Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 KISAH HIDUP

Pogos di Mulana—Gok Pasupasu di Ujungna

Pogos di Mulana—Gok Pasupasu di Ujungna

Tubu di soposopo do ahu, di huta Liberty di Indiana, Amerika Serikat. Huta na gelleng do on. Tolu ma itongku, sada abangku, dua ma anggingku.

Di soposopo on ma ahu tubu

HAMPIR sude do hutanda halak di huta, jala ditanda nasida do ahu. Di singkola pe holan i do donganku sahat tu na tamat, ndang hea ganti.

Pitu do hami marhahamaranggi. Tingki poso, nunga marsiajar mangula ahu

Hauma do na godang di hutangku. Jagung do na jotjot di suan. Mangula di hauma ni halak do bapakku. Dung remaja, huparsiajari do martraktor jala dohot do ahu mangula.

Marumur 56 taon ma bapakku tingki tubu ahu. Sehat jala gogo dope ibana tingki i. Omakku marumur 35 taon ma tingki i. Ringgas do bapa karejo jala diajari do hami asa songon i. Ndang godang hepengna, alai boi do dilehon ibana hami mangan. Adong do jabunami, dohot pangkeannami. Jotjot do ibana rap dohot hami. Marumur 93 taon ma ibana marujung ngolu. Molo omak umur 86 taon. Ndang sanga nasida gabe sisomba Jahowa. Alai adong sada anggingku na gabe Sitindangi. Jala nunga gabe sintua ibana sian taon 1972.

DI MULANA

Pargareja do omakku. Tiap ari Minggu diboan do hami tu gareja. Tingki marumur 12 taon ma  hubege parjolo sahali taringot Tritunggal. Husungkun do omakku, “Songon dia do Jesus gabe Anak, alai gabe Bapak muse?” Dialusi omak ma, “Holan Debata do na mamboto i, ndang pola taantusi i.” Gabe bingung do ahu. Tingki marumur 14 taon dididihon di sunge ma ahu. Tolu hali ma ahu dibonomhon. Sahali di bagasan goar ni Ama, sahali di bagasan goar ni Anak, dungkon i bagasan tondi parbadia.

1952​—Tingki marumur 17 taon, alai ndang gabe tentara dope

Adong do donganku partinju tingki SMA. Ditogihon do ahu asa dohot martinju. Marlatik ma ahu jala dohot tu kelompok partinju. Goarna Golden Gloves. Ndang pola jago ahu martinju. Dung piga hali martanding, ndang olo be ahu dohot. Dungkon i, ditugashon ma ahu gabe tentara ni Amerika, dikirim ma ahu tu Jerman. Tingki di Jerman, dikirim atasanku ma ahu tu akademi militer ala dirimpu nasida boi do ahu gabe pemimpin. Dihilala nasida cocok do ahu gabe tentara. Alai ndang lomo rohangku. Taon 1956, dung dua taon martugas hutadingkon ma i. Ndang sadia leleng, dapothu ma tugas na dumenggan.

1954-1956​—Dua taon ma ahu gabe tentara ni Amerika

MUBA MA NGOLUNGKU

Andorang so marsiajar Bibel, sala do pamingkirionku taringot songon dia do baoa na jago. Huihuthon do pamingkirion na huida sian film dohot sian angka donganku. Huhilala ndang cocok baoa marcarita taringot Bibel. Alai ujungna, muba do pamingkirionku. Tingki marmobil ahu di huta, jumpangku ma dua borua Sitindangi Ni Jahowa. Angka ito ni laengku do nasida. Nunga dapothu hian Menara Pengawal dohot Sedarlah! sian nasida. Alai maol do huantusi Menara Pengawal i. Alai ditogihon nasida do ahu asa dohot marpungu di jabunasida. Hudok ma, hupingkiri pe annon. Mengkel suping ma nasida. Didok ma, “Tutu da, ro ma ho dah.” Hudok ma, “Olo, ro pe ahu.”

Hupingkiri nga sala be ahu, boasa hudok olo nangkin. Gabe ingkon ro ma ahu antong. Bornginna i, ro ma ahu tu parpunguan i. Huida ma angka dakdanak disi, godang do na diboto nasida taringot Bibel. Hape ahu, nunga ganup minggu tu gareja dohot omak, holan saotik do na huboto. Gabe olo ma ahu marsiajar Bibel. Parjolo sahali na huparsiajari, i ma goar ni Debata, Jahowa. Najolo, hea do husungkun omak taringot Sitindangi. Didok ibana, “Oh, halak naung matua do na disomba halak i. Goarna Jahowa.” Alai saonari, huboto ma na sasintongna!

