Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Dipasada di Borngin Parningotan

Dipasada di Borngin Parningotan

”Ida ma, dengganna i dohot sonangnai, molo tung pungu sahundulan angka na marhahamaranggi!”​—PS. 133:1.

ENDE : 18, 14

1, 2. Ulaon aha do na mambahen mansai godang halak dipasada di taon on, jala boasa? (Ida gombar di mula ni parsiajaran.)

DI tanggal 31 Maret 2018 on, dungkon bot mataniari, marjuta halak di liat portibi on laho marpungu tu ulaon na dibahen sahali sataon. Sude Sitindangi Ni Jahowa rap marpungu dohot na asing laho mangarimangi tobusan ni Jesus. Ganup taon, dipasada do angka halak di Borngin Parningotan hamamate ni Jesus. Jala dison ma dipapungu mansai godang halak di portibi on.

2 Tontu, las do roha ni Jahowa dohot Jesus mangida marjuta halak na ro tu ulaon on. Digombarhon do di Bibel, adong ”mansai torop, na so dapot bilangan ni jolma, sian nasa bangso, marga dohot houm dohot hata,” jala mandok, ”Tua ma di Debatanta, na mangkunduli habangsa i, dohot di Birubiru i!” (Pgk. 7:9, 10) Sai las do rohanta di Borngin Parningotan, ala ganup taon mansai godang halak patuduhon pangargaion tu na diulahon Jahowa dohot Jesus!

3. Sungkunsungkun aha do na laho taulas di parsiajaran on?

 3 Adong opat sungkunsungkun na laho taulas di parsiajaran on. I ma: (1) Songon dia do ahu paradehon diri asa dapothu gumodangan laba di Borngin Parningotan? (2) Songon dia Borngin Parningotan boi mangurupi naposo ni Debata asa marsada? (3) Songon dia hita sandiri boi lam marsada dohot angka dongan? (4) Adong do tingkina ndang be taulahon Borngin Parningotan on? Molo songon i, andigan do i?

SONGON DIA HITA PARADEHON DIRI TU BORNGIN PARNINGOTAN JALA DAPOTAN LABA SIAN I?

4. Boasa ringkot Borngin Parningotan on tu hita?

Di parohahon Jahowa dohot Jesus do angka ise na marsitutu tu ulaon i

4 Boasa ringkot Borngin Parningotan on tu hita? Alana, on ma sada caranta laho manomba Jahowa. Pos do rohanta di parohahon Jahowa dohot Jesus do angka ise na marsitutu tu ulaon i. Lomo do roha ni Jahowa dohot Jesus mangida hita ro tu Borngin Parningotan i, nang pe sipata ndang mura asa boi ro tu ulaon i. Molo ro hita tu ulaon na ringkot on, pos ma roha ni Jahowa laho manurathon goarta di ”buku parningotan” i, jala digoari do muse buku on ”buku hangoluan”. Disurat do disi angka goar ni halak na dihalomohon Jahowa asa boi mangolu salelenglelengna.​—Mal. 3:16; Pgk. 20:15.

5. Andorang so Borngin Parningotan, songon dia do hita manulingkiti haporseaonta sandiri?

5 Pigapiga minggu andorang so Borngin Parningotan, talehon do gumodang tingkinta laho martangiang dohot mangarimangi paralealeonta tu Jahowa. (Jaha 2 Korint 13:5.) Dipaboa si Paulus do tu halak Kristen, ”Unjuni hamu ma dirimuna, manang na di bagasan haporseaon hamu.” Songon dia do hita mangulahon i? Tasungkun ma dirinta: ’Porsea do ahu holan on do organisasi na dipillit Jahowa laho mangulahon lomo ni rohaNa? Huulahon do nasa gogongku laho marbarita na uli? Sian parniulaonku, tarida do na porsea ahu nunga mangolu di tingki na parpudi hita saonari? Tongtong do togu haporseaonku tu Jahowa dohot Jesus songon tingki parjolo sahali ahu manomba Jahowa?’ (Mat. 24:14; 2 Tim. 3:1; Heb. 3:14) Molo tarimangi sungkunsungkun on, gabe diurupi ma hita laho ’manulingkiti’ dirinta sandiri.

