Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Juni 2017

Diapuli Jahowa do Hita di Sude Sitaononta

Diapuli Jahowa do Hita di Sude Sitaononta

”Debata, Sipangapul na sumurung . . . diapul do hami di bagasan saluhut haporsuhonnami.”2 KORINT 1:3, 4.

ENDE: 38, 6

1, 2. Songon dia do Jahowa mangapuli hita di sude sitaononta? Jala aha do janji ni Debata na disurat di Bibel?

SAHALAK donganta dolidoli mamingkirhon ayat di 1 Korint 7:28 na mandok, ”marniae di daging” do na mardongan saripe. Disungkun ma tu sintua na matoras di partondion naung mardongan saripe, ”Aha do lapatan ni ’marniae’, jala songon dia do ahu mangadopi i molo dung marhasohotan?” Andorang so dialusi, dipangido sintua i ma ibana mamingkirhon surat ni si Paulus na mandok, Jahowa i ma ’Debata, Sipangapul na sumurung! Ai diapul do hita di bagasan saluhut haporsuhonta’ manang sitaononta.2 Kor. 1:3, 4.

2 Taboto, dihaholongi Jahowa do hita jala lomo rohaNa mangapuli hita tingki mangadopi hasusaan. Ra, diingot hamu do tingki diurupi jala ditogutogu Jahowa hamu marhite Bibel. Dos songon na binahenNa tu naposoNa najolo, pos rohanta na dumenggan do bahenon ni  Jahowa tu hita.Jaha Jeremia 29:11, 12.

3. Sungkunsungkun aha do na laho taulas di artikel on?

3 Somalna, mura do taadopi angka sitaonon molo taboto aha alana. Alani i, boasa boi adong sitaonon di parsaripeon dohot di keluarga? Sitiruon na dia do sian Bibel dohot di tingkinta saonari na boi mangapuli rohanta? Taalusi ma sungkunsungkun on jala taida ma songon dia caranta mangadopi sitaonon.

HASUSAAN DI PARSARIPEON

4, 5. Aha do hasusaan na diadopi na mardongan saripe?

4 Dung ditompa Jahowa borua na parjolo, diboan ma i tu si Adam gabe dongan saripena. Dung i didok Jahowa ma, ”Tadingkonon ni baoa do amana dohot inana mandongani jolmana, jadi sada sibuk nasida.” (1 Mus. 2:24) Saonari, mardosa dope hita. (Rom 3:23) Alani i, adong ma hasusaan na diadopi na mardongan saripe. Umpamana, andorang so marhasohotan, ingkon unduk do sahalak borua tu natuatuana. Alai didok di Bibel, dung marhasohotan, ingkon tungganedoli nama ihuthonon ni borua i. (1 Kor. 11:3) Mulana, maol do dihilala tungganedoli mangalehon tudutudu tu tungganeboruna. Asing ni i, olo do ra umlomo roha ni tungganeboru mangoloi natuatuana sian tungganedolina sandiri. Dung marhasohotan, adong do ra parsoalan maradophon simatua jala maol do on diadopi.

5 Rimangi ma molo diboto na mardongan saripe na laho adong ianakhon ni nasida. Nang pe las situtu rohanasida, olo do marsak nihilala. Ra, sai dipingkirhon tungganedoli do taringot tungganeboruna na mardenggan pamatang, jala mamingkirhon taringot hatutubu ni ianakhonnasida. Dipingkirhon ma muse taringot godang ni hepeng na dihaporluhon. Dung tubu ianakhonna i, adong do na muba di parngoluon ni nasida. Ra, gabe gumodang ma tingki na ingkon lehonon ni tungganeboru tu posoposona. Gabe humurang ma tingki ni nasida mamparrohahon dongan saripena. Jala lam tamba do tanggung jawab ni tungganedoli. Ingkon lehononna do na porlu di tungganeboru dohot ianakhonna.

6-8. Songon dia do pangkilalaan ni na mardongan saripe molo ndang boi marianakhon?

6 Pigapiga na mardongan saripe mangadopi hasusaan na asing. Ra lomo do roha ni nasida marianakhon, alai ndang boi. Lungun do ra roha ni tungganeboru ala ndang boi ibana marianakhon. (Poda 13:12) Disurat di Bibel, najolo mansai ringkot do sahalak borua marhasohotan jala marianakhon. I ma na mambahen si Rahel, tungganeboru ni si Jakkob, marlungun ni roha ala ndang boi marianakhon songon hahana. (1 Mus. 30:1, 2) Di pigapiga negara, godang do na lomo rohana asa godang ianakhonna. Alani i, jotjot do misionaris disungkuni boasa ndang marianakhon. Nang pe naung dipatorang nasida, adong do na mandok, ”Ditangiangkon hami pe asa adong ianakhonmuna.”

