Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Mei 2017

Urupi ma Angka Pangungsi Asa Marlas ni Roha Manomba Jahowa

Urupi ma Angka Pangungsi Asa Marlas ni Roha Manomba Jahowa

”Diramoti Jahowa do angka halak panompang.”PSALMEN 146:9, Bibel siganup ari.

ENDE: 25, 50

1, 2. (a) Aha do ambatambat na diadopi angka donganta pangungsi? (b) Sungkunsungkun aha do na ro tu rohanta?

DONGANTA na margoar si Lije mandok, ”Pas kebaktian do hami tingki marporang angka rayat di Burundi. Diida hami halak marlojongi jala marsitembakan. Sampulu sada ma hami na marhahamaranggi. Lari ma hami mangungsi jala holan barang na diboan hami tu kebaktian i do na adong di hami. Ujungna, pigapiga sian hami sahat ma tu pangungsian di Malawi, na daona lobi 1.600 kilometer sian hutanami. Alai, gabe marserak do hami.”

2 Di liat portibi on, lobi sian 65 juta pangungsi manadingkon hutana ala adong porang dohot penganiayaan. On ma bilangan ni pangungsi na gumodang na hea masa. * Sian angka pangungsi i, marribu Sitindangi Ni Jahowa. Adong do keluarga ni nasida na mate jala agoan arta. Aha do ambatambat na diadopi nasida? Songon dia  do hita mangurupi donganta na mangadopi sitaonon i asa marlas ni roha? (Ps. 100:2) Songon dia do cara na dumenggan marbarita tu pangungsi?

PARNGOLUON NI ANGKA PANGUNGSI

3. Songon dia do Jesus dohot siseanna gabe pangungsi?

3 Dung dipaboa surusuruan tu si Josep na laho bunuon ni Raja Herodes nama Jesus, mangungsi ma nasida tu Misir sahat tu na mate si Herodes. (Mat. 2:13, 14, 19-21) Dung martaontaon, sisean ni Jesus pe ”gabe marserak . . . so padohot angka apostel, tu luat Judea dohot Samaria” alani penganiayaan. (Ul. 8:1) Diboto Jesus, godang do siseanna na laho gabe pangungsi. Didok ma, ”Ia dilele nasida hamu sian huta na sada, maporus ma hamu tu huta na asing.” (Mat. 10:23) Sasintongna, maol do tahilala laho manadingkon jabunta.

4, 5. Aha do bahaya na diadopi pangungsi tingki (a) di pardalanan? (b) tading di pangungsian?

4 Tingki laho pangungsi sian hutana asa tading di pangungsian, godang hasusaan na diadopi nasida. Anggi ni si Lije na margoar si Gad mandok, ”Marmingguminggu ma hami mardalan pat, mamolus marratus bangke ni jolma. Tingki i, 12 taon dope umurhu. Bongkak ma pathu jala hudok ma tu keluargangku asa ditadingkon nasida ahu. Alai, diompa bapa ma ahu. Martangiang jala marhaposan tu Jahowa do hami asa boi martahan. Sipata, holan mangga na di pinggir dalan i do na diallang hami.”Plp. 4:12, 13.

5 Godang do keluarga ni si Lije na tading di pangungsian na diparade PBB saleleng martaontaon. Alai, adong do bahaya na asing disi. Si Lije naung gabe pengawas wilayah patorangkon, ”Godang na so adong karejona. Margosip, mabuk, marjuji, manangko, jala mangulahon ulaon na rorang ma nasida.” Asa unang mangihuthon nasida, ringkot do Sitindangi disi tongtong jonok tu huria. (Heb. 6:11, 12; 10:24, 25) Marbisuk do nasida mamangke tingki asa tongtong togu di partondion, jala godang do na gabe perintis. Diingot nasida do, ndang salelengna nasida di pangungsian i songon halak Israel na so salelengna di halongonan. On mangurupi nasida tongtong marpamingkirion na denggan.2 Kor. 4:18.

HAHOLONGI MA ANGKA PANGUNGSI

6, 7. (a) Songon dia do ”holong ni roha ni Debata” mangonjar rohanta asa mangkaholongi dongan sahaporseaon? (b) Bahen ma tudosan.