6. (a) Songon dia do carana asa boi dapotan ngolu salelenglelengna? (b) Songon dia do sahalak sintua paradehon dirina ganup taon tu Borngin Parningotan, jala songon dia hita mangulahon na sarupa?

6 Adong sada cara laho paradehon dirinta tu Borngin Parningotan. Tajaha jala tarimangi ma angka parsiajaran taringot ulaon na mansai ringkot on. (Jaha Johannes 3:16; 17:3.) Ingkon tatanda jala porsea do hita tu Jahowa  dohot Jesus, asa boi dapotan ngolu salelenglelengna. Asa boi rade hita tu ulaon i, tapillit ma parsiajaran na boi mangurupi hita asa lam jonok tu nasida. On ma na diulahon sahalak donganta sintua. Saleleng martaontaon, disimpan ibana do angka parsiajaran Menara Pengawal taringot Borngin Parningotan. Asing ni i, disimpan do muse parsiajaran taringot holong na dipatudu Jahowa dohot Jesus tu hita. Pigapiga minggu andorang so Borngin Parningotan, dijaha ibana ma angka parsiajaran i, jala dirimangi ma boasa mansai ringkot ulaon i. Sipata, ditambai ibana do muse parsiajaran na laho disimpan. Asing ni i, dijaha jala dirimangi ibana do panjahaion Bibel tu Parningotan. Didok ibana, sai dapotna do parsiajaran na imbaru ganup taon. Jala na umringkot, gabe lam balga do holongna tu Jahowa dohot tu Jesus. Molo taulahon i, tontu lam balga do holongta tu Jahowa dohot tu Jesus. Mandok mauliate do hita tu naung diulahon nasida, jala dapotta ma gumodang laba sian Borngin Parningotan i.

BORNGIN PARNINGOTAN MANGURUPI HITA ASA MARSADA

7. (a) Aha do na ditangiangkon Jesus di Borngin Parningotan ni Tuan? (b) Aha do na patuduhon dialusi Jahowa do tangiang ni Jesus i?

7 Di Borngin Parningotan ni Tuan, martangiang ma Jesus. Tangiangna, i ma taringot ibana dohot Amana na marsada. Dung i, ditangiangkon ibana do angka siseanna asa marsada songon ibana dohot Amana. (Jaha Johannes 17:20, 21.) Dialusi Jahowa do tangiangna i. Saonari, di Borngin Parningotan on, marsada do Sitindangi Ni Jahowa. Marjuta halak sian marragam bangso dohot houm rap marpungu, jala porsea do nasida na disuru Jahowa do Jesus. Di pigapiga inganan, ndang somal molo angka halak marpungu raphon halak sian suku na asing. Jala godang do na so mangkalomohon i. Alai ndang songon i Jahowa dohot Jesus. Mansai uli do di nasida molo boi hita sude marsada.

8. Aha do na dipaboa Jahowa tu si Hesekiel?

8 Ndang pola longang rohanta na marsada hita gabe naposo ni Debata. Nunga disurirangkon Jahowa taringot on tu si Hesekiel. Dipaboa Ibana ma tu si Hesekiel asa dibuat dua hau manang tungkot, sada ”di Juda” jala sada ”di si Josep”. Dung i dipasada ma i asa tung gabe sada nasida. (Jaha Hesekiel 37:15-17.) Di Joujou Paboahon Juli 2016, di bagian ”Sungkunsungkun Sian Na Manjaha” patorangkon: ”Marhite si Hesekiel, disurirangkon Jahowa do na laho pasadaonna sude halak Israel jala mulak tu Tano Parjanjian. Digohi do muse surirang on di tingki parpudi, pasadaon ni Debata ma sude naposoNa gabe sada punguan.”

