Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Olo do Hamu Pasaehon Parsoalan jala Mardame?

Olo do Hamu Pasaehon Parsoalan jala Mardame?

LOMO do roha ni Jahowa asa dame dihilala angka naposoNa jala tongtong mardame. Molo taulahon on, tongtong ma adong hadameon di huria. Hadameon sisongon i mangkorhon na denggan do tu angka dongan di huria.

Umpamana, adong datu di Madagaskar na mamparrohahon hadameon na dihilala Sitindangi Ni Jahowa. Didok ibana, ’Molo naeng mangihuthon sada agama, agama on do na huihuthon.’ Dung i, ndang olo be ibana gabe datu, dipature ma parsaripeonna, jala manomba Jahowa, Debata hadameon.

Dos songon baoa i, ganup taon marribu halak dohot tu huria jala mandapot hadameon naung leleng dilului. Tajaha di Bibel, adong do ”pangiburuon na paet dohot hatongkaron” na boi manegai paralealeonta di huria jala mambahen tubu parsoalan. (Jak. 3:14-16) Alai, adong do poda na denggan di Bibel na boi mangurupi hita pasidingkon parsoalan jala tongtong mardame dohot dongan sahaporseaon. Saonari, taida ma laba ni tudutudu on di pigapiga halak.

PARSOALAN DOHOT CARA PASAEHON

”Ndang boi ahu domu dohot sahalak donganta baoa na gabe dongan sakarejongku. Sada tingki, marsoal jala gogo ma soaranami.”—SI CHRIS.

”Adong donganta borua na jotjot gabe donganku marbarita. Hape hea ma tompu disundati ibana asa unang saut hami marbarita. Dung i, ndang diantoi be ahu. Ndang huboto aha alana.”—SI JANET.

”Martelepon ma ahu dohot dua donganku. Dung i, sada sian nasida paujungkon pangkataion. Hudok ma angka na so denggan taringot donganku na paujungkon pangkataion i tu donganku na sada nai. Hape ndang dipamate donganku na parjolo i dope teleponna.”—SI MICHAEL.

”Di hurianami, adong perintis na marsoal. Sahalak perintis mamuruki perintis na asing. Parsoalan on mangkorhon na roa tu na asing.”—SI GARY.

Ra, ndang parsoalan na balga on. Alai, situasi sisongon on boi mambahen hansit roha ni sasahalak jala manegai hadameon di huria. Nang pe songon i, las do rohanta mangida dongan sahaporseaon na mangihuthon tudutudu sian Bibel jala mardame muse. Tudutudu na dia do di Bibel na mangurupi nasida?

”Unang marbadai hamu di tongan dalan.” (1 Mus. 45:24) Dipasahat si Josep do poda on tu angka hahana tingki naeng mulak nasida tu huta ni amanasida. Molo sasahalak ndang boi mangarajai dirina jala muramura muruk, lam maol do pasaehon parsoalan. Na asing pe boi gabe muruk. Diboto si Chris, sipata maol do dihilala ibana marserep ni roha jala mangihuthon tudutudu. Lomo ma rohana marhamubaon jala mangangku  sala tu donganna marsoal. Dung i, marsitutu ma si Chris asa unang muramura muruk. Ala diboto donganna i do na marsitutu si Chris marhamubaon, ibana pe mangulahon na sarupa. Saonari, nunga mardame nasida jala rap manomba Jahowa.

”Sai na tarselak do angka sangkap molo soada tuptupan.” (Poda 15:22) Tingki ndang diantoi donganna be si Janet, diihuthon ibana do poda di ayat on. Mangkatai ma ibana tu donganta i. Disungkun ma atik boha adong pambahenan ni si Janet na mambahen hansit rohana. Mulana, songon na maila do nasida mangkatai taringot on. Alai ala lambok mangkatai, lumbang ma pangkilalaan ni nasida. Dipaboa donganta i, sala do pangantusionna tu si Janet taringot na masa di tingki naung salpu. Sasintongna, ndang adong pambahenan ni si Janet na mambahen hansit rohana. Mangangku sala ma ibana tu si Janet, mardongan ma muse nasida, jala rap manomba Jahowa.

