Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Juli 2017

Linggomi ma Pingkiranmuna

Linggomi ma Pingkiranmuna

NUNGA ro be musu! I ma Sibolis. Dipangke ibana do sinjata na mansai jago. Sinjata on, boi manegai pingkiranta. Aha ma i? I ma propaganda!

Diboto apostel Paulus do, molo propaganda on boi parohon jea, alai ndang sude halak Kristen mamboto i. Umpamana, dirimpu halak Korint do na togu partondion ni nasida jala ndang boi dielaela Sibolis. (1 Kor. 10:12) Alani i, didok si Paulus ma, ’Biar do rohangku, so tung diago pingkiranmuna, manadingkon bulus ni roha maradophon Kristus, suman tu na pinaotooto ni ulok i si Haoa marhitehite angkalna i.’—2 Kor. 11:3.

Sian i taboto, unang ma tarimpu sai na togu do partondionta. Asa boi monang mangalo propaganda ni Sibolis, ingkon taboto do pangkorhon ni i jala songon dia mangalinggomi diri sian i.

AHA DO PANGKORHON NI PROPAGANDA?

Na didok propaganda dison, i ma hatorangan na so sintong na dibahen laho manipu halak manang asa mangarajai pingkiran ni nasida. Buku na marjudul Propaganda and Persuasion mandok, molo propaganda i ”hata na sala, na so sintong jala mangkorhon na roa”. Angka halak pe mandok dos do i songon ”gabus, hatorangan na mambahen na sintong gabe so sintong, manipu, [jala] na mangarajai pingkiran”.

Boi do propaganda mangkorhon na roa tu hita, alana lam leleng disegai ma pingkiranta di na so pamotoanta. Boi ma i tapatudos songon gas beracun na so boi diida manang dianggo. Si Vance Packard, sahalak ahli na mamparsiajari pangalaho ni jolma paboahon balga do pangkorhon ni propaganda tu parniulaonta. Ahli na asing pe paboahon, propaganda do na mambahen jolma lam jahat, ndang marroha, mangulahon genosida (pamatehon sada suku), marporang, jala  manusai sasahalak alani suku manang agama.—Easily Led—A History of Propaganda.

Gari jolma boi mangotootoi mamangke propaganda, tarlumobi ma Sibolis! Nunga diparsiajari ibana pangalaho ni jolma sian mulai ditompa. Jala ibana do saonari na mangarajai ”nasa portibi on”. Alani i, boi do dipangke ibana portibi on laho mansarhon gabus na binahenna. (1 Joh. 5:19; Joh. 8:44) ’Dipapitung [Sibolis] do pingkiran ni godang halak’ jala dipangke do propaganda laho ”paotootohon liat portibi on”. (2 Kor. 4:4; Pgk. 12:9) Songon dia do hita boi mangalo propaganda ni Sibolis?

PATOGU MA HAPORSEAONMU

Adong do cara na mura laho mangalo propaganda ni Sibolis. Jesus mandok, ”Tandaonmuna ma na sintong i, jala paluaon ni na sintong i ma hamu.” (Joh. 8:31, 32) Di parporangan, ingkon botoon ni sahalak tentara do sian dia boi dapotna hatorangan na sintong. Alana, boi do musu mansarhon gabus laho mangotootoi nasida. Songon dia do molo hita? Sian dia do boi tadapot hatorangan na sintong? Nunga diparade Jahowa i di Bibel. Tarsurat do disi angka na tahaporluhon laho mangalo propaganda ni Sibolis.—2 Tim. 3:16, 17.

Tontu diboto Sibolis do i. Alani i, dipangke ibana ma portibi on laho mambahen hita asa unang manjaha jala mamparsiajari Bibel. Unang ma olo diotootoi ”utiutian [manang, angkal] ni sibolis”! (Eps. 6:11) Ndang sae molo holan mangantusi pigapiga hasintongan sian Bibel. Ingkon marsitutu do hita pabagashon parbinotoanta taringot hasintongan i. (Eps. 3:18) Sahalak pengarang na margoar si Noam Chomsky mandok, ”Ndang adong halak na boi mambahen hasintongan i tu pingkiranmuna. Ingkon hamu sandiri do na mangalului i.” Jadi lului hamu ma hasintongan i tu dirimuna marhite ’ganup ari manangkasi Surat i’.—Ul. 17:11.

Asa unang diotootoi, rimangi ma pangkorhon ni propaganda jala pasiding ma i

Ndang lomo roha ni Sibolis molo bagas taantusi hasintongan i. Boasa? Ala, ”ummura do propaganda masuk” molo ”ndang bagas parbinotoan” ni sasahalak. (Media and Society in the Twentieth Century) Unang pintor haporseai hata na binegemuna. (Poda 14:15) Dilehon Debata do tu hamu ”habisuhon” dohot ”roha”, jadi pangke  ma i laho patoguhon haporseaonmuna.—Poda 2:10-15; Rom 12:1, 2.

TONGTONG MA MARSADA

Tentara na hona propaganda boi do gabe mabiar jala ndang diharingkothon be marporang. Jala boi do on mambahen nasida marbada manang papulikkon diri sian donganna. Sahalak jendral ni Jerman patorangkon, alani propaganda do umbahen talu halak Jerman di Porang Dunia I. Didok ibana, mansai bagas do propaganda i masuk tu pingkiran ni nasida gabe songon na dihipnotis nasida. Saonari, dipangke Sibolis do cara i laho mambahen halak Kristen asa unang marsada. Umpamana, dibahen do parsoalan di angka dongan sahaporseaon. Manang, dibahen ma ganggu roha ni angka dongan asa ditadingkon nasida organisasi ni Jahowa.

