Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Maret 2017

Haporseaonta Mangurupi Hita Marbisuk Manontuhon Sipilliton!

Haporseaonta Mangurupi Hita Marbisuk Manontuhon Sipilliton!

”Ingkon porsea do ho jala unang ganggu.”JAKOBUS 1:6, Bibel siganup ari.

ENDE: 54, 42

1. Aha do na mambahen si Kain mamillit mangulahon na sala, jala aha do pangkorhonna?

INGKON ditontuhon si Kain do sipillitonna. Boi do ibana mamillit laho mangorom dirina, na boi parohon angka na denggan. Alai, boi do ibana mamillit laho mangihuthon giotgiot ni rohana, na boi parohon hajahaton. Didok di Bibel, na sala do na dipillit si Kain. Gabe dipamate ibana ma anggina, i ma si Abel jala sega ma paralealeonna tu Jahowa.1 Mus. 4:3-16.

2. Boasa ringkot mamillit mangulahon na denggan?

2 Hita sude ingkon manontuhon sipilliton di ngolunta. Adong do pigapiga sipilliton na balga pangkorhonna, alai sipilliton na asing ndang songon i. Molo tapillit mangulahon na denggan, ndang pola godang be sitaononta jala lam dame ma ngolunta. Alai molo tapillit mangulahon na sala, godang ma sitaononta jala gabe marmetmet ni roha.Poda 14:8.

3. (a) Asa marbisuk manontuhon sipilliton, aha do na ingkon tahaporseai? (b) Sungkunsungkun aha do na laho taulas?

 3 Asa marbisuk manontuhon sipilliton, ingkon marhaporseaon do hita tu Debata. Pos ma rohanta, olo do Ibana mangurupi hita jala mangalehon bisuk asa boi tapillit na denggan. Hita pe ingkon porsea tu poda ni Debata na adong di Bibel. (Jaha Jakobus 1:5-8.) Molo jonok tu Jahowa jala mangoloi HataNa, on mambahen pos rohanta, diboto Debata do na dumenggan tu hita. Andorang so manontuhon sipilliton, ingkon jolo taparsiajari do Bibel. Alai, songon dia do carana asa tongtong mamillit mangulahon na denggan? Boi do tauba aha naung tapillit?

INGKON TATONTUHON DO SIPILLITONTA

4. Aha do na ingkon dipillit si Adam, jala aha do pangkorhonna?

4 Mulai adong jolma di tano on, sude jolma ingkon manontuhon sipillitonna. Jolma na parjolo, i ma si Adam, ingkon mamillit laho manangihon Jahowa manang manangihon si Hawa. Hape si Hawa do na ditangihon. On mambahen ibana mangulahon na sala. Alani i, dipalao Jahowa ma ibana sian porlak Eden, jala gabe mate. Saonari, sude hita marsitaonon ala na pinillit ni si Adam.

Dilehon Jahowa do Bibel asa marbisuk hita manontuhon sipilliton

5. Ingkon songon dia do pangantusionta taringot tu hakta laho mamillit?

5 Pigapiga halak mandok, umtabo do molo ndang nasida sandiri na manontuhon sipilliton. Ra, songon i do pangkilalaanmuna. Alai taingot ma, ndang ditompa Jahowa hita songon robot, na so boi marpingkir manang manontuhon sipilliton. Dilehon Ibana do Bibel asa marbisuk hita manontuhon sipilliton. Lomo do roha ni Jahowa asa hita sandiri na manontuhon sipillitonta, jala marlaba do on di hita. Taida ma pigapiga tudosan.

6, 7. Aha do na ingkon dipillit halak Israel, jala boasa maol di nasida laho manontuhon sipilliton i? (Ida gombar di mula ni parsiajaran.)

6 Tingki di Tano Kanaan, ingkon dipillit halak Israel do laho manomba Jahowa manang debata na asing. (Jaha Josua 24:15.) Ra, ndang pola maol laho mamillit i. Alai, na pinillit ni nasida boi parohon hangoluan manang hamatean. Di tingki ni angka Panguhum, dipillit halak Israel do mangulahon na sala. Ndang disomba nasida be Jahowa, alai debata na asing do na disomba. (Pangh. 2:3, 11-23) Di tingki ni panurirang Elia, ingkon dipillit nasida do laho manomba Jahowa manang manomba Baal. (1 Raj. 18:21) Mura do mamillit on, alana manomba Jahowa do na dumenggan. Ndang olo halak  na marbisuk manomba ganaganaan. Alai, ndang olo halak Israel manontuhon sipilliton. Didok di Bibel, mardua roha do halak Israel. Alani i, dijujui si Elia ma nasida asa manomba Jahowa, Debata na sintong.

