Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 25

Marhaposan tu Jahowa Tingki Marsak

Marhaposan tu Jahowa Tingki Marsak

“Ai di bagasan hasusaan do ahu.”​—PS. 31:10, Bibel siganup ari.

ENDE 30 Amangku, Debatangku, jala Alealengku

NA LAHO DIULAS *

1. Boasa ingkon taparrohahon sipasingot ni Jesus?

TINGKI manurirangkon taringot ari parpudi, didok Jesus do, “Parrohahon hamu ma dirimuna, asa unang . . . paholsohu tu parngoluon.” (Luk. 21:34) Ingkon taparrohahon do sipasingot i. Boasa? Alana saonari, godang do hasusaan na taadopi songon na diadopi godangan halak.

2. Aha do angka hasusaan na diadopi angka donganta?

2 Sipata, olo do adong piga-piga hasusaan na ro tu hita di tingki na sarupa. Parrohahon ma angka contoh on. Sahalak Sitindangi na margoar si John * marsahit tulang belakang. Dung i, ditadingkon istrina ma ibana. Hape, nunga 19 taon nasida marhasohotan. Dung i, dua boruna ndang olo be manomba Jahowa. On mambahen lungun rohana jala marsak. Si Bob dohot si Linda mangadopi hasusaan na asing. Dipecat do nasida sian parkarejoan. Alani i, ndang boi be nasida manggarar sewa ni jabu. Marsahit jantung muse si Linda, jala adong sahit na asing na mambahen ibana mura gale.

3. Sian Pilippi 4:6, 7, aha do na boi taboto taringot Jahowa?

3 Alai pos ma rohanta, diantusi Jahowa do songon dia pangkilalaanta tingki mangadopi hasusaan. Jala lomo do rohana mangurupi hita asa boi mangadopi hasusaan i. (Jaha Pilippi 4:6, 7.) Di Bibel, godang do angka contoh sian naposo ni Jahowa na tongtong martahan tingki mangadopi hasusaan. Jala dipaboa do songon dia Jahowa mangurupi nasida. Taulas ma piga-piga contoh.

SI ELIA—DOS DO PANGKILALAANNA SONGON HITA

4. Aha do ambat-ambat na diadopi si Elia jala songon dia do ibana mangadopi i?

4 Si Elia, gabe panurirang ni Jahowa di tingki na susa.  Godang do ambat-ambat na diadopi ibana. Raja di Israel tingki i, i ma si Ahab. Ndang disomba ibana Jahowa jala mangoli ibana tu si Isebel na manomba Baal. Dijujui nasida do halak Israel asa manomba Baal jala godang do panurirang ni Jahowa na dipamate nasida. Alai si Elia, boi do malua. Ala marhaposan tu Jahowa, boi do ibana martahan tingki masa haraparon. (1 Raj. 17:2-4, 14-16) Di tingki na asing, marhaposan do ibana muse tu Jahowa tingki mangalo godang panurirang ni Baal dohot na manomba Baal. Dijujui ibana do halak Israel di tingki i asa manomba Jahowa. (1 Raj. 18:21-24, 36-38) Godang do pengalaman ni si Elia na patuduhon na diurupi Jahowa do ibana tingki susa.

Disuru Jahowa do suru-suruanna laho patoguhon si Elia (Ida paragraf 5-6) *

5-6. Hombar tu 1 Rajaraja 19:1-4, songon dia do pangkilalaan ni si Elia, jala songon dia Jahowa mangurupi ibana?

