Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 19

Holong dohot Hatigoran ni Jahowa Mangalinggomi Naposona sian Hajahaton

Holong dohot Hatigoran ni Jahowa Mangalinggomi Naposona sian Hajahaton

“Ndang Debata na mangkalomohon hajahaton Ho. Ndang dipaloas Ho hajahaton di joloM.”​—PS. 5:5, Bibel Siganup ari.

ENDE 142 Gomos ma Tiop Pangkirimonta

NA LAHO DIULAS *

1-3. (a) Hombar tu Psalmen 5:5-7, songon dia do pangkilalaan ni Jahowa taringot hajahaton? (b) Songon dia do pelecehan tu dakdanak maralo tu “patik ni Kristus?”

SOGO do roha ni Jahowa tu sude hajahaton,dohot ma i pelecehan seksual tu dakdanak. (Jaha Psalmen 5:5-7.) Mansai dihagigihon Jahowa do hajahaton sisongon i! Ingkon dihagigihon Sitindangi ni Jahowa do pelecehan seksual tu dakdanak jala ingkon dipasiding do halak na mangulahon i sian huria Kristen.​—Rom 12:9; Heb. 12:15, 16.

2 Maralo situtu do pelecehan seksual tu dakdanak tu “patik ni Kristus”! (Gal. 6:2) Songon naung taulas di parsiajaran naung salpu, patik ni Kristus, i ma sude na diajarhon Jesus marhite hatana dohot parniulaonna. Fondasi ni patik i, i ma holong jala tongtong patuduhon hatigoran. Ala mangihuthon patik i, sude halak Kristen ingkon lambok maradophon dakdanak asa dihilala nasida holong dohot hadameon. Alai pelecehan seksual mambahen dakdanak gabe mabiar jala didok rohana ndang adong na mangkaholongi ibana.

3 Saonari, godang do angka halak na mangulahon pelecehan seksual tu dakdanak. Jala adong do pengaruhna tu halak Kristen. Boasa? Alana lam godang do “angka parjahat dohot panipu”. Ra, adong piga-piga na ro tu huria. (2 Tim. 3:13) Jala adong do piga-piga halak di huria na dirajai giot-giot ni dagingna gabe mangulahon pelecehan seksual tu dakdanak. Saonari, taulas ma boasa pelecehan seksual i dosa na balga. Jala aha do na ingkon diulahon sintua molo adong na mangulahon  pelecehan seksual, jala songon dia natua-tua boi manjaga ianakhon ni nasida. *

DOSA NA MANSAI BALGA

4-5. Boasa pelecehan seksual i dosa tu halak na gabe korban?

4 Tontu, hansit do pangkilalaan ni dakdanak na gabe korban pelecehan seksual, jala diingot do i saleleng ni ngoluna. Asing ni dakdanak i, tontu lungun do roha ni keluarga dohot angka dongan di huria alani na masa i. Alani i, dosa na mansai balga do pelecehan seksual.

5 Mardosa tu dakdanak na gabe korban i. Molo tabahen hansit roha ni na asing jala gabe susa nasida alani i, na mardosa do hita disi. Di parsiajaran na mangihut laho taulas ma, aha do akibat ni pelecehan seksual. Halak na mangulahon pelecehan i, mambahen susa jala mandele dakdanak na gabe korban i. Nunga dioto-otoi ibana dakdanak i, jala on mambahen dakdanak i gabe mabiar. Alani i, sude dakdanak ingkon dijaga do sian ulaon na jahat i. Jala angka na hea gabe korban pelecehan seksual, ingkon diapuli jala diurupi.​—1 Tes. 5:14.

6-7. Boasa pelecehan seksual i manegai huria jala mangalo pamarenta?

6 Mardosa tu huria. Tingki sasahalak na di huria mangulahon pelecehan seksual, ibana nunga manegai jala mambahen roa goar ni huria. (Mat. 5:16; 1 Ptr. 2:12) Hape, marjuta donganta di liat portibi on marsitutu ‘mampartahanhon haporseaon sian nasa gogo’ laho pasangaphon goar ni Jahowa. (Judas 3) Alani i, ingkon tapasiding do angka halak di huria na mambahen roa goar ni Debata dohot na sai mangulahon na jahat jala ndang olo marhamubaon.

7 Mardosa tu pamarenta. Sude halak Kristen ingkon ‘unduk do tu pamarenta’. (Rom 13:1) Laho patuduhon i, ingkon taargai jala ingkon unduk do hita tu hukum na dibahen nasida. Molo sasahalak di huria mangulahon pelecehan seksual, na mardosa do ibana tu pamarenta. (Bandingkon Ul. 25:8) Ndang boi angka sintua na mambahen hukuman tu ibana, jala ndang boi diambati nasida pamarenta laho mambahen hukuman tu ibana. (Rom 13:4) Ingkon martanggung jawab do ibana tu na niulahonna.​—Gal. 6:7.