Hatop do maju ahu, alana huboto do on agama na sintong. Jadi dung sia bulan ahu ro tu parpunguan tardidi ma ahu di bulan Maret 1957. Muba ma pangalahongku. Las do rohangku, alana nga huboto sian Bibel songon dia do gabe baoa na denggan. Jesus baoa na sempurna do. Umgogo do ibana sian baoa na asing. Alai ndang olo ibana marbadai. Gariada “hohom do ibana” tingki dibahen na hansit, songon naung disurirangkon. (Jes. 53:2, 7, Bibel siganup ari) Jala huantusi ma, angka siihuthon Jesus ingkon burju do tu sude halak.​—2 Tim. 2:24.

 Gabe perintis ma ahu taon 1958. Alai sanga do ahu so satongkin, ala naeng marhasohotan dohot si Gloria. Ibana do sada sian borua na manggokkon ahu tu parpunguan tingki i! Ndang husolsoli i. Mansai arga do si Gloria di ahu, ummarga sian berlian. Las hian do rohangku marhasohotan dohot ibana. Saonari ibana ma jo, na patandahon dirina:

“Adong 17 hami na marhahamaranggi. Sitindangi do omakku. Alai, nunga marujung ngolu ibana tingki marumur 14 taon dope ahu. Dungkon i, mulai ma bapa marsiajar Bibel. Asa adong na mangurus angka angginami, direncanahon bapa ma asa marganti ahu dohot kakak lao tu singkola. Molo songon i, boi ma sada sian hami mangurupi angka angginami di jabu. Jala asa boi hami rap mangan sude di jabu, dung mulak bapa sian karejo. Dihatai bapa ma i tu kepala singkola. Setuju do kepala singkola i. Jadi, songon i ma dibahen saleleng sataon, sahat tu na tamat singkola kakakku. Adong dua keluarga Sitindangi na marsiajar dohot hami. Jala 11 halak ma sian hami na gabe Sitindangi. Lomo do rohangku marbarita, nang pe parila ahu. Sai diurupi tungganedolingku do ahu marbarita saleleng martaontaon.”

Jadi bulan Februari taon 1959 ma hami marhasohotan. Rap merintis do hami. Di bulan Juli na i, diisi hami ma formulir laho tu Betel. Marcitacita do hami asa karejo di kantor pusat. Mangkatahatai ma hami dohot si Simon Kraker. Didok ibana, ndang dijalo be molo nunga marhasohotan masuk tu Betel. Alai tong do hami marcitacita tu Betel. Jadi dipaima hami do i saleleng martaontaon.

Dikirim hami ma surat tu kantor pusat. Dipangido hami ma asa boi mangurupi inganan na mangkaporluhon parbarita. Ditugashon ma hami di Pine Bluff, Arkansas. Tingki i, adong do dua huria disi. Sada huria tu angka donganta na kulit putih, jala sada nai tu kulit hitam. Ditugashon do hami tu huria kulit hitam. Holan 14 halak do penyiar disi.

GABE SUSA ALA DIPAIMBARIMBAR

Ra olo do hamu longang, boasa dipaimbar donganta kulit putih dohot kulit hitam, hape Sitindangi do hita. Alai, songon i do situasina tingki i. Diorai pamarenta do marsaor kulit putih dohot kulit hitam. Alana jotjot do gabe masalah molo marsaor nasida. Di pigapiga inganan, gabe disegai do Bale Harajaon ala pungu disi kulit hitam dohot kulit putih. Molo marbarita kulit hitam tu jabu ni kulit putih, olo do gabe ditangkup jala dipungkuli nasida. Jadi asa boi denggan marbarita, ingkon taihuthon do aturan pamarenta. Mangkirim do hami asa boi muba situasi i.

Ndang mura marbarita tingki i. Sipata olo do jumpang hami dohot keluarga na kulit putih. Dipingkiri hami ma: Ingkon dipatorang hami do saotik taringot Bibel? Manang, pintor parmisi do hami? Songon i ma carana.

Asa boi merintis, karejo do hami ganup ari. Si Gloria karejo paiashon jabu ni halak. Molo ahu paiason bagian luar ni jabu songon taman, jandela dohot na asing. Somalna, di sada jabu digaji do hami tolu dollar sadari. Jotjot do huurupi karejo ni si Gloria asa pintor hatop sae. Dung sae karejo, dilehon parjabu i ma hami sipanganon. Alai na ngalingali do, ala sian kulkas do dibuat. Ganup minggu, manggosok baju do si Gloria di jabu ni keluarga na kulit putih. Jala di sada jabu rap do hami paiashon jandela. Molo si Gloria paiashon sian bagas, ahu sian luar ma. Boi ma sadari dikarejoi hami i, dung i dilehon ma hami sipanganon. Alai si Gloria ndang sameja mangan dohot keluarga i. Ahu pe mangan di luar do, alai ndang pola boha. Tabo do sipanganonna i. Sasintongna burju do keluarga i. Alai, gabe tarihutihut ma nasida, alana somal dope angka halak tingki i paimbarimbarhon. Songon pengalamannami, hea do hami mangisi bensin di pom bensin. Adong ma petugas na kulit putih. Husungkun ma, boi do dipangke si Gloria toilet disi? Pintor murhing ma bohina tu ahu, jala didok, “Tarkunci do i.”

