Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 KISAH HIDUP

Dilehon Jahowa do Pasu-Pasu tu Ahu Lobi sian na Huhirim

Dilehon Jahowa do Pasu-Pasu tu Ahu Lobi sian na Huhirim

‘HUBOTO do, ingkon merintis do ahu. Alai sungkun-sungkun do rohangku, tabo do gabe perintis?’ Lomo hian do rohangku tu karejongku di Jerman, i ma mangirim angka sipanganon tu luat Afrika, songon tu Dar es Salaam, Elisabethville, dohot Asmara. Alai dung piga-piga taon ndang hurimpu boi ahu gabe perintis di Afrika!

Tingki mulai merintis ahu, muba ma ngolungku ala hudapot do lobi sian na huhirim. (Eps. 3:20) Alai sungkun-sungkun do ra rohamu, songon dia do i boi masa. Huceritahon ma jo da.

Ahu tubu di Berlin, Jerman taon 1939, piga-piga bulan dung mulai masa Porang Dunia II. Tingki naeng marujung porang i di taon 1945, hona bom ma kota Berlin. Alani serangan bom i, gabe hancur ma dalan. Laho ma ahu dohot keluargangku martabuni tu sada inganan asa unang hona bom. Alai asa aman, gabe pinda ma hami tu huta ni omak di Erfurt.

Ahu dohot natua-tuakku dohot itongku di Jerman, taon 1950

Marsitutu do omakku mangalului hasintongan. Sai dijaha ibana do buku ni angka halak na pistar, jala diihuthon ibana do piga-piga agama. Alai ndang dapotna dope hasintongan i. Alai hira-hira taon 1948, ro ma dua Sitindangi Ni Jahowa tu jabunami. Ditogihon omak ma nasida tu jabu, jala godang do na disungkun ibana tu nasida. Ndang adong dope sajom, didok omak ma tu ahu dohot tu itongku, “Nunga dapothu be hasintongan i!” Ndang sadia leleng, ro ma ahu, omakku, dohot itongku tu parpunguan di Erfurt.

Taon 1950, mulak ma hami tu Berlin. Marpungu di Huria Berlin-Kreuzberg ma hami. Dung i, pinda jabu ma muse hami alai tong do di Berlin. Gabe tu Huria Berlin-Tempelhof ma hami marpungu. Ujungna, tardidi do omak. Alai ahu ndang dope. Boasa?

MARSITUTU ASA UNANG GABE PARILA

Ala parila ahu, gabe leleng do ahu asa maju. Saleleng dua taon, ndang hea ahu mangkatai tingki marbarita. Alai marsaor ma ahu dohot angka donganta na barani jala mangkaholongi Jahowa. Adong do sian nasida na hea dipenjarahon di kamp konsentrasi Nazi manang di penjara Jerman Timur. Adong do muse na hea martabuni-tabuni mamboan sijahaon tu Jerman Timur, hape boi do dipenjarahon nasida alani i. Gabe sitiruon do nasida di ahu. Gabe hurimangi ma, barani do nasida mangalehon ngoluna tu Jahowa dohot tu angka dongan. Ahu pe boi do ndang gabe parila.

 Marsitutu ma ahu asa unang gabe parila. Dohot ma ahu tu sada kampanye khusus laho marbarita di taon 1955. Di sada surat na dibahen di Informant, * dipaboa donganta si Nathan Knorr ma, on ma kampanye na umbalga na hea dibahen Sitindangi Ni Jahowa. Didok ibana molo dohot do sude parbarita tu ulaon on, “di bulan on ma taulahon ulaon marbarita na umbalga na hea adong di portibi on”. Tutu do masa i! Ndang sadia leleng, rap tardidi ma ahu dohot bapakku dohot itongku taon 1956. Alai dungkon i, ingkon hubahen do muse sada keputusan na ringkot.

Saleleng martaon-taon, huboto do cita-cita na denggan do gabe perintis. Alai ndang olo dope ahu gabe perintis tingki i. Huparsiajari ma marbisnis dohot mangirim barang tu luar negeri. Lomo do rohangku asa jolo berpengalaman ahu di bidang on baru pe asa merintis. Taon 1961, dapothu ma karejo di Hamburg, kota na umbalga di Jerman. Gabe lomo ma rohangku tu karejo on. Ujungna, ndang marnasaut ahu gabe perintis. Jadi, aha ma na huulahon?

