”Saluhut hita manjalo . . . asi ni roha na so marnamontok [ndang ra suda].”JOH. 1:16.

ENDE: 1, 13

1, 2. (a) Patorang ma tudosan sian Jesus taringot sahalak nampuna porlak anggur. (b) Songon dia do tudosan i patorangkon parange haburjuon dohot asi ni roha?

DI MANOGOT ni ari, laho ma sahalak nampuna porlak anggur tu pasar manogihon angka pangula asa karejo tu porlakna. Satolop ma nasida taringot gaji na dilehon tongke i. Alai, ala porlu di ibana godang pangula, laho ma ibana muse tu pasar laho manogihon pangula na asing. Satolop ma nasida muse taringot gaji na dilehon. Dung bot ari, dipapungu ma sude pangula i asa digaji. Dos do gaji ni na karejo sadari manipat dohot na karejo satongkin. Alai, gabe marungutungut ma angka pangula na karejo sadari manipat. Didok tongke i ma, ’Ndang naung satolop hita taringot tu gajimuna? Ai nda lomongku mamangke hepengku hombar tu lomo ni rohangku? Na sogo do rohamuna ala burju ahu?’Mat. 20:1-15.

 2 Tudosan on, mangalehon parsiajaran na ringkot taringot ”asi ni roha”. [1] (Ida catatan.) (Jaha 2 Korint 6:1.) Ra adong na mandok, ingkon gumodang do gaji ni pangula na karejo sadari manipat. Alai, dipatudu tongke i do asi ni roha tu pangula na holan satongkin karejo. Sahalak pakar paboahon taringot lapatan ni hata ”asi ni roha” na disurat di Bibel. Ibana mandok, ”Lapatan ni hata i, i ma silehonlehon na dilehon Debata tu jolma, na sasintongna ndang patut dilehon tu jolma.”

DENGGAN BASA NI JAHOWA

3, 4. Boasa jala songon dia Jahowa patuduhon asi ni roha tu jolma?

3 Dipaboa di Bibel, asi ni roha ni Debata, i ma silehonlehon sian ias ni rohaNa. (Eps. 3:7) Ala jotjot hita mangulahon na sala, ndang patut hita mandapot asi ni roha ni Debata. Raja Salomo mandok, ”Ndang adong nanggo sahalak di tano on, na sai tongtong tigor jala na so hea sala.” (Pjm. 7:20, Bibel siganup ari) Apostel Paulus mandok, ”Tung saluhut do nasida mardosa jala ndang dapot pujion ni Debata nasida” jala ”upa tinuhor ni dosa do hamatean.”Rom 3:23; 6:23a.

4 Ala Jahowa mangkaholongi jolma, dilehon ma ”Anakna na sasada i” mate humongkop hita. On ma asi ni roha ni Debata na umbalga. (Joh. 3:16) Si Paulus mandok, ”[Jesus] martumpalhon hasangapon dohot hamuliaon, ala nunga ditaonhon hamatean i, asa sian asi ni roha ni Debata Ibana mangahap hamatean i humongkop saluhut.” (Heb. 2:9) Tangkas ma, ”basabasa ni Debata do hangoluan salelenglelengna marhitehite Kristus Jesus Tuhanta i”.Rom 6:23b.

5, 6. Aha do hinorhonna molo hita dirajai (a) dosa? (b) asi ni roha?

5 Boasa hita mardosa jala mate? Bibel mandok, ”Hamatean manggomgomi, binahen ni na sada ala ni pangalaosionna i.” Ala pinompar ni si Adam do hita, mardosa jala mate ma hita. (Rom 5:12, 14, 17) Alai, boi do hita mamillit asa unang dirajai dosa. Songon dia carana? Molo tahaporseai pelean tobusan ni Jesus, tadapot ma laba sian asi ni roha ni Jahowa. Bibel paboahon, ”Alai ganda pe dosa i, lam sumurung ma asi ni roha i. Asa songon na manggomgomi jolo dosa i mantat hamatean, songon i do nang asi ni roha i manggomgomi marhitehite hatigoran mangkorhon hangoluan na salelenglelengna marhite sian Jesus Kristus Tuhanta i.”Rom 5:20, 21.

6 Nang pe mardosa hita, unang ma olo hita dirajai dosa. Tingki sala hita, tapangido ma asa disesa Jahowa dosanta. Si Paulus mandok, ”Ndang rajaan ni dosa i be hamu, ai ndang digomgomi patik i hamu, tung asi ni roha i do.” (Rom 6:14) Songon dia do asa tadapot laba sian asi ni roha ni Debata? Si Paulus mandok, ”Nunga  tarida asi ni roha ni Debata . . . diajari do hita, asa tasoadahon roha na so daulat ro di angka hisaphisap tano on, asa taparangehon hatomanon, hatigoran dohot hadaulaton, tagan di hasiangan on.”Tit. 2:11, 12.

ASI NI ROHA DIPATUDU SIAN MARRAGAM CARA

7, 8. Aha do lapatan ni asi ni roha ni Jahowa dipatudu sian marragam cara? (Ida gombar di mula ni parsiajaran.)

