Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Dame—Songon dia Asa Tahilala i?

Dame—Songon dia Asa Tahilala i?

DI PORTIBI na sursar saonari on, mansai maol do mangkilala hadameon. Boi pe sonang rohanta, alai holan satongkin do i. Molo menurut Bibel, songon dia do carana asa boi tahilala dame na manongtong? Jala songon dia do carana mangurupi na asing asa mangkilala i?

AHA MA NA INGKON TAULAHON?

Asa boi tahilala dame na manongtong i, ingkon na burju do donganta. Jala na umringkot, tapajonok ma dirinta tu Debata asa dilinggomi hita. Songon dia carana?

Mansai ringkot do poda dohot prinsip ni Debata tu hita. Molo pos rohanta tu Debata jala unduk tu podaNa, boi ma hita marale-ale tu Ibana. (Jer. 17:7, 8; Jak. 2:22, 23) Jala Jahowa pe olo do pajonokkon diriNa tu hita. LehononNa ma dame ni roha tu hita. Didok do di Jesaya 32:17, “Jadi hadameon ma upa ni hatigoran, jala pangkorhon ni hatigoran hademakon dohot hasonangan salelenglelengna.” Boi ma tahilala dame na manongtong i molo unduk hita tu Jahowa.​—Jes. 48:18, 19.

Holso ni roha boi mambahen hita gabe ndang dame

Dilehon Jahowa do muse tu hita silehon-lehon na mansai arga, i ma tondi parbadia. On mangurupi asa tahilala hadameon na manongtong.​—Ul. 9:31.

TONDI PARBADIA MANGURUPI HITA ASA LAM DAME

Si Paulus mandok, “parbue ni tondi” do dame i. (Gal. 5:22, 23) Ala sian tondi parbadia do i, ingkon olo ma hita ditogu-togu tondi parbadia i asa tahilala hadameon. Songon dia carana?

Na parjolo, ingkon tajaha do Bibel ganup ari. (Ps. 1:2, 3) Molo sai tarimangi do na tajaha i, diurupi tondi parbadia ma hita asa taantusi na  dihalomohon Jahowa. Umpamana, gabe taboto ma songon dia Debata manjaga hadameon na nilehonNa, jala boasa ringkot hadameon i di Ibana. Jadi, molo taulahon na taparsiajari sian Bibel, gabe lam dame ma ngolunta.​—Poda 3:1, 2.

Na paduahon, ingkon martangiang do hita tu Debata mangido tondi parbadia. (Luk. 11:13) Alana, dijanjihon Jahowa do tu hita, “Marhite Kristus Jesus, lehonon ni Debata ma tu hamu hadameon na so boi diantusi jolma, na boi manjaga roha dohot pingkiranmuna.” (Plp. 4:6, 7) Jadi, molo tongtong hita jonok tu Debata jala taasahon tondi parbadiaNa, lehononNa ma dame i tu rohanta.​—Rom 15:13.

Hata ni Debata nunga paubahon ngolu ni godang jolma. Saonari, gabe mardame ma nasida dohot Debata, dame ma rohana, jala mardame tu halak na asing. Songon dia nasida boi marhamubaon?

SONGON DIA PIGA-PIGA HALAK MANDAPOT HADAMEON?

Godang do donganta na parmuruk hian jala kasar tingki ndang marsiajar Bibel dope. Alai marsitutu do nasida marhamubaon. Saonari, gabe burju ma nasida, sabar, jala mardame tu halak na asing. * (Poda 29:22) Parrohahon ma pengalaman ni donganta si David dohot si Rachel na paubahon parangena.

Tahilala ma dame molo taulahon prinsip ni Bibel jala martangiang hita mangido tondi parbadia

Tingki ndang Sitindangi dope si David on, holan hasalaan ni halak do na diida ibana, jala posi do mangkatai ibana tu keluargana. Alai dipingkiri ibana ma, porlu do ibana marhamubaon. Jadi songon dia do ibana boi mandapot hadameon? Didok si David, “Huulahon ma angka prinsip ni Bibel di ngolungku. Ujungna, gabe lam mardame ma ahu dohot keluargangku.”

 Parmuruk-muruk do si Rachel on, ala magodang di keluarga parmuruk-muruk do ibana. Didok ibana, “Saonari pe ingkon marsitutu do ahu asa unang mura-mura muruk alana keluargangku pe parmuruk-muruk do.” Aha do na mangurupi si Rachel mandapot hadameon? Didok ibana, “Hutangiangkon do i tu Jahowa.”