8. Tingki mardosa sasahalak tu donganna na asing, songon dia do pangkilalaan ni Jahowa?

8 Dosa na umbalga, i ma tu Jahowa. (Ps. 51:6) Tingki mardosa sasahalak tu donganna na asing, na mardosa do ibana tu Jahowa. Di Patik na dilehon Jahowa tu halak Israel najolo didok, molo adong halak na mamaksa mambuat ampuna ni donganna, na “mangalo parenta ni Jahowa” do i. (3 Mus. 5:21-23) Suang songon i ma, molo adong sasahalak di huria na mangulahon pelecehan seksual, nunga dibuat ibana las ni roha manang hadameon ni dakdanak i jala nunga mardosa ibana tu Jahowa. Angka halak sisongon i gabe mambahen roa goar ni Jahowa. Pelecehan seksual, i ma dosa na dihagigihon Debata. Alani i, ingkon dihukum do halak na mangulahon i.

9. Saleleng martaon-taon, hatorangan aha do na diparade organisasi ni Jahowa taringot pelecehan seksual, jala boasa?

9 Saleleng martaon-taon, diparade organisasi ni Jahowa do hatorangan taringot pelecehan seksual. Umpamana, di artikel Joujou Paboahon dohot Sadarlah!, dipaboa do aha na ingkon diulahon dakdanak na gabe korban i,  songon dia angka na asing boi patoguhon ibana, jala songon dia natua-tua manjaga ianakhonna. Dilehon do tudu-tudu tu angka sintua marhite prinsip ni Bibel songon dia carana pasaehon parsoalan sisongon i. Jala sai diparrohahon organisasi do angka tudu-tudu i, jala sipata adong do na disesuaihon. Boasa? Asa tongtong diihuthon angka sintua patik ni Kristus tingki pasaehon parsoalan sisongon i.

NA INGKON DIULAHON SINTUA

10-12. (a) Tingki adong na mangulahon dosa na balga, aha do na ingkon diingot angka sintua jala aha do na ingkon dipingkirhon? (b) Hombar tu Jakobus 5:14, 15, aha do na ingkon diulahon angka sintua?

10 Ingkon diihuthon angka sintua do patik ni Kristus tingki adong sasahalak di huria na mangulahon dosa na balga. Ingkon burju jala tigor do nasida tu ganup halak di huria hombar tu na dihalomohon roha ni Debata. I do na ingkon diingot nasida tingki adong na mangulahon dosa na balga di huria. Alani i, tingki diboto angka sintua adong sasahalak di huria mangulahon dosa na balga, ingkon manat do nasida mambahen keputusan. Ingkon diingot angka sintua do songon dia asa tongtong pasangaphon goar ni Jahowa. (3 Mus. 22:31, 32; Mat. 6:9) Ingkon diurupi nasida do angka dongan di huria asa tongtong marale-ale tu Jahowa, jala mangapuli angka halak na gabe korban sian na mangulahon dosa na balga i.

11 Asing ni i, molo na marsala i sasahalak di huria, ingkon marsitutu do angka sintua mangida, na marhamubaon do ibana manang na ndang. Molo marhamubaon, ingkon diurupi angka sintua do ibana asa boi marale-ale muse tu Jahowa. (Jaha Jakobus 5:14, 15.) Sahalak Kristen na mangulahon dosa na balga, dipatudos do i songon sahalak na marsahit. Lapatanna, ndang denggan be parale-aleonna tu Jahowa. Jala dipatudos do angka sintua songon sahalak dokter. * Marsitutu do nasida asa “pamalum na marsahit i [manang na mangulahon dosa i]”. Dilehon nasida do poda sian Bibel laho mangurupi halak na mardosa i. Molo marsitutu ibana marhamubaon, boi ma ibana muse marale-ale tu Jahowa.​—Ul. 3:19; 2 Kor. 2:5-10.

12 Balga do tanggung jawab ni angka sintua. Ingkon denggan do dijaga nasida angka biru-biru ni Debata. (1 Ptr. 5:1-3) Marsitutu do nasida asa boi angka dongan di huria mangkilala hadameon. Alani i, tingki adong parsoalan manang dosa na balga na masa di huria dohot ma i pelecehan seksual, ingkon hatop do dipasae nasida. Pingkirhon ma sungkun-sungkun di mula ni  paragraf 13,  15, dohot  17.

13-14. Boi do angka sintua paboahon tu pamarenta taringot pelecehan seksual? Patorang ma.

