Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

”Tangis ma Hamu Rap Dohot Angka na Tangis”

”Tangis ma Hamu Rap Dohot Angka na Tangis”

”Sai masipaingotan ma hamu jala masipauliulian.” —1 TESSALONIK 5:11.

ENDE: 53, 28

1, 2. Boasa ringkot mangulas cara mangapuli na marhabot ni roha? (Ida gombar di mula ni parsiajaran.)

DIDOK si Susi, ”Nunga laho sataon dung mate ianakhonnami, alai sai lungun dope rohanami.” Sahalak baoa paboahon, dung marujung ngolu tungganeboruna ndang tarhatahon songon dia hansitna dihilala ibana. Godang do halak na mangkilala sisongon on. Ndang lomo rohanta molo marujung ngolu halak na tahaholongi andorang so ro dope Armagedon. Ra, adong do halak na tahaholongi naung marujung ngolu, manang adong do ra taboto halak na marhabot ni roha. Olo do ra sungkunsungkun rohamuna, ’Songon dia do asa tarapul halak na marhabot ni roha?’

2 Angka halak mandok, ndang boi hatop malum hansit na dihilala nasida. Tutu do songon i? Sahalak ina na mabalu mandok, ”Na boi pamalumhon lungun ni roha ni sasahalak i ma carana mamparhaseang tingki.” Songon  sada luka, ndang boi pintor hatop malum alai porlu do diubati. Suang songon i ma, ndang boi pintor hatop malum lungun ni roha, adong do na ingkon taulahon. Aha do na boi mangurupi sasahalak mangorui lungun ni roha?

JAHOWA ”SIPANGAPUL NA SUMURUNG”

3, 4. Boasa pos rohanta na diantusi Jahowa do pangkilalaanta tingki marhabot ni roha?

3 Ama Parasiroha jala Sipangapul na sumurung do Jahowa. Sai diapuli do hita di saluhut sitaononta. (Jaha 2 Korint 1:3, 4.) Ibana ma sitiruon na dumenggan tingki mangapuli. Didok do tu naposoNa, ”Ahu, ahu sandiri tutu na mangapuli hamu.”—Jes. 51:12; Ps. 119:50, 52, 76.

Sihol do roha ni Jahowa pahehehon naposoNa na marsihohot

4 Hea do lungun roha ni Jahowa ala mate halak na hinaholonganNa, songon si Abraham, si Isak, si Jakkob, si Musa dohot Raja Daud. (4 Mus. 12:6-8; Mat. 22:31, 32; Ul. 13:22) Bibel paboahon, sihol do roha ni Jahowa pahehehon naposoNa na marsihohot. (Job 14:14, 15) Dung dipahehe, marlas ni roha jala sehat ma sude halak. Lungun do muse roha ni Jahowa tingki mate AnakNa na sasada i. Dipaboa do di Bibel molo Jesus ”anak hasian” ni Debata. (Poda 8:22, 30, Bibel siganup ari) Ndang tarhatahon songon dia lungun ni roha ni Jahowa mangida hansit ni parmate ni AnakNa i.—Joh. 5:20; 10:17.

5, 6. Songon dia do Jahowa mangapuli hita?

5 Pos ma rohanta na urupan ni Jahowa do hita. Sadihari pe, boi do hita martangiang tu Ibana paboahon arsak dohot lungun ni rohanta. Tarapul do roha mamboto na diantusi Jahowa do pangkilalaanta jala diapuli do hita! Songon dia Ibana mangulahon i?

6 Godang do cara ni Jahowa mangapuli hita. Sada sian i, i ma marhite tondi parbadia. (Ul. 9:31) Jesus paboahon, ’lehonon ni Ama i tondi parbadia tu angka na mangido’ sian Ibana. (Luk. 11:13) Si Susi, na dipaboa di mula ni artikel on mandok, ”Jotjot do hami marsinggang martangiang mangido asa diapuli Jahowa. Jala sai diramoti dame ni Debata do roha dohot pingkirannami.”—Jaha Pilippi 4:6, 7.

DIANTUSI JESUS DO PANGKILALAANTA

7, 8. Aha do na paposhon rohanta na olo Jesus mangapuli hita?

7 Tingki di tano on, ditiru Jesus do parange ni Jahowa. Tarida do i sian pangkataion dohot parniulaonna. (Joh. 5:19) Disuru Jahowa do Jesus tu tano on laho mangapuli ”parroha na bojok” dohot halak na ”marsak roha”. (Jes. 61:1, 2; Luk. 4:17-21) Pos do roha ni angka halak na diantusi Jesus sitaonon  ni nasida jala lomo do rohana mangurupi nasida.—Heb. 2:17.

8 Tingki poso dope Jesus, ra adong do sisolhot manang keluargana naung mate. Ra poso dope Jesus tingki mate bapakna si Josep. * Tontu boi do ra diantusi hamu songon dia sahalak na poso manaon habot ni roha, songon pangkilalaan ni omakna, anggina manang ibotona na marhabot ni roha.