9. Songon dia do hita mangida surirang ni si Hesekiel digohi ganup taon?

9 Di mula ni taon 1919, diatur jala dipasada Jahowa do angka na miniahan. Songon tungkot ”ni Juda” do nasida. Angka halak na marpangkirimon mangolu salelenglelengna di tano on, songon tungkot ”ni si Josep”. Marsada do nasida dohot angka na miniahan.  Marjanji do Jahowa laho bahenonNa ”nasida gabe sada hau” di tanganNa. (Hes. 37:19) Jala dipasada Ibana angka na miniahan dohot ’birubiru na asing’ gabe ”sada punguan”. (Joh. 10:16; Sak. 8:23) Saonari, nunga dipasada dua punguan on jala rap manomba Jahowa. Jesus Kristus ma na gabe Raja nasida. Songon surirang ni si Hesekiel, dijou Debata do ibana ”naposongku si Daud”. (Hes. 37:24, 25) Ganup taon, tingki taulahon Borngin Parningotan, boi ma taida marsada do dua punguan i songon na disurirangkon si Hesekiel. Alai, songon dia hita sandiri boi lam marsada dohot naposo ni Debata?

SONGON DIA HITA SANDIRI BOI LAM MARSADA DOHOT ANGKA DONGAN?

10. Songon dia do hita asa lam marsada dohot angka dongan?

10 Songon dia do carana asa boi lam marsada hita dohot angka dongan? Na parjolo, ingkon marsitutu do hita asa marserep ni roha. Didok Jesus do tu angka siseanna asa marserep ni roha. (Mat. 23:12) Saonari, godang do halak na holan mangkaringkothon dirina sandiri. Alai molo serep do rohanta, taargai ma angka dongan na manguluhon hita di huria. Jala unduk ma hita tu tudutudu ni nasida. Molo taulahon i, gabe marsada ma huria. Jala na  umringkot, molo serep rohanta, gabe las ma roha ni Debata. Alana, ”dialo Debata do angka na ginjang roha, alai dilehon do asiasi tu angka na serep marroha.”​—1 Ptr. 5:5.

11. Boasa gabe lam marsada hita molo tarimangi taringot roti na so marragi dohot anggur i?

11 Na paduahon, rimangi ma aha do lapatan na sasintongna taringot roti na so marragi dohot anggur i. Taulahon ma i andorang so Borngin Parningotan dohot di bornginna i. (1 Kor. 11:23-25) Roti na so marragi manggombarhon pamatang ni Jesus na so mardosa. Jala anggur i manggombarhon mudarna. Alai, adong do na porlu muse taboto. Ingkon taingot ma, sian tobusan i, tarida ma holong ni Jahowa na mangalehon anakNa. Jala tarida ma holong ni Jesus na mangalehon ngoluna tu hita. Molo tarimangi i, gabe taronjar ma rohanta asa mangkaholongi nasida. Jala holongta tu Jahowa boi mambahen hita lam solhot jala marsada.

Molo tasalpuhon hasalaan ni angka donganta, gabe lam marsada ma hita (Ida paragraf 12, 13)

12. Aha do na dipangido Jahowa tu hita asa taulahon?

12 Na patoluhon, tasalpuhon ma hasalaan ni angka dongan. On patuduhon hamauliateonta tu Jahowa, ala nunga dilehon anakNa laho manalpuhon dosanta. Asa taantusi ringkot ni manalpuhon hasalaan, dicaritahon Jesus do taringot sada raja dohot hatobanna. Jaha ma Mateus 18:23-34. Jala tasungkun ma dirinta: ’Olo do ahu mangulahon na diajarhon ni Jesus? Sabar do ahu mangadopi angka dongan? Olo do ahu manalpuhon hasalaan ni dongan molo dibahen hansit rohangku? Adong do pigapiga hasalaan na serius, jala maol do di angka halak laho manalpuhon i. Alai marhite carita i, diajarhon Jesus do tu hita asa mangulahon na dipangido Jahowa. (Jaha Mateus 18:35.) Tangkas do dipaboa Jesus molo ndang olo hita manalpuhon hasalaan ni angka dongan naung marhamubaon, Jahowa pe ndang olo manalpuhon hasalaanta. Ingkon tarimangi do on. Alani i, tongtong ma tajaga parsadaanta, tasalpuhon ma hasalaan ni angka dongan songon na niajarhon ni Jesus tu hita.