6 ”Holong ni roha ni Debata” mangonjar rohanta asa mangkaholongi donganta, tarlumobi dongan na susa. (Jaha 1 Johannes 3:17, 18.) Umpamana, tingki halak Kristen abad na parjolo na tading di Judea mangkaporluhon sipanganon ala masa haraparon, adong do pangurupion sian huria. (Ul. 11:28, 29) Dijujui si Paulus dohot si Petrus do halak Kristen asa rade manamue na asing. (Rom 12:13; 1 Ptr. 4:9) Dijujui do halak Kristen asa manjangkon dongan na ro sian luat na asing. Hita pe, ingkon burju do tu donganta na susa parngoluonna manang  na dianiaya alani haporseaon! *Jaha Poda 3:27.

7 Barubaru on, marribu Sitindangi Ni Jahowa ingkon manadingkon huta ni nasida alani porang dohot penganiayaan di Ukraina timur. Adong do sian nasida na tarbunu. Alai, godang donganta i dijangkon di jabu ni dongan sahaporseaon di inganan na asing di Ukraina dohot di Rusia. Di dua inganan i, ndang olo donganta parsidohot tu politik, alana ”ndang sian portibi on” nasida jala tongtong marhiras ni roha ”mamaritahon hata i”.Joh. 15:19; Ul. 8:4.

PATOGU MA HAPORSEAON NI PANGUNGSI

8, 9. (a) Aha do ambatambat na diadopi pangungsi di negara na asing? (b) Boasa ingkon sabar hita mangurupi nasida?

8 Pigapiga pangungsi laho do mangungsi tu inganan na asing di negaranasida. Alai godang do na mangungsi tu negara na asing. Tutu, olo do pamarenta mangalehon sipanganon, pangkean, dohot inganan tu pangungsi. Alai adong do ambatambat na diadopi nasida. Umpamana, ra imbar do sipanganon di negara i. Pigapiga pangungsi na ro sian inganan na mohop ndang mangantusi songon dia marpangkean di inganan na ngali. Na asing muse ingkon marsiajar laho mamangke barang na so hea dipangke.

9 Adong do pigapiga pamarenta na mangurupi pangungsi asa boi maringanan di negara na baru. Alai, mangkirim do pamarenta asa dilului pangungsi i karejona dung pigapiga bulan. On ma na mansai maol diadopi pangungsi. Godang angka na baru na ingkon diparsiajari nasida. Umpamana, bahasa, hasomalan, dohot uhum taringot manggarar pajak, parsingkolaan, jala mangajari ianakhon! Sabar do hamu mangurupi donganta na mangadopi ambatambat sisongon on?Plp. 2:3, 4.

10. Tingki adong pangungsi na baru ro, songon dia do hita patoguhon haporseaon ni nasida? (Ida gombar di mula ni parsiajaran.)

10 Sipata, ndang diloas pamarenta donganta pangungsi manjumpangi dongan sahaporseaon di inganan i. Adong do pamarenta na so paloashon pangurupion sian dongan sahaporseaon. Olo do ra dilehon pamarenta karejo na mambahen nasida ndang boi marpungu. Molo ndang dijalo karejo i, ndang boi nasida tading di inganan i. Ala mabiar jala mangkaporluhon pangurupion, adong do na olo manjalo karejo i. Alani i, hatop ma tajumpangi donganta pangungsi, asa diboto na tasarihon do nasida. Pangurupion sisongon i boi patoguhon haporseaon ni nasida.Poda 12:25; 17:17.

LEHON MA PANGURUPION TU ANGKA PANGUNGSI

11. (a) Mulana, aha do na rumingkot di pangungsi? (b) Songon dia do angka pangungsi patuduhon hamauliateon?

11 Na parjolo, porlu do talehon tu donganta sipanganon, pangkean, dohot  na asing. * Nang pe ndang barang na arga na talehon, songon dasi, nunga mararga i di nasida. Tontu ndang olo nasida mamaksa asa adong na talehon, alai porlu do nasida mandok mauliate tu pangurupion na talehon. On mambahen las roha ni donganta na mangalehon. Tontu, ringkot do di pangungsi manggohi na porlu di nasida sandiri. Molo diulahon songon i, tongtong ma mararga nasida jala denggan maraleale dohot dongan sahaporseaon. (2 Tes. 3:7-10) Alai, tongtong ma taurupi angka pangungsi.

Songon dia do hita mangurupi donganta na gabe pangungsi? (Ida paragraf 11-13)

12, 13. (a) Aha do pangurupion na boi talehon tu pangungsi? (b) Paboa ma pengalaman.

