Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Maret 2017

Si Asa, si Josapat, si Hiskia, si Josia

Tasomba ma Jahowa sian Nasa Roha!

Tasomba ma Jahowa sian Nasa Roha!

”Sai ingot ma ale Jahowa, na tongtong do satia ahu mangoloi Ho, jala na tongtong do hubahen sian nasa gogongku mangulahon lomo ni rohaM.”2 RAJA-RAJA 20:3, Bibel siganup ari.

ENDE: 52, 32

1-3. Aha do lapatan ni manomba Jahowa ’sian nasa roha’? Paboa ma tudosan.

MARDOSA do hita sude jala hea mangulahon na sala. Alai, diparade Jahowa do tobusan jala rade Ibana manalpuhon hasalaanta. Molo serep rohanta jala marhamubaon, disalpuhon Jahowa ma hasalaanta. Pos ma rohanta, ndang dibaloshon Jahowa pambahenanta ”hombar tu angka dosanta”. (Ps. 103:10) Alani i, tasomba ma Jahowa sian nasa rohanta. (1 Kron. 28:9) Nang pe mardosa, songon dia hita boi mangulahon i?

2 Tarimangi ma ngolu ni Raja Asa dohot Raja Amasia. Diulahon nasida do angka na denggan, alai hea do nasida mangulahon na sala. Alai didok di Bibel, ”marsihohot roha ni si Asa tu Jahowa saleleng mangolu ibana”. (2 Kron. 15:16, 17; 25:1, 2; Poda 17:3) Marsitutu do ibana mambahen las roha ni Jahowa, jala  ’sian nasa roha’ manomba Jahowa. (1 Kron. 28:9) Alai si Amasia, ndang manomba Jahowa ’sian nasa rohana’. Dung ditaluhon ibana angka musu ni Debata, diboan ibana ma ganaganaan ni nasida, dung i disomba.2 Kron. 25:11-16.

3 Sasahalak na manomba Debata ’sian nasa roha’, mansai mangkaholongi Jahowa jala lomo rohana manomba Jahowa salelengna. Di Bibel, lapatan ni hata ”roha”, i ma dirinta na sasintongna. Umpamana, caranta marpingkir, aha na tahalomohon, aha na laho taulahon, jala boasa taulahon sada ulaon. Nang pe mardosa, boi do hita manomba Jahowa sian nasa roha. Hita manomba Jahowa, ndang ala na dipangido manang ala dipaksa.2 Kron. 19:9.

4. Aha do na laho taulas?

4 Molo taulas taringot tu ngolu ni raja Asa dohot tolu raja na asing di Juda, boi ma taantusi lapatan ni manomba Debata sian nasa roha. Angka raja na tolu i, i ma si Josapat, si Hiskia, dohot si Josia. Nang pe hea mangulahon na sala, alai dibahen nasida do las roha ni Jahowa. Diboto Jahowa do molo nasida manomba Ibana sian nasa roha. Boasa las roha ni Jahowa mangida nasida, jala songon dia hita maniru nasida?

”MARSIHOHOT ROHA NI SI ASA TU JAHOWA”

5. Dung gabe raja, aha do na diulahon si Asa?

5 Si Asa ma raja na patoluhon di Juda dungkon dibagi dua bangso Israel gabe harajaon ni Israel dohot harajaon ni Juda. Tingki gabe raja si Asa, marsitutu do ibana mangaripashon agama na so sintong dohot angka ulaon na rorang. Diropukhon ibana do angka ganaganaan jala dipalao do angka na mangulahon parmainanon sian bagas joro. Dipalao ibana do ompung boruna sian ”tohonanna raja, ala pinaulina sada ganaganaan”. (1 Raj. 15:11-13) Dijujui si Asa do rayatna asa ”mangalului Jahowa” jala ”mangulahon patikna dohot tonana”. Marsitutu do si Asa mangurupi na asing asa manomba Jahowa.2 Kron. 14:3.