13. Songon dia hita gabe lam marsada molo mardame dohot angka dongan?

13 Molo tasalpuhon hasalaan ni na asing, gabe tongtong ma hita mardame dohot angka dongan. Songon na didok Apostel Paulus, ingkon marsitutu do asa sude hita tongtong marsada jala mardame. (Eps. 4:3) Alani i, saleleng Borngin Parningotan, rimangi ma ingkon songon dia do pambahenanta tu na asing. Tasungkun ma dirinta: ’Diboto halak do molo ahu ndang mura muruk nang pe dibahen hansit rohangku? Boi do diida halak na lomo rohangku mardame jala marsada?’ Ringkot do sungkunsungkun on asa tarimangi.

14. Songon dia hita patuduhon na sabar do hita di bagasan roha na holong?

14 Na paopathon, tatiru ma holong ni Jahowa. (1 Joh. 4:8) Jala unang ma tadok, ”Mardame do ahu dohot angka dongan, alai ndang pola ingkon solhot ahu tu nasida.” Molo tadok songon i, ndang na taihuthon poda ni si Paulus, i ma sabar di bagasan roha na holong.  (Eps. 4:2) Ndang holan sabar na didok si Paulus dison, alai didok do ingkon ’marsihaholongan’. Marragam do parange ni angka dongan di huria, alai sude do nasida dijangkon Jahowa. (Joh. 6:44) Tontu, diida Jahowa do angka na denggan sian nasida umbahen na dihaholongi Ibana nasida. Molo diargai angka dongan do holong ni Debata, dihargai nasida do holong na tapatuduhon. Ingkon marsitutu ma hita mangkaholongi nasida, dos songon Jahowa mangkaholongi nasida.​—1 Joh. 4:20, 21.

ANDIGAN DO NDANG TAULAHON BE BORNGIN PARNINGOTAN?

15. Sian dia taboto adong do tingkina ndang be taulahon Borngin Parningotan?

15 Adong do tingkina ndang be taulahon Borngin Parningotan on. Sian dia taboto? Dipaboa si Paulus do tu halak Kristen na miniahan, molo nasida mangulahon borngin parningotan ni Jesus ganup taon, i patuduhon nasida tongtong mamaritahon hamamatena i ”sahat tu na ro ibana muse”. (1 Kor. 11:26, Bibel Siganup ari) Dipaboa Jesus do muse taringot ”harorona” tingki paboahon surirang di ari parpudi. Jala didok ibana do taringot haporsuhon bolon na naeng ro, ”Di tingki i ma binsar di langit i tanda ni Anak ni jolma i, gabe mangangguhi ma sude bangso na di tano on, ai idaonnasida ma Anak ni jolma i ro di atas ombun ni langit, mantat hagogoon dohot hasangapon godang. Jadi suruonna ma angka surusuruan na marsarune mansai gogo, jadi sian desa na ualu i ma papunguonnasida angka na pinillitna, sian suhi ni langit na sada ro di na sada nari i.” (Mat. 24:29-31) Dipapungu Jesus ma ”angka na pinillitna” i, i ma tingki diboan ibana sude tu surgo angka na miniahan na adong dope di tano on. On masa dung dipungka haporsuhon bolon, i ma andorang so ro dope Armagedon. Jesus dohot 144.000 laho manaluhon angka raja ni portibi on di Armagedon. (Pgk. 17:12-14) On ma Borngin Parningotan na parpudi, andorang so ”ro” Jesus papunguhon na miniahan.

16. Boasa ingkon ro hita tu Borngin Parningotan ganup taon?

16 Alani i, ro ma hita tu Borngin Parningotan di tanggal 31 Maret 2018. Pangido ma tu Jahowa asa tongtong diurupi hamu marsada dohot angka dongan. (Jaha Psalmen 133:1.) Adong do tingkina ndang be taulahon Borngin Parningotan on. Jadi saonari, tapatudu ma na marsada do hita ganup taon di Borngin Parningotan i.