Unang ma olo diotootoi! Ihuthon ma Hata ni Debata jala tongtong ma marsada dohot angka dongan sahaporseaon. Dijujui Bibel do hita asa tongtong ”masisesaan dosa” jala hatop ma pasae parsoalanmuna. (Kol. 3:13, 14; Mat. 5:23, 24) Dipasingot do hita asa unang papulikkon diri sian huria. (Poda 18:1) Parade ma dirimuna asa boi mangalo propaganda ni Sibolis. Sungkun ma dirimuna, ’Di na parpudi on, tingki adong dongan na mambahen hansit rohangku, songon dia do alushu? Palashon roha ni Jahowa do manang Sibolis?’—Gal. 5:16-26; Eps. 2:2, 3.

UNANG MA GANGGU HAPORSEAONMU

Tentara na so setia tu komandanna ndang boi denggan marporang. Dipangke musu do propaganda asa unang porsea tentara i tu komandanna. Molo mangulahon na sala komandan i, pangkeon ni musu ma hasalaan i jala didok ma, ”Unang oloi komandanmi, marjea do ho annon bahenonna!” Songon i ma na diulahon Sibolis. Dibahen do asa unang pos rohamu tu halak na dipillit Jahowa laho manguluhon naposoNa.

Aha do na ingkon bahenonta asa unang masa i tu hita? Tongtong ma di bagasan organisasi ni Jahowa. Unduk jala urupi ma angka baoa na dipillit Jahowa laho manguluhon naposoNa nang pe jolma na mardosa nasida. (1 Tes. 5:12, 13) Olo do halak na murtad dohot angka panipu mangalo organisasi. (Tit. 1:10) Nang pe sipata hira na  sintong hata ni nasida, alai ”unang [ganggu] hamu gabe so marroha”. (2 Tes. 2:2) Ihuthon ma poda ni si Paulus tu si Timoteus na paboahon, ”sai mian ma di bagasan angka na ginuruhon” jala ingot ma ”na mangajarhonsa tu ho”. (2 Tim. 3:14, 15) Rimangi ma angka bukti na patuduhon na boi do tahaporseai naposo haposan na dipillit Jahowa, na mangajarhon hasintongan tu hita saleleng hirahira saratus taon on.—Mat. 24:45-47; Heb. 13:7, 17.

UNANG MA MABIAR

Godang do cara ni Sibolis laho pataluhon hita. Sipata dibahen ibana do hita mabiar. Teror, i ma ”sada propaganda naung leleng dipangke”. (Easily Led—A History of Propaganda) Sahalak profesor sian Inggris na margoar si Philip M. Taylor paboahon, halak Assur ma sada na mamangke teror dohot propaganda laho mangarajai musuna. Dipabiarbiar Sibolis do hita marhite jolma, paraloan, dohot hamatean asa unang be manomba Jahowa.—Jes. 8:12; Jer. 42:11; Heb. 2:15.

Unang olo hamu dipabiarbiar Sibolis! Jesus mandok, ”Unang ma habiari hamu angka na mambunu daging jala dungkon ni i so adong be sihahuaonna.” (Luk. 12:4) Pos ma rohanta tu Jahowa, sai sarihononNa do hita, lehononNa do ”hagogoon na sumurung” jala urupanNa do hita asa boi mangalo Sibolis.—2 Kor. 4:7-9; 1 Ptr. 3:14.

Tutu, sipata olo do hita gale manang mabiar. Alai ingot ma hata ni Jahowa na patoguhon si Josua, ’Patogu ma roham, jala unang tahuton, ai Jahowa Debatam do donganmu, manang dompak dia pe ho mangalangka.’ (Jos. 1:9) Tingki holsoan, pintor martangiang ma tu Jahowa. Pos ma rohamu boi do ’dame ni Debata na sumurung sian saluhut roha mangaramoti angka ateate dohot pingkiranmuna’. Dung i, margogo ma hamu mangalo sude propaganda ni Sibolis.—Plp. 4:6, 7, 13.

Diingot hamu do propaganda na dipangke Rabsake, na gabe suruan ni halak Assur laho pabiarbiarhon naposo ni Debata? Lomo do rohana asa naposo ni Debata porsea ndang adong na boi mangalinggomi nasida. Gariada didok ibana, Jahowa do na marsuru halak Assur laho mangalengsehon Jerusalem. Aha do alus ni Jahowa? ”Unang ho mabiar maradophon hata angka naung binegem, angka naung niinsakkon ni angka naposo ni raja sian Assur, palea Ahu.” (2 Raj. 18:22-25; 19:6) Disuru Jahowa ma sada surusuruan pamatehon 185.000 halak Assur di bagasan saborngin!—2 Raj. 19:35.

MARBISUK JALA SAI TANGIHON MA JAHOWA

Hea do hamu manonton, jala diida hamu adong halak na so pamotoanna diotootoi? Nda dohononmu songon on, ’Unang porsea ho! Nga diotootoi ho!’ Rimangi ma molo didok surusuruan songon on tu hamu, ”Unang olo hamu diotootoi Sibolis!”

Jadi, unang ma tangihon propaganda ni Sibolis. (Poda 26:24, 25) Tangihon ma Jahowa jala marpos ni roha ma tu Ibana di sude ulaonmu. (Poda 3:5-7) Holong do rohaNa tu hamu jala didok do, ”Marbisuk ma ho ale anaha, jala sai palas ma rohangku.” (Poda 27:11) Molo diulahon hamu i, boi do taluhononmu Sibolis!