 13 Boi do angka sintua paboahon tu pamarenta taringot pelecehan seksual? Boi. Di piga-piga negara na adong dibahen hukum ingkon paboahon taringot pelecehan seksual tu pamarenta, ingkon diihuthon angka sintua do i. (Rom 13:1) Ndang maralo i tu patik ni Debata. (Ul. 5:28, 29) Alai andorang so dipaboa angka sintua i tu pamarenta, ingkon jolo dipaboa nasida do i tu kantor cabang laho mangido tudu-tudu.

14 Boi do didok angka sintua tu korban, tu natua-tuana, manang tu halak na mamboto taringot pelecehan seksual i asa dipaboa nasida tu pamarenta. Alai boha do molo na mangulahon pelecehan seksual i sahalak donganta di huria jala godang halak na mamboto taringot i? Sala do halak na paboahon taringot i, ala dihilala ibana on mambahen roa goar ni Jahowa? Daong. Alana halak na mangulahon pelecehan seksual i do na mambahen roa goar ni Jahowa.

15-16. (a) Hombar tu 1 Timoteus 5:19, boasa ingkon adong dua saksi asa boi dibahen panitia pengadilan? (b) Aha do na ingkon diulahon sintua molo adong sasahalak di huria ditudu mangulahon pelecehan seksual?

  15 Di huria, andorang so dibahen angka sintua panitia pengadilan, boasa porlu adong hatorangan sian dua saksi laho patuduhon molo sasahalak nunga mangulahon dosa na balga? Alana on do tudu-tudu na dipaboa di Bibel, jala tigor do on. Tingki sasahalak ndang mangangku mangulahon dosa na balga, ingkon adong do hatorangan sian dua saksi asa boi angka sintua mambahen panitia pengadilan. (5 Mus. 19:15; Mat. 18:16; jaha 1 Timoteus 5:19.) Alai, ingkon adong do dua saksi laho paboahon pelecehan seksual tu pamarenta? Daong. Alana pelecehan seksual, i ma sada pelanggaran hukum. Angka sintua dohot na asing boi pintor do paboahon i tu pamarenta.

16 Tingki adong na paboahon tu sintua adong sasahalak di huria na mangulahon pelecehan seksual, boi do i dipaboa tu pamarenta. Jala ingkon dilului nasida do hatorangan na sasintongna. Dungkon i, baru ma ditontuhon nasida marhite prinsip ni Bibel porlu do dibahen panitia pengadilan manang na ndang. Ingkon jolo disungkun nasida do tu na ditudu i, na tutu do ibana mangulahon pelecehan seksual i. Molo ndang mangangku ibana, ingkon dipangido angka sintua do hatorangan sian na mangida na masa i. Panitia pengadilan boi dibahen molo adong dua saksi, i ma halak na paboahon dohot halak na mangida na masa i. * Alai nang pe holan halak na paboahon i do na mangida na masa i, ndang na gabe so boi dihaporseai hatana i. Nang pe ndang adong dua saksi na boi patuduhon na tutu do halak na ditudu i mangulahon pelecehan seksual, diboto angka sintua do molo na ditudu i nunga mangulahon dosa na balga na mambahen susa halak na asing. Alani i, ingkon diurupi jala diapuli angka sintua do angka halak na gabe korban. Asing ni i, ingkon manat do angka sintua laho manjaga huria sian halak na mangulahon pelecehan seksual i.​—Ul. 20:28.

17-18. Patorang ma tugas ni panitia pengadilan.

 17 Aha do tugas ni panitia pengadilan? Nasida do na mangadili manang na manontuhon sasahalak na mangulahon dosa na balga ingkon dipakaluar sian huria manang na ndang. Tugas ni nasida ndang laho manontuhon na ingkon dihukum pamarenta ibana alani hajahatonna i. Alani i, diloas angka sintua do asa pamarenta na mangalehon hukuman tu halak na mangulahon pelecehan seksual i.​—Rom 13:2-4; Tit. 3:1.

18 Holan taringot parale-aleon ni sasahalak tu Debata dohot tu angka dongan di huria do na ingkon ditangani panitia pengadilan. Dipangke nasida do prinsip ni Bibel laho manontuhon halak na mangulahon pelecehan seksual i marhamubaon manang na ndang. Molo ndang olo ibana marhamubaon, ingkon dipaboa sintua do molo ibana dipakaluar sian huria jala ingkon dibahen do boa-boa di huria. (1 Kor. 5:11-13) Alai molo olo ibana marhamubaon, boi do ibana ndang pola dipakaluar. Nang pe songon i, ingkon dipaboa angka sintua do molo ibana ndang boi mandapot tugas manang tanggung jawab di huria saleleng martaon-taon, manang ra saleleng ni ngoluna. Ingkon diparrohahon angka sintua do angka dakdanak di huria. Alani i, boi do manat dipaboa nasida tu angka natua-tua di huria asa denggan dijaga nasida ianakhonna sian halak na mangulahon pelecehan seksual i nang pe marhamubaon. Alai tingki paingothon angka natua-tua, ingkon diingot angka sintua do asa  unang paboahon ise na gabe korban pelecehan seksual i.

