Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  No. 1 2016

 SIULASON NI MAJALAH ON | BOASA HITA INGKON JUJUR?

Laba ni Hajujuron

Laba ni Hajujuron

”Ai pos do rohanami, na so pola solsolan ni panggora ni roha i hami, ala huringkoti hami marparange na denggan di na saluhut.”Heber 13:18.

Di Bibel, hata Junani na diterjemahon ”hajujuron” lapatanna angka ulaon na denggan manang parange na denggan.

Ringkot do parrohahonon ni halak Kristen hata ni Apostel Paulus on na mandok, ”Huringkoti hami marparange na denggan di na saluhut.” Aha do angka na hombar tusi?

NA MARALO TU ROHA

Torop do halak jumolo markaca andorang so laho sian jabu. Boasa? Asa suman idaon. Alai, adong dope na rumingkot sian parsurion manang pahean na denggan. Sasintongna, parangenta boi do mambahen hita gabe uli manang roa di jolo ni halak.

Disurat di Bibel umlomo do rohanta mangulahon na roa. 1 Musa 8:21 mandok, ”Ai na jat do pingkiran ni roha ni jolma sian sietehetehonna.” Alani i, asa boi jujur ingkon taalo do giotgiot ni rohanta na sala. Hea do dihilala Apostel Paulus songon on. Didok ibana, ”Ai dihalashon jolma parbagasan na di ahu do nian patik ni Debata. Alai huida do patik na asing di bagasan angka ruas ni dagingku, na marmusu dompak patik na di bagasan rohangku; gabe dipatunduk do ahu tu gomgoman ni patik ni dosa, na di bagasan ruas ni dagingku.”Rom 7:22, 23.

Umpamana, molo tubu tu rohanta laho mangulahon ulaon na so jujur, jala lam tahalomohon i, unang ma taoloi. Molo taalo do pingkiran sisongon i, boi do hita tongtong jujur, nang pe godang halak na so jujur di humaliangta.

NA BOI MANGURUPI ASA JUJUR

Tahaporluhon do panogunoguon asa denggan parangenta jala asa boi jujur, nang pe godang halak ndang mangkaringkothon i. Godang halak mandok, ndang ingkon jujur nasida di sude ulaonna. Buku The (Honest) Truth About Dishonesty mandok, ”Sasintongna taboto do na margabus hita, jala ninna rohanta ndang pola boha i, tongtong dope ninna rohanta, hita halak na jujur.” Alai, adong do panogunoguon na boi mangurupi hita asa tongtong jujur? Adong.

Marjuta halak di liat portibi on mangkilala pangurupion sian Bibel na marisi poda asa denggan marparange. (Psalmen 19:8) Nunga godang na mangkilala laba ni poda ni Bibel di keluarga, parkarejoan, di partondion dohot marparange. Patik dohot prinsip ni Bibel  marlaba tu sude halak, houm, marga dohot bangso. Molo taparsiajari Bibel, jala taulahon podana, dipatogu do hita asa tongtong mangulahon na sintong.

Asa tongtong jujur ndang sae holan marsiajar Bibel. Godang do halak na mangelaela hita laho mangulahon na roa. Alani i, ringkot hita martangiang tu Debata mangido pangurupionNa. (Pilippi 4:6, 7, 13) Dung i, ndang mabiar be hita mangulahon na sintong jala boi ma hita jujur di saluhut ulaonta.

LABANA MOLO JUJUR

Si Hitoshi na dipaboa dison, mandapot laba ala jujur ibana karejo. Saonari, karejo ma ibana dohot bos na mangargai hajujuron. Ninna ibana ma, ”Mauliate do hudok ala karejongku saonari mambahen ias panggora ni rohangku.”

Na asing pe adong do mangkilala songon i. Taida ma hatorangan ni halak na mandapot laba ala mangulahon prinsip ni Bibel jala ”marparange na denggan di na saluhut”.

  • Panggora ni Roha na Ias

    ”Tingki marumur 13 taon, ndang singkola be ahu, ala mardongan dohot panangko jala 95 porsen pangomoanku ala na manangko. Dung marhasohotan, marsiajar Bibel ma ahu rap dohot tunggani dolingku tu Sitindangi Ni Jahowa. Diboto hami ma ndang lomo roha ni Jahowa * molo so jujur hami. Alani i, marhamubaon ma hami. Di taon 1990 tardidi ma hami gabe Sitindangi Ni Jahowa.”Poda 6:16-19.

    ”Najolo gok do barang na tinangko di jabungku, alai saonari ndang adong be. Ias ma panggora ni rohangku. Mandok mauliate do ahu tu Jahowa ala disesa do dosangku saleleng on. Saonari boi ma ahu renges modom, ala huboto ulaonku pasonangkon roha ni Jahowa.”—Si Cheryl, Irlandia.

    ”Tingki diboto boshu, ndang hujalo suap sian panuhor, didok ma, ’Debatami mambahen ho gabe halak na boi dihaporseai! Las rohangku ho karejo di perusahaan on.’ Ala tongtong ahu jujur, ias ma panggora ni rohangku di adopan ni Jahowa. Boi ma huurupi keluargangku dohot halak na asing asa tongtong jujur.”—Si Sonny, Hong Kong.

  • Dame ni Roha

    ”Karejongku asisten eksekutif di Bank Internasional. Di parkarejoankon, rumingkot do mamora sian marparange na jujur. Godang halak marpingkir ’aha salana margabus molo boi do mambahen mamora?’ Alai ala jujur, dame ma rohangku. Marsitutu do ahu asa tongtong jujur, nang pe dihasogohon halak ahu. Diboto boshu ma ndang olo ahu margabus tu nasida manang alani nasida.”—Si Tom, Amerika Serikat.

  • Parohon Sangap

    ”Tingki disuru boshu ahu margabus taringot godang ni barang na mago sian inganan parkarejoan, ndang olo ahu. Ujungna habotoan ma ise na manangko, mandok mauliate ma boshu ala jujur ahu. Asa boi jujur di portibi na so jujur on, ingkon barani do hita. Alai, gabe dihaporseai jala diargai halak ma hita.”—Si Kaori, Jepang.

Panggora ni roha na ias, dame ni roha, dohot sangap, i ma laba na tadapot molo marparange na jujur. Satolop do hamu?

^ par. 18 Jahowa, i ma goar ni Debata na disurat di Bibel.