Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 1 2016

Songon dia Mangadopi Biar ni Roha

Songon dia Mangadopi Biar ni Roha

NDANG adong na gumale sian posoposo na baru tubu. Dung tubu hita, natuatuanta ma na mangondingi hita. Tingki marsiajar mardalan, taida ma halak songon raksasa di jolonta. On mambahen hita mabiar, alai ndang mabiar hita molo rap dohot natuatuanta.

Tingki dakdanak, sonang do tahilala molo disarihon natuatuanta hita, ndang mabiar hita. Molo didok denggan ulaonta, pos ma rohanta jala lam denggan ma hita karejo.

Dung lam magodang, boi do moru biar ni rohanta molo adong alealenta. Sonang ma tahilala molo rap dohot nasida. Jala ndang be mabiar hita di singkola.

On manggombarhon na jotjot dihilala angka dakdanak. Alai, godang do dakdanak na so disarihon natuatuana jala ndang piga aleale ni nasida. Songon si Meli na mandok, ”Molo huida poto ni dakdanak dohot natuatuana, hudok ma tu diringku, ’Aut sugari ma on na huhilala tingki dakdanak.’” * Olo do ra, hea dihilala hamu songon i.

HURANG HOLONG NI ROHA SIAN NATUATUA

Tingki poso, olo do ra ndang pos rohamu tu dirimuna ala hurang dihaholongi natuatuamuna. Ala diida hamu natuatuamu marbadai manang gabe marsirang, olo do gabe disalahon hamu dirimuna sandiri. Jala olo do ra paposihu dibahen natuatuamu tu hamu.

Aha do pangkorhonna tu angka naposo molo masa songon on? Adong na marmabukmabuk manang marnarkoba. Deba gabe dohot anggota geng asa unang mabiar. Adong do muse na marhallethallet asa boi mangkilala holong ni roha. Alai, jotjot do holong sisongon on ndang martahan leleng. Dung ndang marhallet be nasida, ndang mararga be dihilala.

Nang pe ndang masa sisongon i tu sude naposo, alai adong do tongtong angka naposo na so marpos ni roha tu dirina. Si Ana mandok, ”Songon halak na so marguna do huhilala ahu, ala jotjot omakku mandok songon i tu ahu. Ndang hea huhilala holong ni omakku, jala ndang hea ahu dipuji.”

 Na asing muse na mambahen pangkilalaanta ndang mararga i ma, parsirangan, lam matua, manang ala humurang di rupa. Sude on boi mambahen hita ndang marlas ni roha jala manegai paralealeon tu na asing. Songon dia do bahenonta molo masa tu hita songon i?

HOLONG DO ROHA NI DEBATA TU HITA

Alai, adong do na olo jala boi mangurupi hita. Taboto do, lomo roha ni Debata mangurupi hita.

Didok Debata marhite panurirang Jesaya, ”Unang ganggu hamu, ai Ahu do Debatamuna. BahenonKu do hamu gogo jala urupanKu do hamu, ramotanKu jala paluaonKu do hamu.” (Jesaya 41:10, 13, Bibel siganup ari) Tontu, las do rohanta ala taboto diurupi Debata hita! Ndang pola sai holsoan be hita!

Adong do dipaboa di Bibel taringot tu halak na holsoan, alai dihilala do hagogoon sian Debata. Umpamana, si Hana inang ni si Samuel marsak ala ndang adong anakhonna. Jotjot do ibana diinsahi, gabe ndang olo ibana mangan jala jotjot tumatangis. (1 Samuel 1:6, 8) Alai, dung martangiang ibana tu Debata, paboahon arsakna ndang holsoan be ibana.1 Samuel 1:18

Si Daud pe hea do susa rohana. Saleleng martaontaon dipaburuburu Raja Saul ibana. Pigapiga hali boi do malua si Daud sian Raja Saul, jala sipata olo do ibana mabiar. (Psalmen 55:3-5; 69:2) Alai, didok ibana do, ”Hupapeak huhut mamintor nok; ai sasada Ho do, ale Jahowa, pasonang ahu maringanan.”—Psalmen 4:9.

Ala olo si Hana dohot si Daud paboahon arsak ni roha ni nasida tu Jahowa, diurupi ma nasida. (Psalmen 55:23) Songon dia do hita boi maniru nasida?

