Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Dihaholongi Jahowa do Halak na “Marparbue di Bagasan Habengeton”

Dihaholongi Jahowa do Halak na “Marparbue di Bagasan Habengeton”

“Alai anggo na tu tano na denggan, i ma angka na . . . marparbue di bagasan habengeton.”​—LUK. 8:15.

ENDE: 68, 72

1, 2. (a) Songon dia hita dipatogu ala godang angka donganta na tongtong marbarita nang pe godang na so manangihon nasida? (Ida gombar di mula ni parsiajaran.) (b) Aha na didok Jesus taringot marbarita di “huta hagodangan”? (Ida ma surat na di toru.)

ADONG dua halak perintis di Amerika Serikat, goarna si Sergio, tungganeboruna i ma si Olinda. Nunga marumur 80 taon nasida. Jala ndang gogo be pat ni nasida mardalan. Alai, nunga martaontaon nasida marbarita. Sian jam pitu manogot, lao ma nasida tu halte bus. Disi, dilehon nasida ma sijahaon tu angka halak na olo manjaha. Godang do na so olo manjalo sijahaon i, alai tongtong do nasida saor tu angka halak. Dungkon tonga ari, mulak ma nasida. Songon i ma diulahon, onom ari di bagasan saminggu.

2 Godang do angka donganta na tongtong marsihohot songon si Sergio dohot si Olinda. Ringgas do nasida marbarita di inganan na jonok tu jabu ni nasida, nang pe godang na so olo manangihon. Ra, hamu pe songon i do. Dipujihon hami do hamu ala tongtong marbarita nang pe  ndang mura. * Angka ulaonmuna i boi patoguhon angka dongan na asing, tarmasuk ma angka naung leleng gabe parbarita. Pigapiga pengawas wilayah mandok songon on, “Tingki marbarita ahu dohot angka dongan na ringgas, gabe dipatogu do ahu alani nasida.” Na asing mandok, “Ala tongtong ringgas nasida, gabe lam ringgas do ahu mangulahon tugas on.” Jala adong muse na mandok, “Las do rohangku mangida sitiruon sian nasida.”

3. Aha do sungkunsungkun na laho taulas, jala boasa?

3 Di parsiajaran on, taalusi ma tolu sungkunsungkun na mangihut: Boasa sipata boi gabe metmet rohanta? Aha do lapatan ni marparbue? Aha do na boi mangurupi hita asa tongtong marparbue di bagasan habengeton? Alus ni tolu sungkunsungkun on boi patoguhon hita asa tongtong marbarita songon na ditonahon Jesus tu hita.

BOASA BOI GABE METMET ROHANTA?

4. (a) Songon dia pangkilalaan ni si Paulus ala godang halak Jahudi na so olo manjangkon barita na uli? (b) Boasa songon i pangkilalaan ni si Paulus?

4 Hea do gabe metmet rohamuna ala ndang olo halak manangihon barita na uli na dipasahat hamu? Molo songon i, dos do pangkilalaanmuna songon si Paulus. Saleleng 30 taon ma ibana marbarita jala mangurupi godang halak asa gabe halak Kristen. (Ul. 14:21; 2 Kor. 3:2, 3) Alai, ndang godang halak Jahudi na boi urupanna gabe halak Kristen. Gariada, godang do nasida na so manjangkon jala adong na mamungkuli ibana. (Ul. 14:19; 17:1, 4, 5, 13) Alani i, songon dia do pangkilalaan ni si Paulus? Didok ibana, “Mansai marsak rohangku jala sai tongtong do hansit rohangku.” (Rom 9:1-3, Bibel siganup ari) Boasa songon i pangkilalaan ni si Paulus? Alana, lomo do rohana marbarita jala dihaholongi ibana do angka halak. Jadi, lungun do rohana ala ndang olo halak Jahudi manjangkon asi ni roha ni Debata.

5. (a) Alani aha do umbahen na olo hita marbarita? (b) Boasa boi hita gabe marmetmet ni roha?