 SAI HUINGOT DO BURJU NI ANGKA DONGAN

Alai las do rohanami tu angka dongan saleleng hami merintis di Pine Bluff. Tingki i hami tanding dohot sada donganta, alai keluargana ndang Sitindangi dope. Diurupi si Gloria do tungganeboruna marsiajar Bibel. Molo ahu, mangurupi dua boruna dohot helana. Ujungna, tardidi ma tungganeboruna raphon dua boruna i.

Adong do kedannami di huria kulit putih. Olo do ditogihon hami mangan di jabuna. Alai ingkon borngin ma hami ro, asa unang adong halak na mangida. Di tingki i, adong do sada organisasi goarna Ku Klux Klan (KKK). Fanatik jala kejam do nasida tu halak kulit hitam. Hea ma di sada perayaan adong sahalak baoa na hundul di jolo ni jabu ni donganta. Dipangke ibana ma baju dohot tangkuluk na bontar sude, dos songon pangkean ni anggota KKK. Nang pe jotjot diida angka dongan songon i, tongtong do nasida burju tu hami. Di tingki na asing, naeng kebaktian ma hami alai ndang adong hepengnami. Jadi digadis hami mobilnami Ford 1950 tu sahalak donganta. Ala ndang adong be mobilnami, ingkon mardalan pat ma hami marbarita dohot mangurupi angka parsiajar Bibel. Jadi loja do hami. Alai di sada tingki dung mulak marbarita, tarsonggot ma hami adong mobilnami najolo i, parkir di jolo jabunami. Jala adong karotas na ditempel di kaca ni mobil i, isina, “Hadiahku ma on tu ho. Sian: Donganmu.”

Adong sada pengalaman na asing na so tarhalupahon ahu. Digokkon do ahu dohot tu Sekolah Pelayanan Kerajaan di South Lansing New York, taon 1962. Di singkola i dilatik do pengawas huria, wilayah dohot distrik saleleng sabulan. Ditingki i ndang adong karejongku, jala otik do hepengku. Hea do ahu melamar karejo di Pine Bluff. Jadi tompu ma ditelepon nasida ahu, asa karejo. Molo olo ahu, ahu ma halak kulit hitam na parjolo karejo disi. Dia ma pillitonku? Hape ndang adong hepengku tu New York lao tu singkola i. Sanga do hupingkiri, hujalo karejo i jala ndang jadi dohot tu singkola i. Naeng hubahen ma surat tu Betel. Alai masa ma na so panagaman, na so tarhalupahon ahu.

Adong ma sahalak donganta borua di hurianami. Alai tungganedolina ndang Sitindangi. Di tingki manogot, ro ma ibana mangalehon amplop tu ahu. Gok do hepeng di amplop i. Jadi saleleng on, ganup ari do ibana dohot anakna mamutik kapas. Jadi dipapungu ibana ma hepeng hasil ni kapas i, asa i ma ongkoshu tu New York. Didok ibana ma, “Lao ma ho tu singkola i, marsiajar ma ho, alai dung mulak annon ajari ma hami dah!” Dung i, hutelepon ma perusahaan i, husungkun ma, “Boi do ahu karejo lima minggu nai?” Dialusi nasida ma, “Ndang boi!” Bah  ndang pola boha. Jadi huputushon ma, ndang hujalo karejo i. Tuani ma!

On ma didok si Gloria saleleng merintis hami di Pine Bluff: “Las hian do rohanami dison. Ra adong do 20 halak na huurupi marsiajar Bibel. Mulai sian manogot marbarita do hami. Dung tonga ari diurupi hami parsiajar Bibelnami. Olo do sahat tu jam 11 borngin. Las hian do rohangku! Naeng ma dison hami tading torus. Molo boi nian, ndang pola be hami ditugashon di inganan na asing manang gabe pengawas wilayah. Alai ndang songon i rencana ni Jahowa da bah.”

GABE PENGAWAS WILAYAH

Diisi hami do fomulir asa boi gabe perintis istimewa, tingki di Pine Bluff dope hami. Hirim do rohanami asa boi gabe PI. Alana lomo do roha ni pengawas distrik asa gabe PI hami di Texas. Setuju do hami. Sai dipaimaima hami do surat sian kantor. Alai ndang marna ro suratna. Ujungna, di bulan Januari 1965 ro ma suratna. Ditugashon do hami gabe pengawas wilayah! Di tingki i, ditugashon ma dohot si Leon Weaver gabe pengawas wilayah. Saonari nunga gabe koordinator di Kantor Cabang Amerika Serikat ibana.