JAGA MA IANAKHONMUNA

Angka natua-tua, jaga ma ianakhonmuna sian pelecehan seksual marhite paboahon taringot seks hombar tu na boi diantusi nasida. Laho mangulahon i, pangke ma hatorangan na diparade organisasi ni Jahowa. (Ida paragraf 19-22)

19-22. Aha do na ingkon diulahon natua-tua laho manjaga ianakhonna? (Ida gambar sampul.)

19 Angka natua-tua, hamu do na tarlumobi ingkon manjaga ianakhonmuna. * Alana, “silehonlehon ni Jahowa” do ianakhonmuna i. (Ps. 127:3, Bibel siganup ari) Dilehon Jahowa do tu hamu tanggung jawab laho manjaga ianakhonmuna. Alani i, songon dia carana manjaga ianakhonmuna sian pelecehan seksual?

20 Na parjolo, ingkon diboto hamu do taringot pelecehan seksual. Ingkon diboto hamu do halak na songon dia na mangulahon pelecehan seksual dohot cara ni nasida manipu angka dakdanak. Ingkon jaga do hamu tu situasi manang halak na boi mangulahon i. (Poda 22:3; 24:3) Ingot ma, godangan halak na mangulahon pelecehan seksual, i ma angka halak naung ditanda jala dihaporseai ianakhonmuna.

21 Na paduahon, jujui ma ianakhonmuna asa olo paboahon na di rohana. (5 Mus. 6:6, 7) Lapatanna, ingkon rade do hamu manangihon ianakhonmuna. (Jak. 1:19) Somalna, mabiar do dakdanak na gabe korban pelecehan paboahon i tu na asing. Ra, didok rohana ndang adong na olo porsea tu ibana, manang diancam halak na mangulahon pelecehan seksual i ibana. Molo diparrohahon hamu hira na asing pangalaho ni ianakhonmuna, boi do lambok disungkun hamu jala denggan ma tangihon ibana.

22 Na patoluhon, ajari ma ianakhonmuna. Paboa ma aha na ingkon diboto nasida taringot seks hombar tu umur dohot na boi diantusi nasida. Ingkon diajari do nasida taringot aha na ingkon didok manang na diulahon molo adong sasahalak mangulahon na so suman tu nasida. Pangke ma hatorangan na diparade organisasi ni Jahowa laho manjaga ianakhonmuna.​—Ida kotak “ Paradehon Dirimuna dohot Ianakhonmuna.”

23. Songon dia do pangkilalaanta taringot pelecehan seksual tu dakdanak, jala aha do na laho taulas di minggu na ro?

23 Di Sitindangi ni Jahowa, pelecehan seksual i ma hajahaton jala dosa na dihagigihon Debata. Hombar tu patik ni Kristus, ingkon tapasiding do angka halak na mangulahon pelecehan seksual di huria. Alai, adong do piga-piga donganta na hea gabe korban pelecehan seksual. Songon dia hita boi mangurupi nasida? Laho taulas ma i di parsiajaran na mangihut.

ENDE 103 Angka Sintua—Silehonlehon tu Angka Jolma

^ par. 5 Di parsiajaran on laho taulas ma, songon dia dakdanak ingkon dijaga sian pelecehan seksual. Taulas muse songon dia sintua manjaga huria dohot songon dia natua-tua manjaga ianakhonna sian i.

^ par. 3 HATA NA DIPATORANG: Pelecehan seksual tu dakdanak, i ma sasahalak na dirajai giot-giot ni dagingna na gabe mangulahon na rorang tu dakdanak. Umpamana, mangulahon seks, seks oral manang seks anal, manjamai alat kelamin, payudara, dohot pantat manang ulaon na rorang na asing. Alai ingkon diingot do, dakdanak na gabe korban pelecehan seksual i, ndang boi didok marsala. Jala adong do muse baoa na gabe korban pelecehan seksual, alai gumodang do angka borua na gabe korban. Jala adong do angka borua na mangulahon pelecehan seksual, alai gumodang do angka baoa na mangulahon i.

^ par. 11 Nang pe didok sasahalak ala na gale do parale-aleonna tu Jahowa umbahen na diulahon ibana dosa na balga i, ingkon tongtong do martanggung jawab ibana tu na niulahonna i.​—Rom 14:12.

^ par. 16 Tingki mangkatai tu halak na ditudu i, ndang pola porlu dipangido angka sintua asa dohot dakdanak i. Alana boi do mambahen dakdanak i gabe lam mabiar. Natua-tuana manang halak na dihaporseai ibana boi do paboahon i tu angka sintua taringot aha na masa.

^ par. 19 Hatorangan on marlangku do tu sude natua-tua, dohot ma i tu orang tua angkat.