”Sai tangihon ma hata sipaingot . . . asa gabe pistar ho.”​—PODA 19:20.

ENDE: 56, 89

1. Songon dia carana asa marbisuk hita, jala songon dia i boi mangurupi hita?

BISUK marharoroan sian Jahowa. Jala lomo do rohana mangalehon i tu na asing. Molo tajaha di Jakkobus 1:5, disi didok, “Molo adong di tongatongamuna na hurangan bisuk, dipangido ma tu Debata, na bulus mangalehon di saluhut jala ndang marpangea.” Sada cara asa boi marbisuk hita, i ma manjangkon sipasingot sian Debata. Molo taulahon i, gabe diondingi ma hita sian ulaon na sala. Jala boi do i mambahen hita lam jonok tu Jahowa. (Poda 2:10-12) Asing ni i, gabe tadapot ma pangkirimon asa mangolu salelenglelengna.​—Jud. 21.

2. Songon dia asa taargai sipasingot sian Debata?

2 Ra, ala jolma na mardosa do hita manang ala ndang somal hita dipasingot di keluarganta, gabe maol ma hita manjangkon sipasingot. Alai, molo tahilala do laba ni sipasingot sian Debata, gabe boi ma tahilala holongNa tu hita. Poda 3:11, 12 mandok, “Ale anaha, sai unang toishon pangajaran ni Jahowa.” Dung i didok do muse, “Ai matua dipinsang Jahowa do na hinaholonganna.” Jadi, pos ma rohanta, lomo do roha ni Jahowa  asa hita mandapot na dumenggan. (Jaha Heber 12:5-11.) Diboto Jahowa do sude na tahaporluhon di ngolunta. Jadi, sipasingot na dilehon Ibana, tontu parohon na denggan do i tu dirinta. Di parsiajaran on, adong opat na laho taulas: (1) mangarajai diri, (2) sipasingot na ingkon dilehon natuatua tu ianakhonna, (3) sipasingot na tadapot di huria, (4) adong do na humansit sian hansit na tahilala tingki dipasingot.

BOASA MARBISUK MOLO TARAJAI DIRINTA?

3. Songon dia ianakhon boi diajari asa mangarajai diri? Paboa ma sada tudosan.

3 Mangarajai diri lapatanna, i ma pasingothon dirinta asa lam denggan di parniulaon dohot di pingkiranta. Disi tubu hita, ndang pintor boi hita mangarajai diri, ingkon taparsiajari do i. Umpamana, sahalak natuatua mangajari ianakhonna marsepeda. Mulana, ditiop ibana pudi ni sepeda i asa unang madabu ianakhonna. Dung i, dipalua ibana ma satongkin, alai sipata olo do ditiop ibana. Alai dung pos rohana dipalua ibana ma molo nunga boi marsepeda ianakhonna. Suang songon i ma, molo sabar natuatua mangalatik ianakhonna “di bagasan ajar dohot poda ni Tuhan i”, on mangurupi ianakhonna asa boi mangarajai diri jala marbisuk.​—Eps. 6:4.

4, 5. (a) Boasa pangarajaion diri gabe sada bagian na ringkot asa boi gabe “jolma na imbaru”? (b) Molo hea taulahon na sala, boasa ndang pola gabe metmet rohanta?

4 Suang songon i ma halak na mananda Jahowa tingki dung magodang. Ra, nang pe nasida nunga mangarajai dirina, alai ndang dope nasida gabe halak Kristen na marbisuk. Alai, molo dung di solukkon nasida “jolma na imbaru” jala marsitutu laho maniru Kristus, boi ma nasida gabe halak Kristen na marbisuk. (Eps 4:23, 24) Mangarajai diri boi mangurupi hita asa “manadingkon pangalaho na so hasea dohot hisaphisap ni haportibion jala asa boi tarajai dirinta, marhatigoran jala maragama di portibi on”.​—Tit. 2:12, Bibel siganup ari.

5 Tutu, jolma na mardosa do hita sude. (Pjm. 7:20) Alai, molo taulahon na sala, alani so adong do pangarajaion diri di hita? Ndang songon i. Taparrohahon ma na didok di Poda 24:16, “Ai tung sura pe tinggang halak partigor i pola pitu hali, sai hehe do ibana muse.” Aha do na boi mangurupi hita asa “hehe” muse? Ndang alani gogonta, alai tondi parbadia do na mangurupi hita mangulahon i. (Jaha Pilippi 4:13.) Parbue ni tondi i tarmasuk ma pangarajaion diri.