7 Boasa maol di halak Israel laho mamillit na denggan? Parjolo, ndang marhaporseaon nasida tu Jahowa, jala ndang olo manangihon Jahowa. Ndang pos rohanasida tu Jahowa, jala ndang olo marsiajar taringot tu Jahowa manang bisukNa. Autsugari diulahon nasida songon i, boi ma nasida marbisuk manontuhon sipilliton. (Ps. 25:12) Paduahon, adong pangkorhon na roa sian angka bangso parbegu. Gabe tarelaela do halak Israel, jala bangso parbegu i do na manontuhon sipilliton di nasida. Gabe diihuthon halak Israel ma bangso parbegu i, jala manomba debata ni nasida. Hape, nunga leleng Jahowa paingothon nasida taringot on.2 Mus. 23:2.

HALAK NA ASING DO NA MANONTUHON SIPILLITONTA?

8. Aha do parsiajaran na ringkot na tadapot sian na masa tu halak Israel?

8 Sian na masa tu halak Israel, gabe taboto ma, ingkon taoloi do Hata ni Debata asa marbisuk manontuhon sipilliton. Galatia 6:5 mandok, ganup jolma martanggung jawab di sipillitonna be. Alani i, unang ma gabe halak na asing na manontuhon sipillitonta. Alai ingkon taantusi, angka na denggan do na nidok ni Debata jala taulahon ma i.

Molo na asing na manontuhon sipillitonta, nasida do na taihuthon

9. Boasa gabe marjea molo halak na asing na manontuhon sipillitonta?

9 Boasa boi gabe halak na asing na manontuhon sipillitonta? Ala tapaloas nasida mangelaela hita mangulahon na sala. (Poda 1:10, 15) On mambahen hita marjea. Alani i, taihuthon ma panggora ni rohanta na hombar tu Bibel. Molo halak na asing na manontuhon sipillitonta, nasida do na taihuthon. On boi parohon jea tu hita.

10. Sipaingot aha do na dilehon si Paulus tu halak Galatia?

10 Dipaingot si Paulus do halak Galatia asa unang halak na manontuhon sipilliton di nasida. (Jaha Galatia 4:17.) Lomo do roha ni pigapiga donganta baoa di Galatia manontuhon sipilliton ni dongan na asing di huria. Boasa diulahon i? Lomo roha ni nasida asa nasida na diihuthon di huria, ndang angka apostel. Ndang diargai nasida hak ni donganna laho mamillit.

11. Songon dia do caranta mangurupi na asing tingki nasida laho manontuhon sipilliton?

11 Tatiru ma si Paulus. Diboto ibana, marhak do dongan sahaporseaonna manontuhon sipilliton jala diargai ibana do i. (Jaha 2 Korint 1:24.) Diihuthon angka sintua do on tingki mangalehon  poda tu sasahalak na laho manontuhon sipilliton. Las do rohanasida paboahon hatorangan sian Bibel tu dongan sahaporseaonna. Alai dipaloas angka sintua do dongan sahaporseaonna manontuhon sipilliton, alana mangkorhon do sipilliton i tu parngoluon ni nasida. Parsiajaranna: Taurupi ma donganta mangantusi poda ni Bibel na hombar tu situasi ni ngoluna. Alai, marhak do dongan sahaporseaonta laho manontuhon sipilliton. Molo marbisuk nasida manontuhon sipilliton, dapotnasida ma laba. Alani i, unang ma gabe hita na manontuhon sipilliton ni angka donganta.

Sintua na burju mangurupi na asing asa boi manontuhon sipilliton (Ida paragraf 11)

UNANG MARHAPOSAN TU ROHANTA TINGKI MANONTUHON SIPILLITON

12, 13. Boasa boi parohon jea molo tapillit sipilliton di tingki muruk manang tingki marmetmet ni roha?

12 Saonari, godang do halak na marhaposan tu rohana tingki manontuhon sipilliton. Alai, ndang denggan songon i. Dipaingot Bibel do hita asa unang marhaposan tu rohanta tingki manontuhon sipilliton. (Poda 28:26) Unang ma marhaposan tu roha, alana ”tung na angkal situtu do roha ni jolma, jala na ganggu”. (Jer. 17:9) Godang do tudosan di Bibel na patuduhon marjea do molo marhaposan hita tu rohanta. (1 Raj. 11:9; Jer. 3:17; 13:10) Alani i, aha do na masa molo marhaposan hita tu rohanta tingki manontuhon sipilliton?

13 Disuru Jahowa do hita mangkaholongi Ibana sian nasa roha jala mangkaholongi donganta songon dirinta sandiri. (Mat. 22:37-39) Alai, ingkon manat do hita. Angka ayat di paragraf 12 patuduhon, marjea do molo marhaposan hita tu roha dohot pingkiran. Umpamana, maol do hita  manontuhon sipilliton tingki muruk. (Poda 14:17; 29:22) Tingki marmetmet ni roha pe, maol do hita manontuhon sipilliton. (4 Mus. 32:6-12; Poda 24:10) Alani i, ingkon hombar do pamingkirionta tu Hata ni Debata. (Rom 7:25) Tingki manontuhon sipilliton, unang ma hita marhaposan tu rohanta sandiri.