7 Apostel Petrus manurat, ”Masipatureturean ma hamu, ganup marguru tu asiasi na jinalona, songon angka juara bagas na burju di ragamragaman ni asiasi ni Debata.” (1 Ptr. 4:10) Aha do lapatan ni asi ni roha ni Jahowa dipatudu sian marragam cara? Lapatanna, nang pe marragam sitaononta, marragam do cara ni Jahowa mangurupi hita. (1 Ptr. 1:6) Dilehon do na tahaporluhon asa tongtong hita martahan.

Nang pe marragam sitaononta, marragam do cara ni Jahowa mangurupi hita jala dilehon do na tahaporluhon asa tongtong martahan

8 Apostel Johannes manurat, ”Sian hamoraonna do saluhut hita manjalo, i ma asi ni roha na so marnamontok.” (Joh. 1:16) Ala dipatudu Jahowa do asi ni roha sian marragam cara, tajalo ma godang pasupasu. Pasupasu aha do i?

9. Songon dia do hita patuduhon hamauliateonta tu Jahowa, jala aha do laba na tadapot sian asi ni rohaNa?

9 Disesa Jahowa do dosanta. Mandok mauliate ma hita tu Jahowa ala disesa dosanta. Ingkon marhamubaon ma hita jala marsitutu asa unang mangulahon dosa. (Jaha 1 Johannes 1:8, 9.) Dipatorang si Paulus do tu halak Kristen na miniahan taringot cara ni Jahowa manesa dosa. Ibana mandok, ”Nunga diroro hita sian gomgoman haholomon i, jala dipaunsat hita tubagasan harajaon ni Anak, haholongan ni rohana. Di bagasan Ibana do adong di hita haluaon i, i ma hasesaan ni angka dosa.” (Kol. 1:13, 14) Las do rohanta mandok mauliate jala mamuji Jahowa alani asi ni rohaNa. Ala disesa Jahowa dosanta, tajalo ma godang pasupasu.

10. Aha do na tahilala alani asi ni roha ni Debata?

10 Boi ma hita mardame jala maraleale tu Debata. Sian mulai tubu, nunga mardosa jala musu ni Debata do hita. Si Paulus mandok, ”Dipadenggan Ibana hita tu Debata hinorhon ni parmate ni Anakna i, uju musuna dope hita.” (Rom 5:10) Alani tobusan, boi ma hita mardame jala maraleale tu Debata. Dipatorang si Paulus do taringot on tu halak  Kristen na miniahan, ”Dung dipintori hita dalan haporseaon, mardame ma hita dohot Debata marhitehite Tuhanta Jesus Kristus. Laos marhitehite Ibana do saut masuk hita tu asi ni roha, hajongjonganta nuaeng dalan haporseaon.” (Rom 5:1, 2) Mandok mauliate do hita ala boi maraleale tu Jahowa!

Hak na sumurung do boi manangihon barita na uli (Ida paragraf 11)

11. Songon dia do angka na miniahan manogunogu godang halak tu hatigoran?

11 Gabe partigor ma hita di adopan ni Debata. Disurat si Daniel, ”angka na pantas marroha”, i ma angka na miniahan, manogunogu ”torop halak tu hatigoran” di tingki parpudi. (Jaha Daniel 12:3.) Songon dia do angka na miniahan mangulahon i? Nasida marbarita na uli jala mangajarhon patik ni Jahowa tu marjuta halak. (Joh. 10:16) Alani asi ni roha ni Jahowa, diurupi ma nasida gabe partigor di adopan ni Debata. Dipatorang si Paulus, ”Gabe dipintori do nasida dalan basabasa binahen ni asi ni rohana hinorhon ni panobusion na di bagasan Kristus Jesus.”Rom 3:23, 24.

Pasupasu alani tangiang (Ida paragraf 12)

12. Aha do pangkorhon ni asi ni roha ni Debata tu tangiangta?

12 Jonok ma hita tu Jahowa marhite tangiang. Alani asi ni roha ni Jahowa, boi ma hita martangiang tu Ibana. Si Paulus mandok, ”habangsa parasiasian” do habangsa ni Jahowa, jala ditogihon do hita marpos ni roha jonok tu Ibana. (Heb. 4:16a) Ganup tingki, boi do hita martangiang tu  Jahowa marhite Jesus. Hak na sumurung do on! Si Paulus mandok, ”Marhitehite Ibana dapot hita hiras ni roha dohot dalan masuk, di bagasan roha na pos, na mangkaporseai Ibana.”Eps. 3:12.

Pangurupion di tingki na pas (Ida paragraf 13)

13. Songon dia do asi ni roha ni Debata mangurupi hita di tingki na pas?

13 Tadapot ma pangurupion di tingki na pas. Dijujui si Paulus do hita martangiang tu Debata ganup tingki, ”asa dapot asi ni roha hita bahen pangurupion, di tingki halehetanna”. (Heb. 4:16b) Tingki marsitaonon, pangido ma pangurupion sian Jahowa. Dialusi do tangiangta ala holong rohaNa tu hita. Jotjot do Ibana mangurupi hita marhite dongan sahaporseaonta. Ala dialusi Jahowa tangiangta, ”pos rohanta mandok: Tuhan i do pangurupi di ahu, ndang mabiar ahu; aha ma bahenon ni jolma tu ahu”?Heb. 13:6.