 ADONG TOLU ISARA ASA UNANG MABIAR HITA

1. Marpos ni roha tu Jahowa.

Dijujui Jesus do hita asa mananda ”Debata na sasada i na sintong i”. (Johannes 17:3) Didok si Paulus muse, ”Ai ndang na dao Ibana sian ganup hita on.” (Ulaon ni Apostel 17:27) Si Jakobus manurat, ”Pajonok hamu ma tu Debata, dung i pajonohonna ma tu hamu!”Jakobus 4:8.

Ala disarihon jala dihaholongi Debata do hita boi ma hita marpos ni roha. Songon na dihilala ni si Karolin na mandok, ”Songon sahalak Ama do Jahowa i di ahu, alani i pos situtu ma rohangku! Boi do hupaboa sude holso ni rohangku tu Ibana.”

Si Rahel mandok, ”Jahowa do na paposhon rohangku tingki ditadingkon natuatuangku ahu. Hupaboa ma sude tu Ibana aha na huhilala jala diurupi do ahu.” *

2. Marsaor ma tu dongan sahaporseaon.

Diajari Jesus do angka siseanna asa mangkaholongi dongan na asing. Didok ibana, ”Saluhutna hamu marhahamaranggi.” (Mateus 23:8) Dihalomohon roha ni Jesus do asa sude siihuthon ibana masihaholongan, jala gabe sada keluarga.Mateus 12:48-50; Johannes 13:35.

Songon sada keluarga do sude halak na di huria ni Sitindangi Ni Jahowa. Marsitutu do nasida patuduhon holong tu sude jolma. (Heber 10:24, 25) Godang do na tarapul rohana tingki ro tu parpunguan ni Sitindangi Ni Jahowa.

Si Eva mandok, ”Adong do alealengku di huria. Diantusi ibana hasusaan na huhilala. Rade do ibana manangihon ahu, manjahahon ayat ni Bibel jala rap martangiang ma hami. Sai didongani jala diurupi ibana do ahu tingki susa. Alani i, boi ma huhilala las ni roha.” Didok si Rahel muse, ”Adong ma natuatuangku di huria, dihahaholongi nasida do ahu jala pos situtu ma rohangku.”

 3. Haholongi ma halak na asing.

Tadapot do aleale molo burju jala tahaholongi na asing. Jesus mandok, ”Martuaan do na mangalehon sian na manjalo!” (Ulaon ni Apostel 20:35) Molo lam burju hita tu halak, lam godang ma tadapot pasupasu. Didok Jesus tu angka siseanna, ”Lehon hamu ma, gabe lehononna ma di hamu!”Lukas 6:38.

Boi ma tahilala hadameon molo sude hita patuduhon burju ni roha. Bibel mandok, ”Ndang na olo salpu haholongon i.” (1 Korint 13:8) Si Maria mandok, ”Olo do sipata, songon na so mararga ahu huhilala. Alai, huboto do ndang denggan songon i. Asa unang holan diringku na hupingkiri, huurupi ma na asing. Las ma rohangku tingki huurupi nasida.”

NDANG ADONG BE BIAR NI ROHA

Molo taulahon na dipaboa dison, dame ma pangkilalaanta. Nang pe ndang sai mura mangulahon on, alai ringkot do i. Si Karolin mandok, ”Sipata biar dope rohangku, alai boi ma lam pos rohangku saonari. Huboto do, diparrohahon Debata do ahu jala godang aleale na paposhon rohangku.” Songon i do muse na dihilala ni si Rahel, didok ibana, ”Sipata, olo do lungun rohangku. Alai, adong do keluarga di huria na patoguhon jala na mangurupi ahu asa tongtong marroha na torang. Na rumingkot, adong do Ama na parholong na boi mangurupi ahu jala boi do hupasahat tu Ibana sude holso ni rohangku ganup ari.”

Bibel mandok, laho adong ma tano na imbaru, na so adong be biar ni roha disi

Asing ni i, adong do muse na boi paposhon rohanta. Didok di Bibel laho adong ma tano na imbaru, na so adong be biar ni roha disi. Bibel mandok, ”Hundul be ma nasida di toru ni hau anggurna dohot di toru ni hau arana, jala ndang adong panonggoti.” (Mika 4:4) Di tingki i, ndang adong be biar ni roha jala ndang adong be halak na mambahen hita susa. Jala ”ndang be ingoton angka na parjolo i”. (Jesaya 65:17, 25) Bahenon ni Debata dohot Jesus Kristus ma ”hatigoran” na parohon ”hademakon dohot hasonangan salelenglelengna”.Jesaya 32:17.

^ par. 5 Deba goar nunga diganti.

^ par. 21 Sitindangi Ni Jahowa mangurupi godang halak na olo mananda Debata marhite marsiajar Bibel ndang manggarar.