Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Mei 2017

”Humolong do Roham di Ahu Sian Angka On?”

”Humolong do Roham di Ahu Sian Angka On?”

”Simon, anak ni si Jonas, humolong do roham di Ahu sian angka on?”JOHANNES 21:15.

ENDE: 32, 45

1, 2. Dung saborngin manipat manjala dengke, aha do parsiajaran na didapot si Petrus?

NUNGA saborngin manipat pitu sisean ni Jesus manjala dengke di Laut Galilea. Alai, ndang adong dengke na dapot ni nasida. Di manogotna i, jongjong ma Jesus di topi ni tao i mamparrohahon nasida. ”Didok ma tu nasida: Sampakkon hamu ma jalamuna tu siamun ni parau i, asa dapotan hamu! Jala disampakkon nasida ma, gabe ndang tartait nasida be jala i dibahen godang ni dengke i.”Joh. 21:1-6.

2 Diparade Jesus do dengke dohot roti asa dipangan siseanna di manogot i. Dung i, didok ma tu si Simon Petrus, ”Simon, anak ni si Jonas, humolong do roham di Ahu sian angka on?” Diboto Jesus, lomo do roha ni si Petrus manjala dengke. Ra disungkun Jesus songon i, asa botoonna do tudia humolong roha ni si Petrus, tu Jesus dohot ajaranna do manang tu ulaon manjala dengke. Dialusi  si Petrus ma, ”Tuhan; diboto Ho do holong ni rohangku di Ho!” (Joh. 21:15) On ma parsiajaran na didapot si Petrus: Ingkon humolong do rohana tu Kristus sian ulaon na asing. Dipatudu si Petrus ma na tutu do hatana i. Dipatudu ma i marhite hiras ni rohana marbarita, jala mandapot hak na sumurung ma ibana di huria.

3. Aha do na porlu diingot sude halak Kristen?

3 Aha na taparsiajari sian hata ni Jesus tu si Petrus? Ingkon manat do asa unang lam ngali holongta tu Kristus. Diboto Jesus, jotjot do hita holsoan jala mangadopi hasusaan. Di tudosanna taringot panabur, didok Jesus do adong pigapiga halak na manjalo ”hata Harajaon i” jala mulana songon na marhiras ni roha. Alai, ”pangkolsohonna di angka na di hasiangan on dohot hamoraon sipangansi i do mamisati hata i”, na mambahen mago hiras ni rohanasida. (Mat. 13:19-22; Mrk. 4:19) Molo ndang manat hita, arsak ni roha siganup ari boi mambahen ndang marhiras ni roha be di ulaon partondion. Alani i didok Jesus tu siseanna, ”Jaga hamu ma dirimuna, unang sorat rohamuna binahen ni parminumon dohot parmabuhon dohot panarihon di hangoluan on.”Luk. 21:34.

4. Aha na mangurupi hita asa mamboto na togu do holongta tu Kristus? (Ida gombar di mula ni parsiajaran.)

4 Songon si Petrus, tapatudu ma holongta tu Kristus marhite mangkaringkothon ulaon marbarita. Songon dia do carana asa taboto na tongtong hita mangulahon i? Tasungkun ma dirinta: ’Tu ulaon aha do humolong rohangku? Manomba Jahowa do na mambahen ahu sonang manang ulaon na asing?’ Asa boi taalusi sungkunsungkun on, adong tolu bagian na laho taulas na boi mambahen humurang holongta tu Kristus, i ma parkarejoan, hiburan, dohot angka arta.

UNANG MA PARKAREJOAN NA RUMINGKOT DI NGOLUMUNA

5. Aha do tanggung jawab ni angka tungganedoli?

5 Ndang na manjala dengke i ulaon na mansai dihalomohon si Petrus. Diulahon pe i, asa boi do mangan keluargana. Saonari, dilehon Jahowa do tanggung jawab tu tungganedoli asa mangalehon mangan keluargana. (1 Tim. 5:8) Marsitutu do nasida mangulahon on. Alai, boi do karejo mambahen hita marsak.