5 Songon si Paulus, hita pe marbarita na uli ala holong do rohanta tu angka halak. (Mat. 22:39; 1 Kor. 11:1) Martua do ngolunta ala manomba Jahowa. Jala lomo do rohanta asa halak na asing pe mangkilala songon i! Alani i do hita tongtong manjujui halak asa marsiajar taringot Jahowa dohot sangkapNa tu jolma. Dos do on songon hita na mamboan sada hadiah na mansai arga. Talehon i tu halak, jala tadok, “On ma dah.” Jadi, molo ndang olo nasida manjalo, olo do gabe ‘hansit rohanta’. Songon i ma na dihilala si Paulus. Jadi, ndang alani gale haporseaonta umbahen na tahilala songon i. Alai, ala holong do rohanta tu angka halak. Jadi, nang pe sipata metmet rohanta, sai olo do hita marbarita. Satolop do hita tu si Elena, sahalak donganta naung gabe perintis saleleng lobi sian 25 taon. Didok ibana, “Ndang mura marbarita na uli. Alai, on do ulaon na dumenggan.”

 AHA DO LAPATAN NI MARPARBUE?

6. Sungkunsungkun aha do na laho taalusi?

6 Boasa pos rohanta na boi do hita marhasil marbarita na uli manang didia pe? Laho mangalusi sungkunsungkun on, taulas ma dua tudosan na dipaboa Jesus taringot “marparbue”. (Mat. 13:23) Tudosan na parjolo, i ma taringot hau anggur.

7. (a) Di tudosan ni Jesus, ise do na digombarhon gabe “tukang porlak”, “hau anggur”, dohot “ranting”? (b) Sungkunsungkun aha do na porlu taboto alusna?

7 Jaha Johannes 15:1-5, 8Di tudosan on, dipatorang Jesus do molo “tukang porlak” i manggombarhon Jahowa, “hau anggur” manggombarhon ibana, jala “ranting” i ma angka siseanna. * Dipaboa Jesus do tu angka apostelna, “Marsangap ma Damang, molo marparbuehon na godang hamu jala gabe angka siseanku hamu.” Jadi, aha do lapatanna marparbue? Di tudosan on, diurupi Jesus do hita asa mamboto alusna.

8. (a) Di tudosan ni Jesus, boasa “marparbue” ndang lapatanna marhasil mambahen halak gabe sisean? (b) Aha do na sasintongna dipangido Jahowa tu hita?

8 Didok Jesus do taringot Amana, “Digotap do nasa rantingku na so marparbue.” Lapatanna, holan angka na marparbue do na boi gabe naposo ni Jahowa. (Mat. 13:23; 21:43) Di tudosan on, marparbue ndang lapatanna ingkon marhasil mambahen halak gabe sisean. (Mat. 28:19) Alana, godang do angka donganta na tongtong marsihohot, alai ndang hea mambahen sasahalak gabe Sitindangi. Jadi, nasida do na didok na so marparbue? Ndang songon i lapatanna! Ndang boi tapaksa angka halak asa gabe sisean ni Jesus. Jala parholong do Debata. Ndang hea dipangido ibana hita asa mangulahon na so tolap taulahon. Holan na boi taulahon, i do na dipangido.​—5 Mus. 30:11-14.

9. (a) Songon dia hita marparbue? (b) Tudosan aha do muse na laho taulas?

9 Jadi, aha do lapatanna marparbue? I ma mangulahon sada tugas na boi taulahon. Tugas aha do na dilehon Jahowa tu sude naposona? I ma mamaritahon Harajaon ni Debata. * (Mat. 24:14) Dipatangkas do muse on di tudosan ni Jesus taringot sahalak panabur. Taulas ma tudosan i.

10. (a) Manggombarhon aha do boni dohot tano di tudosan ni Jesus? (b) Aha do parbue ni eme molo disuan?