Marsitutu do si Asa mangaripashon agama na so sintong

6. Aha do na diulahon si Asa tingki ro halak Etiopia mamorangi Juda?

6 Saleleng sampulu taon pamarentaon ni si Asa, ndang hea masa porang di harajaon ni Juda. Alai, ro ma sajuta tentara ni Etiopia dohot tolu ratus hureta mamorangi Juda. (2 Kron. 13:23; 14:5, 8, 9) Aha na diulahon si Asa? Pos do rohana tu pangurupion ni Jahowa. Martangiang ma ibana asa monang di parporangan i. (Jaha 2 Kronika 14:10) Sipata, diurupi Jahowa do halak Israel manaluhon musuna, nang pe raja ni nasida ndang marsihohot. Diulahon  Ibana on, asa diboto musuNa molo Ibana Debata na sintong. (1 Raj. 20:13, 26-30) Alai, di tingki ni si Asa, diurupi Jahowa do bangsoNa ala marhaposan si Asa tu Ibana. Dialusi Jahowa do tangiang ni si Asa jala monang ma nasida. (2 Kron. 14:11, 12) Hape di pudian ni ari, diulahon si Asa ma hasalaan tingki mangido pangurupion tu raja Siria. (1 Raj. 15:16-22) Nang pe songon i, diboto Jahowa do na holong roha ni si Asa tu Ibana. ”Marsihohot roha ni si Asa tu Jahowa saleleng mangolu ibana.” Songon dia do hita maniru si Asa?1 Raj. 15:14.

7, 8. Songon dia do hita maniru si Asa?

7 Sian dia do taboto molo hita nunga manomba Jahowa sian nasa roha? Tasungkun ma dirinta: ’Huoloi do Jahowa tingki adong situasi na maol? Marsitutu do ahu manjaga huria asa tongtong badia?’ Pingkirhon ma taringot tu habaranion ni si Asa tingki palaohon ompung boruna sian harajaonna. Sipata, porlu do hita barani songon si Asa. Umpamana, songon dia do molo adong keluarga manang donganmuna na dipabali sian huria? Marsitutu do hamu asa unang mardongan be tu nasida? Aha do na diulahon hamu molo masa sisongon i?

8 Songon si Asa, sipata olo do tahilala godang na marsogo ni roha tu hita. Ra, direhei dongan singkola manang gurumuna do hamu ala Sitindangi Ni Jahowa hamu. Manang didok dongan sakarejomuna hamu na oto, ala mambuat cuti asa boi kebaktian manang ala ndang jotjot lembur. Tingki masa sisongon i, marhaposan ma tu Jahowa songon si Asa. Martangiang ma hamu, ingkon barani, jala ulahon na denggan. Ingot ma, molo diurupi Debata do si Asa, hamu pe urupanNa do.

9. Boasa las roha ni Jahowa tingki marbarita hita?

9 Ndang holan dirina sandiri na dipingkirhon si Asa; dijujui ibana do na asing ”mangalului Jahowa”. Suang songon i, taurupi ma na asing manomba Jahowa. Diparrohahon Ibana do hita tingki tapaboa tu na asing taringot tu Ibana. Tingki marbarita hita, mansai las do rohaNa ala holong rohanta tu Ibana jala ala taparrohahon halak na asing!

DILULUI SI JOSAPAT DO JAHOWA

10, 11. Aha do na boi tatiru sian si Josapat?

10 Ditiru si Josapat do parange ni amana, i ma si Asa. (2 Kron. 20:31, 32) Songon dia ibana maniru amana? Songon amana, dipatogu si Josapat do angka halak asa tongtong manomba Jahowa. Disuru ibana do sampulu baoa tu Juda laho mangajarhon angka ”buku patik ni Jahowa”. (2 Kron. 17:7-10) Jala laho do  ibana tu harajaon ni Israel di utara, manjumpangi angka halak di dolok Epraim, asa ”mulak nasida ditogihon tu Jahowa”. (2 Kron. 19:4) Si Josapat ma raja ”na mangalului Jahowa sian nasa rohana”.2 Kron. 22:9.

Dipatogu si Josapat do angka halak asa tongtong manomba Jahowa

11 Saonari, lomo do roha ni Jahowa asa sude halak di liat portibi on diajari taringot tu Ibana, jala boi do hita dohot mangulahon i. Olo do hamu marbarita ganup bulan? Olo do hamu mangajarhon Bibel tu na asing asa boi nasida manomba Jahowa? Ditangiangkon hamu do taringot on? Molo marsitutu hamu, urupan ni Jahowa ma hamu asa mandapot parsiajar Bibel. Olo do hamu mangajari sasahalak nang pe ingkon godang tingkimuna laho mangulahon i? Songon si Josapat na mangurupi na asing asa manomba Jahowa muse, hita pe boi mangurupi halak na so aktif. Asing ni i, dijumpangi jala diurupi angka sintua do angka halak na dipabali sian huria, atik boha naung marhamubaon nasida.