6. Boasa karejonta boi mambahen hita marsak?

6 Gumodang do na mangalului karejo sian godang ni parkarejoan na adong. Marlumba do halak asa mandapot karejo. Godang na mandok ingkon karejo lembur do nasida, nang pe otik gajina. Saonari, godang do perusahaan naeng mambahen barang na denggan alai otik parkarejona. Alani i, pigapiga parkarejo gabe marsak, gale, jala marsahit. Ala  godang na mabiar dipakaluar sian karejona, gabe olo ma nasida mangulahon manang aha pe na dipangido tongkena.

Ala halak Kristen hita, ingkon tu Jahowa do hita marsihohot

7, 8. (a) Ingkon tu ise do hita tongtong marsihohot? (b) Aha do parsiajaran na ringkot na didapot donganta di Thailand taringot karejona?

7 Ala halak Kristen hita, ingkon tu Jahowa do tongtong marsihohot, ndang tu tongke manang tu ise pe. (Luk. 10:27) Tutu, karejonta boi manggohi na tahaporluhon jala mangurupi hita di ulaon marbarita. Alai molo ndang manat hita, boi do i manegai paralealeonta tu Jahowa. Parrohahon ma pengalaman ni donganta di Thailand. Didok ibana, ”Las do rohangku karejo padengganhon komputer, alai godang do suda tingkingku tusi. Ujungna, ndang adong be tingkingku mangulahon ulaon partondion. Huboto ma, molo lomo rohangku mangkaringkothon Harajaon ni Debata, ingkon hulului do karejo na asing.” Aha do na diulahon ibana?

8 Dipatorang ibana, ”Dung hirahira sataon mamingkirhon i, manggadis es krim ma ahu di pinggir dalan. Mulana, otik do pangomoanku jala lungun rohangku. Tingki pajumpang dohot donganku sakarejo hian, diparengkeli jala direhei do ahu ala manggadis es krim. Alana, denggan do karejongku tingki padengganhon komputer di inganan na mar-AC. Martangiang ma ahu tu Jahowa, mangido pangurupionNa asa boi martahan jala mangalehon gumodang tingki di ulaon partondion. Dung i, lam denggan ma situasi ni ngolungku. Lam leleng, lam huboto ma songon dia na dihalomohon angka panuhor, jala lam malo ma ahu mambahen es krim. Habis do es krim i hugadis ganup ari. Saonari, gumodang do hepengku sian na karejo padengganhon komputer. On mambahen las rohangku ala ndang marsak songon karejongku na hinan. Na rumingkot, gabe lam jonok do ahu tu Jahowa.”Jaha Mateus 5:3, 6.

Umlomo do rohangku mangulahon karejongku sian ulaon partondion?

9. Songon dia do asa unang gabe rumingkot parkarejoanta di hita?

9 Diargai jala dipasupasu Jahowa do molo marsitutu hita mangulahon karejonta. (Poda 12:14) Alai ingkon taingot, unang gabe rumingkot parkarejoanta sian ulaon partondion. Tingki mandok taringot haporluon siganup ari, didok Jesus, ”Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!” (Mat. 6:33) Sian dia do taboto molo karejonta ndang gabe rumingkot di hita? Tasungkun ma dirinta, ’Umlomo do rohangku mangulahon karejongku sian ulaon partondion?’ Molo tarimangi sungkunsungkun on, boi ma taboto aha do sasintongna na tahalomohon.

10. Aha do parsiajaran na ringkot na diajarhon Jesus?

10 Diajarhon Jesus do na ingkon tajumolohon di ngolunta. Sada tingki, ro ma ibana tu jabu ni si Maria dohot  si Marta. Pintor diparade si Marta do sipanganon. Alai si Maria, hundul di jonok ni Jesus jala manangihon pangajarionna. Marungutungut ma si Marta ala ndang diurupi si Maria. Didok Jesus ma tu si Marta, ”Dipillit si Maria do tohap na uli i; ndang sibuaton i sian ibana.” (Luk. 10:38-42) On ma parsiajaran na ringkot na diajarhon Jesus: Unang ma lomo ni rohanta na taharingkothon, asa tongtong togu holongta tu Kristus, ingkon tapillit do ”tohap na uli i”. Lapatanna, ingkon rumingkot do paralealeonta tu Jahowa.