9. Songon dia do pangkilalaan ni Jesus tingki mate si Lasarus?

9 Tingki di tano on, dipatudu Jesus do na sapangkilalaan ibana dohot angka halak. Umpamana, tingki mate alealena si Lasarus, boi do dihilala ibana songon dia lungun ni roha ni si Maria dohot si Marta. Ala mansai lungun rohana, gabe tangis ma ibana nang pe laho paheheonna do si Lasarus.—Joh. 11:33-36.

10. Aha do na paposhon rohanta na diantusi Jesus do pangkilalaanta saonari?

10 Songon dia do hata ni Jesus najolo, boi mangurupi hita saonari? Tangkas do dipatorang di Bibel molo Jesus ndang muba. Didok do, ”Ia Jesus Kristus, songon i nantoari, songon i sadari on, laos i do ro di salelenglelengna!” (Heb. 13:8) Digoari do ibana ”Sipartogi tu hangoluan”, ala marhite ibana do hita boi mangolu salelengna. Boi do diantusi ibana lungun ni rohanta ganup marsadasada jala ’haurupanna do angka na tarunjun’. (Ul. 3:15, Bibel siganup ari; Heb 2:10, 18) Pos ma rohanta, lungun do roha ni Jesus mida halak na marsitaonon. Diantusi ibana do lungun ni rohanasida jala boi do ibana mangapuli ”di tingki halehetanna [manang, na topet]”.—Jaha Heber 4:15, 16.

”PANGAPULON NA DI BAGASAN SURAT I”

11. Ayat na dia do na boi mangapuli rohamuna?

11 Godang do ayat na boi mangapuli hita. Sada sian i, i ma taringot Jesus na marhabot ni roha di tingki mate si Lasarus. Ndang pola longang rohanta disi alana ”nasa na tarsurat hian, bahen poda di hita do, umbahen na tarsurat; asa marpangkirimon hita binahen ni habengeton dohot pangapulon na di bagasan Surat i”. (Rom 15:4) Molo marhabot ni roha hamu, boi do tarapul rohamuna manjaha ayat na mangihut:

  • ”Donok do Jahowa di angka na bojok marroha, jala ditumpahi do angka na pogos tondi.” —Ps. 34:19, 20.

  • ”Di hinadeak ni holso ni rohangku di bagasan, sai dipasabam angka pangapoim do tondingku.”—Ps. 94:19.

  • ”Tuhanta Jesus Kristus dohot Debata Amanta, na mangkaholongi hita jala mangalehon apulapul, na mian tongtong, dohot pangkirimon  na denggan sian asi ni roha i: Ibana ma mangapuli jala pahothon rohamuna di bagasan.”—2 Tes. 2:16, 17. *

ANGKA DONGAN DI HURIA BOI MANGAPULI

12. Songon dia do cara mangapuli dongan na asing?

12 Boi do angka dongan di huria mangapuli sasahalak na marhabot ni roha. (Jaha 1 Tessalonik 5:11.) Songon dia do hita patoguhon jala mangapuli sasahalak na ”marsak” manang na marhabot ni roha? (Poda 17:22, Bibel siganup ari) Taingot ma ayat na mandok ”adong do tingki hohom, adong do tingki mangkatai”. (Pjm. 3:7, Bibel siganup ari) Sahalak na mabalu na margoar si Dalene paboahon, ingkon dipatolhas halak na marhabot ni roha do pangkilalaan dohot pingkiranna. Alani i, denggan ma tatangihon nasida, jala unang ma pintor taalusi hata ni nasida. Si Junia, na ibotona mate maningkot mandok, ”Nang pe ndang boi taantusi sude pangkilalaan ni nasida, alai na rumingkot i ma molo rade hita manangihon nasida.”

13. Tingki adong na marhabot ni roha, aha do na porlu taingot?

13 Porlu taingot, ndang sai sarupa pangkilalaan dohot cara ni halak patuduhon habot ni roha. Sipata ndang tarhatahon sadia bagas lungun ni roha ni sasahalak. Hata ni Debata mandok, ’Roha i do tumanda arsak ni rohana sandiri, ndang dapot hilalaon ni halak [na asing].’ (Poda 14:10) Nang pe dipaboa sasahalak lungun ni rohana, alai ndang mura mangantusi pangkilalaanna.

Na dumenggan na boi taulahon, i ma ’tangis rap dohot angka na tangis’

14. Aha do na boi tadok tu halak na marhabot ni roha?

14 Sipata, olo do ndang taboto aha na laho hatahononta laho mangapuli na marhabot ni roha. Alai Bibel paboahon, ”Dila ni halak na pistar hahisaron [manang, pamalumhon] do.” (Poda 12:18) Godang do hata na mangapuli na boi tahatahon sian buku Bila Seseorang yang Anda Kasihi Meninggal. * Alai, adong dope na dumenggan na boi taulahon, i ma ’tangis rap dohot angka na tangis’. (Rom 12:15) Si Gaby, sahalak na mabalu paboahon, sipata tangis ma cara na dumenggan laho patuduhon lungun ni roha. Didok ibana, ”Tarapul do rohangku molo rap tangis ahu dohot donganku. Jala huhilala ma, ndang holan ahu hape na marhabot ni roha.”