12, 13. (a) Tingki mabiar si Josapat, aha do na diulahon ibana? (b) Boasa ingkon tatiru si Josapat?

12 Songon amana, marhaposan do si Josapat tu Jahowa tingki ro godang tentara laho mamorangi Juda. (Jaha 2 Kronika 20:2-4.) Mabiar do ibana jala dipangido ma pangurupion tu Jahowa. Tingki martangiang, didok ibana do ndang boi taluhononna musuna i. Didok muse, ndang diboto nasida laho mangulahon aha. Alai pos do roha ni si Josapat tu pangurupion ni Jahowa. Didok ibana, ”Manatap tu pangurupionMu do hami.”2 Kron. 20:12, Bibel siganup ari.

13 Songon si Josapat, sipata ndang taboto aha na laho taulahon molo adong sitaonon, jala olo do gabe mabiar hita. (2 Kor. 4:8, 9) Alai ingot ma na diulahon si Josapat. Di jolo ni rayatna, martangiang ma ibana jala dipaboa ma na mabiar situtu nasida. (2 Kron. 20:5) Hamu angka tungganedoli, tiru ma si Josapat. Pangido ma pangurupion tu Jahowa asa boi hamu dohot keluargamuna mamboto na ingkon siulahononmu molo adong sitaonon. Unang maila martangiang di jolo ni keluargamuna. Alana, gabe diboto nasida ma na pos rohamuna tu Jahowa. Molo diurupi Jahowa do si Josapat, hamu pe urupanNa do.

TONGTONG DO ANGKA NA DENGGAN NA DIULAHON SI HISKIA

14, 15. Songon dia do si Hiskia marpos ni roha situtu tu Jahowa?

14 Si Hiskia ma muse raja na asing na marsihohot tu Jahowa. Nang pe jahat amana jala manomba ganaganaan, marhaposan tu Jahowa do si Hiskia. ”Diropukhon ibana do sude angka inganan pamelean ni sipelebegu dohot angka tugu jala dipangarumpakhon do sude angka tiang pamelean tu debata boruboru Asera. Disegai ibana do nang ulok tombaga na pinature ni si Musa i hian,” ala i do na disomba halak Israel. Marhaposan tu Jahowa do si Hiskia. ”Diparrohahon  ibana sude angka patik na pinasahat ni Jahowa marhite si Musa.”2 Raj. 18:1-6.

15 Tingki si Hiskia gabe raja, ro ma tentara ni Assur laho mamorangi Juda jala mangancam laho mangalengsehon Jerusalem. Raja ni Assur, ima si Sanherib, mangaleai Jahowa jala disuru do si Hiskia asa menyerah. Di tingki i, marhaposan do si Hiskia tu Jahowa jala mangido pangurupionNa. Diboto ibana, gumogo do Jahowa sian halak Assur jala paluaonNa do naposoNa. (Jaha Jesaya 37:15-20.) Dialusi Jahowa do tangiang ni si Hiskia, jala disuru ma sada surusuruan mambunu 185.000 tentara ni Assur.Jes. 37:36, 37.

16, 17. Aha do na boi tatiru sian si Hiskia?

16 Marsahit ma si Hiskia jala naeng mate. Dipangido ma asa diingot jala diurupi Jahowa ibana. (Jaha 2 Rajaraja 20:1-3.) Ditangihon Jahowa do si Hiskia jala dipamalum ma sahitna. Ala nunga marsiajar Bibel, ndang tahirim asa dibahen Debata tanda halongangan laho pamalumhon sahitta manang asa ganjang umurta. Alai, boi do hita mangido pangurupion tu Jahowa songon si Hiskia. Tapaboa ma tu Jahowa, ”Ale Jahowa, sai marningot ma Ho na marpangalaho i ahu di adopanmu, di bagasan hasintongan dohot punia ni roha.” Porsea do hamu na urupan ni Jahowa hamu tingki marsahit?Ps. 41:4.