PANGANTUSIONTA TARINGOT REKREASI DOHOT HIBURAN

11. Aha do na didok Bibel taringot pasonang roha?

11 Ala godang ulaonta, ingkon talehon do tingki laho pasonang roha. Didok di Bibel, ”Ndang adong hape na denggan di jolma i, dungkon ni na mangan ibana dohot na minum, jala dipasonang rohana mangihutihut ulaonna hian.” (Pjm. 2:24) Diboto Jesus, ringkot do siseanna asa maradi. Umpamana ala nunga loja marbarita na uli, didok Jesus do tu nasida, ”Sumurut ma hamu, tungkan na suhi an, pahosahon saotik!”Mrk. 6:31, 32.

12. Boasa ingkon manat hita manontuhon taringot rekreasi dohot hiburan? Paboa ma pengalaman.

12 Rekreasi dohot hiburan mangurupi hita laho pasonang roha. Alai, ingkon manat do asa unang rumingkot di hita laho pasonangkon dirinta. Di abad na parjolo, godang do na marpingkir songon on, ”Mangan minum ma hita, ai mate do hita marsogot.” (1 Kor. 15:32) Pamingkirion sisongon on pe adong do saonari. Umpamana, sahalak dolidoli di Eropa Barat ro tu parpunguanta. Alai ala lomo hian rohana tu hiburan, ndang olo be ibana marsaor tu Sitindangi Ni Jahowa. Di pudian ni ari, diboto ma, gabe parohon jea do molo holan hiburan i na diharingkothon ibana. Marsiajar Bibel ma ibana muse, jala dohot marbarita na uli. Dung tardidi, didok ibana, ”Na husolsoli di ngolungku, i ma ala suda godang tingkingku mangkaringkothon hiburan na diparade portibi on. Barubaru on pe huboto, gumodang las ni roha molo mangulahon na dihalomohon Jahowa.”

13. (a) Boasa ndang denggan molo pagodanghu hiburan dohot rekreasi? Bahen ma tudosan. (b) Aha do na mangurupi hita asa unang rekreasi dohot hiburan na rumingkot di hita?

13 Ingkon boi do hiburan mambahen las rohanta jala margogo muse. Alani i, sadia godang do tingki na talehon tusi? Tapingkirhon ma on. Godang do na lomo rohana mangallang kue dohot bonbon. Alai, molo jotjot hita mangallang sisongon i, boi do hita gabe marsahit. Asa tongtong sehat, ingkon taallang do sipanganon na denggan tu dagingta. Suang songon i, molo gumodang tingkinta tu hiburan dohot rekreasi, on manegai paralealeonta tu Jahowa. Alani i, sadia godang do tingki na boi talehon tu hiburan? Sada cara na boi taulahon, i ma mangalehon tingkinta saleleng saminggu jala manurat piga jom do taulahon ulaon partondion, songon marpungu, marbarita, jala marsiajar Bibel di saminggu i. Dung i, tasurat ma muse piga jom  do talehon tingkinta di saminggu i tu hiburan, songon marolahraga, manonton TV, manang margame. Molo tabandingkon dua daftar i, porlu do tapadenggan caranta mamangke tingki?Jaha Epesus 5:15, 16.

14. Aha do na mangurupi hita asa boi mamillit rekreasi dohot hiburan na denggan?

14 Dipaloas Jahowa do hita mamillit hiburan na tahalomohon, jala tungganedoli ma na mamillit hiburan na pas tu keluargana. Marhite Bibel, dilehon Jahowa do prinsip na patuduhon pamingkirionNa tu sadasada ulaon. On mangurupi hita mamillit na denggan. * ”Silehonlehon ni Debata” do hiburan na denggan. (Pjm. 3:12, 13) Marasingasing do sipilliton ni halak taringot hiburan. (Gal. 6:4, 5) Alai, hiburan aha pe na tapillit, ingkon manat do hita. Jesus mandok, ”Ai ia disi artam, disi do roham!” (Mat. 6:21) Holong ni rohanta tu Jesus Kristus mangonjar rohanta asa patuduhon Harajaon ni Debata do na taharingkothon di ngolunta marhite parniulaonta, pamingkirionta, dohot pangkataionta.Plp. 1:9, 10.

