Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 11

Tangihon ma Soara ni Jahowa

Tangihon ma Soara ni Jahowa

“On do Anakku . . . Tangihon ma ibana.”​—MAT. 17:5.

ENDE 89 Tangihon, Oloi, asa Dapot Pasupasu

NA LAHO DIULAS *

1-2. (a) Marhite aha do Jahowa mangkatai tu jolma? (b) Aha do na laho taulas di parsiajaran on?

LOMO do roha ni Jahowa mangkatai tu jolma. Najolo, dipangke Jahowa do panurirang, suru-suruan, dohot Anakna Jesus laho paboahon lomo ni rohana. (Am. 3:7; Gal. 3:19; Pgk. 1:1) Saonari pe, mangkatai do Jahowa tu hita marhite Hatana, i ma Bibel. Dilehon do i tu hita asa boi taantusi pingkiran dohot ulaonna.

2 Tingki di tano on Jesus, tolu hali ma Jahowa mangkatai sian surgo tu ibana. Saonari taulas ma, aha na didok Jahowa, aha na boi taparsiajari sian hatana i, jala aha do labana tu hita.

“HO DO ANAKKU, HAHOLONGANKI”

3. Songon na didok di Markus 1:9-11, aha do na didok Jahowa tingki tardidi Jesus, jala aha do na ringkot taboto sian hatana i?

3 Di Markus 1:9-11 ma parjolo sahali dipaboa na hea mangkatai Jahowa sian surgo. (Jaha.) Didok Ibana, “Ho do Anakku, haholonganki. Halomoan ni rohangku do ho.” Tontu mansai las do roha ni Jesus tingki mambege Amana paboahon holong dohot pos ni rohana tu ibana! Sian hata ni Jahowa i, adong tolu na ringkot taboto taringot Jesus. Na parjolo, Jesus Anak ni Debata. Na paduahon, dihaholongi Jahowa do Jesus. Na patoluhon, halomoan ni Jahowa do Jesus. Saonari, taulas ma taringot tolu na ringkot i.

4. Dung tardidi Jesus, songon dia do ibana gabe lam solhot tu Jahowa?

4 “Ho do Anakku.” Tingki didok Jahowa songon i, on patuduhon na lam solhot do Ibana dohot Jesus. Andorang  so tu tano on Jesus, nunga gabe anak ni Debata ibana. Alai dung tardidi, gabe anak ni Debata na dimiahi tondi parbadia ma ibana jala marpangkirimon mangolu di surgo laho gabe Raja dohot Malim. (Luk. 1:31-33; Heb. 1:8, 9; 2:17) Alani i, tingki tardidi Jesus didok Jahowa ma, “Ho do Anakku.”​—Luk. 3:22.

Pujian dohot hata na denggan boi patoguhon hita (Ida paragraf 5) *

5. Songon dia hita boi maniru Jahowa ?

5 “Ho do . . . haholonganki.” Holong dohot asi ni roha na dipatudu Jahowa, paingothon hita asa patoguhon donganta na asing. (Joh. 5:20) Tontu, las do rohanta molo adong dongan na patuduhon holong manang mamuji na taulahon. Dos songon i ma, ingkon tahaholongi jala tapatogu do angka dongan di huria dohot keluarganta. Molo tapuji nasida, gabe lam togu ma haporseaon ni nasida tu Jahowa jala marsihohot tu Ibana. Tarlumobi angka natua-tua, ingkon dipatogu nasida do ianakhonna. Tingki dipuji natua-tua ianakhonna jala dipatudu asi ni roha, on boi mangurupi nasida asa lam togu.