Si David dohot si Rachel on ma contoh ni angka halak na boi marhamubaon ala mangihuthon poda ni Bibel jala mangasahon tondi parbadia. Nang pe hita mangolu di portibi na so dame, alai boi do tahilala dame di roha. Gabe lam jonok ma parale-aleonta tu keluarga dohot tu angka dongan di huria. Alai, didok Jahowa do muse asa ‘mardame hita tu sude halak’. (Rom 12:18) Boi do i? Boasa hita ingkon mardame tu sude halak?

NA INGKON TAULAHON ASA MARDAME TU SUDE HALAK

Tingki marbarita, tapaboa do barita na parohon dame taringot Harajaon ni Debata. (Jes. 9:5, 6; Mat. 24:14) Godang do na marlas ni roha mambege barita i. Alani i, gabe ndang marsak be nasida mangida angka na masa saonari on. Nunga dapot nasida be pangkirimon di ari na naeng ro. Gabe lomo ma roha ni nasida mangalului hadameon.​—Ps. 34:15.

Alai, ndang sude halak olo manjangkon barita na tapasahat. (Joh. 3:19) Nang pe songon i, dilehon Debata do tondi parbadia. On mambahen hita asa tongtong dame jala denggan mangadopi angka halak. Jadi taihuthon ma poda ni Jesus na mandok, “Tingki masuk hamu tu sada jabu, pangkulingi ma parjabu i. Molo dijalo parjabu i do baritamuna, mian ma hadameonmuna di nasida. Alai molo ndang olo nasida manjalo, mulak tu hamu ma damemuna i.” (Mat. 10:11-13) Manang songon dia pe alus dohot pambahenan ni nasida, ingkon tongtong do hita mardame. Jala ingot ma, ra di tingki na asing boi do hita mangurupi nasida.

Ingkon gabe siboan dame do hita. Carana, ingkon denggan ma hita mangkatai tu pejabat nang pe diorai ulaonta. Songon sada pengalaman di Afrika, ndang diloas hita pajongjongkon Bale Harajaon. Diboto angka donganta on do, na ingkon patuduhon dame do nasida laho pasaehon parsoalan i. Disuru nasida ma sahalak donganta na hea gabe utusan injil disi, asa manjumpangi Pejabat Negara di London, Inggris. Dipatorang ibana ma, mamboan hadameon do ulaon na dibahen Sitindangi Ni Jahowa.

Didok donganta i do, “Dung sahat ahu disi, huida ma adong sahalak penerima tamu. Sian pangkeanna, huboto do didia hutana, ala hea huparsiajari bahasana. Pintor hupangkulingi ma ibana mamangke bahasana. Songgot do rohana, dung i disungkun ibana ma, ‘Apala aha do na porlu tahe?’ Hudok ma naeng pajumpang ahu dohot Pejabat Negara. Ditelepon ibana ma pejabat i, dung i pajumpang ma hami. Disise ibana ma ahu mamangke bahasana. Dung i hupaboa ma, ulaon na parohon dame do na diulahon Sitindangi. Denggan do ibana manangihon ahu.”

Dung ditangihon Pejabat i donganta on, gabe diantusi ibana ma ulaon na denggan do ulaonta. Jala ndang sogo be rohana. Ndang sadia leleng, diuba pamarenta ma haputusanna asa boi Sitindangi Ni Jahowa pajongjongkon Bale Harajaon. Las situtu ma roha ni angka donganta! Tangkas ma, gabe siboan dame do hita molo denggan caranta mangadopi angka halak.

MANGKILALA HADAMEON SALELENG-LELENGNA

Saonari on, marlas ni roha do naposo ni Jahowa songon di paradeiso, ala rap manomba Debata di bagasan hadameon. Sude do hita boi mambahen situasi lam dame. Carana, ingkon jolo dame do pangkilalaanta di parngoluonta be. Dung i gabe pos ma rohanta na las do roha ni Jahowa tu hita. Jala di tano na imbaru haduan, lehononNa ma dame na manongtong tu hita.​—2 Ptr. 3:13, 14.

^ par. 13 Di parsiajaran na naeng ro, taulas ma muse taringot haburjuon na sian parbue ni tondi.