Mandok mauliate do ahu ala marhite angka dongan, diurupi Jahowa do ahu asa mangkaringkothon parale-aleonku tu Ibana. Godang do angka donganku na mulai merintis. Gabe sitiruon do nasida di ahu. Asing ni i, adong do donganta si Erich Mundt na hea dipenjarahon di kamp konsentrasi. Dijujui ibana do ahu asa porsea tu Jahowa. Didok ibana, tingki di kamp konsentrasi, adong do angka donganta na holan porsea tu dirina sandiri, ujungna gabe gale ma nasida. Alai angka dongan na porsea tu Jahowa, tongtong do setia jala ujungna dipangke organisasi ni Jahowa do nasida.

Tingki baru mulai merintis ahu, taon 1963

Jala, adong donganta si Martin Poetzinger, na ujungna gabe anggota Punguan Na Mangaradoti Organisasi na manjujui angka dongan. Didok ibana, “Habaranion do sada arta na ummarga!” Dung hurimangi hatana i, huputushon ma kaluar sian karejongku jala mulai ma ahu merintis bulan Juni taon 1963. On ma sada keputusan na dumenggan na hea hubahen! Dung dua bulan, diundang ma ahu gabe perintis istimewa. Hape tingki i, ndang sanga dope dapothu karejo na baru. Dung piga-piga taon, dipasu-pasu Jahowa ma ahu lobi sian na huhirim. Diundang ma ahu tu Singkola Gilead kelas 44.

PARSIAJARAN NA ARGA SIAN GILEAD

Sada parsiajaran na huingot sian singkola i tarlumobi sian donganta si Nathan Knorr dohot si Lyman Swingle, i ma “unang pintor menyerah di penugasanmuna”. Dipatogu do hami asa marhasil di penugasannami nang pe maol. Didok donganta si Knorr do, “Aha do na sai dipingkiri hamu taringot daerah penugasanmuna i? Inganan na kotor do, angka serangga, manang hapogoson? Manang, diingot hamu do angka hau, bunga dohot bohi na marlas ni roha? Marsitutu ma hamu laho mangkaholongi angka halak!” Hea do dipaboa donganta si Swingle boasa adong angka dongan na pintor menyerah di penugasanna. Sampe naeng tangis do ibana paboahon i. Sanga do so satongkin ibana marjamita alani i. Hona hian do i tu rohangku. Gabe marsitutu ma ahu asa unang gabe kecewa hubahen Jesus dohot angka na miniahan.​—Mat. 25:40.

Ahu, si Claude, dohot si Heinrich tingki gabe misionaris di Lubumbashi, Kongo, taon 1967

Dung dipaboa daerah penugasannami, adong piga-piga donganta di Betel na manungkun tu daerah dia hami ditugashon. Dipuji nasida do daerah penugasan ni dongan na asing. Alai tingki hudok, “Tu Kongo (Kinshasa)”, didok nasida ma tu ahu, “Oh, tu Kongo ate! Sai didongani Jahowa ma ho disi!” Alana tingki i, godang do barita taringot halak na marbadai jala masibunuan di Kongo (Kinshasa). Alai sai huingot do angka parsiajaran na hudapot sian singkola i. Ndang sadia leleng dung wisuda hami di bulan September 1967, borhat ma ahu, si Heinrich Dehnbostel, dohot si Claude Lindsay tu Kinshasa, ibukota ni Kongo.

DILATIK TINGKI GABE MISIONARIS

Dung sahat hami di Kinshasa, marsiajar bahasa Prancis ma hami saleleng tolu bulan. Dung i,  pinda ma hami tu Lubumbashi di ujung selatan Kongo na jonok tu perbatasan tu Zambia. Najolo goarna Elisabethville. Pinda ma hami tu jabu ni misionaris di pusat kota.

Huta-huta do Lubumbashi on, jala ndang hea dope ro parbarita na uli tuson. Godang do parsiajar Bibelnami, sampe ndang sanga tingkinami laho mangajari sude. Marbarita do muse hami tu angka pejabat na karejo di kantor ni pamarenta manang tu polisi. Godang do na mangargai Bibel dohot ulaonnami marbarita. Godangan halak disi marbahasa Swahili do. Alani i huparsiajari ma bahasa i rap dohot si Claude Lindsay. Ndang sadia leleng, ditugashon ma hami tu huria na marbahasa Swahili.

Nang pe godang pengalaman na denggan na didapot hami, alai adong do tong angka ambat-ambat. Jotjot do hami pajumpang dohot angka tentara na mabuk na mamboan sinjata. Adong do muse polisi na manudu hami mangulahon hajahaton. Hea do ro polisi mamboan sinjata tu parpunguannami di jabu ni misionaris. Diboan ma hami tu kantor polisi. Disuru ma hami hundul di lante sahat tu jam sampulu borngin. Dung i, diloas ma hami mulak.