6. Boasa boi pos rohanta tu Jesus Kristus?

6 “Halomoan ni rohangku do ho.” Hata on patuduhon, na pos do roha ni Jahowa, na tongtong Jesus mangulahon sangkap ni Bapakna. Suang songon i ma, hita pe ingkon pos do rohanta na laho digohi Jesus do sude janji ni Jahowa. (2 Kor. 1:20) Molo tarimangi angka contoh na dibahen Jesus, on mangonjar rohanta asa marsiajar sian ibana jala maniru ibana. Songon pos ni roha ni Jahowa tu Jesus, pos do roha ni Jahowa tu angka naposona na tongtong maniru Anakna.​—1 Ptr. 2:21.

 “TANGIHON MA IBANA”

7. Songon na dipaboa di Mateus 17:1-5, tingki sadihari do Jahowa mangkatai sian surgo jala aha do na didok Ibana?

7 Jaha Mateus 17:1-5. Tingki ‘muba rupa ni Jesus’, mangkatai do Jahowa paduahalihon sian surgo. Tingki i, diboan Jesus do si Petrus, si Jakobus, dohot si Johannes mandongani ibana nangkok tu dolok na timbo. Sanga do “modom” angka apostelna i. Alai dung dungo, diida nasida ma sada parnidaan. (Luk. 9:29-32) Diida nasida ma marsinondang bohi ni Jesus jala pangkeanna mansai bontar. Jala diida nasida si Musa dohot si Elia mangkata-hatai dohot Jesus taringot hamatean dohot haheheon ni Jesus. Dung i adong ma ombun manutupi nasida, jala dibege nasida ma soara ni Debata sian ombun i! Songon tingki Jesus tardidi, dipaboa Jahowa do muse holong ni rohana tu Anakna i. Didok, “On do Anakku, haholonganki, halomoan ni rohangku do ibana.” Alai di tingki on, didok Jahowa ma muse, “Tangihon ma ibana.”

8. Aha do laba ni parnidaan i tu Jesus dohot tu angka siseanna?

8 Parnidaan i patuduhon, hasangapon dohot huaso ni Jesus tingki gabe Raja haduan di Harajaon ni Debata. Tontu, on patoguhon jala mampargogoi Jesus asa boi martahan mangadopi angka sitaonon na laho masa tu ibana. Jala parnidaan i, patoguhon angka sisean ni Jesus asa boi mangadopi angka hasusaan na laho masa tu nasida. Jala mangurupi nasida laho mangulahon tugas na dilehon Jesus tu nasida. Dung 30 taon, disurat si Petrus do taringot parnidaan i. On patuduhon, na tangkas dope diingot ibana parnidaan i.​—2 Ptr. 1:16-18.

9. Sipaingot aha do na dilehon Jesus tu angka siseanna?

9 “Tangihon ma ibana.” Tangkas ma, lomo roha ni Jahowa asa tatangihon hata ni Anakna jala taulahon. Aha do na didok Jesus tingki di tano on ibana? Godang do na dipaboa ibana na ringkot tatangihon! Umpamana, denggan do diajarhon ibana tu angka siseanna carana marbarita na uli, jala dipaingot do nasida asa tongtong jaga. (Mat. 24:42; 28:19, 20) Didok Jesus do muse tu nasida asa marsitutu mangulahon i jala unang marnaloja. (Luk. 13:24) Dipaingot Jesus do angka siseanna asa masihaholongan, tongtong marsada, jala mangulahon parentana. (Joh. 15:10, 12, 13) Tontu sipaingot na denggan do on tu angka sisean ni Jesus! Jala marlaba do sipaingot on tu hita saonari.

10-11. Songon dia do hita patuduhon na tatangihon do Jesus?

10 Didok Jesus, “Manang ise na mangoloi hasintongan i, tangihononna do soarangku.” (Joh. 18:37) Molo ‘tongtong sabar tu na asing, jala rade manalpuhon hasalaan’, on patuduhon na tatangihon do Jesus. (Kol. 3:13; Luk. 17:3, 4) Cara na asing laho manangihon Jesus, i ma molo tongtong ringgas hita marbarita na uli “di tingki susa dohot di tingki sonang”.​—2 Tim. 4:2.