6. Songon dia asa lam denggan hita marsiajar Bibel? (Ida gombar di mula ni parsiajaran.)

6 Molo martangiang hita, marsiajar jala mangarimangi isi ni Bibel, boi do i mangurupi hita asa lam mangarajai diri. Alai, songon dia molo maol tahilala marsiajar manang ndang pola lomo rohanta marsiajar? Unang gabe metmet rohanta. Diurupi Jahowa do hita asa “mauas” di hataNa. (1 Ptr. 2:2, Bibel siganup ari) Pangido ma pangurupion sian Jahowa, asa boi hamu mangarajai diri jala mangatur tingki laho marsiajar Bibel. Mulana, boi do hamu marsiajar Bibel holan satongkin. Lam leleng, lam mura ma jala lomo ma rohamu marsiajar. Gabe las ma rohamuna mangarimangi hata ni Debata.​—Ps. 77:13.

7. Molo tarajai dirinta, songon dia i boi mangurupi hita marhasil mandapot citacita na tabahen?

7 Mangarajai diri boi mangurupi hita asa  marhasil mangulahon citacita na tabahen laho mangalehon gumodang tingki tu Jahowa. Umpamana, adong sada ama na mangkilala nunga ndang ringgas be ibana marbarita na uli. Jadi, dibahen ibana ma citacita asa boi merintis biasa. Songon dia do ibana boi mangulahon i ala boi mangarajai dirina? Dijaha ibana ma angka sijahaon taringot merintis jala ditangiangkon ibana ma i. On mambahen gabe togu paralealeonna tu Jahowa. Merintis ekstra ma ibana pigapiga hali. Ndang diloas ibana manang aha pe mangambati citacitana i. Ujungna, boi ma ibana gabe perintis biasa.

AJAR MA IANAKHONMUNA MARHITE SIPASINGOT SIAN JAHOWA

Disi tubu ianakhonmuna, ndang pintor diboto dia na sala dohot na sintong. Jadi porlu do nasida dilatik (Ida paragraf 8)

8-10. Aha do na boi mangurupi natuatua laho mangajari ianakhonna asa manomba Jahowa? Paboa ma sada sitiruon.

8 Dilehon Jahowa do tanggung jawab tu angka natuatua laho mangajari ianakhon ni nasida “di bagasan ajar dohot poda ni Tuhan i”. (Eps. 6:4) Mansai maol do mangulahon on di tingkinta saonari. (2 Tim. 3:1-5) Alana disi tubu ianakhonmuna, ndang pintor diboto ibana dia na sala dohot na sintong. Jala panggora ni rohana ndang tarlatik dope. Alani i, porlu do nasida dipasingot asa  tarlatik panggora ni rohana mamboto dia na sala dohot na sintong. (Rom 2:14, 15) Sahalak pakar Alkitab mandok, hata Junani na diterjemahon gabe “sipasingot”, boi do lapatanna “mangajari ianakhon”, manang pagodanggodangkon ianakhon asa gabe halak na martanggungjawab.

9 Molo mardonganhon holong do natuatua pasingothon ianakhonna, dame ma pangkilalaan ni ianakhonna. Gabe diantusi ianakhonna ma ndang sude na dihalomohon nasida boi diulahon. Alana aha na taulahon mangkorhon do i tu ngolunta. Jadi, ringkot do molo natuatua mangasahon bisuk sian Jahowa laho pagodanggodangkon ianakhon nasida. Di ganup inganan, marasingasing do cara ni halak pagodanggodangkon ianakhonna, jala asing do cara ni halak na jolo dohot tu halak saonari. Alai, molo ditangihon natuatua do Hata ni Debata, ndang be lilu nasida taringot aha na ingkon diulahon. Jala nasida pe ndang holan mangasahon pengalaman ni angka halak.

10 Taparrohahon ma sitiruon sian si Noak. Tingki diparentahon Jahowa asa dipauli si Noak sada parau, ndang diboto ibana dope songon dia mangulahon i. Alai, mangasahon Jahowa do ibana. Diulahon ibana do songon na diparentahon Jahowa tu ibana. (1 Mus. 6:22) Aha do hasilna? Tingki ro aek na sumar, malua ma si Noak dohot keluargana! Marhasil do si Noak gabe natuatua na denggan. Boasa? Ala diasahon ibana do bisuk na sian Jahowa. Denggan do si Noak mangajari ianakhonna jala gabe sitiruon do ibana tu nasida, nang pe ndang mura mangulahon i di portibi na jahat tingki i.​—1 Mus. 6:5.