12 Ndang ingkon hepeng na godang na talehon tu pangungsi. Tingki dohot holong do na rumingkot talehon tu nasida. Umpamana, urupi ma nasida mamboto taringot transportasi, manuhor sipanganon na sehat jala mura. Urupi ma nasida asa boi mandapot masin jahit manang masin babat rumput na boi parohon hepeng. Na rumingkot, urupi ma nasida asa marlas ni roha di huria na baru. Molo adong kendaraanmu, boan ma nasida tu parpunguan. Patorang ma cara na dumenggan laho marbarita di ingananmuna, jala boi do hamu rap marbarita.

13 Tingki ro opat pangungsi na poso dope tu sada huria, diurupi sintua do  nasida. Diajari do nasida asa boi mamboan mobil, mambahen surat, jala mangalului parkarejoan. Diurupi do nasida mangatur tingki asa mangkaringkothon pangkobasion tu Jahowa. (Gal. 6:10) Ndang sadia leleng, gabe perintis ma siopat halak i. Ala pangurupion ni sintua jala lomo roha ni nasida marhobas tu Jahowa, tarida ma hamajuon ni nasida di partondion jala dipasiding do ulaon na so dihalomohon Debata.

14. (a) Angka aha do elaela na diadopi pangungsi? (b) Paboa ma pengalaman.

14 Songon halak Kristen na asing, ingkon martahan do pangungsi mangadopi elaela asa unang mangkaringkothon arta sian paralealeon tu Jahowa. * Songon si Lije dohot hahaanggina na dipaboa di parsiajaran on, diingot do na diajarhon bapakna, i ma ingkon togu di haporseaon tudia pe nasida mangungsi. Didok nasida, ”Tingki di pardalanan, dibolongkon bapakku ma barang na so pola porlu na di bagasan tas. Ujungna, ditiop ma tas na so marisi i, jala mengkel suping mandok tu hami: ’Ida ma, holan on do na tahaporluhon!’”—Jaha 1 Timoteus 6:8.

NA RUMINGKOT DI ANGKA PANGUNGSI

15, 16. (a) Songon dia do hita boi patoguhon haporseaon ni donganta pangungsi? (b) Songon dia do caranta mangurupi asa las rohanasida?

15 Ndang holan sipanganon dohot pangkean na dihaporluhon pangungsi. Dihaporluhon nasida do pangapulion marhite Hata ni Debata. (Mat. 4:4) Angka sintua boi mangurupi pangungsi marhite mangalehon publikasi di bahasa ni nasida, jala mangido pangurupion sian donganta na mamboto bahasa ni nasida. Mansai ringkot do on, alana ditadingkon pangungsi do sude na adong di nasida. Masihol do nasida tu keluarga, aleale, dohot huria. Dihaporluhon nasida do holong ni Jahowa dohot haburjuon sian dongan sahaporseaon. Molo ndang pintor taurupi, olo do donganta pangungsi gabe manjalo pangurupion sian halak na so manomba Jahowa. (1 Kor. 15:33) Molo tabahen nasida gabe donganta di huria, na rap saulaon do hita dohot Jahowa mangalinggomi ”panompang”.Ps. 146:9, Bibel siganup ari.

16 Ndang mulak Jesus dohot keluargana tu huta ni nasida saleleng mamarenta dope na paburuburu nasida. Olo do songon i pangkilalaan ni pangungsi. Alai, adong do na so olo be mulak. Songon na didok si Lije, godang do natuatua mangida ianakhonna diperkosa jala dibunu di hutana. I do alana ndang olo be nasida mulak tu hutana. Laho mangurupi donganta, porlu do tapatudu roha ’sapangkilaan, marholong ni roha di dongan, marasi ni roha, jala serep marroha’. (1 Ptr. 3:8) Ala dianiaya, sipata ndang olo pangungsi i marsaor tu na asing, jala maila paboahon sitaononna, tarlumobi di jolo ni ianakhonna. Sungkun ma dirimu, ’Molo ahu na  mangkilala i, aha do na huhalomohon bahenon ni halak tu ahu?’Mat. 7:12.