”Asa molo diboan ho sipelehononmu tu langgatan, dung i tarsingot roham disi di sogo ni roha ni donganmu dompak ho, tadingkon ma sipelehononmi di jolo ni langgatan i; laho ma ho jolo mardenggan dohot donganmi.” (Mat. 5:23, 24) Dilehon Jesus do poda on tingki pasahathon Jamita di Dolok. Dung didok si Michael angka na so denggan taringot donganta i, ganggu ma rohana. Lomo rohana asa pasaehon on jala padengganhon situasina. Dijumpangi ibana ma donganta i jala mangangku sala. Dung i, aha na masa? Didok si Michael, ”Burju do ibana jala disalpuhon do hasalaanki.” Mardongan ma muse nasida.

”Masipauneunean jala masisesaan dosa ma hamu, jumpa marpangkurangi na sada dompak donganna.” (Kol. 3:12-14) Songon dia do taringot dua perintis na marsoal na dipaboa di artikel on? Diurupi sahalak sintua ma nasida asa mangantusi molo nasida nunga mambahen muruk dongan na asing, jala mambahen ndang tabo pangkilalaan ni na asing. Dipaingot ma nasida asa sabar maradophon na asing jala marsitutu mambahen dame di huria. Dijalo jala diulahon nasida do poda i. Saonari, nunga mardongan nasida jala rap marbarita.

Poda na disurat di Kolosse 3:12-14 boi mangurupi hamu marserep ni roha, manalpuhon hasalaan, jala ndang sai mangingot parsoalan naung salpu. Songon dia do molo ndang tarjalo rohanta laho manalpuhon hasalaan ni sasahalak? Poda di Mateus 18:15 boi mangurupi hita. Di ayat on, nang pe Jesus paboahon taringot dosa na balga, alai dipatorang do na boi taulahon tingki adong parsoalanta tu dongan sahaporseaon. Marhite serep ni roha dohot burju ni roha, tajumpangi ma donganta i jala tapasae parsoalanta dohot ibana.

Godang dope poda di Bibel na boi mangurupi jala manjujui hita mangasahon tondi parbadia. Alani i, adong ma di hita ”parbue ni Tondi”,  songon ”holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon”. (Gal. 5:22, 23) Pingkirhon ma on. Sada masin boi denggan mardalan molo dibahen miakna. Suang songon i, molo tapatudu parange na denggan na sian Jahowa, mura ma hita manalpuhon hasalaan ni na asing jala tongtong maraleale.

PARANGE NA MARRAGAM MAMBAHEN HURIA MARLAS NI ROHA

Marragam do parangenta ganup marsadasada jala marasingasing do pandapot dohot caranta mamboanhon diri. On boi mambahen hita marlas ni roha di paralealeonta. Alai, parangenta na marragam boi do mambahen gabe tubu parsoalan. Sahalak sintua naung marpengalaman mangalehon tudosan taringot on. Didok ibana, ”Sahalak parila boi do maol marsaor dohot sasahalak na burju tu sude halak. Ra, ndang parsoalan na balga on. Alai boi do on mambahen gabe tubu parbadaan.” Molo didok rohamuna, boi do angka halak na marasingasing parangena rap saulaon jala marsada? Taparrohahon ma taringot parange ni dua apostel. Umpamana si Petrus. Aha pe na adong di pingkiranna, i do na dipasahat. Molo si Johannes, sahalak parholong jala dipingkirhon do hatana andorang so dihatahon manang mangulahon sadasada ulaon. Imbar do parange ni si Petrus dohot si Johannes. Alai, rap saulaon do nasida manomba Jahowa. (Ul. 8:14; Gal. 2:9) Suang songon i ma hita saonari. Nang pe marasingasing parangenta, alai boi do hita marsada.

Alai, songon dia do molo adong dongan sahaporseaonta na mangulahon manang mandok hata na mambahen hansit roha? Taingot ma, Kristus mate humongkop hita sude, jala ingkon tahaholongi do dongan sahaporseaonta. (Joh. 13:34, 35;  Rom 5:6-8) Unang ma pintor didok hamu na so olo be hamu mardongan tu ibana. Alai sungkun ma dirimu, ’Na maralo do tu patik ni Jahowa na diulahon dongan sahaporseaonki? Tutu do marsangkap ibana naeng mambahen hansit rohangku? Manang, ala marimbar do parangenami umbahen na hansit rohangku? Asing ni i, adong do parangena na naeng hutiru?’