 7 Rimangi ma muse pengalaman ni donganta borua di Inggris na lomo rohana marianakhon. Dung diboto na so boi ibana marianakhon, lungun situtu ma rohana. Dung i, lomo roha ni nasida asa manonduk sasahalak gabe ianakhonna. Alai, olo do sipata lungun roha ni donganta on. Didok ibana, ”Huhilala, ndang sarupa anak ni halak tu anak na hutubuhon sandiri.”

8 Dipatorang di Bibel, ”Dapotan haluaon do [sahalak borua] marhitehite na mangintubu.” (1 Tim. 2:15) Alai, ndang ala na marianakhon na mambahen sahalak borua gabe boi mangolu salelengna. Molo songon i, aha do lapatan ni ayat i? Tontu godang do tingki dohot gogo na ingkon dilehon sahalak ina tu keluargana. On mangondingi ibana asa unang margosip manang mangantoi ulaon na so ulaonna. (1 Tim. 5:13) Nang pe songon i, sai adong do sitaonon na diadopi di parsaripeon dohot di keluarga.

Godang do janji ni Jahowa na boi mangapuli rohanta tingki marsitaonon

9. Sitaonon aha do muse na diadopi na mardongan saripe?

9 Sitaonon na asing na diadopi na mardongan saripe, i ma molo marujung ngolu dongan saripena. Nang pe didok rohanasida ndang masa sisongon on di ngoluna, godang do na mangadopi on. Alai porsea do hita tu haheheon, jala boi do on mangapuli rohanta. (Joh. 5:28, 29) Di Bibel, godang do janji ni Jahowa na boi mangapuli rohanta tingki marsitaonon. Saonari, taida ma songon dia naposo ni Jahowa mandapot pangapulion jala diurupi.

Molo marujung ngolu dongan saripemuna, didia do dapotmuna pangapulion? (Ida paragraf 9, 12)

PANGAPULION TINGKI MARSITAONON

10. Songon dia do si Hanna mandapot pangapulion? (Ida gombar di mula ni parsiajaran.)

10 Rimangi ma na masa tu si Hanna, tungganeboru ni si Elkana. Lomo do rohana marianakhon, alai ndang boi. Hape imbangna, i ma si Pininna, godang ianakhonna. (Jaha 1 Samuel 1:4-7.) Lam susa do dihilala si Hanna ala direhei si Pininna ibana ”ganup taon”. On mambahen hansit roha ni si Hanna. Aha do na diulahon ibana asa mandapot pangapulion? Martangiang do ibana tu Jahowa. Laho do ibana tu bagas joro jala leleng martangiang disi. Dipangido ma tu Jahowa asa boi ibana marianakhon, jala pos situtu do rohana tu pangurupion ni Jahowa. Dung sae martangiang, lumbang ma pangkilalaanna jala ”bohina pe, ndang be surbot (marsak) idaon”. (1 Sam. 1:12, 17, 18) Diboto ibana, laho bahenon ni Jahowa do asa adong ianakhonna manang mangapuli ibana marhite cara na asing.

11. Songon dia do tangiang boi mangapuli rohanta?

11 Ala mardosa jala mangolu di portibi na nirajaan ni Sibolis, tongtong do  adong sitaononta. (1 Joh. 5:19) Alai adong do pangurupion. Boi do hita martangiang tu Jahowa, ”Sipangapul na sumurung”. On ma na diulahon si Hanna. Dipatolhas do pangkilalaanna jala mangido pangurupion tu Jahowa. Suang songon i, molo marsitaonon, unang ma holan paboahon sitaononta i tu Jahowa. Alai, tapangido ma pangurupionNa, jala tapatolhas ma na di rohanta.Plp. 4:6, 7.

12. Nang pe marsitaonon, aha do na mangurupi si Hanna marlas ni roha?

12 Ra, lungun situtu do rohanta ala ndang boi marianakhon manang ala marujung ngolu na tahaholongi. Alai, adong do pangapulion. Rimangi ma si Hanna, na mangolu di tingki ni Jesus. Dung pitu taon marhasohotan, marujung ngolu ma tungganedolina. Ra, ndang adong ianakhonna. Alai, aha do na mangurupi ibana martahan? ”Ndang hea ditadingkon ibana Bagas Joro”. Nang pe naung marumur 84 taon, laho do ibana martangiang jala manomba Jahowa tu bagas joro. (Luk. 2:37, Bibel siganup ari) On mangapuli rohana jala mambahen las rohana nang pe marsitaonon.