Ndang yakin dope ahu gabe pengawas wilayah. Alai tingki ditugashon ahu, si James A. Thompson ma na gabe pengawas distrik tingki i. Ibana do na mangajarajari ahu. Dipaboa ibana do dia na porlu hulatik sian diringku, asa boi gabe pengawas wilayah na denggan. Dung gabe pengawas wilayah ahu, huantusi ma porlu hian do poda sisongon i di ahu. Jadi godang do na boi huparsiajari sian ibana.

Diurupi angka donganta on do ahu

Tingki i, adong do dibahen pelatihan tu pengawas wilayah. Jadi di bagasan saminggu disuru ma ahu mamparrohahon sahalak pengawas wilayah di sada huria. Dung saminggu nai, marganti ma hami. Ibana ma na mamparohahon ahu. Dung i, ndang pola be rap hami. Hudok ma tu si Gloria, “Sayang nai ate ndang rap be hita dohot nasida.” Alai, dapothu ma parsiajaran na ringkot. Manang didia pe hita, sai adong do donganta na rade mangurupi. Jadi, ingkon olo ma hita diurupi. Sai hujangkon do molo adong donganta na mangurupi ahu. Umpamana, songon si J. R. Brown dohot si Fred Rusk na karejo di Betel.

Sai adong do na paimbarimbarhon kulit hitam dohot kulit putih tingki i. Hea do KKK mambahen acara di Tennessee tingki melayani hami  disi. Huingot do tingki maradi hami di sada restoran dung sae marbarita. Tingki naeng tu toilet ahu, adong ma sahalak baoa na murhing bohina tu ahu. Jala adong do tattona na patuduhon ndang lomo rohana mangida kulit hitam. Diihutihuthon ibana ma ahu. Alai ro ma donganta kulit putih manjumpangi ahu. Balga do donganta on. Didok ibana, “Aman do kan, brur?” Pintor lao ma baoa nangkin. Dung martaontaon huantusi ma, ndang alani marimbar warna kulitna umbahen na songon i nasida. Alai, ala mardosa dope hita. Jala huantusi ma, donganta do sude na diorganisasi ndang soal warna kulitna. Rade do nasida mangurupi hita.

GOK PASUPASU DI UJUNGNA

Nunga 12 taon ahu gabe pengawas wilayah. Molo gabe pengawas distrik 21 taon ma. Gok do pasupasu dohot pengalaman na hudapot. Alai adong dope. Di bulan Agustus 1997 digokkon do hami karejo di Betel Amerika Serikat. Saut do citacitanami i hape dung 38 taon. Dung i karejo ma hami di Betel. Dirimpu hami satongkin do hami karejo disi. Hape daong.

Arga situtu do si Gloria di ahu

Mulana di Departemen Dinas do ahu ditugashon. Godang do na boi huparsiajari! Godang do angka sungkunsungkun sian angka sintua dohot pengawas wilayah di negara on. Jadi, ingkon dialusi angka dongan di departemen on do i. Alai, las do rohangku, ala sabar do nasida mangajari ahu karejo di bagian i. Molo ditugashon pe ahu muse di bagian i, godang nai dope na boi huparsiajari sian nasida.

Lomo do rohangku dohot si Gloria karejo di Betel. Ala nunga somal hami hatop dungo sian najolo, gabe mura do hami mangihuthon jadwal di Betel. Dung pigapiga taon, mangurupi Punguan na Mangaradoti Organisasi do ahu, i ma di bagian Panitia Dinas. Dung i, dilantik ma ahu gabe anggota Punguan na Mangaradoti Organisasi di taon 1999. Godang do na boi huparsiajari di bagian i. Alai na rumingkot, gabe huantusi ma Jesus Kristus do na manguluhon sude huria Kristen, ndang jolma.

Taon 1999 gabe anggota Punguan na Mangaradoti Organisasi ma ahu

Molo huingotingot ngolungku muse, sipata songon panurirang Amos do huhilala. Halak na biasa-biasa do si Amos. Parderes parbue ni ara do ibana, sipanganon ni angka na pogos do i. Alai dipangke Jahowa do ibana gabe panurirang. Gok do pasupasu na dilehon tu ibana. (Am. 7:14, 15) Jadi ahu pe diparrohahon Jahowa do. Hape halak na pogos hian do ahu di Liberty di Indiana. Alai gok situtu do pasupasu na hudapot sian Jahowa! (Poda 10:22) Ndang hea tarbayangkon ahu boi dapothu on sude.