Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Tutu do Dilehon Jesus Ngoluna Humongkop Ahu?

Tutu do Dilehon Jesus Ngoluna Humongkop Ahu?

DI BIBEL, adong do disurat taringot sahalak baoa na ‘dos pangkilalaanta dohot ibana’. (Jak. 5:17) Umpamana, boi do tajaha taringot pangkilalaan ni si Paulus na disurat di Rom 7:21-24 na mandok, “Tingki naeng huulahon na sintong, sai na jahat i do na adong di ahu. . . . Tung jolma na dangol do ahu.” Molo marsitutu dope hita mangadopi hagaleonta, tarapul do rohanta ala hea do si Paulus mangkilala sisongon i.

Alai adong do muse pangkilalaan na asing na dipaboa si Paulus. Di Galatia 2:20, didok ibana do molo Jesus ‘mangkaholongi ibana jala mangalehon ngoluna humongkop ibana’. ‘Dos do pangkilalaanmuna dohot ibana’? Ra ndang dos songon i.

Ala hea taulahon dosa di tingki naung salpu, olo do ra tahilala ndang mararga be dirinta. Ra gabe ndang pos rohanta na dihaholongi Jahowa do hita jala nunga disesa dosanta. Alani i, gabe maol ma tahilala na marlaba do tobusan i tu hita. Lomo do roha ni Jesus molo songon i pangkilalaanta tu tobusan? Molo songon i, aha do na boi mangurupi hita? Taulas ma dua sungkun-sungkun on.

PANGKILALAAN NI JESUS TU TOBUSAN

Lomo roha ni Jesus asa tahilala molo tobusan i, sada silehon-lehon do tu hita. Songon dia asa boi pos rohanta? Tarimangi ma na disurat di Lukas 23:39-43. Adong sahalak baoa na digantung di lambung ni Jesus. Diakkui ibana do angka hajahatonna. Tontu, alana godang do hajahaton na diulahon ibana umbahen na digantung ibana di hau partinaonan. Gabe mandele ma ibana, jala dipangido ma tu Jesus, “Ingot ma ahu molo dung masuk ho tu Harajaonmi.”

Aha ma na didok Jesus tu ibana? Bayangkon ma, hansit do dihilala Jesus tingki i, alai olo dope ibana mangida dompak baoa i. Nang pe hansitan ibana, boi dope ibana lambok jala paposhon roha ni baoa i. Didok ibana, “Tutu do na hudok on tu ho sadari on, rap do ho dohot ahu di Paradeiso.” Dipaingot Jesus do baoa i molo ‘Anak ni jolma i ro laho mangalehon ngoluna bahen tobus ni torop jolma’. (Mat. 20:28) Jala dipaboa Jesus do aha laba na didapot baoa i alani tobusan. Dipangke ibana do hata “ho” dohot “ahu” disi laho paposhon roha ni baoa i. Jala didok do tu baoa i boi do ibana mangolu salelengna di Paradeiso di tano on.

Tangkas ma, lomo do roha ni Jesus asa dihilala baoa i molo tobusan i silehon-lehon do di ibana. Molo songon i do pangkilalaan ni Jesus tu halak na jahat na so sanga dope manomba Debata, tarlumobi ma tu halak Kristen naung tardidi jala nunga manomba Debata. Aha do na mangurupi hita asa porsea na marlaba do tobusan i tu dirinta, nang pe hea taulahon dosa di tingki naung salpu?

 NA MANGURUPI SI PAULUS

Ala dilehon Jesus do tugas tu si Paulus laho marbarita, gabe diantusi si Paulus ma na marlaba do tobusan i tu ibana. Boasa songon i? Didok ibana, “Mandok mauliate do ahu tu Tuanta Kristus Jesus na mangalehon gogo tu ahu. Dipillit ibana do ahu gabe parhobasna, ai diboto do na marsihohot ahu. Hape ginjang do rohangku najolo, huleai do Debata jala hulelei naposona.” (1 Tim. 1:12-14) Ala dilehon Jesus do tugas tu si Paulus, gabe dihilala ibana ma asi ni roha ni Jesus, holongna, jala pos do roha ni Jesus tu ibana. Hita pe dilehon Jesus do tugas laho marbarita na uli. (Mat. 28:19, 20) Jadi, boi do dos pangkilalaanta songon si Paulus?

Si Albert, na hea dipecat sian huria hira-hira 34 taon jala nunga mulak tu Jahowa mandok, “Sai huingot dope angka dosangku najolo. Alai molo marbarita na uli, gabe sarupa ma pangkilalaanku dohot si Paulus. Jesus do na mangalehon tugas on tu ahu. On mambahen las rohangku. Jala gabe pos ma rohangku tu diringku, tu ngolungku, dohot tu ari na naeng ro.”​—Ps. 51:5.

Tingki diurupi hamu angka halak marsiajar Bibel, papos ma roha ni nasida na asi do roha ni Jesus jala dihaholongi do nasida

Adong sahalak baoa na margoar si Allan, na hea mangulahon godang hajahaton jala saonari nunga gabe Sitindangi. Didok ibana, “Sai hupingkiri do angka hajahaton na hubahen tu angka halak. Sipata, gabe mandele do ahu alani i. Alai mauliate ma hudok tu Jahowa ala dipangke Ibana dope pardosa songon ahu laho marbarita na uli. Tingki huida las roha ni angka halak ala mambege barita na uli, gabe huingot ma burju jala parholong do Jahowa i. Huhilala do na dipangke Jahowa ahu laho mangurupi angka halak na mangulahon hajahaton songon na hea huulahon.”

Molo marbarita hita, na denggan do na taulahon dohot na tapingkirhon. Gabe pos ma rohanta na asi do roha ni Jesus tu hita, holong rohana, jala pos rohana tu hita.

UMBALGA DO JAHOWA SIAN ROHANTA

Saleleng di portibi na dirajai Sibolis on dope hita, olo dope sai lungun rohanta alani dosanta najolo. Aha do na boi mangurupi hita asa unang songon i pangkilalaanta?

Tingki poso, olo dope si Jean mangulahon na so denggan hape nunga Sitindangi ibana tingki i. Saonari jotjot dope diingot ibana i. Alai didok ibana ma, “Las do rohangku ala ‘umbalga do Debata sian rohanta.’” (1 Joh. 3:19, 20) Songon si Jean, boi ma dame pangkilalaanta ala taboto na diantusi Jahowa dohot Jesus do na mardosa dope hita. Ingot ma, tobusan na dilehon nasida i, ndang dilehon tu jolma na sempurna. Alai tu jolma na mardosa naung marhamubaon do.​—1 Tim. 1:15.

Pos ma rohanta na marlangku do tobusan i tu hita. Tarimangi ma cara ni Jesus maradophon jolma na mardosa jala ringgas ma hita mangulahon tugasta marbarita. Molo diulahon hamu i, songon si Paulus boi ma didok hamu, ‘Dihaholongi Jesus do ahu jala dilehon ibana do ngoluna humongkop ahu.’