UNANG MA ARTA NA RUMINGKOT DI HAMU

15, 16. (a) Songon dia do roha na holongan di hepeng boi gabe jorat di hita? (b) Aha do poda na dilehon Jesus taringot angka arta?

15 Saonari, lomo do roha ni halak manuhor angka barang na baru, songon  baju, handphone, komputer, dohot na asing. Dirajai holongan di hepeng dohot arta do nasida. Ala naung gabe halak Kristen, aha do na rumingkot di hamu? Rimangi ma: ’Gabe suda do tingkingku mamingkirhon mobil manang baju na baru sian mangalehon tingki paradehon na diulas di parpunguan? Pasibukhu do ahu gabe ndang jotjot martangiang dohot manjaha Bibel?’ Molo ndang manat, boi do gabe rumingkot roha na holongan di hepeng sian holong ni rohanta tu Kristus. Tarimangi ma na didiok Jesus, ”So tung hisapan hamu di arta.” (Luk. 12:15, Bibel siganup ari) Boasa didok songon i?

Molo hamoraon manang arta do na rumingkot di hita, ndang boi talehon na dumenggan tu Jahowa

16 Jesus mandok, ”Ndang haoloan sada halak dua induk.” Didok muse, ”Ndang haoloan hamu Debata rap dohot Mammon (Hamoraon)!” Lapatanna, molo hamoraon manang arta do na rumingkot di hita, ndang boi talehon na dumenggan tu Jahowa. Didok Jesus do muse pangkorhonna, i ma ”hosomanna do na sada, haholonganna do na sada nari” jala ”hombaranna do na sada, toisanna do na sada nari”. (Mat. 6:24) Ala mardosa dope hita, ingkon marsitutu do mangalo ”hisaphisap ni dagingta”, dohot ma i roha na holongan di hepeng.Eps. 2:3.

17. (a) Boasa adong na maol pasidingkon roha holongan di hepeng? (b) Aha do na mangurupi hita pasidingkon roha holongan di hepeng?

17 Saonari, godang na mangkaringkothon lomo ni rohana dohot hasonangan. Gabe maol ma nasida pasidingkon roha na holongan di hepeng. (Jaha 1 Korint 2:14.) Ala nunga asing pamingkirion ni nasida, maol ma paimbarhon dia na sala jala dia na sintong. (Heb. 5:11-14) Ujungna, lam humolong ma roha ni nasida di hepeng. Molo lam godang na didapot, lam godang ma na dihalomohon muse. (Pjm. 5:9) Boi do tapasiding roha na holongan di hepeng molo tajaha Bibel. (1 Ptr. 2:2) Ala dirimangi Jesus taringot bisuk na sian Jahowa, boi ma ibana manjua elaela ni Sibolis. (Mat. 4:8-10) Saonari pe, asa boi tapasiding roha na holongan di hepeng, ingkon taihuthon do poda ni Jahowa. Molo taulahon on, nunga tapatudu na humolong do rohanta tu Jesus sian angka arta.

Aha do na rumingkot di ngolumuna? (Ida paragraf 18)

18. Aha do na laho ulahononmuna?

18 Tingki disungkun Jesus tu si Petrus, ”Humolong do roham di Ahu sian angka on?”, didok Jesus ingkon diharingkothon si Petrus do paralealeonna tu Jahowa. Lapatan ni goar ni si Petrus, i ma ”Sada Batu”. On tarida sian parange ni si Petrus na denggan jala togu songon batu. (Ul. 4:5-20) Saonari, lomo do rohanta asa tongtong togu holongta tu Kristus. Alani i, unang ma rumingkot karejo, hiburan, dohot angka arta di ngolunta. Molo taulahon i, sarupa ma hita songon si Petrus na mandok, ”Tuhan; diboto Ho do holong ni rohangku di Ho.”

^ par. 14 Ida ma artikel ”Apakah Rekreasi Saudara Bermanfaat?” di Menara Pengawal 15 Oktober 2011, halaman 9-12, paragraf 6-15.