Umpamana molo lomo roha ni donganmu sai mangkatai, hape hamu parsip, olo do hamu manogihon ibana marbarita jala mandapot parsiajaran sian i? Atik na umburju do ibana sian hamu. Diparrohahon hamu do las ni roha na boi tahilala molo mangurupi na matua, na marsahit, dohot na mangkaporluhon pangurupion? Adong do parsiajaran na dapotmuna sian ibana asa lam burju marroha? Na rumingkot, nang pe marimbar parangemuna dohot dongan sahaporseaon, alai ida ma parange ni nasida na denggan. Nang pe ndang gabe solhot hamu, alai boi do hamu gabe lam jonok. On ma na boi mambahen hadameon tu hamu dohot tu huria.

Di abad na parjolo, adong dua donganta borua na margoar si Euodia dohot si Sintike. Mansai imbar do parange ni nasida, alai dijujui apostel Paulus do nasida ”asa marsada ni roha di bagasan Tuhan i”. (Plp. 4:2) Hita pe, lomo do rohanta rap manomba Jahowa dohot dongan sahaporseaon jala tongtong mardame di huria.

UNANG PALOAS PARSOALAN I TONGTONG ADONG

Boasa ingkon hatop tasalpuhon hansit ni rohanta tu na asing? Boi ma tapatudos hansit ni roha i songon ri na tubu di tongatonga ni porlak na godang bunga. Molo ndang tabutbut ri i, boi do i gabe rarat tu sude porlak i. Suang songon i, molo tongtong tapaloas hansit ni rohanta lam  balga tu na asing, on mangkorhon na roa tu huria. Alai, molo tahaholongi do Jahowa dohot dongan sahaporseaon, tontu marsitutu do hita manjaga asa tongtong dame di huria.

Molo serep rohamu jala marsitutu mardame tu na asing, ra longang do rohamu mangida pangkorhonna

Molo marsitutu hita mardame tu na asing, ra longang do hita mangida pangkorhonna. Adong donganta borua na mangkilala sisongon on. Didok ibana, ”Huhilala, songon dakdanak do ahu dibahen dongan sahaporseaonku. Ndang lomo rohangku songon i. Ala lam balga hansit ni rohangku, hudok ma hata na pahansithon rohana. Ninna rohangku, ’Ala ndang diargai ahu, ahu pe songon i ma tu ibana.’”

Dung i, dirimangi donganta on ma pangalahona sandiri. Didok ibana, ”Dung huboto taringot pangalahongku na so denggan, jut ma rohangku mangida diringku. Huboto ma, porlu do ahu manguba pamingkirionku. Dung hutangiangkon taringot on, hutuhor ma hadiah na so pola arga tu donganta i jala hubahen ma surat mandok mangangku sala. Huhaol ma ibana jala satolop do hami asa unang mangingot parsoalannami. Dung i, ndang hea be hami marsoal.”

Sude do hita mangkalomohon hadameon. Alai, pangkilalaan na so tabo manang ginjang ni roha boi mambahen sasahalak ndang olo mardame. Jotjot do on masa di portibi on. Alai, dipangido Jahowa do asa tongtong dame jala marsada angka naposoNa. Ditogutogu Jahowa do si Paulus asa manurat tu halak Kristen laho marparange ”na tama hombar tu panjouon” naung dijalo nasida. Dijujui si Paulus do nasida asa ’martoruk ni roha situtu, marlambok jala marlambas ni roha, masihaehean di bagasan roha na holong! Ringgas mangaradoti hasadaon ni Tondi, pinadomu ni dame’. (Eps. 4:1-3) Mansai arga do hadameon na dihilala naposo ni Jahowa. Alani i, marsitutu ma hita manjaga asa tongtong dame di huria jala pasaehon sude parsoalan dohot dongan sahaporseaon.