10 Jaha Lukas 8:5-8, 11-15. Di tudosan ni Jesus taringot sahalak panabur, dipatorang ibana do molo boni i manggombarhon “hata ni Debata”, manang barita taringot Harajaon ni Debata. Tano manggombarhon roha ni sasahalak. Molo boni i madabu tu tano na denggan, boi ma tubu gabe suansuanan. Dung i, boi ma i marparbue “saratus lompit”. Molo eme disuan, aha do parbuena? Batang ni eme do? Ndang. Parbuena i ma angka boni, na boi tubu gabe batang ni eme. Di tudosan on,  sada boni boi gabe 100 boni. Sian tudosan on, aha do na taparsiajari taringot ulaonta marbarita?

Songon dia hita “marparbue di bagasan habengeton”? (Ida paragraf 11)

11. (a) Sian tudosan taringot panabur, aha do na taparsiajari taringot ulaonta marbarita? (b) Songon dia hita marparbuehon boni na baru?

11 Tingki natuatuanta manang sahalak Sitindangi mangajarhon tu hita taringot Harajaon ni Debata, dos do nasida songon halak na manaburhon boni tu tano na denggan. Las do roha ni nasida tingki tajangkon barita i. Tubu ma boni i jala marparbue. Songon hau eme na dipaboa nangkin, boni na baru do parbuena, ndang hau eme na baru. Hita pe, ndang na ingkon marhasil mambahen sasahalak gabe sisean, alai hita ingkon marparbuehon boni na baru. * Songon dia carana? Tapaboa ma barita Harajaon i tu na asing. Dos do i songon na manaburhon boni naung marparbue di rohanta. (Luk. 6:45; 8:1) Jadi, molo tongtong hita mamaritahon Harajaon ni Debata, tutu do hita “marparbue di bagasan habengeton”.

12. (a) Aha do na boi taparsiajari sian tudosan hau anggur dohot sahalak panabur? (b) Songon dia pangkilalaanmuna dung mangantusi tudosan i?

12 Aha do na boi taparsiajari sian tudosan hau anggur dohot sahalak panabur? Gabe taantusi ma molo “marparbue” ndang diida sian sadia godang halak na olo manangihon hita. Alai, diida do i sian sadia ringgas hita marbarita. Didok si Paulus do, “Ganup do manjalo upana, hombar tu pangulaonna be.” (1 Kor. 3:8) Diargai Jahowa do hita alani ringgas di ulaon marbarita, ndang alani sadia godang halak na boi tabahen gabe sisean. Si Matilda naung merintis lobi sian 20 taon mandok, “Las do rohangku ala huboto diargai Jahowa do hita ala ringgas marbarita.”

SONGON DIA ASA TONGTONG HITA MARPARBUE?

13, 14. Songon na disurat di Rom 10:1, 2, boasa si Paulus tongtong marbarita?

13 Aha do na boi mangurupi hita asa tongtong “marparbue”? Taparrohahon ma muse pengalaman ni si Paulus. Gabe metmet do roha ni si Paulus ala godang  halak Jahudi na so olo manjangkon barita na uli. Alai nang pe songon i, tongtong do marbarita si Paulus tu nasida. Disurat ibana do songon dia pangkilalaanna tu halak Jahudi, “Sai huparsinta jala hutangiangkon do asa malua bangsongku. Boi do huhatindangkon tu hamu, tung marsitutu do nasida manomba Debata, alai ndang marojahan tu parbinotoan na sintong parsombaonnasida i.” (Rom 10:1, 2, Bibel siganup ari) Jadi, boasa ibana tongtong marbarita?

14 Na parjolo, na mambahen tongtong si Paulus marbarita tu halak Jahudi, i ma ala ‘diparsinta’ rohana do i. Lomo do rohana asa boi malua nasida. (Rom 11:13, 14) Na paduahon, ‘ditangiangkon ibana do nasida tu Debata’. Dipangido si Paulus do tu Jahowa, asa diurupi ganup halak Jahudi manjangkon barita Harajaon i. Na patoluhon, didok si Paulus, “Marsitutu do nasida manomba Debata”. Diida si Paulus, adong do sangkap di roha ni nasida laho manomba Jahowa. Diboto si Paulus, adong do halak Jahudi na boi gabe sisean ni Kristus songon ibana.

