf ni ibana. ”Mangkorhon do on tu kesehatan jala boi mambahen bisulon, sahit jantung dohot asma.”

Dipaboa Jesus do boasa ndang denggan molo maholsohu hita: ndang adong lapatanna maholsohu. Jesus mandok, ”Ise hamu marhuaso pagandahon ariarina nanggo saasta ganjangna, anggo tung sian pangkolsohon ni rohana?” (Mateus 6:27) Ndang tamba umurta molo maholsohu hita tu parngoluon. Asing ni i, jotjot do ndang masa na taholsohon i. Sahalak sarjana mandok, ”Ndang marlapatan molo maholsohu tu ari sogot, alana ndang taboto aha na masa sogot jala jotjot do ndang tutu masa na taholsohon i.”

Songon dia do asa unang maholsohu hita? Na parjolo, marpos ni roha ma tu Debata. Gari pidong dohot bunga disarihon Debata, tarlumobi ma halak na manomba Ibana. (Mateus 6:25, 26, 28-30) Na paduahon, unang ma paholsohu hita tu ari sogot. Jesus mandok, ”Unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari.”​—Mateus 6:34.

Molo taihuthon na didok ni Jesus, boi ma tapasiding angka sahit alani na holsoan. Na rumingkot, dapotta ma dame ni roha—i ma ”dame ni Debata” songon na didok di Bibel.​—Pilippi 4:6, 7.