13. Molo jut rohanta dibahen keluarganta, songon dia do alealenta boi mangapuli rohanta?

13 Marhite alealenta na di huria, boi do tadapot pangapulion. (Poda 18:24) Marumur lima taon do si Paula tingki omakna ndang be manomba Jahowa. Lungun situtu do roha ni si Paula, jala maol do i di ibana. Alai, adong ma sahalak perintis na margoar si Ann na patoguhon jala mangurupi si Paula. Didok si Paula, ”Nang pe si Ann ndang keluargangku, alai marhite holong do ibana mangurupi ahu. On mambahen ahu tongtong manomba Jahowa.” Dung i, mulak ma muse omakna tu huria, jala on mambahen las roha ni si Paula. Asing ni i, las do roha ni si Ann ala diurupi ibana si Paula tongtong manomba Jahowa.

14. Aha do labana molo taapuli roha ni na asing?

 14 Molo jotjot taurupi na asing, boi do gabe lupa hita di sitaononta. Umpamana, godang do donganta borua na marhasohotan manang na ndang, marlas ni roha tingki marbarita na uli. Diboto nasida, na rap saulaon do nasida dohot Jahowa jala mangulahon lomo ni rohaNa. Sasintongna, boi do hita sude mangurupi na asing marhite pasahathon barita na uli. Molo taurupi dongan sahaporseaon, lam solhot ma hita tu nasida. (Plp. 2:4) On ma na diulahon apostel Paulus. Diparrohahon ibana do na asing ”songon inaina na pauliuli gellengna”. Diapuli jala dipatogu do dongan  sahaporseaonna ”songon pangapoi ni amaama di anakkonna”.Jaha 1 Tessalonik 2:7, 11, 12.

PANGAPULION DI KELUARGA

15. Ise do na martanggung jawab mangajari ianakhon taringot tu Jahowa?

15 Songon dia do hita mangapuli angka keluarga na di huria? Sipata, adong do na mangido tu hita asa mangurupi nasida mangajari ianakhonna, manang mangido asa hita na mangajari ianakhonna marsiajar Bibel. Didok di Bibel, tu natuatua do dilehon Jahowa tanggung jawab laho mangajari jala mangalatik ianakhonna. (Poda 23:22; Eps. 6:1-4) Nang pe adong pangurupion sian na asing, ingkon natuatua do na mangajari ianakhonna. Ingkon jotjot do natuatua mangkatai tu ianakhonna.

Ingkon jotjot do natuatua mangkatai tu ianakhonna

16. Aha do na ingkon taingot tingki mangurupi ianakhon ni na asing?

16 Molo adong na mangido asa hita na mangurupi ianakhonna marsiajar Bibel, taingot ma ndang dos tanggung jawabta songon natuatuana. Sipata, olo do dipangido hita mangajari sahalak ianakhon na natuatuana ndang Sitindangi. Molo dipangido hita mangulahon i, denggan do molo marsiajar hita di jabu ni nasida tingki disi natuatuana manang tingki disi Sitindangi na matoras di partondion. Boi do muse hita marsiajar di inganan na ribur. Molo taulahon on, ndang gabe sala pamingkirion ni halak tu hita. Asing ni i, olo do ra dipangido natuatuana asa nasida sandiri na mangajari ianakhonna.

17. Songon dia do ianakhon boi mangapuli keluargana?

17 Angka ianakhon naung marsiajar taringot tu Jahowa, boi do mangapuli jala patoguhon keluargana. Songon dia carana? Marhite patuduhon pangargaion tu natuatuana jala marsitutu mangurupi nasida di pardagingon dohot di partondion. Molo marsihohot do ianakhon i tu Jahowa, on boi patoguhon keluarga. Tingki so ro Aek na Sumar, adong naposo ni Jahowa na margoar si Lamek. Didok ibana do taringot anakna, i ma si Noak, ”On ma mangapul hita di ulaonta dohot di haloloja ni tanganta di tano on, na hona toru ni Jahowa.” Digohi ma surirang on dungkon sae Aek na Sumar, dung disalpuhon Jahowa bura sian tano on. (1 Mus. 5:29; 8:21) Ianakhon na marsihohot tu Jahowa boi mangapuli keluargana. Boi ma nasida mangurupi keluargana mangadopi sitaonon saonari dohot di ari na naeng ro.

18. Aha do na boi mangurupi hita mangadopi angka sitaonon?

18 Saonari, tarapul do roha ni naposo ni Jahowa marhite martangiang, mangarimangi angka sitiruon na disurat di Bibel, jala maraleale dohot dongan sahaporseaon. (Jaha Psalmen 145:18, 19.) Taboto, sai rade do Jahowa mangapuli hita, jala sai urupanNa do hita mangadopi angka sitaononta!