TINGKI LAHO MANGUBA SIPILLITON

14. Sian dia do taboto ndang sala laho manguba aha naung tapillit?

14 Ingkon marbisuk do hita tingki manontuhon sipillitonta. Alai diboto halak na marbisuk, porlu do ibana mangarimangi angka na pinillitna jala olo do ra ibana manguba i. Dilehon Jahowa do sitiruon tu hita sude. Parrohahon ma na diulahon Ibana tu halak Ninive di tingki ni si Jona, ”Jadi dung diida Debata pambahenannasida, na mulak i nasida sian dalannasida angka na roa i, gabe disolsol Debata ma rohana taringot tu hamagoan na nilumbahonna bahenonna hian tu nasida, gabe ndang saut dibahen.” (Jona 3:10) Tingki marhamubaon halak Ninive jala ndang diulahon nasida be angka hajahaton, diuba Jahowa do na pinillitNa. On patuduhon, serep do roha ni Jahowa jala marasi ni roha. Ndang songon jolma, diboto Jahowa do mamillit na dumenggan nang pe tingki muruk.

Tingki marhamubaon halak Ninive jala ndang be mangulahon na jahat, diuba Jahowa do na pinillitNa

15. Boasa porlu manguba aha naung tapillit?

15 Sipata, denggan do molo tarimangi angka naung tapillit, umpamana tingki muba situasi di ngolunta. Ingot ma, Jahowa pe olo do manguba naung ditontuhon Ibana hian. (1 Raj. 21:20, 21, 27-29; 2 Raj. 20:1-5) Tingki adong tudutudu na baru, hita pe boi do manguba angka naung tapillit. Taparrohahon ma na binahen ni Raja Daud. Pintor disalahon ibana do si Mepiboset alani barita na binegena. Alai dung diboto ibana songon dia sasintongna na masa, gabe diuba ibana ma naung pinillitna. (2 Sam. 19:25-30) Hita pe boi do mangulahon sisongon i.

16. (a) Aha do na ingkon taingot tingki laho manontuhon sipilliton? (b) Boasa ingkon tarimangi angka na tapillit di tingki naung salpu, jala aha do na porlu taulahon?

16 Didok di Bibel, unang ma pintor hatop manontuhon sipilliton. (Poda 21:5) Asa marbisuk manontuhon sipilliton, ingkon manat do tapingkiri taringot tu angka na masa. (1 Tes. 5:21) Andorang so manontuhon sipilliton, sahalak tungganedoli ingkon manulingkiti isi ni Bibel dohot hatorangan sian publikasinta. Denggan do muse molo tatangihon pandapot ni anggota keluarga. Ingot ma, dijujui Debata  do si Abraham asa manangihon tungganeboruna. (1 Mus. 21:9-12) Angka sintua pe ingkon mangalehon tingkina laho manulingkiti isi ni Bibel. Molo adong tudutudu na baru na mambahen nasida ingkon manguba angka naung dipillit, ndang mabiar nasida gabe ndang diargai na asing. Molo porlu, ingkon rade do angka sintua manguba pamingkirion dohot na pinillitna. Jala denggan do molo taihuthon sitiruon sian nasida. On mangurupi huria asa tongtong mardame jala marsada.Ul. 6:1-4.

ULAHON MA NAUNG PINILLITMUNA

17. Aha do na mangurupi hita asa marhasil tingki manontuhon sipilliton?

17 Sipata, adong do sipilliton na mansai ringkot na ingkon tapillit. Umpamana, tingki mamillit laho marhasohotan manang mamillit dongan saripe. Na asing muse, tingki mamillit laho dohot tu dinas sepenuh waktu. Andorang so tapillit i, ingkon manat do tapingkiri taringot i jala porlu mangido pangurupion sian Jahowa. Asa marbisuk manontuhon sipilliton, ingkon porsea do hita tu Jahowa, manangihon jala mangulahon tudutudu na nilehonNa. (Poda 1:5) Dilehon Jahowa do tudutudu marhite HataNa. Alani i, ringkot do tasulingkiti isi ni Bibel jala martangiang tu Jahowa. Dilehon Ibana do angka parange tu hita na boi mangurupi hita manontuhon sipilliton na hombar tu lomo ni rohaNa. Andorang so manontuhon sipilliton, ingkon tasungkun do dirinta: ’Molo hupillit on, tarida do na huhaholongi Jahowa? Parohon las ni roha dohot hadameon do on tu keluargangku? Sian on, tarida do na sabar ahu jala burju?’

18. Boasa lomo roha ni Jahowa asa hita sandiri na manontuhon sipillitonta?

18 Ndang dipaksa Jahowa hita laho mangkaholongi dohot manomba Ibana. Alani i, dilehon Ibana do tu hita hak laho mamillit. Diargai Ibana do hakta laho manomba Ibana manang na ndang. (Jos. 24:15; Pjm. 5:3) Alai, lomo do rohaNa asa hombar sipillitonta tu HataNa. Molo marhaporseaon hita tu Jahowa jala mangihuthon tudutuduNa, boi do hita marbisuk manontuhon sipillitonta. Jala tapatudu ma, molo hita ndang mardua roha mangihuthon tudutuduNa i.Jak. 1:5-8; 4:8.