14. Songon dia do asi ni roha ni Jahowa mangapuli rohanta?

14 Tadapot ma pangapulion. Dilehon Jahowa do pangapulion tu hita tingki marsitaonon. (Ps. 51:19) Tingki marsitaonon halak Kristen di Tessalonik, si Paulus manurat, ”Apala Tuhanta Jesus Kristus dohot Debata Amanta, na mangkaholongi hita jala mangalehon apulapul, na mian tongtong, dohot pangkirimon na denggan sian asi ni roha i: Ibana ma mangapuli jala pahothon rohamuna di bagasan nasa ulaon.” (2 Tes. 2:16, 17) Las situtu do rohanta, Jahowa parasi roha mangkaholongi jala mamparrohahon hita!

15. Alani asi ni roha ni Debata, aha do pangkirimonta?

15 Marpangkirimon tu hangoluan salelengna. Molo ndang alani Jahowa, ndang adong pangkirimonta ala mardosa dope hita. (Jaha Psalmen 49:8, 9.) Dilehon Jahowa do pangkirimon. Aha ma i? Jesus mandok, ”Ai on do dipangido roha ni Damang: Naeng ma dapotan hangoluan salelenglelengna ganup na marnida Anak i jala porsea di Ibana.” (Joh. 6:40) Alani asi ni roha ni Jahowa, marpangkirimon ma hita tu hangoluan salelengna. Si Paulus mandok, ”Ai nunga tarida asi ni roha ni Debata, sibahen haluaon ni saluhut jolma.”Tit. 2:11.

UNANG MA SALA MAMANGKE ASI NI ROHA NI DEBATA LAHO MANGULAHON DOSA

16. Songon dia do halak Kristen di abad na parjolo sala mamangke asi ni roha ni Debata?

16 Tajalo ma godang pasupasu alani asi ni roha ni Jahowa. Alai, unang ma hita sala mamangke holong ni Debata laho mangulahon dosa. Di abad na parjolo, adong do halak Kristen na ”sala mamangke di asi ni roha ni Debata laho pasombuhon hisaphisapnasida”. (Jud. 4, Bibel siganup ari) Dirimpu nasida, salpuhonon ni Jahowa ma hasalaan ni nasida nang pe sai mangulahon dosa nasida. Ditogihon do angka dongan sahaporseaon asa mangihuthon nasida. Di  tingkinta saonari, molo adong sasahalak na mangulahon sisongon i, ”na mangaleai Tondi parasian i” do nasida.Heb. 10:29, Bibel siganup ari.

17. Aha do sipaingot na dilehon si Petrus?

17 Saonari, Sibolis mangotootoi halak Kristen asa marpingkir ndang sala mangulahon dosa, alana sai disesa Debata do i. Tutu, disesa Jahowa do dosa ni sasahalak, alai dipangido Ibana do asa marhamubaon hita jala marsitutu pasidingkon dosa. Si Petrus manurat, ”Hamu angka haholongan, ala naung diboto hamu i hian, jaga ma, unang tarela hamu, dibahen haliluon ni angka na so maruhum i, gabe madabu hamu maon sian haojahanmuna. Alai lam ganda ma di hamu asi ni roha dohot panandaon di Tuhanta Jesus Kristus, Sipalua i!”2 Ptr. 3:17, 18.

ASI NI ROHA NI DEBATA MAMBAHEN HITA INGKON MARTANGGUNG JAWAB

18. Alani asi ni roha ni Jahowa, aha do tanggung jawabta?

18 Mandok mauliate do hita alani asi ni roha ni Jahowa. Tapasangap ma Jahowa jala taurupi ma na asing. Songon utang do i di hita. Songon dia do hita mangulahon i? Si Paulus mandok, ”Ganup manjalo silehonlehon marguru tu ragam ni asi ni roha na tinurpukkonna tu hita . . . Ia ulaon marhobas, ba ulaon marhobas ma; ia haguruon, i ma! Ia pangapoion, i ma; . . . ia na marbasabasa, sian las ni rohana ma!” (Rom 12:6-8) Alani asi ni roha ni Jahowa, martanggung jawab do hita asa marsitutu di ulaon marbarita, mangajarhon Bibel tu na asing, patoguhon dongan sahaporseaon, jala manalpuhon hasalaan ni sasahalak na mambahen hansit rohanta.

19. Di artikel na mangihut, tanggung jawab aha do na ingkon taulahon?

19 Songon angka halak na dipasupasu Jahowa marhite asi ni rohaNa, marsitutu ma hita ”mangkatindangkon barita na uli taringot tu asi ni roha ni Debata”. (Ul. 20:24) Taulas ma taringot on di artikel na mangihut.

^ [1] (paragraf 2) Molo tadapot hata ”asi ni roha ni Debata” na dienet sian Bibel jala taulas di artikel on dohot artikel na mangihut, on lapatanna basabasa ni Debata na manongtong.