5 Jaha 1 Rajaraja 19:1-4. Alai di sada tingki, gabe mabiar do si Elia. Alana didok Ratu Isebel, naeng bunuonna do ibana. Alani i, lari ma si Elia tu Berseba. Gabe metmet ma rohana sampe “mangidohon mate” ibana tu Debata. Boasa songon i pangkilalaan ni si Elia? Ala halak na so sempurna do ibana jala “dos do pangkilalaanta dohot ibana”. (Jak. 5:17) Ra dihilala si Elia pe songon i, ala marsak do ibana jala palojahu. Marisuang do dihilala ibana manjujui halak Israel laho manomba Jahowa. Jala dirimpu ibana, holan ibana nama na manomba Jahowa. (1 Raj. 18:3, 4, 13; 19:10, 14) Ra songgot  do rohanta ala hea dihilala si Elia songon i. Alai, diantusi Jahowa do songon dia pangkilalaanna.

6 Nang pe didok si Elia songon i, ndang muruk Jahowa tu ibana. Gariada, dipatogu do rohana. (1 Raj. 19:5-7) Dung i, diurupi Jahowa do si Elia asa paubahon cara marpingkirna marhite patuduhon huasona na balga. Didok Jahowa tu si Elia, adong dope 7.000 halak Israel na so olo manomba Baal. (1 Raj. 19:11-18) Marhite cara on, dipatudu Jahowa do na holong rohana tu si Elia.

CARA NI JAHOWA MANGURUPI HITA

7. Sian cara ni Jahowa mangurupi si Elia, aha do na boi paposhon rohanta?

7 Susa do dihilala hamu saonari? Tontu tarapul do rohanta dung mamboto songon dia Jahowa mangantusi pangkilalaan ni si Elia. On paposhon rohanta na diantusi Jahowa do pangkilalaanta tingki mangadopi hasusaan. Jala diboto ibana do aha na boi dohot na so boi taulahon. Diantusi Jahowa do pingkiran dohot rohanta. (Ps. 103:14; 139:3, 4) Molo tatiru si Elia na marhaposan tu Jahowa, boi ma hita martahan mangadopi angka hasusaan.​—Ps. 55:23.

8. Tingki marsak, songon dia do Jahowa mangurupi hamu?

8 Molo sai marsak hamu, boi do i mambahen hamu mandele jala mambahen metmet rohamuna. Alai molo masa sisongon i, ingot ma urupan ni Jahowa do hamu. Songon dia carana? Ditogihon Ibana do hamu asa paboahon sude na di rohamuna. Jala alusanna do tangiangmuna molo dipangido hamu asa diurupi. (Ps. 5:4; 1 Ptr. 5:7) Alani i, tongtong ma martangiang tu Jahowa laho paboahon sude arsak ni rohamuna. Tontu, ndang pintor mangkatai Jahowa tu hamu songon na dibahen tu si Elia. Alai dipatogu Jahowa do hamu marhite Bibel dohot organisasina. Angka contoh na di Bibel, boi patoguhon jala mangapuli rohamuna. Jala adong do angka dongan sahaporseaon na boi patoguhon hamu.​—Rom 15:4; Heb. 10:24, 25.

9. Asa boi hita diurupi dongan, aha do na ingkon taulahon?

9 Didok Jahowa tu si Elia asa dilehon deba tugasna tu si Elisa. Sasintongna, disuru Jahowa si Elia mangulahon i, asa adong do dongan na boi mangurupi ibana tingki marmetmet ni roha. Suang songon i ma nang hita, molo tapaboa pangkilalaanta tu dongan na boi dihaporseai, boi ma nasida mangurupi hita asa martahan. (2 Raj. 2:2; Poda 17:17) Molo dihilala hamu ndang adong dongan na boi mangurupi, martangiang ma tu Jahowa asa dapotmuna dongan na togu parale-aleonna tu Debata na boi mangurupi hamu.

10. Songon dia do pengalaman ni si Elia boi mangurupi hita, jala songon dia janji na disurat di Jesaya 40:28, 29 boi mangurupi hita?

10 Diurupi Jahowa do si Elia asa boi tongtong martahan jala manomba Ibana saleleng martaon-taon. Pengalaman ni si Elia on boi mangurupi hita. Molo marsak hita, on mambahen loja daging dohot pingkiranta. Alai molo marhaposan hita tu Jahowa, lehononna do tu hita gogo asa boi tongtong manomba Ibana.​—Jaha Jesaya 40:28, 29.