11 Jesus mandok, “Ditangihon biru-birungku do soarangku.” (Joh. 10:27) Dipatudu sisean ni Jesus do na ditangihon nasida soarana jala mangulahon angka parentana. Ndang olo nasida “paholsohu tu parngoluon”. (Luk. 21:34)  Alai, diharingkothon nasida do parenta ni Jesus di ngolu ni nasida, nang pe ingkon mangadopi na susa. Godang do angka donganta na mangadopi hasusaan. Adong na dipungkuli na marsogo ni roha tu hita, haraparon, dohot bencana alam. Alai tongtong do nasida marsihohot tu Jahowa. Marjanji do Jesus tu nasida, didok, “Manang ise na manjalo jala na mangoloi parentangku, ibana ma na mangkaholongi ahu. Manang ise na mangkaholongi ahu, haholongan ni Damang i ma ibana.”​—Joh. 14:21.

Ulaonta marbarita mangurupi hita asa tongtong marsihohot (Ida paragraf 12) *

12. Aha do cara na asing na patuduhon na tatangihon do Jesus?

12 Cara na asing na patuduhon na tatangihon do Jesus, i ma marhite unduk tu na manguluhon hita. (Heb. 13:7, 17) Piga-piga taon on, godang do dibahen organisasi tudu-tudu na baru. Umpamana, mamangke alat dohot cara na baru laho marbarita, acara na baru di parpunguan parsitongaan ni minggu, pajongjongkon, padengganhon, dohot manjaga Bale Harajaonta. Tontu taargai jala taulahon do tudu-tudu on! Pos ma rohanta pasu-pasuon ni Jahowa do hita molo marsitutu mangihuthon tudu-tudu na dilehon organisasi.

13. Aha do labana molo tatangihon Jesus?

13 Godang do labana na tadapot molo tatangihon sude hata ni Jesus. Marjanji do Jesus tu angka siseanna, molo na diajarhonna i boi mambahen las roha ni nasida. Didok ibana, ‘Dapotmuna ma hasonangan. Ai lambok do augangku jala neang do bobanku.’ (Mat. 11:28-30) Di Bibel, tarlumobi di opat Injil, dipaboa do taringot hangoluan dohot pangkobasion ni Jesus. On boi mambahen las rohanta, patoguhon haporseaonta jala mambahen hita marbisuk. (Ps. 19:8; 23:3) Didok Jesus ma, “Halak na manangihon hata ni Debata jala na mangulahon i do na marlas ni roha!”​—Luk. 11:28.

‘PASANGAPONKU DO GOARHU’

14-15. (a) Songon na disurat di Johannes 12:27, 28, sadihari do muse Jahowa mangkatai sian surgo? (b) Boasa hata ni Jahowa i mangapuli jala patoguhon Jesus?

14 Jaha Johannes 12:27, 28. Dipaboa do di injil Johannes tingki mangkatai Jahowa na patoluhalihon sian surgo.  Piga-piga ari andorang so mate Jesus, laho do ibana tu Jerusalem laho mangarayahon Paska na parpudi. Didok ibana, “Susa do huhilala.” Didok ma di tangiangna, “Ale Amang, pasangap ma goarmi.” Dialusi Jahowa ma sian surgo, “Nunga hupasangap i, jala pasangaponku do i muse.”

15 Ala naeng tongtong setia tu Jahowa, gabe susa ma dihilala Jesus. Diboto Jesus do na laho disiksa ibana jala lea parmatena. (Mat. 26:38) Alai na rumingkot di Jesus, i ma pabadiahon goar ni Jahowa. Marsak do Jesus molo parmatena i mambahen lea goar ni Jahowa, alana ditudu do ibana mangaleai Debata. Tontu, hata ni Jahowa i mambahen togu roha ni Jesus. Pos do rohana na laho dipasangap do goar ni Jahowa. Hata ni Jahowa i mambahen ibana boi martahan mangadopi angka na laho masa tu ibana. Tingki i, ra holan Jesus do na mangantusi hata ni Jahowa i. Alai saonari, disurat do i di Bibel laho patoguhon hita.​—Joh. 12:29, 30.