Taon 1969, gabe pengawas wilayah ma ahu. Tingki gabe pengawas wilayah, ingkon hudalani do dalan na margambo jala marramba. Godang do tajumpangi dalan sisongon i di Afrika. Tingki marborngin ahu di sada huta, adong ma manuk dohot angka anakna modom di toru ni podomanku. Sai huingot do songon dia soara ni manuk i mandungoi ahu, hape golap dope ari. Hea do ahu mangkata-hatai taringot hasintongan  tingki borngin dohot angka dongan di jonok ni api unggun. Molo huingot i muse, las do rohangku.

Sada ambat-ambat na mansai borat na diadopi hami, i ma ala adong angka donganta na dohot tu organisasi Kitawala. * Piga-piga sian nasida nunga tardidi jala gabe sintua di huria. Gabe songon “batu karang na buni” do nasida di huria. Alai angka dongan na serep rohana ndang olo mangihuthon nasida. (Jud. 12) Alai ujungna, dipaias Jahowa do huria sian angka halak sisongon i, jala lam godang ma muse halak na gabe Sitindangi Ni Jahowa.

Taon 1971, ditugashon ma ahu tu kantor cabang di Kinshasa. Marragam do karejongku disi. Songon surat-menyurat, lektur, dohot bagian dinas. Di Betel, huparsiajari ma songon dia mangorganisasi ulaon di negara na balga nang pe terbatas fasilitasna. Sipata, ingkon marbulan-bulan do asa sahat surat na dikirim hami tu angka huria. Mulana, dikirim do i marhite pesawat, dung i ditaruhon marhite parau. Alai, olo do ndang boi mardalan parau i saleleng marminggu-minggu ala godang eceng gondok. Nang pe songon i, marhasil do ulaonnami nang pe mangadopi angka ambat-ambat.

Longang do rohangku mangida songon dia angka dongan paradehon kebaktian na balga nang pe terbatas biayana. Dibahen nasida ma panggung sian asar ni rayap na songon bukit. Dindingna dohot hundulanna pe dibahen nasida sian lalang. Dibahen ma bambu gabe tiangna, jala tikar bambu gabe atapna dohot mejana. Dipotong nasida ma kulit ni hau ganti ni paku. Longang do rohangku ala sai adong do cara ni angka donganta mambahen i sude. Holong hian do rohangku tu nasida. Dung pinda ahu tu penugasan na baru, masihol do ahu tu nasida!

MARTUGAS DI KENYA

Taon 1974, dipapinda ma ahu tu kantor cabang di Nairobi, Kenya. Godang do angka ulaonnami disi, ala kantor cabang Kenya do na mangaradoti ulaon marbarita di sampulu negara na jonok sian i. Di piga-piga sian negara on, diorai do ulaon marbarita disi. Nunga jotjot ahu ditugashon asa ro tu angka negara i, tarlumobi tu Etiopia. Godang do ambat-ambat na diadopi angka donganta disi, jala godang do sian nasida na dianiaya. Godang do nasida na dipungkuli, dipenjarahon, jala adong do na dipamate. Alai tongtong do nasida setia ala togu do parale-aleonna tu Jahowa dohot tu angka dongan.

Taon 1980, lam tamba ma las ni rohangku dung marhasohotan dohot si Gail Matheson. Sian Kanada do si Gail, jala sakalas do hami tingki singkola Gilead. Gabe misionaris ma ibana di Bolivia. Jotjot do hami marsikiriman surat. Dung 12 taon, pajumpang ma hami muse di New York. Ndang sadia leleng, marhasohotan ma hami di Kenya. Las hian do rohangku tu si Gail, ala togu do parale-aleonna tu Jahowa jala sederhana do parngoluonna. Tongtong do didongani ibana ahu jala dihaholongi do ahu.

Taon 1986, ditugashon ma ahu gabe pengawas wilayah huhut gabe Panitia Cabang. Dikunjungi hami ma angka negara na diawasi kantor cabang Kenya.

Marjamita di kebaktian di Asmara, taon 1992

Huingot do tingki paradehon inganan kebaktian di Asmara (di Eritrea) taon 1992. Tingki i, ndang diorai be Sitindangi Ni Jahowa. Alai mansai roa do inganan kebaktian na dapotnami. Roa do i idaon sian luar, alai umroa dope na di bagasan. Alai tingki ari kebaktian i, longang do rohangku ala boi dibahen angka dongan inganan i gabe denggan. Godang do angka keluarga mamboan kain jala ditempelhon nasida ma i tu angka bagian na roa. Las do rohanami mangihuthon kebaktian i, jala adong 1.279 halak na ro.