SI HANNA, SI DAUD, DOHOT SAHALAK PANURAT PSALMEN MARHAPOSAN TU JAHOWA

11-13. Ala marsak si Hanna, si Daud dohot sahalak panurat psalmen, aha do na masa tu nasida?

11 Di Bibel, adong do muse dipaboa taringot halak na hea marsak situtu.  Umpamana, si Hanna na marsak situtu ala mandul. Hape imbangna, i ma si Pininna boi marianakhon. Jala sai direhei imbangna i do si Hanna. (1 Sam. 1:2, 6) Gabe lungun hian ma roha ni si Hanna alani i. Sai tumatangis ma ibana jala ndang langku mangan.​—1 Sam. 1:7, 10.

12 Contoh na asing, i ma Raja Daud. Hea do ibana marsak situtu ala adong hasusaan na diadopi ibana. Jotjot do disalahon ibana dirina ala godang dosa na diulahon ibana. (Ps. 40:13) Anak haholonganna i ma si Absalom, marsitutu naeng gabe raja manggantihon ibana. Hape ujungna mate do anakna i. (2 Sam. 15:13, 14; 19:1) Jala dongan na dihaporseai ibana, ndang setia tu ibana. (2 Sam. 16:23–17:2; Ps. 55:13-15) Godang do ende na disurat si Daud di Psalmen paboahon arsak ni rohana. Alai dipaboa ibana do muse taringot haporseaonna na togu tu Jahowa.​—Ps. 38:6-11; 94:17-19.

Aha do na mangurupi sahalak panurat psalmen asa boi marlas ni roha muse? (Ida paragraf 13-15) *

13 Adong sahalak panurat psalmen na gabe mangiburu tu halak na so manomba Jahowa. Ra ibana sada sian pinompar ni si Asap halak Lepi jala ra marhobas di bagas joro ni Debata. Alani arsak ni rohana, gabe kecewa do ibana jala ndang marlas ni roha. Jala didok rohana hurang dope pasu-pasu na nilehon ni Jahowa i tu ibana.​—Ps. 73:2-5, 7, 12-14, 16, 17, 21.

14-15. Sian tolu contoh na dipaboa di Bibel nangkin, aha do na boi taparsiajari taringot marhaposan tu Jahowa?

14 Tolu naposo ni Jahowa na dipaboa nangkin, tongtong do marhaposan tu Ibana. Dipaboa nasida do sude arsak ni rohana di bagasan tangiang. Dipaboa do muse aha na mambahen nasida marsak. Jala tongtong do nasida ro tu bagas joro  laho manomba Jahowa.​—1 Sam. 1:9, 10; Ps. 55:23; 73:17; 122:1.

15 Lambok do Jahowa maradophon angka naposona. Songon si Hanna, gabe dame do pangkilalaanna. (1 Sam. 1:18) Dipaboa si Daud do pangkilalaanna. Didok, “Godang do sitaonon ni halak na burju, alai dipalua Jahowa do ibana sian angka i.” (Ps. 34:20, Bibel siganup ari) Na manurat psalmen nangkin pe, dipaboa do pangkilalaanna tu Jahowa. Jala dihilala ibana do na ditiop Jahowa do tanganna siamun marhite poda na dilehon tu ibana. Diendehon ibana ma, “Anggo ahu-untungku do hasolhoton tu Debata; haposanku do hubahen Tuhan Jahowa.” (Ps. 73:23, 24, 28) Aha ma parsiajaranna tu hita? Di sada tingki, olo do adong hasusaan na boi mambahen hita gabe mandele. Alai molo tarimangi songon dia Jahowa mangurupi nasida, hita pe urupanna do. Ringgas ma martangiang jala ihuthon ma sude tudu-tudu na dilehon Jahowa.​—Ps. 143:1, 4-8.