Pasangapon ni Jahowa do goarna jala paluonna do naposona (Ida paragraf 16) *

16. Aha do na tahilala boi mambahen marlea goar ni Jahowa?

16 Songon Jesus, hita pe olo do mabiar molo dileai goar ni Jahowa. Dibahen do na so tigor tu hita, manang adong mandok na so tutu taringot hita. Ra gabe marsak do hita, ala on boi mambahen  marlea goar ni Jahowa dohot organisasina. Molo masa sisongon i, unang pola marsak hita. Taingot ma hata ni Jahowa tu Jesus. Pos ma rohanta, ‘marhite Kristus Jesus, lehonon ni Debata ma tu hita hadameon na so boi diantusi jolma, na boi manjaga roha dohot pingkiranta’. (Plp. 4:6, 7) Sai dipasangap Jahowa do goarna. Marhite Harajaonna, ripashononna ma Sibolis dohot portibi on na mambahen susa naposo ni Jahowa na marsihohot.​—Ps. 94:22, 23; Jes. 65:17.

LABA NI MANANGIHON SOARA NI JAHOWA

17. Hombar tu Jesaya 30:21, songon dia Jahowa mangkatai tu hita saonari?

17 Saonari pe, mangkatai do Jahowa tu hita. (Jaha Jesaya 30:21.) Tutu, ndang hea tabege soara ni Jahowa sian surgo. Alai dilehon Ibana do tu hita Hatana na tarsurat, i ma Bibel na boi manogu-nogu hita. Asing ni i, marhite tondi parbadiana, diparade “naposo haposan” do angka na tahaporluhon laho patoguhon hita. (Luk.12:42) Mansai godang do na diparade nasida, songon publikasi tercetak manang elektronik, video, dohot rekaman ni sijahaonta na boi patoguhon haporseaonta!

18. Songon dia do hata ni Jahowa boi patoguhon haporseaonmuna jala mambahen hamu barani?

18 Tongtong ma taingot hata ni Jahowa tu Jesus tingki di tano on! Songon na dipaboa di Bibel, pos do rohanta na Jahowa do parhuaso. Jala laho padengganonna do muse angka naung sega na dibahen Sibolis dohot portibi na jahat on. Alani i, tongtong ma tatangihon soara ni Jahowa. Molo taulahon i, boi ma hita mangadopi angka hasusaan saonari dohot di ari na naeng ro. Bibel mandok, “Ingkon sabar do hamu, asa molo dung diulahon hamu lomo ni roha ni Debata, dapotmuna ma na dijanjihonna i.”​—Heb. 10:36.

ENDE 4 “Jahowa do Siparmahan Ahu”

^ par. 5 Tingki di tano on Jesus, tolu hali ma Jahowa hea mangkatai tu ibana sian surgo. Sian sitolu hali i, hea do sahali didok Jahowa tu sisean ni Jesus asa ditangihon nasida Anakna i. Saonari pe, mangkatai do Jahowa tu hita marhite Bibel, na marisi ajaran ni Jesus, dohot organisasina. Di parsiajaran on taulas ma, aha do laba na tadapot molo tatangihon Jahowa dohot Jesus.

^ par. 52 HATORANGAN NI GAMBAR: Sahalak sintua mamparrohahon sahalak parhobas di huria paiashon Bale Harajaon jala mangaradoti angka sijahaonta. Jala dipuji sintua i do parhobas i.

^ par. 54 HATORANGAN NI GAMBAR: Donganta na mardongan saripe di Sierra Leone mangalehon gokkon tu parpunguan tu sahalak nelayan.

^ par. 56 HATORANGAN NI GAMBAR: Angka Sitindangi di negara na mangorai ulaonta, marpungu di sada jabu. Ndang pola resmi pangkean ni nasida asa unang dicurigai.