Tingki gabe pengawas wilayah ahu, marragam do inganannami marborngin ganup minggu. Sipata, marborngin ma hami di sada penginapan na mewah jala jonok tu laut. Alai di tingki  na asing, marborngin do hami di jabu na dibahen sian seng. Kamar mandina pe daona 100 meter sian jabu. Alai manang didia pe hami melayani, sai diingot hami do tingki rap marbarita dohot angka perintis dohot parbarita na ringgas. Tingki dapotnami penugasan na baru, ingkon marsirang ma hami dohot angka dongan na burju i. Masihol hian do hami tu nasida.

GODANG PASU-PASU DI ETIOPIA

Sian taon 1987 sahat tu taon 1992, ndang diorai be ulaon ni Sitindangi Ni Jahowa di piga-piga negara na diawasi kantor cabang Kenya. Alani i, dibahen ma muse piga-piga kantor cabang. Taon 1993, ditugashon ma ahu tu kantor cabang di Addis Ababa, Etiopia. Nunga marpulu taon diorai ulaon ni Sitindangi Ni Jahowa disi. Alai saonari ndang be.

Tingki gabe pengawas wilayah di Etiopia, taon 1996

Dipasu-pasu Jahowa do ulaon ni Sitindangi Ni Jahowa di Etiopia. Godang do angka donganta na gabe perintis. Ganup taon mulai sian 2012, lobi sian 20 persen Sitindangi gabe perintis biasa. Asing ni i, diparade do angka singkola laho mangalatik angka donganta. Jala lobi sian 120 Bale Harajaon na dipajongjong. Di taon 2004, pinda ma anggota Betel tu inganan na baru jala nunga adong be Bale Kebaktian. On ma angka pasu-pasu na dilehon Jahowa.

Saleleng martaon-taon, nunga marale-ale hami dohot angka dongan na di Etiopia. Holong hian do rohanami tu nasida ala burju-burju do nasida. Baru-baru on, hurang sehat do hami. Alani i, gabe ditugashon ma hami tu kantor cabang Eropa Tengah. Denggan do hami diurus dison, alai masihol hian do hami tu angka dongan na di Etiopia.

GODANG NA MARTAMBA DIBAHEN JAHOWA

Dihilala hami do songon dia Jahowa mambahen lam godang na mananda Ibana. (1 Kor. 3:6, 9) Umpamana, tingki parjolo sahali ahu marbarita tu halak Rwanda na karejo di pertambangan tembaga di Kongo, ndang adong dope Sitindangi di Rwanda. Saonari, nunga lobi sian 30.000 Sitindangi di Rwanda. Di taon 1967, hira-hira 6.000 do Sitindangi di Kongo (Kinshasa). Saonari, adong hira-hira 230.000 Sitindangi disi, jala lobi sian sajuta halak na ro tu Borngin Parningotan di taon 2018. Di sude negara na hea diawasi kantor cabang Kenya, saonari nunga adong lobi sian 100.000 Sitindangi disi.

Lobi sian 50 taon naung salpu, dipangke Jahowa do angka dongan laho mangurupi ahu asa merintis. Sahat tu saonari parila dope ahu. Alai, nunga marsiajar ahu asa tongtong porsea tu Jahowa. Pengalamanku na di Afrika i mangurupi ahu asa boi sabar jala sederhana. Las do rohangku dohot si Gail tu angka dongan na mansai burju, na tongtong setia nang pe godang hasusaan, jala porsea tu Jahowa. Huhilala do asi ni roha ni Jahowa na mansai balga. Dilehon Jahowa do pasu-pasu tu ahu, lobi sian na huhirim.​—Ps. 37:4.

^ par. 11 Ujungna goarna gabe Pangkobasion Harajaonta, jala saonari diganti gabe Hangoluan dohot Pangkobasion ni Halak Kristen—Na Laho Diparsiajari.

^ par. 23 “Kitawala” dibuat sian bahasa Swahili lapatanna, i ma “mangatur, manang mamarenta”. Tujuan ni punguan on, i ma asa boi merdeka sian Belgia. Kitawala on mamangke, mamparsiajari, jala mansarhon sijahaon ni Sitindangi Ni Jahowa. Jala gabe dipadomu nasida do ajaran ni Bibel tu politik ni nasida, ulaon mardatu, dohot ulaon na rorang.