MARHAPOSAN TU JAHOWA ASA MARHASIL

Mulana, sahalak donganta mandao sian angka dongan. Alai tingki mangurupi na asing, gabe muba do pangkilalaanna (Ida paragraf 16-17)

16-17. (a) Boasa ndang boi hita mandao sian Jahowa dohot sian angka dongan? (b) Asa boi hita dipatogu muse, aha do na ingkon taulahon?

16 Adong parsiajaran na asing na tadapot sian tolu contoh i, i ma unang  mandao sian Jahowa dohot sian angka dongan. (Poda 18:1) Si Nancy na hea marsak situtu ala ditadingkon suamina mandok, “Piga-piga ari, ndang olo ahu pajumpang manang mangkatai tu manang ise pe. Lam dao ahu sian angka dongan, gabe lam lungun do huhilala.” Alai tingki mangurupi angka halak na mangadopi hasusaan, gabe muba do pangkilalaanna. Didok muse, “Tingki adong na paboahon hasusaan na tu ahu, denggan do hutangihon. Dung hupingkiri hasusaan ni nasida i, gabe asi do rohangku mangida nasida. Jala gabe ndang sai hupingkiri be hasusaanku sandiri.”

17 Molo ro hita tu parpunguan, boi do gabe togu hita muse. Tingki marpungu, na tapaloas do Jahowa laho “mangurupi dohot mangapuli” hita. (Ps. 86:17) Di parpunguan, diurupi do hita marhite tondi parbadiana, Bibel, dohot angka dongan. Jala tingki marpungu, boi do hita “masipatoguan” dohot angka dongan. (Rom 1:11, 12) Sahalak donganta na margoar si Sophia mandok, “Jahowa dohot angka dongan mangurupi ahu asa martahan. Mansai ringkot do di ahu ro tu parpunguan. Huboto ma, molo lam ringgas ahu marbarita dohot marpungu, gabe boi ma huadopi angka hasusaan.”

18. Tingki marmetmet ni roha, songon dia do Jahowa mangurupi hita?

18 Tingki marmetmet ni roha, taingot ma janji ni Jahowa. Di tingkinta saonari pe, diurupi Jahowa do hita asa boi mangadopi hasusaan. Jala di ari na naeng ro, salpuhononna do sude na mambahen hita susa. Tingki marsak hita jala mandele, dibahen Jahowa do hita “rade jala margogo” asa boi tongtong togu.​—Plp. 2:13.

19. Songon na didok di Rom 8:37-39, aha do janji ni Jahowa tu hita?

19 Jaha Rom 8:37-39. Didok apostel Paulus, tongtong do dihaholongi Debata hita. Alai songon dia do hita boi mangurupi angka dongan na marsak? Di parsiajaran na mangihut, taulas ma songon dia hita boi maniru Jahowa marhite patuduhon asi ni roha jala mangurupi angka donganta.

ENDE 44 Tangiang di Tingki Susa

^ par. 5 Molo jotjot hita marsak, boi do i mambahen hita marsahit. Alai songon dia do Jahowa boi mangurupi hita? Laho taulas ma songon dia Jahowa mangurupi si Elia tingki marsak. Jala adong do muse di Bibel contoh na asing na patuduhon tu hita aha do na porlu taulahon asa boi diurupi Jahowa tingki susa.

^ par. 2 Angka goar na di artikel on nunga diganti.

^ par. 53 HATORANGAN NI GAMBAR: Lambok do suru-suruan ni Jahowa mandungoi si Elia jala dilehon do roti dohot aek.

^ par. 55 HATORANGAN NI GAMBAR: Sahalak panurat psalmen ra sahalak sian pinompar ni si Asap, marlas ni roha tingki manurat angka ende jala marende rap dohot halak Lepi.