11. Boasa ingkon marsitutu natuatua mangajari ianakhonna?

11 Molo hamu sahalak natuatua, songon dia do caramuna mangulahon songon na diparentahon Debata? Tangihon ma Jahowa, jala jangkon ma pangurupion sian Ibana. Ihuthon ma poda na sian Ibana dohot na sian organisasi. Dung magodang, gabe mandok mauliate ma nasida tu pambahenanmuna i. Songon sahalak donganta mandok, “Tuani ma songon i cara ni natuatuangku pagodanggodangkon ahu. Marsitutu do nasida asa na diajarhonna i hona tu rohangku.” Didok ibana, natuatuana do na mangurupi ibana asa maraleale tu Jahowa. Tontu, nang pe nunga marsitutu natuatua mangajari ianakhonna, alai adong do ianakhon na tong manadingkon Jahowa. Alai, ala nunga marsitutu natuatua mangajari ianakhonna, gabe ias ma panggora ni roha ni nasida. Jala ingot ma, boi dope nasida mulak tu Jahowa.

12, 13. (a) Molo adong ianakhon na dipecat, songon dia do natuatua patuduhon na unduk nasida tu Debata? (b) Songon dia sada keluarga mandapot laba ala natuatuana unduk tu Jahowa?

12 Sada parsoalan na mansai borat na diadopi pigapiga natuatua, i ma tingki ianakhonna dipecat. Adong sahalak donganta borua na boruna dipecat, jala nunga lao sian jabuna. Didok ibana, “Sai hulului do hatorangan sian publikasi atik na boi dope ahu manjumpangi borungku dohot pahompungku.” Alai diurupi tungganedolina ma ibana mangantusi molo nasida ndang be martanggungjawab tu boruna i, jala ingkon tongtong do nasida marsihohot tu Jahowa.

13 Dung pigapiga taon, dijangkon ma muse boruna. Didok omakna ma, “Jotjot do hami martelepon dohot mar-sms! Jala diargai ibana do tungganedolingku dohot ahu ala diihuthon hami do Debata. Gabe lam solhot ma hami.” Jadi molo adong ianakhonmuna na dipecat, olo do hamu “marhaposan  tu Jahowa” sian nasa rohamuna? Manang ‘marpangunsandean tu pingkiranmuna sandiri’ do? (Poda 3:5, 6) Ingot ma, sipasingot sian Jahowa, patuduhon bisukNa na sun denggan dohot holongNa na mansai balga tu hita. Jala unang ma lupa, nunga dilehon anakNa laho manghongkop sude jolma tarmasuk do i ianakhonmuna. Jadi lomo do rohana asa sude jolma mangolu salelengna. (Jaha 2 Petrus 3:9.) Angka natuatua tongtong ma porsea na denggan do sipasingot sian Jahowa dohot tudutuduNa. Tangihon ma Debata jala unang ma mangalo, nang pe hansit tahilala tingki mangihuthon i.

DI HURIA

14. Songon dia do hita diurupi ala mangihuthon tudutudu sian Jahowa marhite naposo haposan?

14 Marjanji do Jahowa laho manarihon, mangalinggomi, dohot mangajari huria Kristen. Diulahon ibana do i marhite pigapiga cara. Umpamana, dipillit ibana do AnakNa laho manarihon angka huria. Jala ditugashon Jesus do naposo haposan laho mangalehon pangajarion na boi patoguhon haporseaonta. (Luk. 12:42) Dilehon nasida do tudutudu na mansai arga dohot sipasingot. Ra, hea do hamu gabe mambahen hamubaon ala mambege sada jamita manang manjaha sijahaonta. Las ma rohamuna, alana i patuduhon na dioloi hamu do sipasingot sian Jahowa.​—Poda 2:1-5.

15, 16. (a) Songon dia hita mandapot laba sian pangurupion ni angka sintua? (b) Aha do na ingkon taulahon asa mura angka sintua mangulahon ulaonna?

15 Dilehon Kristus do angka sintua laho manarihon huria di bagasan holong. Bibel mandok, “silehonlehon tu angka jolma” do angka donganta on. (Eps. 4:8, 11-13) Songon dia hita boi mandapot laba sian ulaon ni angka sintua? Tatiru ma haporseaon dohot parange ni nasida na denggan, jala ihuthon ma poda na dilehon nasida na sian Bibel. (Jaha Heber 13:7, 17.) Holong do roha ni angka sintua tu hita, jala lomo rohana asa lam jonok hita tu Debata. Molo diparrohahon nasida ndang ro hita tu parpunguan, manang ndang ringgas be hita marbarita, pintor hatop do nasida mangurupi hita. Rade do nasida manangihon hita, jala dipatogu do hita marhite poda sian Bibel. Dihilala hamu do holong ni Jahowa marhite pangurupion ni nasida?