17 Songon dia do muse caranta maniru si Hiskia? Ra, adong do na boi mambahen sega paralealeonta tu Jahowa manang mambahen hita manimbil sian Ibana. Saonari, godang do halak na mandebatahon sasahalak, songon angka artis na so ditanda nasida. Godang do na pasudahon tingkina laho manjahajaha taringot tu ngolu ni sasahalak jala mangida angka fotona. Adong do na jotjot mangkatai tu angka halak marhite Internet. Tontu, las do rohanta molo boi mangkatai tu keluarga dohot aleale marhite Internet. Alai, boi do suda tingkinta molo jotjot marinternet. Ra, mansai las do rohanta molo godang na mangida foto dohot komentar na tabahen di Internet. Alai, molo taboto ndang adong be na mangida angka fotonta, olo do gabe jut rohanta. Tatiru ma apostel Paulus, si Akuila, dohot si Priskilla. Ninna rohamuna, olo do nasida pasudahon tingkina laho mamboto taringot tu parngoluon ni sasahalak na so manomba Jahowa? Didok di Bibel, dipangke si Paulus sude tingkina laho mamaritahon barita na uli. Dipatorang si Priskilla dohot si Akuila do ”dalan ni Debata tumangkas”. (Ul. 18:4, 5, 26) Tasungkun ma dirinta: ’Manat do ahu asa unang mandebatahon sasahalak? Huulahon do angka na rumingkot di parngoluonku?’Jaha Epesus 5:15, 16.

DIOLOI SI JOSIA DO PARENTA NI JAHOWA

18, 19. Songon dia do hita maniru si Josia?

18 Raja Josia pe mangoloi Jahowa do ”sian nasa rohana”. (2 Kron.  34:31) Si Josia, i ma pahompu ni si Hiskia. Tingki remaja dope, olo do ibana ”mangalului Debata ni si Daud”. Tingki marumur 20 taon, diropukhon ibana ma ganaganaan sian Juda. (Jaha 2 Kronika 34:1-3.) Marsitutu do si Josia mambahen las roha ni Jahowa. Gumodang do na denggan na diulahon ibana sian angka raja na asing di Juda. Di sada tingki, jumpang ni sintua ni malim ma buku Patik ni Debata di bagas joro. Ra, si Musa do na manurat buku on! Tingki dijahahon buku i tu si Hiskia, diboto ma na ingkon marsitutu do ibana manomba Jahowa sian nasa roha. Dijujui ibana do na asing asa mangulahon i. Alani i, ndang ditadingkon bangso i Jahowa saleleng ngolu ni si Josia.2 Kron. 34:27, 33.

Dibahen si Josia do las roha ni Jahowa jala lam denggan marparange

19 Molo hamu sahalak na poso, tiru ma si Josia jala lam solhot ma tu Jahowa. Sian na masa tu ompungna, i ma Raja Manasse, diboto si Josia do na rade Jahowa manalpuhon hasalaan. Hamu pe boi marsiajar sian natuatua di keluarga dohot di huria. Las do rohanasida paboahon angka pasupasu na dilehon Jahowa tu nasida. Ingot ma songon dia pangkilalaan ni si Josia dung mamboto na didok di buku patik. Marsitutu do ibana mambahen las roha ni Jahowa jala lam denggan marparange. Molo dijaha hamu Bibel, hamu pe boi marsitutu asa mangoloi Jahowa. Gabe lam togu ma paralealeonmuna tu Jahowa jala marlas ni roha ma hamu. Taronjar ma rohamu paboahon taringot Jahowa tu na asing. (Jaha 2 Kronika 34:18, 19.) Tingki marsiajar Bibel, ra gabe diboto hamu do aha na ingkon diuba hamu asa lam togu di partondion. Alani i, sai tatiru ma si Josia.

TASOMBA MA JAHOWA SIAN NASA ROHA!

20, 21. (a) Parange na sarupa aha do na pinatudu ni opat raja ni Juda? (b) Aha do na laho taulas di artikel na mangihut?

20 Aha do na taparsiajari sian opat raja ni Juda na manomba Jahowa sian nasa roha? Marsitutu do nasida mambahen las roha ni Jahowa jala manomba Ibana saleleng ngolu ni nasida. Marhaposan do nasida tu Jahowa tingki ro musu na gogo. Na rumingkot, dihaholongi nasida do Jahowa.

21 Nang pe angka raja na opat i hea mangulahon na sala, dibahen nasida do las roha ni Jahowa. Diboto Jahowa do na di bagasan roha ni nasida, jala diboto do na holong rohanasida tu Jahowa. Hita pe hea do mangulahon na sala. Alai, las do roha ni Jahowa molo tasomba Ibana sian nasa rohanta. Di artikel na mangihut, taulas ma parsiajaran na boi tadapot sian hasalaan ni angka raja i.