15. Songon dia hita boi maniru si Paulus? Paboa ma pigapiga pengalaman.

15 Songon dia hita boi maniru si Paulus? Na parjolo, marsitutu ma hita mangalului halak na sihol rohana tu “hangoluan salelenglelengna”. Na paduahon, tapangido ma tu Jahowa  asa diurupi halak na serep roha laho manangihon barita na tapasahat. (Ul. 13:48; 16:14) I do na diulahon si Silvana naung merintis lobi sian 30 taon. Didok ibana, “Andorang so laho ahu marbarita, martangiang do ahu tu Jahowa asa pos rohangku tingki marbarita.” Boi do muse tatangiangkon asa diurupi surusuruan hita laho manjumpangi halak na olo manangihon. (Mat. 10:11-13; Pgk. 14:6) Si Robert, naung merintis lobi sian 30 taon mandok, “Las do rohangku boi rap saulaon dohot surusuruan. Alana diboto surusuruan do songon dia situasi ni ganup halak na di jabu.” Na patoluhon, tongtong ma taingot angka na denggan sian halak, jala tabayangkon ma molo nasida boi gabe naposo ni Jahowa. Sahalak sintua na margoar si Carl jala nunga tardidi lobi sian 50 taon mandok, “Sai huida do ias ni roha ni sasahalak sian carana manjangkon, engkelna, pambahenanna, manang sungkunsungkunna.” Molo taulahon i, gabe boi ma hita “marparbue di bagasan habengeton” songon si Paulus.

“UNANG PATAIT TANGANMU”

16, 17. (a) Aha na boi taparsiajari sian Parjamita 11:6? (b) Aha do pangkorhonna tu angka halak molo tongtong hita marbarita?

16 Ingot ma, ndang marisuang molo marbarita hita, nang pe hira na so adong na manangihon. (Jaha Parjamita 11:6.) Diparrohahon godang halak do hita. Diida do na denggan pangkeanta, pantun, jala saor tu nasida. Alani i, ra adong do na sogo hian rohana mangida hita, ujungna gabe burju tu hita. Songon i ma pengalaman ni si Sergio dohot si Olinda.

17 Didok si Sergio, “Hea do hami ndang boi lao marbarita di inganan na godang halak alani marsahit. Alai dung marbarita muse hami tusi, adong ma na mandok, ‘Nga leleng ndang huida hamu. Masihol do hami bah.’” Didok si Olinda, “Adong do angka supir bus na mandok tu hami gogo, ‘Mantap!’ Dipangido nasida do angka sijahaon.” Jala songgot do roha ni si Sergio dohot si Olinda muse ala adong sahalak baoa na mangalehon bunga tu nasida, jala didok do mauliate ala ringgas nasida marbarita disi.

18. Boasa tongtong hita “marparbue di bagasan habengeton”?

18 Alani i, ‘unang ma patait tanganmuna’. Molo tongtong hita marbarita na uli, on patuduhon na taulahon do tugas na ringkot, i ma “mangkatindangkonsa tu saluhutna bangso”. (Mat. 24:14) Na porlu taingot, gabe las ma rohanta, ala taboto las do roha ni Jahowa mangida hita. Dihaholongi Ibana do halak na “marparbue di bagasan habengeton”!

^ par. 2 Jesus sandiri pe mandok, ndang mura marbarita di “huta hagodanganna”. Disurat do on di opat buku injil.​—Mat. 13:57; Mrk. 6:4; Luk. 4:24; Joh. 4:44.

^ par. 7 Nang pe ranting na di tudosan on manggombarhon halak Kristen na miniahan, alai parsiajaranna marlangku tu sude naposo ni Debata.

^ par. 9 Hata “marparbue” boi do muse lapatanna patuduhon “parbue ni Tondi”. Alai, di parsiajaran on dohot na mangihut, na taulas i ma patuduhon “parbue ni bibir”, manang mamaritahon Harajaon ni Debata.​—Gal. 5:22, 23; Heb. 13:15.

^ par. 11 Di tingki na asing, dipangke Jesus do tudosan taringot manabur dohot manabi laho manggombarhon ulaon mambahen halak gabe siseanna.​—Mat. 9:37; Joh. 4:35-38.