15. Molo ndang malo hita mangkatahon hata na mangapuli halak na marhabot ni roha, songon dia do carana? (Ida kotak ” Hata Apulapul”.)

15 Molo ndang malo hita mangkatahon  hata na mangapuli halak na marhabot ni roha, boi do takirim e-mail (surat elektronik), sms, manang surat. Surathon ma sada ayat na mangapuli roha, paboa ma parange na denggan, manang las ni rohamuna dohot halak na marujung ngolu i. Si Junia mandok, ”Tarapul do rohangku tingki didok angka dongan hata na patoguhon, jala las do rohangku tingki ditogihon nasida asa rap mangkatahatai dohot angka dongan sahaporseaon. Sudena i patuduhon na dihaholongi jala disarihon nasida do ahu.”

16. Aha do cara na dumenggan laho mangapuli angka dongan?

16 Boi do tangiangta mangurupi angka dongan na marhabot ni roha. Tangiangkon ma nasida manang rap martangiang ma dohot nasida. Molo tung pe maol mangulahon i ala boi mambahen hita gabe tangis, tangiang sian nasa roha boi mangapuli nasida. Songon na didok si Dalene, ”Tingki ro donganta borua mangapuli ahu, hupangido do asa rap martangiang hami. Tingki martangiang, maol do dihilala ibana di mulana i, alai dung pigapiga hata gabe lam tangkas jala tarida ma na sian roha do tangiangna. Haporseaon na togu, holong, dohot panarihon ni nasida mambahen lam togu haporseaonku.”

SAI RADE MA MANGAPULI

17-19. Boasa ingkon sai rade hita mangapuli?

17 Ndang taboto sadia leleng sasahalak marhabot ni roha. Tingki baru  marujung ngolu halak na dihaholongi, godang do angka dongan dohot sisolhot na ro mangapuli. Alai ndang sadia leleng dungkon i, mangulahon ulaonna be ma nasida. Sasintongna porlu dope halak na marhabot ni roha i diapuli. Rade ma hamu mangurupi. ”Manang ise na tongtong marholong ni roha, i ma aleale.” (Poda 17:17) Ingkon taapuli do nasida saleleng na dihaporluhon.—Jaha 1 Tessalonik 3:7.

18 Ingot ma olo do tompu sasahalak marlungun ni roha. Olo do alani tanggal parbogason, musik, poto, ulaon, suara manang manganggo angur ni manang aha. Olo do na mabalu marlungun ni roha tingki parjolo sahali mangulahon sada ulaon sahalakna, umpamana songon tingki ro tu kebaktian manang tu Borngin Parningotan. Sahalak donganta paboahon, ”Dung mabalu, didok rohangku lungun do ra huhilala di tanggal ni ari parbogasonnami. Alai dibahen angka dongan do acara, asa unang lungunan rohangku di ari i.”

19 Alai, ndang holan di tingki sisongon i halak na marhabot ni roha porlu dipatogu. Si Junia patorangkon, ”Sadihari pe, boi do talehon tingki tu halak na marhabot ni roha, marlaba situtu do i.” Sasintongna, ndang boi tapamalum sude lungun ni rohanasida, alai adong do na boi tabahen laho mangapuli nasida. (1 Joh. 3:18) Didok si Gaby, ”Mandok mauliate do ahu tu Jahowa ala rade do angka sintua mangurupi ahu di tingki susa. Gabe pos ma rohangku sai na donganan ni Jahowa do ahu.”

20. Boasa tarapul rohanta mamboto Jahowa Sipangapul na sumurung?

20 Tarapul do rohanta mamboto Jahowa Sipangapul na sumurung. Di ari haheheon, salpuhononNa ma sude habot ni roha. (Joh. 5:28, 29) Marjanji do Debata na laho ”bondutonna ma hamatean salelenglelengna jala apusan ni Tuhan Jahowa ma iluilu sian nasa bohi”. (Jes. 25:8) Di tingki i ndang porlu be hita ”tangis . . . rap dohot angka na tangis”, gariada sude jolma ”marlas ni roha . . . rap dohot angka na marlas ni roha”.—Rom 12:15.

^ par. 8 Songon na dipatorang di Bibel, mangolu dope si Josep tingki Jesus marumur 12 taon. Alai tingki Jesus mambahen tanda halongangan na parjolo, i ma mambahen aek gabe anggur, ndang adong be dipaboa taringot tu si Josep. Ra on patuduhon nunga mate be si Josep di tingki i. Hatorangan na asing muse, tingki digantung Jesus di sada tiang, didok do tu apostel Johannes asa disarihon omakna, i ma si Maria. Tontu ndang dohonon ni Jesus songon i, molo mangolu dope si Josep.—Joh. 19:26, 27.

^ par. 11 Ayat na asing na boi mangapuli hita tarsurat di Ps. 20:2, 3; 31:8; 38:9, 10, 16; 55:23; 121:1, 2; Jes. 57:15; 66:13; Plp. 4:13; dohot 1 Ptr. 5:7.

^ par. 14 Ida ma muse Menara Pengawal, 1 November 2010 di halaman na marjudul ”Hiburlah Yang Berduka, seperti Yesus”.