16 Ingot ma ndang sai mura angka sintua laho mangalehon poda tu hita. Rimangi ma tingki panurirang Natan laho maminsang Raja Daud ala manabunihon dosana na balga. (2 Sam. 12:1-14) Suang songon i ma apostel Paulus tingki mamodai si Petrus ala paimbarimbarhon halak Jahudi dohot na so Jahudi. Hape sada sian 12 apostel i do si Petrus. Tontu ingkon barani do si Paulus pasingothon ibana. (Gal. 2:11-14) Aha do na ingkon taulahon asa mura nasida mangalehon poda tu hita? Serep ma rohamuna, burju, jala mura ma hamu tingki ditogihon mangkatai. Pos ma rohamuna holong ni Debata do na dihilala hamu sian pangurupion ni nasida. Dapotmuna ma labana, jala las ma roha ni sintua mangulahon ulaon ni nasida.

17. Songon dia angka sintua mangurupi sahalak donganta?

17 Adong sahalak donganta borua na hea mangkilala maol mangkaholongi Jahowa, ala hea masa situasi na mambahen ibana mangkilala sisongon i. Didok ibana, “Huboto do na ingkon mangkatai do ahu tu angka sintua. Ndang dibahen nasida metmet rohangku, gariada dipatogu do ahu. Di ganup parpunguan, nang pe godang ulaon  ni nasida, disangahon nasida do mangkatahatai dohot ahu. Najolo, adong do situasi di tingki naung salpu na mambahen gabe maol huhilala manjangkon holong ni Debata. Alai, dipangke Jahowa do angka dongan dohot angka sintua laho patuduhon na holong do Ibana tu ahu. Martangiang ma ahu, hudok ma ndang na laho tadingkononku Ibana.”

AHA DO NA HUMANSIT SIAN PANGKILALAANTA TINGKI DIPASINGOT?

18, 19. Aha do na humansit sian sipasingot? Paboa ma sada pengalaman.

18 Olo do hansit pangkilalaanta tingki dipasingot, alai humansit do molo ndang tajangkon sipasingot na sian Debata. (Heb. 12:11) Taparrohahon ma pengalaman ni si Kain dohot Raja Sedekia. Tingki diida Jahowa si Kain marsogo ni roha tu anggina jala naeng bunuonna anggina i, dipasingot Jahowa do ibana, “Boasa muruk ho? Boasa murhing bohim? Molo diula ho na denggan, minar ma bohim; alai ala diula ho na jahat, mangonggop ma dosa i di pintu ni roham. Naeng rajaanna ma ho, alai taluhon ma i.” (1 Mus. 4:6, 7, Bibel siganup ari) Ndang olo si Kain manangihon sipasingot sian Jahowa. Dibunu ibana do anggina i. Ujungna, gabe ditaon ibana ma na hansit di ngoluna.(1 Mus. 4:11, 12) Autsugari olo ibana manangihon Debata, ndang ditaon ibana ngolu na mansai hansit.

19 Raja na jahat jala parbiar do si Sedekia. Tingki pamarentaonna, mansai porsuk do ngolu ni angka halak di Jerusalem. Sai jotjot do panurirang Jeremia pasingothon ibana asa marhamubaon. Alai ndang olo ibana manjangkon sipasingot sian Jahowa. Ujungna, gabe porsuk ma ngoluna. (Jer. 52:8-11) Jadi ndang lomo roha ni Jahowa molo hita manaon na hansit.​—Jaha Jesaya 48:17, 18.

20. Aha do na didapot halak na olo manjangkon sipasingot dohot halak na so olo manjangkon?

20 Saonari, godang do halak di portibi on na neang rohana mangida sipasingot sian Debata, jala ndang olo mamparrohahon i. Alai satongkin nai, hilalaon nasida ma hasusaan dohot pangkorhon na roa ala ndang olo manjangkon sipasingot sian Debata. (Poda 1:24-31) Jadi, ingkon tatangihon do sipasingot, asa marbisuk hita. Songon na didok di Poda 4:13, “Marsitiopan tu pangajaran [manang sipasingot] ma ho, unang parsitading i; sai tiopi ma i, ai i do hangoluanmu.”