TINGKI MARBARITA TU PANGUNGSI

17. Songon dia do ulaon marbarita boi mangapuli pangungsi?

17 Godang do pangungsi na ro sian negara na mangorai ulaon marbarita na uli. Alai, ala hiras ni roha ni Sitindangi marbarita, marribu pangungsi gabe boi manangihon ”hata Harajaon”. (Mat. 13:19, 23) Godang do ”na sorat” na mandapot pangapulion dohot pangurupion tingki ro tu parpunguan. Jala didok nasida, ”Tutu do Debata di tongatongamuna.”Mat. 11:28-30; 1 Kor. 14:25.

18, 19. Songon dia do hita patuduhon bisuk tingki marbarita tu pangungsi?

18 Porlu do marbisuk jala ’pantas marroha’ tingki marbarita tu pangungsi. (Mat. 10:16; Poda 22:3) Sabar ma hamu manangihon nasida. Alai, unang ma ulas taringot politik. Taihuthon ma tudutudu sian kantor cabang dohot sian pamarenta asa unang parohon jea tu hita dohot tu na asing. Ala marragam do agama dohot hasomalan ni pangungsi, porlu do taparsiajari songon dia pangkilalaan dohot pamingkirion ni nasida. Umpamana, adong do na mamboan hasomalan sian negarana taringot songon dia sahalak borua marpangkean. Alani i, tingki marbarita na uli tu nasida, ringkot taparrohahon caranta marpangkean asa unang ganggu roha ni nasida.

19 Lomo do rohanta mangurupi halak na marsitaonon nang pe nasida ndang manomba Jahowa. Molo taulahon on, na maniru halak Samaria di tudosan ni Jesus do hita. (Luk. 10:33-37) Cara na dumenggan laho mangurupi halak, i ma mangajarhon barita na uli tu nasida. Sahalak sintua naung mangurupi pigapiga pangungsi patorangkon, pintor tapaboa ma molo hita Sitindangi Ni Jahowa. Ingkon botoon ni nasida, umlomo do rohanta mangurupi nasida mangantusi pangkirimon na dipaboa di Bibel sian na mangurupi nasida di parhepengon.

PAROHON LAS NI ROHA

20, 21. (a) Aha do pasupasu na tadapot molo tapatudu holong tu pangungsi? (b) Aha do na laho taparsiajari di artikel na mangihut?

20 Molo tapatudu holong tu pangungsi, parohon pasupasu do i. I ma na dihilala donganta na margoar si Alganesh. Tingki mate tungganedolina, mangungsi ma ibana dohot onom ianakhonna ala adong penganiayaan di Eritrea. Saleleng ualu ari ma nasida mamolus padang pasir. Ujungna, sahat ma nasida di Sudan. Didok si Alganesh, ”Dibahen donganta na disi do hami songon keluargana sandiri, dilehon do sipanganon, pangkean, inganan, dohot transportasi.” Didok muse, ”Ise ma na olo manjangkon halak na so ditanda tu jabuna holan ala na manomba Debata na sarupa? Holan Sitindangi Ni Jahowa do na songon i!”Jaha Johannes 13:35.

21 Songon dia do taringot ianakhon na mangungsi dohot natuatuana? Di artikel na mangihut, taparsiajari ma songon dia hita mangurupi nasida asa marlas ni roha manomba Jahowa.

^ par. 2 Di artikel on, hata ”pangungsi” patuduhon halak na manadingkon hutana alani porang, penganiayaan, manang gempa bumi. Ra, tading di inganan na baru do nasida manang di inganan na jonok sian huta ni nasida. Komisaris Tinggi PBB Urusan Pengungsi (UNCHR) paboahon, 1 sian 113 halak gabe pangungsi di liat portibi on.

^ par. 6 Ida ma artikel ”Patudu ma Haburjuon tu Halak na So Tatanda sian Luat na Asing” di Joujou Paboahon Oktober 2016, halaman 3-8.

^ par. 11 Pintor hatop ma sintua mangurupi pangungsi na ro, jala mangihuthon tudutudu sian buku Diorganisasi untuk Melakukan Kehendak Yehuwa, pasal 8, paragraf 30. Hatop ma disungkun tu kantor cabang marhite jw.org, manungkun didia huria ni pangungsi i. Jala marbisuk ma sintua manungkun tu pangungsi i taringot huria ni nasida laos mamparrohahon partondion ni nasida.

^ par. 14 Ida ma artikel ”Tak Seorang Pun Dapat Melayani Dua Majikan” dohot ”Tabahlah—Yehuwa Penolong Saudara!” di Menara Pengawal 15 April 2014, halaman 17-26.